Read Ntcham Apocalypse 20 Bible Online

Apocalypse 20 - Ntcham bible

Apocalypse 20

¹Boonee ní m ká ntuun ŋubɔ nyánní yilpu ki ŋúbiń mbookpaan saafiiu nì ikusaka iba i nyìm̀ na!

²Ní ntuunee cúú kupeebiliŋŋu ukookpikee, an dàkà yii Sitaan, ki dū ikusakee ki bóob́-u ú nīn bí míǹ kí nīn cí abin kutuku.

³Ŋu téé-u ki tɔ́ mbookpaanee ni ní ki pīiǹ ki kpàl̄ ki ŋéeb́, án nín làá ŋá pu ú taa ti kīil̀ atimbun nib kí tin cáá sāā abin kutukuee. Boonee bi làá fàtīí gíiǹ-u kí líí ŋyunti ŋubɔ poon fiii.

⁴Ní m ká abeejal aba[96], ní bi tīī bin kā ŋi-puee mpɔn bí nīn sá bibɔsoonliibi, ní m gíti ká bin nìn sòoǹ Unimbɔti bɔti ki lèekī Yeesu pu seera bi kūū-bee nammu, nì bin kaa nìn gbāaǹ ki jáam̀ upeelee nì u-naŋkuee, kaa yāntì bi dáań bi-yigbeeŋi nì bi-ŋaliiyee, bi-kɔkɔ fātìi fīkitì bi nì Kriisitoo kāl̀ dibeel abin kutuku.

⁵Bitaŋkpiibi bin kíǹee kaa làá fìkitī, see abin kutukuee yaa láa jítì, difìkitipeekaal bɔti dee.

⁶Bin yaa láa bí difìkitipeekaal poonee bí mmɔnni nì circir poon. Ŋkúnliliitiim kaa dāa gíti cáá bíǹ pu mpɔn. Bíǹ di dāa sá Unimbɔti nì Kriisitoo saraaŋaliibi, ní bi nì Kriisitoo ń kàl̄ u-beelin abin kutuku.

⁷Abin kutukuee yaa láa jítèe, bi làá dāá gíiǹ Sitaan kí líí, ú nyā sarkan.

⁸U yaa nyáńee, u làá dāá nīn yìiǹ ki mɔ́ntí duulinya jannaatiliŋ timbuliŋ, an dàkà yii Gɔɔgi nì Maagoogi, kí kpāfì-bi bí bɔ́ntí kujaau. Bi làá dāá nīn wīikí tikpil kii tiŋku gbandi bulee ní.

⁹Bi làá dāá kpátí kí gbí kitiŋ kɔkɔ, ní kí dāá léeń Unimbɔti nibul nì kitiŋ kin u néeńee pu, ama ŋŋmi ŋubɔ làá nyānní yilpu kí dāá wà bi-kɔkɔ.

¹⁰Ní bí dāá téé Sitaan un kíiĺ-bee kí tɔ̄ farwata[97] nì ŋŋmi bookun, laakin upeelee nì u-nyimɔmbɔnaatiliu bée. Niin ní bi làá nīn bí falaa poon ki yáliŋkíǹ bi-ba ŋwiimpu nì kunyeeu kí nīn pée cáa cá jaanjaan.

¹¹Boonee ní m ká dibeejapindi dikpaandi diba, ní kitiŋ nì kutagbɔŋu sáǹ un kā dibeejapindi gbanti puee nimbiin, baa ti ká-bi.

¹²Ní m ká bitaŋkpiibi, bikpaambi nì biwaabi yú dibeejalee nimbiin, ní bi cúú tigbɔn ki kpátì, ní ki gíti cúú kugbɔŋu kubɔ mun ki kpátì, kúǹ di sá dimaŋfal gbɔŋku. Ní bi sòon̄ bitaŋkpiibi bɔti ki táá nì bi nín túń atuun ŋin bi ŋmàn̄ ki ŋá kugbɔŋu poonee[98].

¹³Ní tiŋku gíiǹní binib bin u nìn yōoǹee, ní ŋkúm nì ditaŋkpiil gíiǹní bitaŋkpiibi bin kɔkɔ bi ŋúb́ee, ní bi sòon̄ báà ŋma bɔti tin u ŋée.

¹⁴Ní bi téé ŋkúm nì ditaŋkpiil ki tɔ́ ŋŋmi bookun, ŋŋmi booku gbanti di sá ŋkúnliliitiimee.

¹⁵Un kamaa yindi ní baa ká dimaŋfal gbɔŋku poonee, bi dù-u kí tɔ̄ ŋŋmi bookun ní.