Read Ntcham Apocalypse 14 Bible Online

Apocalypse 14 - Ntcham bible

Apocalypse 14

¹Niinee ní m ká Dipibil yú Siiyɔn jool pu, u nì binib kutukub dilaataal nì imuŋku ili nì binaa bin yigbeeŋi pu bi ŋmàn̄ u nì u-Baa yiŋŋee[63].

²M gbìl̄ nneen ŋubɔ nyánní yilpu a lì kii mbuŋkpaan nyim nín sìtī puee, ní ki gíti bí kii utaa nín tátí pu mpɔn mpɔnee, ní nneen ŋun pu m gbìl̄ee bí kii bibeebɔɔliibi di bɔ̀ɔ́ bi-bati ki gà ilanee.

³Binib gbantee nìn yú dibeejal nì tiwan tinaa tin cáá kufoouee nì bikpilibee nimbiin ki gà nlampɔɔn, ubɔ kaa ŋūǹ kí bīfì-ŋu, asee binib kutukub dilaataal nì imuŋku ili nì binaa bin bi dá ki nyántìń duulinyanee baba di ŋūǹ kí gāā an laŋŋu.

⁴An nibee kaa dōoǹ nì binimpoobi ki kɔ́ǹ bi-ba tijɔkɔndi, bi ŋúb́ bi-ba circir ní. Bi dī Dipibil boon ki cá laakin dì yaa cée. Unimbɔti dá-bi ki nyántì binib kansikin bí nīn sá bin bi làá péé péé kí dūú sú Unimbɔti nì Dipibilee.

⁵Baa gbìl̄ an nibee mɔ́ntì nnyimɔn[64] dalba ki ká, kaa ti kāntí ikpiti iba bi-pu kí lì.

⁶Boonee ní m ká ntuun ŋubɔ ŋàaǹ kutagbɔŋu pu yilpu yilpu ki cáá Tibɔmɔntiil tin kaa cáá dikúntilee ki tùkù binib bin kóò duulinyanee, ntimu kɔkɔ nib nì atimbun kɔkɔ nì isoon kɔkɔ nib nì anibul kɔkɔ.

⁷Ŋu nìn tátí mpɔn yii: «Fàŋkìmaan Unimbɔti kí tīī-u tinyool, kun puee ŋyunti bāań ú sòoǹ nnibiyaamu bɔti. Nyɔ̄ŋkìmaan Unimbɔti un náań yilpu nì taapuee, nì tiŋku nì inyimbul kɔkɔee.»

⁸Ní ntuun nliliiti páaǹní ní ki lī yii: «Babilooŋkpaan lítì! Kitiŋkpaaŋŋi lítì! U nyūntì atimbun kɔkɔ u-daam min sá u-laakpaati tin u ŋáań an lákatèe[65]!»

⁹Ní ntuun ntataati páaǹní ki lī mpɔn yii: «Un di yaa gbāaǹ ki jáam̀ upeelee nì u-naŋku, ní ki yāntì bi dáań u-yigbeel nì u-ŋalee,

¹⁰Unimbɔti làá dāá nyùntī udaan ndaam min sá u-ŋuulee. U làá dāá fōō bidambi pu diŋuukpaandi din kaa cáá jutee kí dū-bi kí tɔ̄ farwata ŋmiŋun bí jī falaakpaan, u-tuuŋyi circirdambi nì Dipibil nimbiin[66].

¹¹Ŋŋmi ŋun poon bi làá nīn bí ki jīǹ falaayee làá nīn pée dùkù ní kaa cáá dikúntil[67]. Baa dāa cáá diŋuŋfil ŋwiimpu nì kunyeeu, bíǹ bin kɔkɔ gbāaǹ ki jáam̀ upeel nì u-naŋkuee, nì bin yāntì bi dū upeelee yindi ki dáań-bee.»

¹²Ŋyunti nee di máaǹ Unimbɔti yab bin ŋúb́ u-marab tiŋan ki máká Yeesu puee ń pɔ́ɔǹ bi-ba, kí nīn cáá kimɔtii.

¹³Ní m gbìl̄ nneen ŋubɔ sòon̄ní yilpu yii: «Ŋmà yii: <Bin nóó ti-Dindaan ki kúù kɔŋkɔnneeyee bí mmɔnneeee!> Unimbɔti Fam lī yii: <An sá mbaamɔn, bi làá cùú kàl̄ kí ŋùŋfì, kun puee atunnyaan ŋin bi túńee dī-bi!>»

¹⁴M kpēēyee, ní ki ká ditagbampindi diba, ní ubɔ kā di-pu ki náań nì unil[68], ní ki cíkí sindaariya beefuuliiki ki ŋúb́ ugɔti un jītée u-ŋaan.

¹⁵Ní ntuun ŋubɔ nyánní kunimbɔtidiin ki téeń mpɔn ki tùkū un kā ditagbampindi puee yii: «Dū a-gɔtiuee kí cā tijikaal, kun puee kudiceeu ŋmāntì. Duulinya bīń ki ŋmāntì bí cā[69]!»

¹⁶Niinee ní un kā ditagbandi puee dū u-gɔtiu ki bɔ́ duulinyan ní ki cáń duulinya.

¹⁷Ní ntuun ŋubɔ mun gíti nyánní yilpu Nimbɔtidiikun ki mun ŋúb́ ugɔti un jītée.

¹⁸Ní ntuun ŋubɔ gíti tí nyánní nsaraafanni, ŋúǹ di ŋúb́ ŋŋmi pɔŋŋu, ki téeń mpɔn ki tùkū ŋun ŋúb́ ugɔti an jītée yii: «Dū a-gɔtiu un jītée kí bɔ̄ fiinyi sufii in sí kitiŋ puee sakaŋi poon kí kìtī, kun puee abil bīń.»

¹⁹Ní ntuunee dū ŋu-gɔtiu ki bɔ́ fiinyi sufiin ní ki kītì duulinya fiinyi biliŋ ki gbéeǹ mbookpaan ŋun ni bi ŋmāam̀ ki lèekī ndaamee, an dàkà yii bi cáa kɔ́ǹ Unimbɔti ŋuulin dee.

²⁰Ní bi ŋmáaḿ fiinyi biliŋee mbookpaanee ni kitiŋ kpaanceetiŋu nnyim ń nyā. Kun nyáńee di sá fatiku, ki pùub̀ ki tin sāā ataŋkpee alaataa ata. Ní fatikuee nín dɔ̄ ki jɔ́m̀ puee tin sāā itaamu nyɔɔkpaaŋi[70].