Read Ntcham Apocalypse 21 Bible Online

Apocalypse 21 - Ntcham bible

Apocalypse 21

¹Boonee ní m ká kutagbɔmpɔŋu nì kitimpɔŋ. Kutagbɔŋkpikuu nì kitiŋkpikii wáŋkì ní tiŋku kaa ti bí.

²Ní m ká circir tiŋki Jeerusaleempɔɔn nyánní Unimbɔti cee yilpu ki kpákatìń ki ŋān̄ kii unimpucaan di fùl̄ nnyim ki cí u-calee.

³Ní m gbìl̄ nneen ŋubɔ nyánní dibeejal cee ki téeń mpɔn yii: «Kɔŋkɔnnee Unimbɔti ŋá u-kɔŋkooŋŋu binib cee. U nì bi di làá nīn kíǹ ki kóò, ní bí nīn sá u-nibul, ní úǹ ń nīn sá bi-Nimbɔtiu un làá nīn bí bi-ceeyee.

⁴Úǹ di làá dāá pítí bi-nyinnyim kɔkɔ, ŋkúm dāa gíti kpá, dinimbinaamandi nì ibiil nì iyaliŋki dāa gíti kpá, kun puee duulinyakpiki kpáaǹ tíǹ kɔkɔ ki jítì[99].»

⁵Ní un kā dibeejal puee bí yii: «Kpèèmaan, m fātìi ŋá tiwan kɔkɔ mpɔm,» ní ki bí-mi yii: «Á ŋmà-tì, kun puee tibɔti gbanti sá mbaamɔn ní ki máaǹ bí fōō-tì.»

⁶Ní u gíti bí-mi yii: «An kɔkɔ bɔ́ntì ki dóò! Man di sá Alfa nì Oomeega, ukílkaa nì ukúntikaa. Un ní nnyinnyoo yaa cááyee ń dāan̄ m-cee, m làá tīī-u nnyim min nyēeń dimaŋfal nyimbuliŋunee faalaa.

⁷Un yaa jáń ki jíńee ní m làá tīī tiwammɔntiil gbanti, ní ki dāa sá u-Nimbɔtiu, ní úǹ dāa sá man biki[100].

⁸Ama an yaa kíǹ bifaantidambee nì bin kaa yú nì Unimbɔti deedeeyee, nì bijɔkɔndambee, nì binikpɔliibee, nì bin ŋáań tilaakpaalee, nì bikpaŋkpantiibee nì biwaatootiliibee nì binyimɔndambee kɔkɔee, bíǹ laŋki di sá farwata ŋmibookun, niin di sá ŋkúnliliitiimee.»

⁹Ní ituun iluli ijoolkaa in bàà ŋúb́ nsambiyaamu falaabi gbí poonee kansikin ŋubɔ dɔ́miń ki bí-mi yii: «Dāan̄ ḿ dàkà-si unimpucaan, Dipibil nimpuu.»

¹⁰Ní Unimbɔti Fam dɔ́miń m-ni, ní ntuun yōoǹ-mi ki jɔ́m̀ dijoofɔkɔl[101] diba pu, ní ki dàkā-mi Jeerusaleem circir tiŋki kin nyánní Unimbɔti cee ki sìntīńee.

¹¹Kì nìn jìlìń Unimbɔti nyaaŋku ní. Kitiŋee jìl̀ kii ataŋkpanyaanee, a lì kii ataŋkpee ŋin jɔ̀m̀ pɔ́lpɔl ki wāĺ kílkilee.

¹²Ní digundi din bi máń ki māntì ki tú kitiŋee gbìfì ki fɔ̀kɔ̀ mun, ní ki cáá mpunyɔmu saalaa nì muli, ní ituun saalaa nì ili yú mpunyɔmu pu ki cí, ní bi ŋmàn̄ Isirayeel yab naakɔti saalaa nì tilee yiŋŋi ki nákáǹ mpunyɔmuee pu.

¹³Ní mpunyɔmu muta túĺ ŋwìiń nyalaŋki pú, ní muta túĺ ŋwìiń jeetilaŋki pú, ní muta túĺ ŋgan pú, ní muta túĺ ŋgiil pú[102].

