Read Ntcham Apocalypse 5 Bible Online

Apocalypse 5 - Ntcham bible

Apocalypse 5

¹Ní m ká un kā dibeejal puee ŋúb́ kugbɔŋu kubɔ u-ŋaŋgiilin bi kpáb́-ku, ní an ŋmàn̄ poon nì boon ní bi dū tiwampiiŋkaal tiluli ki bóob́ kugbɔŋuee[19].

²Ní ntuun ŋun cáá mpɔnee bíi báakí mpɔn yii: «Ŋma di cáá mpɔn kí bútí tiwampiiŋkaal nee kí kpátí kugbɔŋu nee dee?»

³Báà ubɔ nìn kpá yilpuɔɔɔ, ki kpá taapuɔɔɔ[20], ki kpá ditaŋkpiilin kí ŋmā kí kpátí kugbɔŋuee kí kàaǹ poon.

⁴Niinee ní m bíi sūǹ tikpil, kun puee ubɔ kaa nìn bí laaba ki ŋūǹ kí kpátí kugbɔŋuee kí kàaǹ tin bí poonee.

⁵Ní bikpilib mmuŋku nì binaayee kansikin ubɔ bí-mi yii: «Taa ti sɔ̄. Kpèè! Juuda naakookun gbikintiu un sá ubɔti Daafiidi naantiiuee[21] jáń ki jíń. Úǹ di làá ŋmā kí bútí tiwampiiŋkaal tiluli tin bi dū ki bóob́ kugbɔŋuee kí kpátí-ku kí kàaǹ.»

⁶Ní m kpēēyee, dipibil di yú bikpilibee nimbiin, dibeejal nì tiwan tinaa tin cáá kufoouee kansikinee, ki bí kii bi nìn kūū-dèe, ní dì cáá iyin iluli, animbil aluli. Animbil alulee di sá Unimbɔti Fam miluli min u tú duulinya kɔkɔnee[22].

⁷Dipibilee di dɔ́miń ki fōō un kā dibeejal puee ŋaŋgiiliŋun kugbɔŋu.

⁸U fōō kugbɔŋuee ki dóòyee ní tiwan tinaa tin cáá kufoouee nì bikpilib mmuŋku nì binaayee dɔ́miń ki lítì u-nimbiin, báà ŋma ŋúb́ kubeeu nì sindaariya sambiyaamu, ní talaalu gbí poon. Talaaluee di sá Unimbɔti nibul wimmeem.

⁹Ní bi bí ki gà nlampɔɔn ki nyɔ́ŋkí-u yii: «A máaǹ kí fōō kugbɔŋuee kí bútí tiwampiiŋkaal tin bi dūu bóob́ee. Kun puee bi kūū-si ní a-fatikuu dá anibul kɔkɔ nì isoon kɔkɔ nib, nì atimbun kɔkɔ nib nì ntimu kɔkɔ nib ki tīī Unimbɔti[23],

¹⁰ki dū-bi ki ŋá dibeel poon nib, bí nīn sá ti-Nimbɔtiu saraaŋaliibi kí jī dibeel duulinya poon.»

¹¹M bí ki kpèéyee, ní ki gbìl̄ ituun kucikukpaaŋŋu kutukub kutukub[24] wooku māntì ki tú dibeejalee nì tiwan tin cáá kufoouee nì bikpilibee.

¹²Ní bi gà ilan mpɔn yii: «Dipibil din bi kūūyee máaǹ bí tīī-dì mpɔn nì tigaajati nì iciin nì jilma nì tinyool nì ipaka.»

¹³Niinee ní m gbìl̄ tiwannáaŋkaal tin kɔkɔ bí yilpuee nì tin kɔkɔ bí taapuee nì tin gíti bí kitiŋ taapu taapuee nì tin bí tiŋkunee, tiwannáaŋkaal kɔkɔ bí ki gà ilan yii: «Un kā dibeejal puee nì dipibilee di máaǹ inyɔŋki nì ipaka nì tinyool nì mpɔn kí nīn pée cáa cá jaanjaan.»

¹⁴Ní tiwan tinaa tin cáá kufoouee kíí yii: «Ameeni!» Ní bikpilibee tātìi gbāaǹ ki nyɔ́ŋkì.