Read Ntcham Apocalypse 19 Bible Online

Apocalypse 19 - Ntcham bible

Apocalypse 19

¹Boonee ní m gbìl̄ yilpu an bí kii kunipaau neenee, ki lī mpɔn yii: «Aleeluya! Ti-Nimbɔtiu di yì difiil nì tinyool nì mpɔn.

²U-bɔsòontam sá mbaamɔn ní ki bí deedee. Di sá yii u sòon̄ ki kūū kinimpulaakpaai bɔti kì nín dū ki-laakpaati ki tīntì kitiŋ pu kɔkɔ nib ki yāntì bi kpántì bikpitibee, ní ki dáaĺ ki-tafal ki tɔ̀n̄-kì ipɔntoon kì nín kūū u-tɔntɔnliibi puee.»

³Ní ki gíti bí yii: «Aleeluya! Kun puee kitiŋ gbanti làá nīn pée wù ŋŋmi ní ki-ŋminyiim ń nīn yíkí míǹ kí nīn cá jaanjaan.»

⁴Ní bikpilib mmuŋku nì binaayee, nì tiwan tinaa tin cáá kufoouee, lítì Unimbɔti un kā dibeejal puee nimbiin ní ki bí yii: «Ameeni! Aleeluya!»

⁵Ní nneen ŋubɔ nyánní dibeejal cee ki lī yii: «Nimbi bin kɔkɔ sá Unimbɔti tɔntɔnliibee, nyɔ̄ŋkìmaan-u! Bikpaambi nì mbiyaamu, bin kɔkɔ fàŋkí-uee, nyɔ̄ŋkìmaan-u!»

⁶Ní m gbìl̄ an bí kii binib kupaau di sòon̄ee, ní ki bí kii dimɔɔl nyim nín sìtī nsitimin puee, ní ki gíti bí kii utaa nín tátí mpɔn puee ki lì yii: «Aleeluya! Ti-Dindaan Unimbɔti Mpɔŋkɔdaan di sá ubɔti ki kā dibeel pu[90].

⁷Tí nīn fàal̀maan án nīn mɔ̄ǹ-ti tí nīn nyɔ́ŋkí Unimbɔti, kun puee Dipibil nimpucáatam bāań, u-bɔɔn bɔ́ntì ki dóò.

⁸Unimbɔti tīī-u dibɔkutipindi káŋkaŋ din jìl̀ee ú pèen̄.» (Dibɔkutipindee di sá deedee tuuŋŋi ŋin bi nóó Unimbɔti deedeeyee túnnée.)

⁹Ní Unimbɔti tuuŋŋu bí yii ḿ ŋmà yii: «Bin bi yíiń bí dāá jī Dipibil nimpucáatam jintee bí mmɔnneeee[91]!» Ní ki gíti kútì yii: «Unimbɔti u-ba di lī míǹ.»

¹⁰U lī mimmee ní m gbāaǹ kí jāam̀-u, ní u bí-mi yii: «Taa ŋée! Ma mun pée sá utɔntɔnli kii si nì a-nabiyaamu mun bí ki sòoǹ Yeesu bɔti tin u nyántì ki dàkā-nee ní. Unimbɔti ní a máaǹ kí jāam̀.» Kun puee Unimbɔti Fam nín yāntì Unimbɔti bɔnaatiliibi sòon̄ tiŋyee sòoǹ Yeesu pu ní.

¹¹Niinee ní m ká yilpu pīitì, ní utampiin ubɔ nyánní, ní unil ubɔ kā u-pu, bi yíì udaan yii Deedee nì Mbaamɔn, u sòoǹ tibɔti deedee ki jáà kujaau nì deedee[92].

¹²U-nimbiliŋ ŋmóò làka laka kii ŋŋmee, ní u cíkí mbeefuulimu tikpil u-yil pu. Diyindi diba náká u-pu, báà ubɔ kaa nyí-dì, see úǹ baba.

¹³Ní u-bɔkutil din u pēēyee táká fatiku, ní bi yíì-u yii: «Unimbɔti nyɔɔbundi.»

¹⁴Ní yilpu janjaliibi nóó-u ki kā itampiin pu ki pēē abɔkutimɔnti apiin káŋkaŋ.

¹⁵U-nyɔkɔnee kitàataajiki kā ki jītí. An ní u làá dūú jáǹ atimbun. Mpɔn ŋun u làá dāá nīn cáa kpòotī-bee dāa pɔ̄ɔ̄ kii tikútee ní, ní Unimbɔti Mpɔŋkɔdaan nín díkí bi-pu diŋuul diŋyee puee, u làá dāá nà-bi dúsi dusi kii bi nín nà asubil pu ki ŋáań ndaamee ní[93].

¹⁶Bi ŋmàn̄ diyindi diba u-bɔkutil nì u-tapandi pu yii: «Bibɔtiibi kɔkɔ Bɔtiu, bidindambi kɔkɔ Dindaan.»

¹⁷Ní m ká Unimbɔti tuuŋŋu ŋubɔ yú ŋwìiń poon, ní ŋu téeń mpɔn ki tùkū inoon in kɔkɔ ŋàaǹ kutaa puee yii: «Dāá kpāfìmaan kí jī Unimbɔti jiŋaakpaaŋwu!

¹⁸Ní dāan̄ kí jī bibɔtiibi nì bisoojakpilib nì bipɔndambi wunnanti nì itaamu nì bin kā-iee wunnanti, nì binib kɔkɔ wunnanti, bin yì bi-bee nì iyumbu, binikpaambi nì biwaabi[94].»

¹⁹Niinee ní m ká upeelee nì duulinya bɔtiibi nì bi-soojab kpáfì kí jáǹ un kā utaamu puee nì u-janjaliibi.

²⁰Ní un kā utaamu puee nì u-janjaliibi cúú upeelee nì u-nyimɔmbɔnaatiliu un nìn ŋáań maamaacib upeelee nimbiin ki kíiĺ binib bin kɔkɔ bi nìn dáań upeelee daaŋku bi gbàantí ki jáaḿ upeelee naŋkuee. Ní bi dū bi-liitil nì bi-nimbiliŋ ki tɔ́ farwata[95] ŋmibookun.

²¹Ní kitàataajiki kin nyēē un kā utampiinee nyɔkɔnee kūū bin kíǹee kɔkɔ, ní inoon dɔ́miń ki jíń bi-nanti ki bál̀.