¹⁴Ataŋkpee saalaa nì ali pu ní bi nìn máń kitiŋee gundi ki tɔ́kɔ́ǹ, ní ki ŋmàn̄ Dipibil kpambaliŋ saalaa nì alee yiŋŋi ataŋkpeeyee pu.

¹⁵Ní ntuun ŋun yú ki sòoǹ nì mee ŋúb́ tiwaŋŋmantikaal, sindaariya kaluuku, kí ŋmàntī kitiŋee nì ki-punyɔmmu nì ki-guŋŋi[103].

¹⁶Kitiŋee púuŋŋu nì ki-waaŋŋu ŋmà ní. Ntuunee dū sindaariya kaluukuee ki ŋmāntì kitiŋee púuŋŋu, ní ki ká ataŋkpee kutukub bili nì kulaafaau, míǹ ní ki-waaŋŋu nì ki-fɔkɔŋŋu mun nìn sá.

¹⁷Ní ŋu ŋmāntì digundi mun ní ki ká di-gbifiŋŋu meetab imuŋku ita nì biŋmoo, kii binib nín pée ŋmàntī puee ní ŋu ŋmāntì.

¹⁸Ataŋkpee ŋin jɔ̀m̀ pɔ́lpɔlee ní bi dū ki máń digundi, ní kitiŋ ki-ba kɔkɔ sá sindaariyamɔnti ki wāĺ kílkil kii digitilee.

¹⁹Ataŋkpee ŋin bi dūu kíĺ taapu ki nín máń digundee ki tɔ́kɔ́ǹee puee, bi dū ataŋkpanyaan ŋin bí tɔbinee ní ki nákáǹ. Bi nìn dū ataŋkpee saalaa nì ali ní ki kíĺ taapu. Ntantukupeekaa taŋkpeeŋi ní bi yíì yii jaaspi, ní ki yíì dililiitiil yii safiir, ní ki yíì ditataatiil yii kalseeduwana, ní ki yíì dinanaatiil yii eemeeroodi,

²⁰ní ki yíì diŋmooŋmootiil yii saarduwaan, ní ki yíì diluluutiil yii kɔɔrnaliini, ní ki yíì diluluútiil yii kriistooliiti, ní ki yíì dininiitiil yii beeriil, ní ki yíì diwawaatiil yii toopaasi, ní ki yíì disaalaatiil yii kriisooprasi, ní ki yíì saalaa nì dipeepeekaal yii iyasinti, ní ki yíì dijoolkaalee yii ameetiisti.

²¹Mpunyɔmu saalaa nì mulee sá ataŋkpanyaan ní. Kipunyɔkɔ kamaa nì ditaŋkpapiiŋkaal dimɔndi. Ní kitiŋ ki-ba daŋŋi sá sindaariyamɔnti ki wāĺ kílkil kii digitilee[104].

²²Ama maa ká kunimbɔtidii kitiŋ gbanti poon, kun puee ti-Dindaan Unimbɔti Mpɔŋkɔdaan nì Dipibil di sá kunimbɔtidii.

²³Kitiŋ gbanti kaa nyàab̀ ŋwìiń nì uŋmal ń ŋmíntí-kì i-walfiŋu, Unimbɔti nyooti di dāa sá-kì ŋwalifi, ní Dipibil dāa sá ki-fitilau.

²⁴Atimbun kɔkɔ dāa còom̄ ki-walifiŋun ní, ní duulinya bɔtiibi ń dāá cáań bi-gaajati niin.

²⁵Mpunyɔmu dāa pée wāā ní ŋwiimpu, baa pìintí, kun puee kunyeeu dāa kpá niin.

²⁶Bi dāa cāabìń atimbun jilmau nì ŋi-nyooti niin.

²⁷Ikpiti iba kaa dāa kóò niin, nì bitiŋwiiliibi nì binyimɔndambi, see bin baba yiŋŋi bi ŋmàn̄ Dipibil gbɔŋku kun sá dimaŋfal gbɔŋkuee nee[105].