Read Ntcham 1 Samuel 10 Bible Online

1 Samuel 10 - Ntcham bible

1 Samuel 10

¹Samiyeel nìn ŋúb́ kikpalbabiki ŋkpam kā poon, ní u bātì ki sītì Saayuul yil pu ki kpàl̄-u ní ki bí-u yii: «Ti-Dindaan u-ba di lēē-si á nīn sá u-nibul bɔtiu.»

²A yaa yíkì m-cee doo díǹee, a làá tū binaacimpɔmbi bili Raseel kaakul caŋin Seelisaa, Beenjameen yab tiŋkin. Bi làá tùkù-si yii: «Bi ká imansal in a bíi nyàab̀ee. Kɔŋkɔnnee a-baa kaa ti dàkafī íǹ pu, ama nimbi bɔti di kíǹ ki páb́-u. U bíi bàlifī u-ba min ní u làá dī ní kí ká u-jipɔɔnee.»

³A yaa nìkī a-saŋŋu ki cá ki tin bàn̄ busubu bun bi yíì Tabɔɔree, a làá ká bininjab bita niin, bi jɔ́ḿ Beeteel kí jāam̀ Unimbɔti. Ubɔ ŋúb́ aŋɔbil ata, uliliiti ŋúb́ kpɔnɔb bita ní utataati bàl̄ kuloou ndaam kā poon.

⁴Bi làá jāam̀-si ní kí tīī-si kpɔnɔb bili. A làá fōō kpɔnɔb gbanti.

⁵Míǹ boonee, a làá nìkī a-saŋŋu kí tin bà Giibeeya-Eelooyiim tiŋkin, laakin Fiiliistii yab yidambi kóòyee. A yaa tóob́ kí kɔ́ kitiŋinee, a làá tū Unimbɔti bɔnaatiliibi nsanni bi nyánní nsaraaŋapaan pu ki sìntīń. Biwambɔɔliibi līiń bi-nyɔkɔpu ki bɔ̀ɔ́ tibati nì ŋgaŋgamu ki búǹ awul ki bɔ̀ɔ́ saŋgu. A làá ká-bi bi fītì ní ki nàatī Unimbɔti bɔti.

⁶Niinee ti-Dindaan Fam làá kɔ́ a-ni ní á fìtī kii án nín fītì bi mun puee, ní á kpántí unipɔɔn.

⁷A yaa láa ká tidaandi nee jítì mimmee, á béé yii Unimbɔti bí a-cee tiŋman pu. Niinee tin yaa láa pée bāań á ŋée, ŋá míǹ.

⁸Á lìntī kí sìntī Giilgaal. Boonee ma mun làá dāan̄ kí ká-si niin kí ŋá bisaraawɔkaabi nì mpèé saraabi. Á kàl̄ niin iwiin iluli kí cīití-mi. M yaa láa bāańee, m làá tùkù-si tin sá á ŋée.

⁹Ŋyunti ŋun Saayuul yíkì Samiyeel ceeyee ní Unimbɔti cúú u-pɔbil ki kpántì. Tin kɔkɔ Samiyeel sòon̄ee, ŋwimbaanti gbanti ní an jítì míǹ.

¹⁰Ŋyunti ŋun Saayuul nì u-tɔntɔnliuee bāań Giibeeyayee ní bi tú Unimbɔti bɔnaatiliibi dikitil. Unimbɔti Fam nìn dɔ́miń ki kɔ́ Saayuul ni, ní u fītì ki kútì dikitilee pu bi bíi nàatī Unimbɔti bɔti.

¹¹Bin kɔkɔ nìn pée nyí Saayuul dooooyee nín ká u bíi nàatī Unimbɔti bɔti kii Unimbɔti bɔnaatiliibi nín nàatī puee, ní bi bíi bàlifī tɔb yii: «Ba cáá Kiisi jipɔɔn ní? Saayuul mun kpántì Unimbɔti bɔnaatiliu níii?»

