Read Ntcham Apocalypse 12 Bible Online

Apocalypse 12 - Ntcham bible

Apocalypse 12

¹Boonee ní maamaacikpaŋkpaan ubɔ nyáń ki páaǹ kutagbɔŋu pu: unimpu ubɔ pēē ŋwìiń ní ki tɔ́kɔ́ uŋmal pu ní ki cíkí kibeefuulii iŋmalbijaa saalaa nì ili náká ki-pu.

²Unimpuee làá màal̀ ní ki yáliŋkí imatiŋween ki gbáà ibiil.

³Ní maamaaci ubɔ gíti nyáń ki páaǹ kutagbɔŋu pu: an sá kupeebiliŋŋu kubɔ, ku sá kumaŋu ki cáá ayil aluli nì iyin saalaa, ní kibeefuulii cíkí diyil sá kamaa pu[55].

⁴U-juul ní u dūu fùkū iŋmalbijaa yaa yākatì mitee diba pu ki lúkufìń kitiŋ pu, ní ki kíǹ ki yú ki kɔ́ĺ unimpu un làá màal̀ee, u yaa màl̄ee ú cúú kibikee kí ŋmɔ́[56].

⁵Ní unimpuee dūu màl̄ kibininjabiki. Kíǹ di làá nīn cáá mpɔn kii tikútee[57] kí dūú kpòotī atimbun kɔkɔ, ní bi yōoǹ u-bikee malaa ki jɔ́m̀ Unimbɔti cee, u-beejal laŋki.

⁶Ní unaati sáǹ ki búntì kuteeun laakin binib kpée. Niin ní Unimbɔti bɔ́ntì ki yóoǹ-u ú cùú kàl̄ bí nīn kpīintí-u kí tin sāā abin ata nì dijandi.

⁷Niinee ní kujaau fōō ki píĺ kutagbɔŋu pu, Unimbɔti tuuŋyi kpiliu Mikayeel nì u-yab bí ki jáà nì kupeebiliŋŋuee nì u-yab,

⁸ní Mikayeel nì u yab jáń ki pɔ́ɔkiǹ-bi, ní ki jìn̄-bi bí taa ti kàl̄ kutagbɔŋun.

⁹Ní bi téeń kupeebiliŋŋuee, ukookpiki un bi yíì Sitaan u kíil̀ duulinya kɔkɔee nì u-tuuŋyi ki tɔ́ń duulinyan[58].

¹⁰Ní m gbìl̄ nneen ŋubɔ téeń mpɔn yilpu yii: «Kɔŋkɔnnee Unimbɔti fiil bāań dee! Min bí nee ní ti-Nimbɔtiu nyántì u-beel pɔŋŋu ki dàkā! Kɔŋkɔnnee u-Meesiyau dàkā mpɔn ŋun u cááyee, kun puee ukuŋfil un yú Unimbɔti nimbiin ki kúŋfí ti-nabiyaamu boon ŋwiimpu nì kunyeeuee, bi téé-u ki nyántì[59].

¹¹Dipibil fatikuu nì Unimbɔti bɔti tin ti-nabiyaamu sòon̄ee pu ní bi jáń ki pɔ́ɔkiǹ-u, kaa fāŋkì kí dū bi-ba kí tīī ŋkúm.

¹²An puee án nīn mɔ̄ǹ yilpu yab. Án nīn mɔ̄ǹ nimbi bin kóò kutagbɔŋu puee, ama an sá mbusu ní ki tīī-ni tiŋku nì kitiŋ pu yab, kun puee nì diŋuukpaandi ní Sitaan dūu kpákatìń ni-cee, ki nyí mun yii ŋyunti fiii di kíǹ-u.»

¹³Kupeebiliŋŋuee nín ká yii bi téeń-ku ki lúkuń taapuee, ní ku nín jì unimpu un nìn màl̄ kibininjabikee boon.

¹⁴Ní bi tīī unimpuee ifeen ili kii ukaalun feeŋyee, ú ŋàaǹ kí nīn cá kuteeun laakin bi bɔ́ntì ki yóoǹ-u ú cùú kàl̄ bí kpíiǹ-u abin ata nì dijandee[60], ukoobu ń taa ŋmā kí ká-u.

¹⁵Ukoobuee sáń ki jì-uee ní ki wūliŋkì nnyim ki tɔ́ unimpuee boon pú án kpántí dimɔɔl kí yòon̄-u.

¹⁶Ama ní kitiŋ fīī unimpuee. Kitiŋ wāaǹ ki dū nnyim min min kupeebiliŋŋuee bàà wūliŋkì ki tɔ́ń u-boon án bàà yòon̄-uee ki náĺ.

¹⁷Niinee ní kupeebiliŋŋuee fōō unimpuee pu diŋuul ní ki cūtì ki bíi jáà nì unimpuee biyaamu mun kíǹee, bin kɔkɔ tɔ́ Unimbɔti marab ki ŋúb́ Yeesu bɔti deedeeyee.

¹⁸Ní kupeebiliŋŋuee kíǹ ki yú tiŋku gbandi.