Read Ntcham Apocalypse 13 Bible Online

Apocalypse 13 - Ntcham bible

Apocalypse 13

¹M kpēēyee, ní ki ká upeel ubɔ nyánní tiŋkun, ki cáá ayil aluli nì iyin saalaa ní ki cíkí u-yiŋŋu kamaa pu kibeefuulii, ní diyil sá kamaa puee disiibil náká ki sìí Unimbɔti.

²Upeel un m kée náań nì ugbii ní, ní u-taaŋi náań nì digbiŋgbil, ní u-nyɔkɔ náań nì gbikinti nyɔkɔ, ní kupeebiliŋŋuee dū ku-pɔŋyi kɔkɔ nì ku-beel ki tīī-u[61].

³U-yiliŋee diba nìn fōō tiweendi ki cá ŋkúm, ama ní iweenee dāa dóò, ní an mɔ́ɔkiǹ duulinya yab kɔkɔ ní bi nóó upeelee.

⁴Ní binib kɔkɔ bí ki nyɔ́ŋkí kupeebiliŋŋuee ku nín dū ku-pɔŋyi kɔkɔ nì ku-beel ki dūu tīī upeel un nyánní tiŋkunee pu, ní bi bí ki nyɔ́ŋkí upeelee ki lì yii: «Ŋma di ŋūǹ kí dū u-ba kí ŋmàntīǹ upeel nee? Ŋma di ŋūǹ kí já nì u?»

⁵Ní bi pú upeelee kinyɔkɔ ú nīn sòoǹ tibɔfan ki bíiĺ Unimbɔti, ní ki tīī-u mpɔn ú nīn ŋáań míǹ kí tin sāā abin ata nì dijandi.

⁶U nìn lafun kíĺ ki bíi sòoǹ tibɔfan ki bíiĺ Unimbɔti yindi, nì u-kɔŋkooŋŋu nì bin kɔkɔ kóò yilpuee.

⁷Bi nìn pú upeelee nsan ú já nì Unimbɔti yab kí pɔ̄ɔkiǹ-bi[62], ní ki tīī-u tinaakɔti kɔkɔ nì anibul kɔkɔ, nì isoon kɔkɔ nib nì atimbun kɔkɔ pu mpɔn.

⁸Kitiŋ pu nib bin yiŋŋi kaa ŋmàn̄ doooo duulinya kíltam dimaŋfal gbɔŋku kun Dipibil din kpíìyee yèe poonee, an nibee kɔkɔ dāa jáaḿ upeelee ní.

⁹«Un yaa cáá ditafalee ń pīlifì tiŋan.

¹⁰Un Unimbɔti lī yii bi làá cúú kuyuŋuee, see bí cúú-u kuyuŋu. Un Unimbɔti lī yii bi làá kpɔ̀-u nì kitàataajikee, see bí kpɔ̀ udaan nì kitàataajiki. An sá Unimbɔti yab ń dàkà bi-pɔ́ɔǹtam nì bi-fookiiu un bi cáá Unimbɔti puee ní.»

¹¹Boonee ní m ká upeel ubɔ mun púń ki nyáń kitiŋ ki cáá iyin ili an bí kii dipibil yiŋyee, ní ki sòoǹ kii kupeebiliŋŋuee.

¹²Upeel upeepeekaayee nimbiin ní u ŋáań maamaacib nì mpɔn ŋun u fōō u-ceeyee, ní ki yàntī binib bin kɔkɔ bí kitiŋ puee jáaḿ upeel upeepeekaa un nìn fōō ŋkúm weeŋyi ki dāa pɔ́ɔkèe.

¹³Upeel uliliitee nìn ŋáań maamaacikpaambi, ki yàntī ŋŋmi nyēeń yilpu ki lítí kitiŋ binib kɔkɔ nimbiin.

¹⁴Mpɔn ŋun bi nìn tīī-u u cáa ŋáań maamaacib upeel upeepeekaa nimbiinee ní u nìn cáa kíiĺ binib ní ki páb́ binib bí náań upeel un bi nìn gāā kitàataajiki ki tīī tiweendi waa kpíìyee naŋku kí yóoń.

¹⁵Ní u fōō mpɔn kí ŋmā kí tīī upeelee naŋku kun bi máńee kufoou, án nín làá ŋá pu kú ŋmā kí nīn sòoǹee, ní bin yaa kaa gbāaǹ ki jáam̀-kuee ú kpɔ̀ bidambee.

¹⁶Mbiyaamueeee, bikpaambeeee, bigaajabeeee, bisoodambeeee, bin tɔ́ bi-beeyeeee, iyumbueeee, u cāntì bi nákáǹ bi-kɔkɔ ŋaŋgiilii nì bi-yigbeeŋi pu tidaandi.

¹⁷Ubɔ kaa ŋūǹ kí dā tiba, kaa tí ŋūǹ kí nyāfì tiba, upeelee yindi nì u-yindi nambau yaa kaa náká udaan pu.

¹⁸An sá mpɔ́ɔn ní, un cáá iciinee ń tùkù taapu. Kun puee tita nì ita nì biluuyee (666) dàkà unil ubɔ yindi ní.