¹²Ní kitiŋ gbantin niliu ubɔ bí yii: «Ŋma di baasii sá bi-kpiliu ní?» Niin ní dilìmbil nee nyánní yii: «Saayuul mun kpántì Unimbɔti bɔnaatiliu níii?»

¹³An cēetì Saayuul puee, ní u nín jɔ́ḿ nsaraaŋapaan pu.

¹⁴Saayuul wee bālifì u nì u-tɔntɔnliu yii: «Ni cūtì la ní?» Ní Saayuul kíí-u yii: «Ti cūtìi nyàab̄ imansal ní. Ama taa ká-i ní ki nín cá Samiyeel cee.»

¹⁵Ní u-wee bí-u yii: «Māafì-mi tin Samiyeel tùkū-nee.»

¹⁶Ní Saayuul bí u-wee yii: «Tin u pée tùkū-tee di sá yii bi fātìi ká imansal.» Ama waa tùkū-u Samiyeel nín sòon̄ nì u dibeel bɔti tiŋyee.

¹⁷Samiyeel yíiń Isirayeel yab ki kpáfì Miisipa ti-Dindaan nimbiin.

¹⁸U bí-bi yii: «Ti-Dindaan Isirayeel yab Nimbɔtiu nín sòon̄ puee sèé: <Man di nyántìń-ni Eejipiti tiŋkin, ki fōō-ni Eejipiti yab nì abee ŋin yab nìn sàantí-nee ŋaan ki líì.>

¹⁹Ama díǹ nee nimbi dū ni-Nimbɔtiu ki fá, úǹ un fìil̄-ni ki nyāntí nnaabu nì animbinaaman kɔkɔ poonee. Ni bí-u yii: <Á tīī-ti ubɔti.> Too, dāá yūĺmaan ti-Dindaan nimbiin kí nóó nì ni-naakɔti nì ni-maaliŋu nín sá puee.»

²⁰Samiyeel yāntì Isirayeel naakɔti kɔkɔ sútìń. Bi tɔ́ kasee ní án lēē Beenjameen naakooku.

²¹Ní u cáań bin sá Beenjameen yabee ki síiǹ ki nóó nì bi nín pēē pēē mmaal puee, ní án lēē Matirii maaliŋun yab. Mmaal gbanti poonee ní án lēē Kiisi jipɔɔn Saayuul. Ní bi nyàab̄-u ki gīī kaa ká-u.

²²Ní bi gíti bālifì ti-Dindaan yii: «Uninja gbanti dɔ́miń doooo?» Ní ti-Dindaan bí yii: «U kɔ́ ki bál̀ tiwaŋkpiil kansikin.»

²³Ní bi cūtì ki nɔ̄kɔtìń-u tiwaŋkpiilee kansikin ní u cūtì ki yúl̀ samaa kansikin. U nìn fɔ̀kɔǹ bi-kɔkɔ.

²⁴Ní Samiyeel bí samaa kɔkɔ yii: «Kpèèmaan un ti-Dindaan lēēyee. U-juti kaa bí samaa kansikin.» Niinee báà ŋma bíi kpáafí ki tátí yii: «Ubɔti ń nīn cáá mmaŋfafɔkɔn!»

²⁵Míǹ boonee ní Samiyeel kàan̄ tin sá bí ŋá kí tīī ubɔtee samaa nimbiin[8], ní ki ŋmàn̄-tì ki ŋá kugbɔŋun ki cáa yóoǹ circir kɔŋkooŋŋun, ní ki pú Isirayeel yab nsan bí kpì bi-dumpui.

²⁶Ní Saayuul mun nín kùǹ u-dumpu Giibeeya. Unimbɔti nìn gbēē bibaatandambi biba pɔbiliŋ ní bíǹ nóó-u.

²⁷Ama bin kaa bí tibanee mun nìn lī yii: «Mana ní un bí nee ŋūǹ kí fīī-ti?» Bi nìn kpēē-u fám kaa cáań tiba ki jáam̀-u. Ama ní an kaa nìn ká Saayuul.