Read Ntcham Apocalypse 17 Bible Online

Apocalypse 17 - Ntcham bible

Apocalypse 17

¹Boonee ní ituun iluli in kpáatì diŋuul ki sītì duulinya puee ŋubɔ sútìń m-cee ní ki bí-mi yii: «Dāan̄ tí cù ḿ dàkà-si bi nín làá dáaĺ ulaakpaadaan un pée sá ukpaan ki kā ikpin puee tafal miŋyee.

²Kitiŋ pu bɔtiibi dōoǹ nì u ní kitiŋ pu nib mɔ̄nnì-u ní u-laakpaati gbí-bi kii ndaamee[81].»

³Ní Unimbɔti Fam dɔ́miń m-ni ní ntuun yōoǹ-mi ti búntì kuteeun, ní m tin ká unimpu ubɔ kā upeel pu. Upeelee sá uman, ní u-wunti kɔkɔ náká asiibil ki sìí Unimbɔti, ki cáá ayil aluli nì iyin saalaa.

⁴Unimpu gbanti pēē dibɔkutinyaandi diba dì máǹ, ní u-falfatib nì u-bɔmbiliŋ nì u-beedimbiliŋ sá sindaariya nì ataŋkpee ŋin pɔ̄ɔ̄ kudaau ki jìl̀ee, ní ki ŋúb́ sindaariya sambiki ikpiti nì tilaakpaal tin u ŋáańee jɔkɔnti gbí poon.

⁵Ní dimaamaaciyindi diba ŋmàn̄ ki náká u-yigbeel pu yii: «Babiloon kitiŋkpaaŋŋi, tilaakpaal dambi nì bitiŋwiiliibi na.»

⁶Ní m ká yii unimpuee nyùn̄ Unimbɔti nib nì bin nóó Yeesu deedee bi kūū-bee fatikuu ki gbí. M nín ká mimmee ní m bākatì sèeee.

⁷Ní Unimbɔti tuuŋŋu bālifì-mi yii: «Ba ŋá ní a bākatì? M làá bìitī unimpuee nì upeel un pu u kā u cáá ayil aluli nì iyin saalaayee bɔɔŋŋi pu kí tùkù-si.

⁸Upeel un a ká nee nìn bí dooooyee, ama kɔŋkɔnnee waa ti bí. U làá nyānní mbookpaan ŋun ni u nìn bée ní kí nīn cá laakin bi làá nàan̄-uee. An làá dāá ŋá bin doooo duulinya kíltam baa ŋmàn̄ bi-yiŋŋi dimaŋfal gbɔŋkunee maamaaci, bi yaa láa fātìi gíti ká upeel gbantee. Di sá upeelee nìn pée bí dooooyee ní ki dāa wáŋkì, ní ki dāa gíti fātìi nyánní.

⁹«Tibɔti nee pu ní unil máaǹ kí dàkà u-landɔkɔŋu nì u-ciiŋŋu. Upeelee yiliŋ alulee di sá ajoon aluli ŋin pu unimpuee kēe, ní ki sá bibɔtiibi biluli mun.

¹⁰Bibɔtiibi bilulee kansikin biŋmoo lítì, ubɔ kā dibeejal pu, ní un kíǹee kaa láá bāań, ama u mun yaa láa bāańee, waa làá dāá kàl̄ kí yúntí.

¹¹Upeel un nìn bí ní kaa ti bée u-ba kútì ki sá ubɔtininiiti, u mun sá bibɔtiibi bilulee kansikin ubɔ ní. Úǹ ní bi làá nàan̄.

¹²«Iyin saalaa in a kée di sá bibɔtiibi saalaa[82] bin kaa láá kāl̀ dibeel puee, ama bi làá tīī-bi mpɔn bi nì upeelee ń jī dibeel kukúluu kubɔ poon.

¹³Bibɔtiibee kɔkɔ dāa pēē kinyɔkɔ ní kí dū bi-pɔŋyi kí kūtì upeelee.

¹⁴Ní bí jáǹ Dipibil, ní Dipibil ń dāá pɔ̄ɔkiǹ-bi, u nì bin kɔkɔ sá u-yab u lútì-bi bi yú deedeeyee, kun puee úǹ di sá bidindambi kɔkɔ Dindaan, nì bibɔtiibi kɔkɔ Bɔtiu.»

¹⁵Ní ntuunee gíti bí-mi yii: «Inyiŋfi in pu a ká kilaakpaayee kēe di sá atimbun nibiim nì isoon kamaa nib.

¹⁶Iyin saalaa in a kée nì upeelee làá nīn ná kilaakpaayee ní. Bi làá dāá gbākal̀ tiwan tin kɔkɔ kā ki-wunti puee ní kí kíń dicancaŋgbeel, ní kí dāá ŋmɔ́ ki-nanti ní kí dū-kì kí wà ŋŋmi.

¹⁷Di sá Unimbɔti di dū min u lèe ki ŋá bi-pɔbiliŋin bí ŋá ubaanti kí dū bi-pɔŋyi kí kūtì upeelee pu, kí nīn cí ŋyunti ŋun Unimbɔti làá dāá ŋá min u nìn lī yii u làá ŋée.

¹⁸«Unimpu un a kée di sá kitiŋkpaaŋŋi kin tɔ́kɔ́ duulinya bɔtiibi puee.»