Read Ntcham Apocalypse 2 Bible Online

Apocalypse 2 - Ntcham bible

Apocalypse 2

¹«Á ŋmà kugbɔŋu kí tīī m-nikitil din bí Eefeesee tuuŋŋu yii: «Un ŋúb́ iŋmalbijaa iluli u-ŋaŋgiilin ki còom̄ fitilab tɔ́kɔŋkaati tiluli tin sá sindaariyee kansikinee di lī yii:

²M nyí a-tuuŋŋi ŋin a túńee kɔkɔ pu, m nyí falaa un jíń-see, ki nyí a-pɔ́ɔǹtam. M nyí a-pu yii aa là binikpitib bɔti. A cɔ́ŋkì ki béè bin bí yii bi sá Yeesu kpambaliŋ, kin kaa sée, ní ki bīitì binyimɔndambi pu.

³A cáá dipɔ́ɔǹdi, ki jíń falaa m-pu kaa yɔ̄tì a-wunti.

⁴Ama tiba ní m cáá kí wòoǹ-si, di sá yii a nín nìn néeń-mi ŋkilkaamin puee, a dūu fá, aa ti néeń-mi míǹ.

⁵An puee á téetí laakin ní a lítèe. Á kpántí a-bimbim, kí fàtīí nīn tūǹ atummɔnti ŋin a nìn tūǹee. A yaa yíìyee, m làá dāan̄ a-cee ní kí yòon̄ a-fitilau nì u-tɔkɔŋkaati ti-paaŋŋu.

⁶Ama nì míǹ kɔkɔee, a cáá tiba tì ŋān̄. Tíǹ di sá a nín ná atuun ŋin Niikoolaati yab tūǹee, kii ma mun nín ná-ŋi puee.

⁷«Un yaa cáá ditafalee ń pīlifì Circir Fam nín bíi sòoǹ nì Kriisitoo nikitiŋ puee. «Un yaa jáń ki jíńee, m làá tīī-u dimaŋfal subu bun yú Unimbɔti kpaabunee bil ú ŋmɔ́[3].»

⁸«Á ŋmà kugbɔŋu kí tīī m-nikitil din bí Simiirnee tuuŋŋu yii: «Un sá upeepeekaa ki sá uluŋkikaayee, man un nìn kpíì ki fīkitèe di lī yii:

⁹M nyí a-falaau nì a-sool, ama nì míǹ kɔkɔee, a sá ugaaja ní. M nyí bin kúŋfí a-boon ki yíì bi-ba yii Juuda yab kin kaa sée. An nibee sá Sitaan nikitil ní.

¹⁰Á taa fàŋkì falaa un dɔ̄ ki cí-si a làá jēe pu. Di sá yii Sitaan làá cɔ̄ŋkì-ni kí yàntī bí cūtì ni-kansikin biba kí tɔ̄ sarka, ní ní dāá jī falaa iwiin saalaa. Nín̄ yú deedee áli a-kúm dal, ní ḿ dāá tīī-si dijajil beefuuliiki, an dàkà yii dimaŋfal din kaa kúntée.

¹¹«Un yaa cáá ditafalee ń pīlifì Unimbɔti Fam nín sòoǹ nì Kriisitoo nikitiŋ puee. «Un yaa jáń ki jíńee, ŋkúnliliitiim kaa dāa gíti gbèetī udaan.»

¹²«Ŋmà kí tīī m-nikitil din bí Peergaamee tuuŋŋu yii: «Un ŋúb́ kitàataajiki kin jītí ajan liitilee bí yii:

¹³M nyí yii kitiŋ kin poon Sitaan jíń dibeelee ní a kóò. Ama ní a ŋúb́ m-bɔti deedee kaa páatì a-fookiiu m-pu. A gbíntì ki ŋúb́ an píkí ki kpáaǹ ŋyunti ŋun bi nìn kūū m-tɔntɔmmɔntiu Antiipa ni-tiŋki kin sá Sitaan kɔŋkooŋŋuee nee.

