Read Ntcham Apocalypse 7 Bible Online

Apocalypse 7 - Ntcham bible

Apocalypse 7

¹Míǹ boonee ní m ká ituun inaa yú duulinya jaŋŋi naatil kɔkɔ pu, ní ki ŋúb́ duulinya buŋku naatil[29], án nín làá ŋá pu kubuŋu ń taa ti jītí tiŋku puɔɔɔ, kí taa ti jītí kitiŋ puɔɔɔ, kí taa ti jītí busubu báà bubɔ puee.

²M gíti kpēēyee, ki ká ntuun ŋubɔ nyánní ŋwìiń nyalaŋki pú ki ŋúb́ Unimbɔti un bí dimaŋfalinee daaŋku, ní ki téeń ki tùkū ituun inaa in fōō mpɔn kí dāá bīil̀ kitiŋ nì tiŋkuee yii:

³«Ní taa láá ŋá kitiŋ nì tiŋku nì isufi tiba kí nīn cí ŋyunti ŋun ti yaa láa dū tidaandi ki nákáǹ ti-Nimbɔtiu tɔntɔnliibi yigbeeŋi pu ki dóòyee[30].»

⁴Ní m gbìl̄ bi lī bin bi nákáǹ Unimbɔti daaŋku bi-yigbeeŋi puee wíiŋŋu nyɔkɔm, yii bi sá binib kutukub dilaataal nì imuŋku ili nì binaa, ní ki nyánní Isirayeel naakɔti kɔkɔ poon.

⁵Bi dáań Juuda naakookun yab binib kutukub saalaa nì bili, ki dáań Rubeen naakookun yab binib kutukub saalaa nì bili, ki dáań Gaadi naakookun yab binib kutukub saalaa nì bili,

⁶ki dáań Aseer naakookun yab binib kutukub saalaa nì bili, ki dáań Neefitalii naakookun yab binib kutukub saalaa nì bili, ki dáań Manasee naakookun yab binib kutukub saalaa nì bili,

⁷ki dáań Simeeyɔn naakookun yab binib kutukub saalaa nì bili, ki dáań Leefii naakookun yab binib kutukub saalaa nì bili, ki dáań Isakaar naakookun yab binib kutukub saalaa nì bili,

⁸ki dáań Sabulɔn naakookun yab binib kutukub saalaa nì bili, ki dáań Jooseefi naakookun yab binib kutukub saalaa nì bili, ki dáań Beenjameen naakookun yab binib kutukub saalaa nì bili.

⁹Míǹ boonee, m kpēēyee, ní ki ká nnibiim tikpil tikpil, ubɔ kaa ŋūǹ kí kàaǹ-mì. An nìn sá anibul kɔkɔ nì atimbun kɔkɔ nib nì ntimu kɔkɔ nib nì isoon kɔkɔ nib. Bi nìn yú dibeejal nì Dipibil nimbiin ki pēē abɔkutipiin káŋkaŋ ki ŋúb́ tikpakpati bi-ŋaan.

¹⁰Bi nìn tátí mpɔn yii: «Difiil nyēeń ti-Nimbɔtiu un kā dibeejal puee nì Dipibil cee ní.»

¹¹Ní ituun in māntì ki tú dibeejalee, nì bikpilibee nì tiwan tinaa tin cáá kufoouee, tātìi dōoǹ dicincibil dibeejal taapu ní ki bíi nyɔ́ŋkí Unimbɔti,

¹²ní ki lì yii: «Ameeni! Ti-Nimbɔtiu di yì inyɔŋki nì jilma nì iciin nì ijaam nì tinyool nì mpɔn kí nīn pée cáa cá jaanjaan! Ameeni.»

¹³Ní bikpilibee kansikin ubɔ bālifì-mi yii: «Binib bin pēē abɔkutipiin nee sá bilab ní? Bi nyánní la ní?»

¹⁴Ní m kíí-u yii: «M-Dindaan, sii di nyí-bi.» Ní u fātì ki bí-mi yii: «Bin nyánní falaakpaŋkpaan poonee dee[31]. Bíǹ di fíntì bi-bɔkutiŋ ki dū-ŋi ki ŋá Dipibil fatikuun ŋi píil̀ káŋkaŋ.

¹⁵An pu ní bi yú kunimbɔtidiin Unimbɔti beejal nimbiin ki jáaḿ-u ŋwiimpu nì kunyeeu, ní un kā dibeejal puee làá nīn bí bi-cee kí mɔ̄tì bi-pu.

¹⁶Ŋkùm kaa dāa gíti cútí-bi, nnyinnyoo kaa dāa gíti cútí-bi, diwiŋkaŋkambil kaa dāa wù-bi, ní kutuntuŋu kubɔ kaa dāa bí niin.

¹⁷Kun puee Dipibil din yú dibeejal kansikinee di dāa sá bi-kpàaliu, ní kí cáá-bi kí cùnnì nnyim min tìì dimaŋfalee laŋki, ní Unimbɔti ń pítí bi-nyinnyim kɔkɔ[32].»