Read Ntcham Apocalypse 6 Bible Online

Apocalypse 6 - Ntcham bible

Apocalypse 6

¹M yú ki kpèéyee, ní Dipibil cúú tiwampiiŋkaal tiluli tin bóob́ kugbɔŋuee kubɔ ki bútì, ní m gbìl̄ tiwan tinaa tin cáá kufoouee kansikin kubɔ téeń mpɔn mpɔn kii ntaateenteenee yii: «Dāan̄!»

²M kpēēyee, ki ká utampiin, un kā-uee ŋúb́ butɔbu, ní bi cíkiǹ-u kibeefuulii, ní u búntì nì dijajil poon kí já kí jīń.

³Ní Dipibilee bútì tiwampiiŋkaal kuliliitiiu, ní m gbìl̄ kuwaŋu kun cáá kufoouee kuliliitiiu téeń yii: «Dāan̄!»

⁴Niinee ní utaamu ubɔ mun nyánní ki sá uman ní bi pú un kā u-puee mpɔn ú lēē ŋgbansɔŋfi kitiŋ pu binib ń nīn kù tɔb, ní bi dū kitaataajikpaaŋŋi ki tīī-u.

⁵Ní Dipibilee bútì tiwampiiŋkaal kutataatiiu, ní m gbìl̄ kuwaŋu kun cáá kufoouee kutataatiiu téeń yii: «Dāan̄!» M kpēēyee, ki ká utambɔn[25], un kā-uee ŋúb́ saniya u-ŋaan.

⁶Ní m gbìl̄ nneen ŋubɔ sòon̄ní tiwan tinaa tin cáá kufoouee kansikin ki lī yii: «Dū saniya kí ŋmàntī bilee kiiloo ubɔ ŋwiin ŋubɔ tundi paati, kí ŋmàntī ɔɔji kiiloo bita ŋwiin ŋubɔ tundi paati. Ama á taa gbēē ŋkpam nì ndaam pu.»

⁷Ní Dipibilee tí bútì tiwampiiŋkaal kunanaatiiu ní m gbìl̄ kuwaŋu kun cáá kufoouee kunanaatiiu téeń yii: «Dāan̄!»

⁸M kpēēyee, ki ká utaamu un pīiǹ fùuuyee, ní bi yíì un kā-uee yii Ŋkúm ní Ditaŋkpiil nóó-u. Bi nìn tīī-bi mpɔn yii bí dū ntàataajimu nì ŋkùm nì bìlbil kúm kí kpɔ̀ kitiŋ pu nib kɔkɔ yaa yākatì minaayee dijandi diba pu, ní tipeecuncuti tin bí kitiŋ puee ń cūtì binib[26].

⁹Ní u cúú tiwampiiŋkaal kuŋmooŋmootiiu ki bútì. M kpēēyee, ki ká nsaraafan ceeyee bin bin nìn sòoǹ Unimbɔti bɔti ki lèekī seerab bi kūū-bee nammu,

¹⁰ní bi bí ki tátí mpɔn yii: «Ti-Dindaan un sá circir ki sá mbaamɔndaanee, a làá cīití kí tin sāā ŋyunti ŋulɔŋu ní kí sòoǹ duulinya yab bin kūū-tee bɔti kí dáaĺ bi-tafal ní?»

¹¹Niinee ní bi cáań abɔkutipiin ki pēeǹ bi-kɔkɔ ní ki bí-bi yii bí dá láá kàl̄ kí ŋùŋfì fiii, kí nīn cí ŋyunti ŋun ní bi yaa láa kūū bi-tɔntɔnjutiibi nì bi-nabiyaamu mun kíǹ duulinyan bi mun dɔ́miń ki kútì bi-puee.

¹²Ní Dipibilee tí cúú tiwampiiŋkaal kululuutiiu ki bútì, ní kitiŋ cīŋkì ŋkpitim pu, ní ŋwìiń fōō ki bɔ̄ntì kii satabɔnee, ní uŋmal mántì cínciŋ kii fatikuee,

¹³ní iŋmalbijaa tìfī yilpu ki lítí a lì kii kubuŋkpaaŋŋu nín tìfī asubigaan ki lúkufí puee.

¹⁴Ní kutagbɔŋu wáŋkì a lì kii kukampeeu ní bi kpáb́ ki yōoǹee, ní ajoon nì ntimu mun nnyim māntì ki túee kpīkitì[27].

¹⁵Ní duulinya bɔtiibi nì biyidambi nì bisoojakpilib nì bigaajab nì ipɔndambi nì iyumbu nì bin tɔ́ bi-bee, báà ŋma sáń ki bāal̀ afaginni nì titaŋkpanaakɔtin ajoon pu,

¹⁶ní binibee lì ajoon nì ataŋkpee yii: «Lítímaan kí bìin̄ ti-pu, un kā dibeejal puee ń taa ká-ti, Dipibil mun ŋuul ń taa bàń-ti.

¹⁷Kun puee ŋwiin ŋun sá diŋuukpaandi wiiŋŋuee bāań. Ŋma di sá-u kí yūĺ[28]?»