Read Ntcham Apocalypse 11 Bible Online

Apocalypse 11 - Ntcham bible

Apocalypse 11

¹Ní bi dū ŋkpaŋkpaan ŋubɔ ki tīī-mi, ŋu náań nì ndɔ ŋun bidimaliibi cáa ŋmàntī ki māā adiin an tèen̄ee, ní ki bí-mi yii: «Yīkìí ŋmàntī kunimbɔtidii nì nsaraafan, kí kàaǹ bin kɔkɔ bí ku-poon ki jáaḿ Unimbɔtee[45].»

²Ní bi gíti bí-mi yii: «Yàntī, taa ŋmàntī kunimbɔtidii cindi din bí mmɔŋki púee, kun puee bi dū niin ki tīī atimbun ŋin kaa nyí Unimbɔtee ní. Bíǹ di làá tāā circir tiŋki pùb kí tin sāā abin ata nì dijandi[46].

³M-seeradambi bin m làá dāá tɔ̄ńee dāa pēē kutukub ní ki sòoǹ m-bɔti kí tin sāā abin ata nì dijandi.»

⁴M-seeraleeliibi gbantee di sá ɔliifi sufii ili nì fitilab bili bin yú ti-Dindaan un yì kitiŋee nimbiinee[47].

⁵Ubɔ yaa là kí bīil̀-bee, ŋŋmi ŋubɔ làá nyānní bi-nyɔmmun ní kí wà bi-nannanliibi. Un nyàab̀ kí bīil̀-bee nín làá dāá kpú miŋyee dee.

⁶Bi cáá mpɔn kí pìin̄ kutagbɔŋu iwiin in bi làá dūú sòoǹ Unimbɔti bɔtee utaa ń taa jōō kitiŋ pu, ki cáá mpɔn kí yàntī nnyim ń kpántí fatiku, ki tí cáá mpɔn kí yàntī animbinaaman nín bí tɔbin puee ń jēetí kitiŋ pu ŋyunti ŋun kamaa bi yaa lèe[48].

⁷Bi yaa láa sòon̄ Unimbɔti bɔti ki dóòyee, upeel un bí mbookpaannee làá dāá nyānní kí jáǹ-bi ní kí pɔ̄ɔkiǹ-bi ní kí kpɔ̀-bi[49].

⁸U yaa kūū-bee, anikpilee làá gbíntí ki dɔ̄ kitiŋkpaaŋŋi gbanti daŋŋi pu. Kitiŋkpaaŋŋee ní bi dū ki nántiǹ Soodoom nì Eejipiti. Kitiŋ gbanti kibaantii poon ní bi kpáá bi-Dindaan ndɔpuntikaa pu[50].

⁹Anibul kɔkɔ nì atimbun kɔkɔ nì isoon kɔkɔ nib làá dāá dāan̄ kí kpèè anikpil gbanti kí tin sāā iwiin ita nì dijandi. Baa làá dāá pɔ̄ nsan bí síb́-bi.

¹⁰Bi-kúm gbanti puee, an dāa sá duulinya yab kɔkɔ jiŋaal ní, ní bi fàal̀ ki pūǹ tɔb tiwan. Kun pu an dāa mɔ̄ǹ-bi mimmee di sá Unimbɔti bɔnaatiliibi bili gbantee nìn kɔ́ǹ-bi dinimbinaamandin.

¹¹Ama iwiin ita nì dijandee boonee, Unimbɔti yāntì kufoou kubɔ dɔ́miń ki kɔ́ bi-ni, ní bi fīkitì[51], ní tifaandi cúú bin yú ki kpèé-bee.

¹²Bi yáatìi yúl̀ee ní ki gbìl̄ nneen ŋubɔ sòon̄ní yilpu mpɔn yii: «Jɔ̄mìḿmaan doo!» Bi-nannanliibi yú ki kpèé-bi míǹ ní bi yíkìi nín jɔ́ḿ yilpu ki tin kɔ́ atagbanni[52].

¹³Dicilpu niinee, kitiŋ cīŋkì ŋkpitim pu. Bi yaa yākatì kitiŋ gbanti diiŋŋi saalaa puee, diba pu lēē ki lítì ní binib kutukub biluli kpíì. Ní tifaandi kɔ́ bin kíǹ kaa kpíìyee, ní bi bí ki nyɔ́ŋkí Unimbɔti un yì yilpuee.

¹⁴Mbusuliliiti jítì, utataati di làá bàń kɔŋkɔnnee.

¹⁵Ntuun nluluútee búń ŋu-kantándee, ní ineen kupaau sòon̄ní yilpu mpɔn yii: «Duulinya beel kpántì ti-Dindaan nì u-Meesiyau Beel ní kɔŋkɔnnee. Úǹ di làá nīn pée kā di-pu kí nīn cá jaanjaan[53].»

¹⁶Ní bikpilib mmuŋku nì binaa bin kā bi-beejaliŋ pu Unimbɔti ceeyee tātìi dōoǹ dicincibil u-nimbiin ki bí ki nyɔ́ŋkí-u

¹⁷ki lì yii: «Ti-Dindaan Unimbɔti Mpɔŋkɔdaan, sii un nìn bí ki gbíntì ki bée, ti jáam̀-si a nín dàkā a-pɔŋkpaaŋŋu ki jíń dibeelee pu.

¹⁸Atimbun nìn gíí a-pu diŋuul, ama ŋyunti bāań á dàkà-ŋi a-ŋuul nín sá puee, kí sòoǹ bitaŋkpiibi bɔti. Ŋyunti bāań dee á pà a-tɔntɔnliibi bin sá a-bɔnaatiliibee paati, nì bin kɔkɔ sá a-yab ki fàŋkí-see, bikpaambi nì ŋwaamu. Ŋyunti bāań dee á kúntí bin bí ki nàantí duulinyee[54].»

¹⁹Ní bi cúú yilpu Nimbɔtidiiku ki pīitì ní dipoondi dakaau nyáń ki yú kunimbɔtidiin. Niinee ní an bíi ŋmóò ki tátí kii utaayee, ní m gbìl̄ dibintiŋkpaandi pu, ní kitiŋ cīŋkì ŋkpitim pu, ní ataanyiŋkumbil bíi lítí.