Read Ntcham Apocalypse 8 Bible Online

Apocalypse 8 - Ntcham bible

Apocalypse 8

¹Dipibil bútì tiwampiiŋkaal kululuútiiuee, ní yilpu ŋmíl̀ fɔ́ŋfɔŋ díkí diki ki tin cáa sāā kukúluu dijandi pu.

²Ní m ká ituun iluli in yú Unimbɔti nimbiinee, ní bi tīī-i akantán aluli.

³Ní ntuun ŋubɔ mun dɔ́miń ki yúl̀ nsaraafan cee ki ŋúb́ sindaariya sambiki kin poon bi ŋáań talaalu ki tùutēe. Ní bi tīī-ŋu talaalu tikpil yii ŋú tūū kí kpáaǹ Unimbɔti nib wimmeem kí ŋá saraa kí tīī Unimbɔti, sindaariya saraafaŋŋu ŋun yú dibeejal nimbiinee pu[33].

⁴Ní talaalu un ntuunee tūūyee nyiim yíkí ŋu-ŋaan ki jɔ́ḿ Unimbɔti cee ki kpáaǹ Unimbɔti nib wimmeem.

⁵Ní ntuunee yōoǹ kisambiki kin poon bi ŋáań talaalu ki tùutēe ní ki pātì ŋŋmi nsaraafan pu ki gbéeǹ ki-poon, ní ki dūu lúkuń duulinyan. Niinee ní m gbìl̄ dibintiŋkpaandi nì ataadun pu, ki ká an bíi ŋmóò kii utaayee ní kitiŋ cīŋkì[34].

⁶Ní ituun iluli in ŋúb́ akantánee bɔ́ntì kí búń i-kantáŋŋi[35].

⁷Ntuun mpeepeekaa búń ŋu-kantándi ní ataanyiŋkumbil nì ŋŋmi ŋmàl̄ fatiku ki nyánní yilpu ki lítí kitiŋ, ní kitiŋ nín dɔ̄ ki wīikí puee yaa yākatì mitee dijandi lēē ki wùn̄, ní isufi nì timool nín dɔ̄ ki wīikí puee yaa yākatì mitee, an lēē dijandi ki wùn̄[36].

⁸Ní ntuun nliliiti búń ŋu-kantándi, ní an bí kii dijookpaandi di fōō ŋŋmee, ní bi dūu lúkuń tiŋkun, ní tiŋku nín dɔ̄ ki wīikí puee yaa yākatì mitee dijandi kpántì fatiku.

⁹Ní tiwan tin cáá kufoou ki bí tiŋkunee nì ti-nyɔkɔmee yaa yākatì mitee, dijandi lēē ki kpíì poon, ní meelab nì bi-nyɔkɔm bin bí tiŋkunee yaa yākatì mitee, dijandi lēē poon ki nāaǹ.

¹⁰Ní ntuun ntataatee búń ŋu-kantándi, ní uŋmalbija ubɔ nyánní yilpu ki wù kii ŋŋminaapoolee ki dɔ́miń ki lítì amɔɔ nì inyimbul yaa yākatì mitee dijandi diba pu.

¹¹(Bi yíì uŋmalbijee yii, Ntuntun.) Inyiŋfi jandi din pu uŋmalbijee lítèe túŋkì ní binib tikpil nyùn̄-mì ní ki kpíì, kun puee mì nìn tū.

¹²Ní ntuun nnanaatee búń ŋu-kantándi, ní ŋwìiń yaa yākatì mitee, dijandi fōō ki bɔ̄ntì, ní uŋmal yaa yākatì mitee, dijandi fōō ki bɔ̄ntì, ní iŋmalbijaa yaa yākatì mitee, dijandi fōō ki bɔ̄ntì, ní dibɔmbɔndi jéetì kitiŋ pu ŋwiin yaa yākatì mitee dijandi pu, ní uŋmal nì iŋmalbijaa kaa ti ŋmíntí kunyeeu yaa yākatì mitee, dijandi diba pu[37].

¹³M bí ki kpèéyee, ní ki gbìl̄ ukaalun ubɔ nín ŋàaǹ yilpu yilpu ki tátí mpɔn yii: «Mbusu, mbusu, mbusu gíti dɔ̄ ki cí kitiŋ pu nib ŋyunti ŋun ituun ita in kíǹee yaa láa búń i-kantáŋŋee.»