Read Ntcham Apocalypse 18 Bible Online

Apocalypse 18 - Ntcham bible

Apocalypse 18

¹Boonee ní m ká ntuun ŋubɔ nyánní yilpu ki cáá mpɔŋkpaan, ní ŋu nín jìl̀ puee ŋmíntì duulinya kɔkɔ.

²Ní ntuunee téeń mpɔn yii: «Kì lítì, Babiloon tiŋkpaaŋkee lítì ki kpántì kɔŋkɔnnee arasiniibi kɔŋkooŋŋu, arasiniibi nín bí tɔbin puee balilaŋki, nì inoon in kɔkɔ kaa sàafì kpataaayee balilaŋki.

³Di sá yii kì nyūntì atimbun kɔkɔ ki-daam min sá ki-jɔkɔmbiikuee. Duulinya bɔtiibi kɔkɔ dōoǹ nì kì ki kpántì bijɔkɔndambi, ní duulinya bantiliibi kūliŋkì ki-wannyaanti tikpil tikpil.»

⁴Ní m gíti gbìl̄ nneen ŋubɔ nyánní yilpu ki lī yii: «M-samaau, nyāmaan kitiŋ nee poon, án nín làá ŋá pu ní taa ŋá ki-kpitii, kí dāá fōō ki-tafadaaldi din bi bɔ́ntì ki yóoǹ-kèe.

⁵Kun puee kitiŋ gbanti yab kpitii kpúkú ní ki tin sāā kutagbɔŋu, Unimbɔti kaa súntì ki-tuŋkpitiŋ gbanti pu.

⁶Ŋámaan-kì kii kì nín ŋá-ni puee, téem̀maan-kì ikpiti in kì ŋá-nee mili pu. Kì nín dáaĺ ni-tafal miŋyee, nimbi ń dáaĺ-kì míǹ mili pu.

⁷Kì nín cáá tiwannyaandi ki gà ki-bindi miŋyee, ní yàntī falaa nì dinimbinaamandi ń kɔ́-kì míǹ, kun puee kì sòoǹ ki pɔ̀ ki-ba yii kíǹ sá unimpubɔti ní, kaa sá ukpiipu, dinimbinaamandi kpá kí kɔ́ kíǹ dalba dalba.

⁸An pu ní ditafadaaldi din dɔ̄ ki cí-kèe kɔkɔ làá bàń ki-pu ŋwimbaanti, ŋkúm nì dinimbinaamandi nì ŋkùm, ní ŋŋmi ń dāá púntí-kì kí wà, kun puee ti-Dindaan Unimbɔti un dáaĺ ki-tafalee sá mpɔndaan ní[83].»

⁹Niin ní duulinya bɔtiibi bin nì u kpáfì ki ŋá tijɔkɔndi ki yākatì ki-wannyaantee làá sɔ̄ kí yāliŋkì bi yaa láa ká ŋŋmi ŋun bíi wù kitiŋ gbantee ŋminyiim yíkì jòoooyee.

¹⁰Dinimbinaamandi din poon kitiŋee làá dāá kɔ́ee làá cúú-bi tifaandi, ní bi dāa yú kudandaŋu ki lì yii: «Ba busuu di jéetì Babiloon kitiŋkpaaŋŋi kin cáá mpɔnee pu nan dee! Kukúbambaantiiu poon bi kpáàa pée dáaĺ sii tafal sɔkɔmiii[84]?»

¹¹Ní duulinya bantiliibi sūǹ ki yáliŋkí ki-pu, kun puee baa làá ti ká ubɔ ń dā bi-nyampuwanti,

¹²bi-nyampuwanti tin sá sindaariyab nì animbil kúti, nì ataŋkpee ŋin pɔ̄ɔ̄ kudaauee, nì abeedimbil nì iŋaamɔnti nì iŋaabɔn nì iman, nì in bí kii sirci ki pɔ̄ɔ̄ kudaauee, nì idɔ in cáá kudapɔɔu tikpilee kɔkɔ, nì tin kɔkɔ bi cáá akuntinyin ki ŋáańee, nì bi nín cáá idɔ ki kpítí tiwammɔntiil tin an pɔ̄ɔ̄ kudaauee, nì tasa kúti nì tikúti wanti nì ataŋkpee ŋin jìl̀ee,

¹³nì talaalub nín bí tɔbin puee nì tifaal tin sɔ́fèe nì ŋkpaŋŋmitikaam, nì tikaliŋkpun tin bi tùutī an sɔ́fèe, nì idafi nì ikpafi nì ŋkpɔnɔyim, nì bilee biliŋ nì inaa nì ipii nì itaamu nì tɔrɔkub nì iyumbu, ki tin kpáaǹ binib nammu.

