Read Ntcham Apocalypse 1 Bible Online

Apocalypse 1 - Ntcham bible

Apocalypse 1

¹Yeesu Kriisitoo nín lēē tibɔti tin ki dàkā Yoowaneesee sèé. Unimbɔti di bí yii ú lēē tin bí ki làá ŋá kɔŋkɔnneeyee kí dàkà u-tɔntɔnliibi, ní Kriisitoo túnní u-tuuŋŋu dɔ́miń ki tùkū u-tɔntɔnliu Yoowaneesi tibɔti tin u lēē ki dàkā-uee kɔkɔ taapu.

²Yoowaneesi di ŋmàn̄ Unimbɔti nín sòon̄ puee nì ibaamɔn in Yeesu Kriisitoo lēē ki dàkā-uee, nì tin kɔkɔ u kée.

³Unimbɔti ń yàntī án nīn mɔ̄ǹ un di kàaǹ tibɔti tin Unimbɔti tīiń an kā kugbɔŋu nee poonee, kí nīn mɔ̄ǹ un di pílifí-tì ki ŋáań tì nín lī puee. Kun puee an nín lī yii tin kɔkɔ làá dāá jītée, ŋyunti tóobiń án ŋá míǹ.

⁴An sá man Yoowaneesi di ŋmàn̄ kugbɔŋu nee ki tīī Kriisitoo nikitiŋ aluli ŋin bí Asii tiŋkinee. Unimbɔti un bí, ki nìn pée bí dooooyee ki làá dāá dāan̄ee[1] ń ŋá-ni tiŋan kí tīī-ni ŋgbansɔŋfi nì ŋfam miluli min bí u-beejal nimbiinee.

⁵Yeesu Kriisitoo un sòoǹ ibaamɔn, ki sá Ujipɔŋkpil, ki sá upeepeekaa un Unimbɔti fīkitì ditaŋkpiilinee, ki sá duulinya bɔtiibi kpiliuee ń tīī-ni tíǹ kɔkɔ. Úǹ di néeń-ti ní ki nyántì u-fatikuu ki kpíì ki fīī-ti ti-kpitii poon.

⁶Úǹ di kóoǹ-ti ki kpáfì u-Beelin ní ki dū-ti ki ŋá u-Baa Unimbɔti saraaŋaliibi. Úǹ Yeesu Kriisitoo di yì tinyool nì mpɔn kí nīn pée cáa cá jaanjaan! Ameeni.

⁷Kpèèmaan, u làá dāá dāan̄ atagban māntì ki tú-u. Báà ŋma làá dāá ká-u, ki kpáaǹ bin nìn sāā ki cíl̀ u-takakalee. Míǹ ní duulinya timbuŋŋi kɔkɔ làá dāá sɔ̄ kí yāliŋkì u-dāantam gbanti pu. Tiŋman, án ŋá míǹ!

⁸Ti-Dindaan Unimbɔti Mpɔŋkɔdaan, un bí, ki nìn pée bí dooooyee ki làá dāá dāan̄ee bí yii: «Man di sá Alfa nì Oomeega, upeepeekaa nì ujoolkaa.»

⁹An sá man Yoowaneesi ni-nabiki, ni nì un kpáfì ki jīǹ Yeesu pu falaa nì kimɔtii u-Beel puee. M nìn bí Patimoosi tiŋki kin dimɔɔl māntì ki túee ni ní. Kun pu bi nìn cáá-mi ki cūnnì niinee di sá m sòon̄ Unimbɔti bɔti ki lēekì Yeesu pu seera.

¹⁰An nìn sá Kɔɔsil dal, ní Unimbɔti Fam dɔ́miń m-ni. Niinee ní m gbìl̄ m-boon nneen ŋubɔ sòoǹ ki pɔ̄ɔ̄ kpaŋkpam kii dikantándee,

¹¹yii: «Á ŋmà tin a wāĺ nee kí ŋá kugbɔŋun kí tīī Kriisitoo nikitiŋ aluli ŋin yiŋŋi m làá yíiń nee: Eefeesi nikitil nì Simiirni nikitil nì Peergaam nikitil nì Tiyatiir nikitil nì Saardi nikitil nì Fiiladeelfii nikitil nì Lawoodiisee nikitil.»

¹²M fātì kí kpèè yii ŋma di sòoǹ m-boonee, m kpēēyee ki ká fitilab tɔ́kɔŋkaati tiluli yú ki sá sindaariya.

¹³Ní m ká ubɔ náań nì unil ki yú fitilab tɔ́kɔŋkaati tin sá sindaariyee kansikin, ki pēē dibɔkutifɔkɔl diba ní ki cúú sindaariya dambalau u-bindi.

¹⁴Ní u-yikpiti pīiǹ káŋkaŋ kii gulfee, ní u-nimbiliŋ ŋmóò làka laka kii ŋŋmee.

¹⁵Ní u-taaŋi jìl̀ pàlpal kii tasa ní bi fíntèe, ní u-neen bí kii mbuŋkpaan nín wòoǹ puee.

¹⁶Ní u ŋúb́ u-ŋaŋgiilin iŋmalbijaa iluli, ní kitàataajiki kin jītí ajan liitilee nyēē u-nyɔkɔn, ní u-nimbiin jìl̀ kii ŋwìiń yaa bíitì ki píĺ ŋu nín jìliŋkī puee.

¹⁷M nín ká mimmee ní m lítì ki kíǹ ki dɔ̄ u-taaŋi taapu kii m kpíìyee, ní u dū u-ŋaŋgiil ki páaǹ m-pu ní ki bí-mi yii: «Taa fàŋkì! Man di sá upeepeekaa ní ki sá ujoolkaa[2].

¹⁸Man di sá un bí dimaŋfalinee. M nìn kpíì, ama kɔŋkɔnnee m kíǹ ki bí dimaŋfalin kí nīn cá jaanjaan. Man di ŋúb́ ŋkúm nì ditaŋkpiil pɔŋŋu.

¹⁹An puee á ŋmà tin a ká nee, nì tin bí ki jītí nee nì tin bí boon ki dòońee.

²⁰Iŋmalbijaa iluli in a ká m ŋúb́ m-ŋaŋgiilinee, nì fitilab tɔ́kɔŋkaati tiluli tin sá sindaariya a ká kaa nyí an nín sá puee, taapu sèé: iŋmalbijaa ilulee di sá Kriisitoo nikitiŋ alulee tuuŋyi, ní fitilab tɔ́kɔŋkaati tilulee sá Kriisitoo nikitiŋ alulee.»