Read Ntcham Apocalypse 22 Bible Online

Apocalypse 22 - Ntcham bible

Apocalypse 22

¹Ní ntuun dàkā-mi mbun ŋun pùub̀ nnyim min tìì dimaŋfalee. Nnyim gbanti wāĺ ní kílkil ní ki jìl̀ pàlpal, ní ki nyēeń Unimbɔti nì Dipibil beejal laŋki[106].

²Mì pùub̀ kitiŋ kansikin didandi pu. Ní dimaŋfal subu yú abuŋgbán liitil pu ki lòoǹ dibindi poonee saalaa nì mili, an dàkà yii uŋmal kamaa poonee bu lòoǹ diba. Bu-faati di cāantí atimbun weeŋyi.

³Mbusu dāa gíti kpá[107]. Unimbɔti nì Dipibil beejal làá dāá nīn bí kitiŋ poon ní, ní u-tɔntɔnliibi ń nīn nyɔ́ŋkí-u.

⁴Bi làá dāá wāl̀ u-nimbiin, ní bi dāa ŋmà u-yindi bi-yigbeeŋi pu.

⁵Kunyeeu kaa dāa gíti bí. Ubɔ kaa dāa gíti nyàab̀ fitila kí tūū án nīn wāĺ-u, kaa dāa gíti nyàab̀ ŋwìiń ń nyā bí nīn wāĺ, kun puee ti-Dindaan Unimbɔti di dāa sá-bi ŋwalifi, ní bí dāá nīn bí ki jīǹ dibeel kí nīn pée cáa cá jaanjaan[108].

⁶Ní ntuunee bí-mi yii: «Tibɔti nee sá ibaamɔn ní, ki máaǹ bí fōō-tì. Ní ti-Dindaan Unimbɔti un tìì u-Fam u-bɔnaatiliibee túnní u-tuuŋŋu ń dāá dàkà u-tɔntɔnliibi tin làá bàń kɔŋkɔnneeyee.»

⁷Ní Yeesu bí yii: «Pīlifì! M làá dāan̄ kɔŋkɔnnee. Un ŋúb́ tibɔti tin m sòon̄ bi ŋmàn̄ an kā kugbɔŋu nee poonee bí mmɔnni.»

⁸Man Yoowaneesi di gbìl̄ an bɔtee kɔkɔ ki wál̀-tì mun. M nín gbìl̄ ki wál̀-tì mimmee ní m lítì dicincibil ntuun ŋun dàkā-mi tibɔti gbanti kɔkɔ taapuee nimbiin kí jāam̀-ŋu.

⁹Ní ŋu bí-mi yii: «Taa ŋée, kun puee ma mun sá utɔntɔnli kii sisee ní, kii a-nabiyaamu mun nàatī Unimbɔti bɔtee, nì bin kɔkɔ tɔ́ tibɔti tin bi ŋmàn̄ kugbɔŋu nee poonee ní. Unimbɔti ní an sá á jāam̀.»

¹⁰Ní u bí-mi yii: «Á taa báĺ tibɔti tin bi nyántì ki dàkā-si tì kā kugbɔŋu nee poonee, kun puee ŋyunti ŋun an bɔtee kɔkɔ làá bàńee tóobiń.

¹¹Unikpiti ń mɔ̀tīí nīn ŋáań u-kpitii, ujɔkɔndaan ń mɔ̀tīí nīn ŋáań u-jɔkɔnti, deedeedaan ń mɔ̀tīí nīn ŋáań deedee tuuŋŋi, ní circirdaan ń mɔ̀tīí nīn bí circir[109].»

¹²Ní Yeesu bí-mi yii: «Pīlifì! M làá dāan̄ kɔŋkɔnnee kí nīn ŋúbiń tipaal, kí pà báà ŋma u-tundi nín sá puee.

¹³Man di sá Alfa nì Oomeega, an dàkà yii upeepeekaa nì ujoolkaa, ukílkaa nì ukúntikaa[110].»

¹⁴Bin fíntí bi-bɔkutiŋ ŋaa cáá tijɔkɔndi, ki máaǹ kí ŋmɔ́ dimaŋfal subil[111], ki làá dī mpunyɔmu kí kɔ́ kitiŋinee bí mmɔnneeee!

¹⁵Ní bijɔkɔndambi nì bikpaŋkpantiibi nì bin ŋáań tilaakpaalee nì binikpɔliibi nì biwaatootiliibi nì binyimɔndambee dāa yú kitiŋ kpaanceetiŋu.

¹⁶«Man Yeesu di túnní m-tuuŋŋu ŋú sòoǹ an bɔti m-nikitiŋ kansikin kí tùkù-ni. M sá Daafiidi naakookun ní, ki sá utaafaaŋmalbija un jìl̀ee[112].»

¹⁷Unimbɔti Fam nì Unimpucaan bí yii: «Dāan̄!» Bin mun gbìl̄ an bɔtee ń lì yii: «Dāan̄!» Un nnyinnyoo yaa cááyee ń dāan̄ kí fōō nnyim min tìì dimaŋfalee faalaa[113].

¹⁸Man Yoowaneesi di kpáafí bin kɔkɔ gbìl̄ tibɔti tin Unimbɔti sòon̄ an kā kugbɔŋu nee poonee yii: Un yaa gbéeǹ tibɔti nee poon tibee, Unimbɔti làá dāá gbéeǹ udaan ditafadaaldi din u ŋmàn̄ ki ŋá kugbɔŋu nee poonee.

¹⁹Un yaa tí bātì tibɔti gbanti poon tiba ki fée, Unimbɔti làá dāá fōō u-jandi din u cáá disubil din tìì dimaŋfalee poonee, ú taa kɔ́ circir tiŋki kin bɔti bi ŋmàn̄ kugbɔŋu nee poonee[114].

²⁰Úǹ Yeesu un bí ki sòoǹ nì ti an bɔtee di lī yii: «Iiin! M làá dāan̄ kɔŋkɔnnee.» Án lafun ŋá míǹ! Dāan̄, ti-Dindaan Yeesu[115]!

²¹Ti-Dindaan Yeesu ŋanti ń nīn bí ni-pu!