¹⁴Ní binyampoobee kíǹ ki lì yii: «Tiwan tin pu a-nimbiliŋ máǹee kaa ti dàbiǹ-si, a-gaajati nì a-wannyaanti tin jìl̀ pàlpalee wáŋkì a-ŋaan, a pée gíti kpá kí ká-tì jaanjaan!»

¹⁵Binyampoobi bin di bāntì kitiŋ gbanti poon ki ká animbilee, làá dāá fàŋkì falaa un kitiŋee bíi jīǹee[85], an pu ní bi dāa yú kudandaŋu ki sūǹ ki yáliŋkí,

¹⁶ki lì yii: «Mbusu, mbusu kɔ́ kitiŋkpaaŋŋi, kíǹ kin nìn pēē iŋaamɔnti, ibɔn nì iman bɔkutinyaaŋŋee. Kì nìn túuń sindaariya falfatib nì abeedimbil nì idiŋfi in pɔ̄ɔ̄ kudaau ki jìl̀ee,

¹⁷kukúbambaantiiu ja poon ní bi dūu kúntì ki-gaajati kɔkɔ!» Bimeelaŋaalkpilib kɔkɔ nì bin kā meelabinee nì bimeelaŋaaliliibi nì bin kɔkɔ tūǹ ditundi tiŋkunee yúń kudandaŋu

¹⁸ki wāĺ kitiŋee nín fōō ŋŋmi mi-nyiim yíkí jòoooyee, ní bi gbáà ibiil ki lì yii: «Kitiŋ kiba kpá bí dūú ŋmàntīǹ Babiloon tiŋki».

¹⁹Bi nìn jáfí ntam ki sìtī bi-yiliŋ pu ki sūǹ ki yáliŋkí ní ki lì yii: «Mbusu ulɔu di nín kɔ́ kitiŋkpaaŋŋi míǹ nan dee! Ki-gaajati pu ní meeladambi kpántì bigaajab. Ní kukúbambaantiiu ja poon ní bi kpáàa kúntì sii nì a-wanti kɔkɔɔɔ[86]!»

²⁰Nimbi bin kóò yilpu ki sá Unimbɔti yab nì Unimbɔti bɔnaatiliibi nì Yeesu kpambaliŋee, nín̄ fàal̀maan[87] tin bāań kitiŋkpaaŋŋi gbantee pu, kun puee ikpiti in kì ŋá-nee pu ní Unimbɔti dáaĺ ki-tafal kí pɔ̀-ni.

²¹Niinee ní ntuun mpɔndaan ŋubɔ yōoǹ ditaŋkpal diba dì gbìfì kii kunaauee ki tɔ́ tiŋkun, ní ki bí yii: «Míǹ ní bi làá dāá téé Babiloon kitiŋkpaaŋŋi kìlkil kí tɔ̄ taapu, ubɔ kaa dāa gíti líkití ki-pu jaanjaan.

²²Baa làá ti gbìl̄ kitiŋ gbanti poon bi bɔ̀ɔ́ kubeeu, kaa làá ti gbìl̄ bi búǹ diwul àá dikantándi, kaa làá ti gbìl̄ bigbiŋgbiililiibi baa ubɔ pu, kaa làá ti wāl̀ utɔntɔnli báà uŋyee kitiŋ gbanti poon, kaa làá ti gbìl̄ bi nà kunaau.

²³Fitila walifiŋu kaa làá ti ŋmíntí kitiŋ gbanti pu. Baa làá ti gbìl̄ unimpucaan nì u-cal pu. Kun puee bibantiliibi sá bikpikpaambi ní kitiŋ gbanti poon, ní ki cáá bi-bɔti ki kíiĺ binib kɔkɔ[88].»

²⁴Kitiŋ gbanti fōō ditafadaaldi, kun puee bi kūū Unimbɔti yab nì u-bɔnaatiliibi nì bin kɔkɔ bi kūū kitiŋ puee[89].