Read Ntcham Ruth 4 Bible Online

Ruth 4 - Ntcham bible

Ruth 4

¹An yuntiŋuee Boowaasi nìn nín jɔ́ḿ kitiŋ punyɔkɔpu[15] ki cūtìi kāl̀ niin. Kpalaayee kinabiki kin nì Eeliimeeleeki pēē kiŋkiŋ, Boowaasi sòon̄ u-bɔtee di jītée. Ní u yíiń-u ki bí yii: «Kinabiki, pàatīń kí dāá kàl̄ yéèyaa!» Ní kijapaayee pāatì ki kāl̀.

²Ní Boowaasi yíiń bitindaŋkpilib kansikin binib saalaa ní ki bí bi mun yii: «Ní kàl̄maan doo!» Ní bi mun kāl̀.

³Ní u bí uninja un nì Eeliimeeleeki pēē kiŋkiŋee yii: «Nawoomii nyánní Moowaab satin ki fātìi bāań ki bíi nyáfí ti-nabiki Eeliimeeleeki kpaatanti.

⁴Ní m bí yii m máaǹ kí yàntī á gbìl̄ ní kí kpáàá kpòotī-si yii á kíí kí fōō tikpaatan gbanti bitindaŋkpilib nì binib bin bí doo nee kɔkɔ nimbiin. A yaa kíí ki làá fōō, á fōō. A yaa tí nyí yii aa là kí fōō, á tùkù-mi ḿ nīn nyí, kun puee sii di sá upeekaa ki cáá nsan kí fōō tikpaatan gbanti, sii boonee man di pá.» Ní kijapaayee kíí Boowaasi yii: «Iiin, m kíí ki làá fōō!»

⁵Ní Boowaasi bí-u yii: «Daliŋkin ní a làá fōō kusaau gbanti Nawoomii ŋaanee, á nīn nyí yii a fōō ki kpáaǹ kimoowaabibiki Ruuti ukpiipu dee, u-cal un kaa ti bí ti-kansikinee yindi ń taa kúntí, ní u-kpaatanti tin sá u-fakalee ń gbíntí u-naakookun kí nīn cá jaanjaan.»

⁶Niinee ní kijapaayee bí Boowaasi yii: «An yaa sée man kaa làá ŋmā kí fōō. Di sá yii m-kpátam boonee, án dāa ŋūǹ kí cáań digìńdi mama m-ba fakal pu. Míǹ puee a ŋūǹ kí yūĺ man yil pu kí fōō ti-nabiki wanti tin man bàà cáá nsan ki jítiǹ sii kí fōōyee, man kaa ti làá ŋmā kí fōō-tì!»

⁷Too njaminee, Isirayeel yab ubɔ yaa làá nìn fàtīí fōō a-nabiki kiba wanti àá u nì ubɔ yaa làá nìn kpántí tɔb tiwanee, kí dàkà yii bi gbìlīǹ tɔbee, bi-kansikin ubɔ tákatí u-naatakal diba ní kí dūú tīī u-juti. Isirayeel tiŋkinee, an di nìn sá kudaaŋŋu yii bi sòon̄ ki bɔ́ntì tibɔti ki gbìlīǹ tɔb.

⁸An pu ní kijapaayee nín tùkū Boowaasi yii u ŋūǹ kí yūĺ úǹ yil pu kí fōō bi-nabiki wantee, u tákatì u-naatakal diba ki dūu tīī Boowaasi.

⁹Niinee ní Boowaasi bí bitindaŋkpilib nì samaa kɔkɔ yii: «Ni-kɔkɔ sá biseeradambi díǹ wiiŋŋu nee yii m fōō Nawoomii ŋaan Eeliimeeleeki nì u-jipɔmbi Maalɔn nì Kiiliyɔn wanti kɔkɔ kí nīn ŋúb́.

¹⁰M fōō ki kpáaǹ Ruuti kimoowaabibiki, Maalɔn nimpuu ukpiipu, utaŋkpiil wanti ń gbíntí u-naakookun ní u-yindi ń taa wāŋkì u-nabiyaamu kansikin, kí taa wāŋkì u-tiŋki punyɔkɔpu mun. Ni sá biseeradambi díǹ wiiŋŋu nee yii m lafun ŋá mimmaaa?»

¹¹Ní bitindaŋkpilibee nì samaa un kpáfì kitiŋ punyɔkɔpuee kɔkɔ kíí-u yii: «Iiin, ti sá biseeradambi yii a ŋá míǹ! Ti-Dindaan ń yàntī unimpu un a làá fōō ú kɔ́ a-dicaŋkun nee ń nīn sá kii Raseel nì Leeya[16] bin liitil náań Isirayeel nibulee. Ti mèé yii á kpántí unikpaan Eefiraata tiŋkin ní kí nyā diyiŋkpaandi Beetileem tiŋki kɔkɔn.

¹²Mbiyaamu mun ní ti-Dindaan làá yàntī unimpusapɔɔn gbanti ń màal̀ kí tīī-see puee, a-naakooku ń nīn sá kii Peereesi[17] un un Taamaar nìn màl̄ ki tīī Juudayee naakooku!»

¹³Míǹ ní Boowaasi fōō Ruuti ukpiipu ní u kpántì u-nimpuu. U nì Ruuti kpáfèe ní ti-Dindaan bīiǹ Ruuti boon u cáá dipool ní ki dūu màl̄ kibininjabiki.

¹⁴Ní Beetileem nimpoobi bí Nawoomii yii: «Tí nyɔ̄ŋkìmaan ti-Dindaan! Díǹ pu nee waa ŋmīntì-si un làá dāá ŋúb́-si fool boonee. U làá dāá nyā diyindi Isirayeel tiŋki kɔkɔn!

¹⁵Úǹ di làá yàntī a-bimbim ń kpántí a-maŋfal wiiŋyi in poon a bí nee, ní kí dāá nīn kpèé-si a-puti poon fool boon. An sá a-coopu un néeń-si tikpil, ki jítiǹ jipɔmbi biluli puee di màl̄ naantiiu gbanti ki tīī-si.»

¹⁶Ní Nawoomii yōoǹ kibikee ki péé u-taaŋi pu ki kíĺ ki bíi lòó-kì.

¹⁷Ní u-nimpujutiibi sòon̄ ki nāatì tɔb kibikee bɔti ki lī yii: «Bi màl̄ kibininjabiki ki tīī Nawoomii!» Bi nìn pú kibikee diyindi yii Oobeedi. Úǹ di dāa màl̄ Isayi, Daafiidi baa.

¹⁸Peereesi maaliŋun yab nín nóó tɔb puee sɔ̀. Peereesi màl̄ Eesirɔn

¹⁹ní Eesirɔn màl̄ Raam ní Raam màl̄ Amiinadaab

²⁰ní Amiinadaab màl̄ Naasɔn ní Naasɔn màl̄ Salima

²¹ní Salima màl̄ Boowaasi ní Boowaasi màl̄ Oobeedi

²²ní Oobeedi màl̄ Isayi ní Isayi màl̄ Daafiidi.