¹⁴Ama nì míǹ kɔkɔee, m làá wòoǹ-si tiba pu. Di sá binib biba bí a-cee ki ŋáań kii Balaam nín nìn sáŋkì Balaaki ú ŋmàtiǹ Isirayeel biyaamu bí ŋmɔ́ tiwaatootinan kí ŋá tilaakpaal kí lítí ikpitinee[4].

¹⁵Míǹ ní si mun a-ba cáá binib bin tūǹ atuŋkpiti kii Niikoolaati yabee.

¹⁶An puee á kpántí a-bimbim. A yaa yíì, m làá dāan̄ kí dū m-nyɔɔbundi din sá kitàataajikee kí já nì an nibee kɔŋkɔnnee.

¹⁷«Un yaa cáá ditafalee ń pīlifì Unimbɔti Fam nín bíi sòoǹ nì Kriisitoo nikitiŋ puee. «Un yaa jáń ki jíńee, m làá tīī-u maana un bí dibalinee, nì ditaŋkpapindi din pu bi ŋmàn̄ diyimpɔndi[5] diba din báà ubɔ kaa nyée, see un fōō ditaŋkpalee.»

¹⁸«Ŋmà kugbɔŋu kí tīī m-nikitil din bí Tiyatiiree tuuŋŋu yii: «Unimbɔti Jipɔɔn un nimbiliŋ ŋmóò làka laka kii ŋŋmi, u-taaŋi jìl̀ pàlpal kii tasa ní bi fíntèe di lī yii:

¹⁹M nyí tin kɔkɔ a ŋáańee, m ká dineendi din a cááyee, nì a-fookiiu, nì a nín tūǹ atuun ŋin ki tútúǹ binibee nì dipɔ́ɔǹdi din a cááyee. M ká yii atummɔnti ŋin a bíi tūǹ kɔŋkɔnnee jítiǹ apeepeekaa.

²⁰Ama nì míǹ kɔkɔee, m làá wòoǹ-si tiba pu, di sá a yāntì unimpu Jeesabeel[6] un yíì u-ba yii u sá Unimbɔti bɔnaatiliuee cáá u-dàkatam ki kíiĺ m-tɔntɔnliibi yii bi yaa ŋáań tilaakpaalee, an kaa cáá tiba, ki yàntī bi ŋmóò tiwaatootinan.

²¹M pú-u ŋyunti ú bàà kpántí u-ba kí fá u-bimbikpitim ní u yíì.

²²An puee m làá yàntī ú lítí iween pu kí jī falaa ki kpáaǹ u nì bin pēē kinyɔkɔ ki ŋáań tilaakpaalee. Asee bi yaa kpántì bi-ba ki fá bi-bimbikpitim baba.

²³M làá fáá kí kpɔ̀ u-yab bin nóó-uee ní m-nikitiŋ kɔkɔ ń béé yii man di sá un nyí binib landɔkɔi nì bi-làtamee. M làá dāá pà báà ŋma tuuŋŋi paati ní[7].

²⁴«Ama nimbi bin kíǹ Tiyatiir nikitil kansikin kaa bí bi-tuŋkpitiŋ gbanti poon, kaa bífì kun bíǹ yíì yii Sitaan bɔti tin bí dibalin ki nyóòyee, nimbee, maa pée cáá tiba kí lì ni-pu.

²⁵Ama tin baba m làá lèe di sá ní nīn ŋúb́ tin ni cááyee gbīŋgbim áli ḿ dāá gítiń.

²⁶«Un di yaa jáń ki jíń ki gbíntì ki nìkì ki ŋáań min fáatì-mee ki tin kátì-kuee, m làá yàntī ú jī dibeel atimbun pu.

²⁷Mpɔn ŋun m làá tīī udaan ú dūú kpàà-bee dāa pɔ̄ɔ̄ kii tikútee ní. U dāa ŋūǹ kí dūú wīī binib sɔkɔmii kii atansambilee.

²⁸Míǹ ní mama m-ba fōō mpɔn gbanti m-Baa cee. Ní ḿ dāá tīī un jáń ki jíńee utaafaaŋmalbija[8].

²⁹«Un yaa cáá ditafalee ń pīlifì Unimbɔti Fam nín sòoǹ nì Kriisitoo nikitiŋ puee.»