Read Ntcham Ruth 2 Bible Online

Ruth 2 - Ntcham bible

Ruth 2

¹Nawoomii nìn cáá kpeeja ubɔ u nìn sá unikpaan ní ki cáá tigaajati tikpilku. U nìn sá Eeliimeeleeki naakookun ní bi nìn yíì-u yii Boowaasi.

²Dalbee ní Ruuti kimoowaabibikee bí u-beel Nawoomii yii: «M bàà là kí cù tisatin kí kpèè ulaŋŋaŋfiti ubɔ yaa táá sɔ̄ m-saai kí kíí ḿ nīn pá u-boon kí lūlifì tijin udaan kpaabun.» Ní Nawoomii kíí-u yii: «A ŋūǹ kí nīn cá, m-bisal[10].»

³Niinee ní Ruuti nín cá ki bàn̄ ki kɔ́ bukpaa bubɔ poon ní ki páaǹ bijincaliibi boon ki bíi lúlifí. Unimbɔti bɔtee, Boowaasi un nì Eeliimeeleeki pēē kunaakoouee di yì bukpaa gbanti.

⁴An kútì fiiiyee ní Boowaasi nyánní Beetileem kitiŋin ki bāań, ní ki jáam̀ bijincaliibi yii: «Ti-Dindaan ń nīn bí ni-cee!» Ní bi kíí-u yii: «Ti-Dindaan ń bìin̄ a-boon[11]!»

⁵Ní Boowaasi bālifì u-tɔntɔnliu un kpèé bijincaliibee yii: «Kin unimpusapɔɔn nee úǹ sá ŋma?»

⁶Ní utɔntɔnli un kpèé bijincaliibee kíí-u yii: «An sá kimoowaabibiki kin nóoń Nawoomii ki nyánní Moowaab satinee.

⁷U dɔ́miń ní ki mēē nsan ki lī yii: <M bàà là kí páań bijincaliibi boon kí nīn lúlifí tijin tin kīntí bi-boonee.> Doooo kutaafaau u nín pée bāań ki yú puee ní u yú nee. Waa ŋman pée kɔ́ ki kāl̀ kibiŋ taapu kí ŋùŋfì gba!»

⁸Niinee ní Boowaasi bí Ruuti yii: «Pīlifì m-bisal! Á taa lì yii a làá gíti cù kusaau kubɔn kí lūlifì tijin, kí taa pée sútí kí cù laaba gba. Á gbíntí m-saakun doo kí dū a-ba kí nákáǹ m-sapɔmbi.

⁹Nín̄ pée kpèé bijincaliibi nín cēē ki cá puee ní kí nīn pá bisapɔmbi boon ki lúlifí. M kpáafì m-naacimpɔmbi yii bí yàntī á nīn lúlifí, bí taa páb́-si! Nnyinnyoo yaa cáá-see, á cù kí jōō nnyim min bitɔntɔnliibi lúń ki sītì aboonnee kí nyɔ̀.»

¹⁰Niinee ní Ruuti gbāaǹ Boowaasi nimbiin ki tīntì u-yil taapu taapu ní ki bālifì-u yii: «Mana ní a kíí ki dàkā man un sá kinicambiki nee kulaŋŋaŋfitiiu ki ŋá-mi tiŋan míǹ na?»

¹¹Ní Boowaasi kíí-u yii: «Bi pée máafì-mi tiŋan tin kɔkɔ a ŋá ki tīī a-beel doooo a-cal nín lántì dimaŋfalee. M gbìl̄ a nín kíí ki fá a-baa nì a-na ki yíkìń kitiŋ kin pu bi màl̄-see, ki nóoń a-beel ki nín dòoń u-tiŋki kin ní saa láá pée nyí ki ká ŋwindalee poonee.

¹²Ti-Dindaan di làá pà-si tiŋan tin a ŋée paati! Ti-Dindaan Isirayeel Nimbɔtiu un a sáǹní ki dɔ́miń ki kɔ́ nee ń téeǹ-si tiŋan tin kɔkɔ a ŋá ki tīī a-beelee!»

