Read Ntcham 1 Samuel 11 Bible Online

1 Samuel 11 - Ntcham bible

1 Samuel 11

¹Amɔn yab bɔtiu Naasi nìn cūtì kí jáǹ Yabeesi tiŋki kin bí Galaadi tiŋkinee. Ní Yabeesi yab kɔkɔ bí ubɔti Naasi yii: «Á pòon̄-ti kí pùtī yii ti nì si ŋá ubaanti ní tí kpántí a-tɔntɔnliibi.»

²Ní ubɔti Naasi kíí-bi yii: «Ni yaa là ḿ pòon̄-ni kí pùtī yii man nì ni ŋá ubaantee, see báà ŋma ń lúkutí u-ŋaŋgiinimbil kí kɔ́ǹ Isirayeel nibul kɔkɔ icoo.»

³Ní Yabeesi tindaŋkpilib kíí-u yii: «Á pɔ̄-ti iwiin iluli. Ti làá tɔ̄ binib Isirayeel tiŋki kɔkɔ poon kí kpèè. Ubɔ yaa kaa nín bí kí fīī-tee, ti làá dū ti-ba kí ŋá a-ŋaan.»

⁴Binibee nín cá Giibeeya, Saayuul tiŋkin ki dū tibɔtee ki máafì niin yab. Kitiŋ gbantin nib nìn súń ki yáliŋkì.

⁵Ŋyunti gbantee Saayuul mun nyánní kusaau ki pá u-naai boon ki kùnní, ní u bālifì yii: «Ba di yì-tì ní samaa kɔkɔ bíi sūǹ míǹ?» Ní bi máafì-u tin Yabeesi yab lēe.

⁶Saayuul nín gbìl̄ an bɔtee ní Unimbɔti Fam kɔ́ u-ni ní u fōō diŋuul ŋkpitim pu.

⁷Ní u cúú inaa ili ki kūū ki càkā. U nìn dūu tīī binib ń cáá yìiǹ Isirayeel tiŋki kɔkɔn kí tùkù-bi yii: «Un kamaa yaa kaa páaǹ Saayuul nì Samiyeel boon ki cūtì kujaauee, bi nín làá ŋá udaan naai puee dee.» Ti-Dindaan nìn yāntì dinyoondi kɔ́ samaa, ní bi-kɔkɔ kpáfì kii unibaantee.

⁸Saayuul nìn kpáfì u-janjaliibi Beeseeki ki kàan̄-bi. Isirayeel yab nìn nyáń binib kutukub alaataa ata, ní Juuda yab nyáń binib kutukub mmuŋku nì saalaa.

⁹Ní bi tùkū bin bi nìn túnnée yii: «Fool kuwiŋkuluuee, ni làá fu ká dijòońdi.» Bi nín cáá an bɔtee ki tùkū Yabeesi yabee ní an mɔ́ɔkiǹ-bi.

¹⁰Niinee Yabeesi yab tùkū Amɔn yab yii: «Foolee ti làá fu cáań ti-ba kí ŋá ni-ŋaan, ni yaa fu là-ti puee ní ŋá.»

¹¹Kutaa wúntèe ní Saayuul cúú u-janjaliibi ki yākatì akiti ata. Kutaa síitì ki cá diwuntilee ní bi kɔ́ bi-nannanliibi janjanaapaal pu ki kūū Amɔn yab ki tin sāā kuwiŋkuluu. Bin nìn kíǹee nìn sáǹ ki yàl̄ bi-ba bi-ba, baa ti kāntí biba nóó bili.

¹²Isirayeel yab bí Samiyeel yii: «Bilab di nìn bí yii baa là Saayuul ń nīn sá ti-bɔtiuee? Bí nyāntiń-bi doo tí kpɔ̀-bi.»

¹³Ní Saayuul bí yii: «Baa máaǹ kí kpɔ̀ ubɔ ŋwiin kii ŋu nee dal, kun puee ti-Dindaan tīī Isirayeel yab dijajil díǹ.»

¹⁴Boonee ní Samiyeel bí Isirayeel yab yii: «Dāam̄maan tí cù Giilgaal kí cùú mɔ̀tīí síití Saayuul beel.»

¹⁵Ní samaa kɔkɔ nín cá Giilgaal, ní bi kāaǹ Saayuul dibeel niin ti-Dindaan nimbiin, ní ki ŋá mpèé saraabi ki tīī ti-Dindaan. Niinee Saayuul nì Isirayeel yab kɔkɔ jíń jiŋaakpaan ki fàal̄.