Read Ntcham Apocalypse 9 Bible Online

Apocalypse 9 - Ntcham bible

Apocalypse 9

¹Ní ntuun ŋŋmooŋmootee búń ŋu-kantándi, ní m ká uŋmalbija ubɔ nyánní yilpu ki lítì kitiŋ ní bi dū mbookpaan saafiiu ki tīī-u.

²Ní u cúú mbookpaanee ki pīitì, ní ŋŋminyiim nyēeń poon tikpil tikpil a lì kii kipaai kikpaŋkpaaŋŋinee[38], ní ki dūu bīiǹ ŋwìiń pu ki kpáaǹ kubuŋu mun pu.

³Ní inaakitoon nyánní ŋŋminyiimee poon ki kpátìi gbí kitiŋ pu, ní Unimbɔti tīī-i mpɔn í nīn júntí binib án nīn wàlifī kii inoomee[39].

⁴U nìn tùkū-i yii í taa jú kumoou, kí taa jú nsuwaamu, kí taa jú isukpaan, ama í nīn pée júntí binib bin kaa cáá Unimbɔti daaŋku bi-yigbeeŋi puee,

⁵ní ki bí-i yii í taa nín̄ júntí ki kù binib, ama í nīn júntí-bi bi yáliŋkí áli iŋmal iŋmoo. I-looti weeŋyi sá kii unoom yaa jú unil an nín wù u yáliŋkí puee ní.

⁶Iwiin gbantee, binib dāa nyàab̀ ŋkúm ń dāá kpɔ̀-bi, ama baa làá dāá ká-mì. Ŋkúm ní bi dāa néeń, ama ní ŋkúm ń dāá sāǹ kí wàatī-bi[40].

⁷Inaakitoonee bimbim náań nì kii itaamu in bi bɔ́ntì i cá kujaauee ní, ní i cáá tiba i-yiliŋ pu an náań nì sindaariya beefuuliiki, ní i-nimbiin náań nì binib nimbiin,

⁸ní i-yikpiti fɔ̀kɔ̀ kii binimpoobi yikpitee ní i-nyiŋŋi náań nì gbikinti nyiŋŋi.

⁹Ní i cáá ajanjabɔkuti i-biŋŋi pu an náań nì tikúti. I yaa ŋàaǹee, i-feeŋyi bintindi bí kii itaamu kupaau nín dátí tɔrɔkub ki sáń ki jáà kujaau puee bintindi ní[41].

¹⁰I-juuŋi nì i-looti bí kii inoomee ní i cáa júntí binib kí tin cáá sāā iŋmal iŋmoo.

¹¹Inaakitoon gbanti bɔtiu di sá ntuun ŋun kā kubookpaaŋŋun bi yíì-ŋu eebru sooŋyin yii «Abadɔn», ní greeki sooŋyin yii «Apooliyɔn», an taapu sá yii «Un nàantée».

¹²Mbusupeepeekaa dɔ́miń ki ŋá ki jítì, an kíǹ mbusub bili mun ń dāan̄ dee.

¹³Ní ntuun nluluuti búń ŋu-kantándi, ní m gbìl̄ nneen ŋubɔ nyánní iyin inaa in nìn cɔ́ sindaariya saraafaŋŋu ŋun yú Unimbɔti nimbiinee ni.

¹⁴Ní nneenee lī ntuun nluluuti ŋun ŋúb́ dikantándee yii: «Cùú gbìntī ituun inaa in bi bóob́ i kā dimɔɔl din bi yíì Eefiraatee kí líí.»

¹⁵Ní bi gíiǹ ituun inaa in bɔ́ntì ki cí i-kúluku nì i-wiiŋŋu nì i-ŋmaliu nì i-bindi din bi làá líí-i í lēē duulinya poon binib yaa yākatì mitee diba pu kí kpɔ̀ee ki líì ŋyunti ŋun bi yóoǹee deedee.

¹⁶Ní m gbìl̄ bi lī yii i-soojab bin kā itaamu puee sá miiliyɔmbi kulaafaau ní.

¹⁷M nín ká i-soojab bin kā itaamu puee nín bí puee sèé: bi-janjabɔkutiŋ máǹ kii ŋŋmee, ní iba yaŋ jìl̀ kii ataŋkpamɔnti ŋin bi yíì iyasintee, ní iba yaŋ bɔ̀ǹ kii kunaaluŋuee, ní iba yaŋ bí kii kpalkuee. Itaamu yiliŋ bí kii gbikinti yilee, ní ŋŋmi nì nnyiim nì farwata nyēē i-nyɔmmun.

¹⁸Ŋŋmi nì nnyiim nì farwata un nyēē i-nyɔmmunee di sá ditafadaaldi din bi dūu kūū duulinya nib yaa yākatì mitee dijandi dibee.

¹⁹Di sá itaamuee pɔŋŋu kā i-nyɔmmun nì i-juuŋin ní, ní i-juuŋi náań nì ikoobu, ní i cáá ayil. An ní i cáa ŋáań binib asaluu.

²⁰Binib bin kíǹ, ditafadaaldee kaa kūūyee, baa dū bíǹ bi-ba nín ŋá tiŋyee ki fá, bi gbíntì ki jáaḿ arasiniibi nì awaa ŋin bi dū sindaariya nì animbil kúti nì tasa kúti ki mɔ́ɔ́yee, awaa ŋin sá ataŋkpee nì isufee. Tiwan gbanti kaa wāĺ, kaa gbìl̄, kaa ŋūǹ kí còom̀ mun[42].

²¹Baa dū bi-nikpaakooŋu, nì bi-nyɔɔjil, nì bi-laakpaati nì bi-naayufii ki fá.