Read Ntcham Apocalypse 16 Bible Online

Apocalypse 16 - Ntcham bible

Apocalypse 16

¹Ní m gbìl̄ nneen ŋubɔ nyánní kunimbɔtidiin ki sòoǹ mpɔn ki tùkù ituun ilulee yii: «Nín̄ cámaan kí kpáatí Unimbɔti ŋuul din kā nsambiyaamu mululinee kí sìtīmaan duulinyan.»

²Ní ntuun mpeepeekaa kpáatì diŋuul din gbí ŋu-sambikinee ki sītì duulinyan, ní ibunsoon[74] dɔ́miń ki jéetì bin kɔkɔ cáá upeelee daaŋku ki jáaḿ u-naŋkuee pu.

³Ní ntuun nliliiti kpáatì diŋuul din gbí ŋu-sambikinee ki sītì tiŋkun, ní tiŋku nyim kpántì fatiku a lì kii unil un bi kūūyee fatikuuee, ní tin kɔkɔ bí tiŋkun ki cáá kufoouee kpíì.

⁴Ní ntuun ntataati kpáatì diŋuul din gbí ŋu-sambikinee ki sītì amɔɔ nì ikpin poon, ní inyiŋfi kpántì fatiku[75].

⁵Niinee m gbìl̄ ntuun ŋun yì inyiŋfi pɔŋŋuee bí yii: «A sá deedeedaan ní a nín ŋá min nee pu, sii un bí ki nìn pée bí dooooyee, a sá circirdaan ní.

⁶Di sá bi nìn kūū a-nib nì a-bɔnaatiliibi bi-fatikuu nyáń ki fá, míǹ pu ní a yāntì inyiŋfi kpántì fatiku bí nyɔ̀, bi nín máaǹ puee ní a ŋá-bi nee!»

⁷Ní m gbìl̄ nneen ŋubɔ nyánní nsaraafanni ki lī yii: «Tiŋman, ti-Dindaan Unimbɔti Mpɔŋkɔdaan, a nín sòon̄ binib bɔti miŋyee sá mbaamɔn ní ki sá deedee.»

⁸Ní ntuun nnanaati kpáatì diŋuul din kā ŋu-sambikinee ki sītì ŋwìiń pu yii ŋwìiń ń píĺ binib tikpil.

⁹Ní kutuntuŋu píĺ binib tikpil ní bi bí ki bíiĺ Unimbɔti un cáá mpɔn falaabi gbanti puee yindi, ki yíì kaa fá bi-kpitii kí tīī Unimbɔti tinyool.

¹⁰Ní ntuun ŋŋmooŋmooti kpáatì diŋuul din gbí ŋu-sambikinee ki sītì upeelee beejal pu, ní u-beelin nib jéetì dibɔmbɔndin[76], ní tifaandi yāntì binib júntí bi-limbiliŋ, kun puee iween nìn gbìl̄-bi.

¹¹Bi-bunsooŋyi nì bi-falaau un bi bí ki jīǹee pu ní bi nìn bí ki bíiĺ Unimbɔti un yì yilpuee. Ama bi yíì, kaa fá bi-tuŋkpitiŋ.

¹²Ní ntuun nluluuti kpáatì diŋuul din kā ŋu-sambikinee ki sītì Eefiraati mɔɔkpaandin, ní dimɔɔl fóotì ki kūń ní nsan dōoǹ ní ŋwìiń nyalaŋki pú bɔtiibi kíǹ ki dì[77].

¹³Ní m ká arasiniibi bita, bi náań nì kpaadalib ki nyánní kupeebiliŋŋuee nì upeel un kíǹee nì u-bɔnaatiliu unyimɔndaan nyɔmmun.

¹⁴Arasiniibi[78] bitee ŋáań maamaacib, ní ki cūtì ki ká duulinya kɔkɔ bɔtiibi ki kpáfì-bi bí dāá já nì Unimbɔti Mpɔŋkɔdaan u-wiŋkpaaŋŋu dal.

¹⁵«Ní pīlifì, m làá dāan̄ kii unaayuu yamee ní! Un kaa gèen̄ ki kā ki cí u-bɔkutil dɔ̄ ki kɔ́ĺ-uee bí mmɔnni. Udaan kaa dāa nyēē dicancaŋgbeel bí ká u-cooi.»

¹⁶Ní arasiniibee kóoǹ bibɔtiibi ki cáa kpáfì laakin Eebru yab yíì yii Arimageedɔŋyee.

¹⁷Ní ntuun nluluúti kpáatì diŋuul din kā ŋu-sambikinee ki yàl̄ kutaa pu, ní m gbìl̄ nneen ŋubɔ nyánní kunimbɔtidiin dibeejal cee ki sòon̄ mpɔn yii: «An ŋá ki dóò!»

¹⁸Niinee an bíi ŋmóò nyàlnyal ki tátí kii utaayee, ní m gbìl̄ dibintiŋkpaandi pu ní kitiŋ cīŋkì ŋkpitim pu. Kí yòon̄ ŋwiin ŋun binib kíĺ ki kóò kitiŋ pu ki dāa sāā díǹ nee, kitiŋ kaa láá cīŋkì míǹ bi ká.

¹⁹Ní kitiŋkpaaŋŋi lítì ki nābitì agin ata, ní atimbun tiŋkpaammu kɔkɔ wīil̀. Niinee Unimbɔti téetì Babiloon kitiŋkpaaŋŋi pu, ní ki dū u-ŋuul din pɔ̄ɔ̄ kpaŋkpamee ki nyūntì-kì kii ndaamee[79].

²⁰Ní ntimu mun bí amɔɔ kansikinee nì ajoon wáŋkì.

²¹Ní ataanyiŋkumbil[80] ŋin nyìm̀ kii kiiloobi imuŋku ilee lítí ki tàbitī binib, ní binib bí ki sìí Unimbɔti ditafadaaldi gbanti pu, kun puee ditafadaaldee nìn pɔ̄ɔ̄ ki lákatì.