Read Ntcham Apocalypse 10 Bible Online

Apocalypse 10 - Ntcham bible

Apocalypse 10

¹Boonee ní m ká ntuun ŋubɔ ŋun cáá mpɔnee nyánní yilpu ki kpákatiń, ní ditagbandi bīī ŋu-pu ní dikuntinyindi māntì ki tú ŋu-yil, ní ŋu-nimbiin jìliŋkī kii ŋwìińee, ní ŋu-taaŋi bí kii ŋŋmipiinee,

²ní ŋu ŋúb́ kigbambiki kiba, kì kpátì ki kā ŋu-ŋaan. U nìn dū u-ŋaŋgiitaal ki tɔ́kɔ́ǹ tiŋku pu, ní ki dū u-ŋaŋgantaal ki tɔ́kɔ́ǹ kitiŋ pu.

³Ní ŋu téeń mpɔn a lì kii gbikinti di súń ní. Niinee ní itaatantati iluli bíi tátí.

⁴Ŋyunti ŋun m bàà là kí ŋmà itaatantatee nín sòon̄ puee ní m gbìl̄ nneen ŋubɔ sòon̄ní yilpu yii: «Á dū itaatantati ilulee bɔti kí dūú kpāafì, á taa dūú ŋmà.»

⁵Ní ntuun ŋun m bàà ká ŋu-taal diba tɔ́kɔ́ tiŋku pu, din kíǹee kitiŋ puee, yōoǹ ŋu-ŋaŋgiil ki túĺ kutaa,

⁶ní ki pūtì un bí kí nīn cá jaanjaan ki náań yilpu nì tin kɔkɔ bí yilpuee, ki náań kitiŋ nì tin kɔkɔ bí kitiŋ puee, ki náań tiŋku nì tin kɔkɔ bí tiŋkunee yii: «Unimbɔti kaa làá ti yóoń ŋyunti ŋubɔ!

⁷Ŋyunti ŋun ní ntuun nluluútee làá dāá búń dikantándee, ŋyunti gbantee ní tin nìn bí dibalin Unimbɔti yāntì u-tɔntɔnliibi bin sá u-bɔnaatiliibee sòon̄ee làá ŋá[43].»

⁸Ní nneen ŋun bàà nyánní yilpu ki sòon̄ nì mee gíti bí-mi yii: «Cù ntuun ŋun yú ŋu-taal diba tɔ́kɔ́ tiŋku pu, din kíǹee tɔ́kɔ́ kitiŋ puee cee kí fōō kigbambiki kin kpátì ki kā ŋu-ŋaanee.»

⁹Ní m cūtì ntuunee cee ki mēē-ŋu ŋú dū kigbambikee kí tīī-mi. Ní ŋu bí-mi yii: «Fōō kí dūú ŋmɔ́, kì làá nīn mɔ̄ a-nyɔkɔn kii tisiilee ní, ama ní kí tin nín̄ tū a-poon[44].»

¹⁰Ní m fōō kigbambikee ntuun cee ki dūu ŋmɔ́. M nín bíi ŋmóòyee, an mɔ̄ m-nyɔkɔn kii tisiilee ní, ama m nín dūu náĺee ní an túŋkì m-poon.

¹¹Ní ŋu bí-mi yii: «An sá á gíti sòoǹ tin bí ki dòońee kí tùkù binib tikpil, nì atimbun nì isoon kɔkɔ nib nì bibɔtiibi ní.»