¹³Niinee ní Ruuti fātìi bí-u yii: «Ukpil, a ŋá-mi tiŋan tikpilku. Á nīn pée ŋúb́-mi míǹ, á taa dū-mi kí fá! Di sá yii a sòon̄ nì man a-tɔntɔnliu an kɔ́-mi, ki tīī-mi kunyannyaau, ki sɔ̄ŋkì m-pɔbil. Ama maa kpáàa bàn̄ a-tɔntɔnliibi binimpoobi kansikin báà ubɔ gba!»

¹⁴Ŋyunti ŋmāntì bi làá jī tijinee ní Boowaasi bí Ruuti yii: «Dāan̄ kí kàl̄ tí jī tijin. Dāá gíí kpɔnɔ kí sēē tikun kí ŋmɔ́.» Niinee ní Ruuti cūtìi kāl̀ ki kɔ́ĺ bijincaliibi ní Boowaasi lēē ɔɔji fiŋyi in bi púĺee ki tīī-u. Ruuti fōō ki ŋmēem̀ ki ŋmɔ́ ki díkí ní an kíǹ, ní u dūu kpáafì.

¹⁵Ruuti jíń tijin ki dóòyee ní ki yíkìi nìkī ki bíi lúlifí. Ní Boowaasi tīī u-naacimbi mara ki lī-bi yii: «Ní yàntī ú nīn lúlifí ki kpáaǹ ni nín cēē ɔɔji ki bīil̀ ipɔ̀n pu kí dāá nín kóoǹee kansikin, ní taa pée lì-u tiba an bīil̀ u-pɔbil.

¹⁶Ní nīn lèekī ifin in ni cēē ki bīil̀ kí dāá nín kóoǹee iba gba ki bīil̀-u ú nīn yòontí, ní taa wòoǹ-u.»

¹⁷Míǹ ní Ruuti gbíntì Boowaasi saakun ki lúlifì ní ŋwìiń dāa dūu jéetì. U nìn gbáń ɔɔji un u lúlifèe kɔkɔ ki cāatì ki ŋmāntì, ní ki ká kii asambil saalku nyɔkɔm[12].

¹⁸U yōoǹ ki túǹ ki cáa nín kùǹ mmɔŋki ní ki bàn̄ ki dūu dàkā u-beel Nawoomii, ní ki dū tijin tin u jíń ki kíǹee mun ki tīī-u.

¹⁹Ní u-beel bālifì-u yii: «La ní a lúlifìń mimmee? La ní a cūtìi túń ditundi díǹ ní? Unimbɔti ń bìin̄ udaan un súń a-saayee boon!» Ní Ruuti tùkū u-beel unil un cee u cūtì ki túń ditundi yaadal gbantee ki lī yii: «Uninja un cee m túń ditundi díǹ neeyee yindi di sá Boowaasi.»

²⁰Niinee ní Nawoomii bí u-coopu yii: «Ti-Dindaan un dàkà timbi binifoobi ki kpáaǹ bitaŋkpiibi u-ŋanti kaa gbèentée ń bìin̄ unil gbanti boon!» U lī mimmee ní ki kútì yii: «Uninja gbanti sá ti-niliu ubɔ ní. U sá ti-dicaŋku poon bin bin cáá nsan kí fōō-ti kí ŋúb́ee kansikin ubɔ ní.»

²¹Ní Ruuti kimoowaabibiki fātìi kūbitì ki bí yii: «U gíti lī-mi yii: <Á dū a-ba kí nákáǹ m-tɔntɔnliibi binimpoobi kí taa pée sútí ki wàatī-bi kí tin sāā ŋyunti ŋun bi làá cā m-kpaajinti kɔkɔ kí dóóyee.>»

²²Niinee ní Nawoomii bí u-coopu Ruuti yii: «Tiŋman ní, m-bisal! Pée dū a-ba kí nákáǹ u-tɔntɔnliibi binimpoobi kí taa cù unifantanti ubɔ saakun bi dāa ŋáań-si ntoom.»

²³Ní Ruuti gbíntì Boowaasi tɔntɔnliibi binimpoobi cee ki lúlifì tijin ní bi dāa cáń ɔɔji nì bilee[13] ki dóò. U nìn pée gbíntìi kóò u-beel Nawoomii cee ní.