Read Ntcham Apocalypse 4 Bible Online

Apocalypse 4 - Ntcham bible

Apocalypse 4

¹U lī míǹ ki dóòyee, boonee m kpēē kutagbɔŋu puee, kipunyɔkɔ kiba cúu pīitì. Niinee nneen ŋun m bàà péé péé ki gbìl̄ ŋu pɔ̄ɔ̄ kpaŋkpam kii dikantándee bí-mi yii: «Jɔ̄mìń doo ḿ dàkà-si tin bí ki dòoń boonee.»

²Kpalaa niinee ní Circir Fam yōoǹ-mi ki jɔ́m̀ yilpu ní m ká dibeejal ní ubɔ kā dibeejalee pu.

³Udaan nimbiin jìl̀ ki ŋmóò làka laka kii ataŋkpamɔnti ŋin bi yíì jaspee nì ŋin bi yíì saarduwaanee, ní dikuntinyindi māntì ki tú dibeejalee ní ki jìl̀ pàlpal kii ditaŋkpal din bi yíì eemeeroodee[14].

⁴Ní abeejal mmuŋku nì anaa aba mun māntì ki tú dibeejalee, ní bikpilib bin kā an beejaliŋ gbanti puee pēē tiwampin ní ki cíkí sindaariya beefuulimmu.

⁵Dibeejalee ni ní itaaŋmɔŋmɔ nì ataadun nì dibintiŋkpaandi nyēeń ní iŋminaapool iluli tūū ki yú dibeejalee nimbiin ki tùm̀ kpaŋkpam, an di sá Unimbɔti Fam milulee[15].

⁶Tiŋku ubɔ dɔ̄ dibeejalee nimbiin ki wāĺ kílkil kii digitil nín wāĺ puee, kii ataŋkpee ŋin bi yíì kriistaalee nín jìl̀ puee. Dibeejalee jannaatiliŋ puee, tiwan tinaa tin cáá kufoouee yú kansikin ki māntì ki tú, ní ti-boon nì ti-nimbiinee kɔkɔ sá animbil[16] ŋma.

⁷Upeepeekaayee náań nì gbikinti, ní uliliitee náań nì unaja, ní utataatee nimbiin nì unil yɔŋu náań, ní unanaatee náań nì ukaalun yaa bíi ŋàaǹ u nín bí puee[17].

⁸Tiwan tinaa tin cáá kufoouee gbanti kɔkɔ cáá ifeen iluu iluu in pu animbil píńee poon nì boon. Ní bi lì ŋwiimpu nì kunyeeu kaa gbèentí yii: «Circir, circir, ti-Dindaan Unimbɔti di sá circir, úǹ di sá Mpɔŋkɔdaan, un nìn bí, ki gbíntì ki bí, ki làá dāan̄ee[18].»

⁹Ŋyunti ŋun ní tiwan tinaa tin cáá kufoouee yaa bí ki tìì jilma nì tinyool ki pàkà un kā dibeejal pu ki làá nīn bí kí nīn cá jaanjaanee,

¹⁰ní bikpilib mmuŋku nì binaayee lítí un kā dibeejal pu ki làá nīn bí jaanjaanee taapu ní kí nyɔ̄ŋkì-u, ní ki cíkití bi-fuulimmu ki lúkufí u-beejal taapu ní ki gà ilan ki pàkà-u yii:

¹¹«Sii ti-Dindaan ti-Nimbɔtiu, a máaǹ jilma nì tinyool nì mpɔn. Di sá yii sii di náań tikɔkɔ nì tikɔkɔ, ní ki là ní ki tīī tikɔkɔ dimaŋfal tí nīn bí.»