Read Ntcham 1 Samuel 14 Bible Online

1 Samuel 14 - Ntcham bible

1 Samuel 14

¹Dalbee, Saayuul jipɔɔn Joonatan bí un ŋúb̀ u-janjawantee yii: «Dāan̄ tí cù Fiiliistii yab janjakitil din bí lapu jandi púee cee.» Ama Joonatan kaa nìn tùkū u-baa báà tiba.

²Saayuul nìn kā Giibeeya kpaanyɔkɔ busubu bubɔ taapu Miigirɔn tiŋkin, bijanjaliibi kii alaataa aluu nìn bí u-cee.

³Usaraaŋal ubɔ nìn bí u-cee ki ŋúb́ eefoodi. Úǹ di sá Akituub jipɔɔn Abiiya, Ikaboodi nabiki. Ikaboodi sá Fineeyaasi jipɔɔn ní ki sá Eelii un nìn sá ti-Dindaan saraaŋakpiliu Siiloo tiŋkinee naantiiu. Samaa kansikinee báà ubɔ kaa nìn nyí yii Joonatan búntì.

⁴Kí wàatī Joonatan ń bà Fiiliistii yab janjakitil ceeyee, u nìn jítì ataŋkpee ali ŋin nyɔmmu cɔ́m̀ee kansikin. Bi nìn yíì diba Booseesi ní ki yíì din kíǹee Seenee.

⁵Ditaŋkpapeekaalee nìn bí ŋgan pú ki túĺ Miikimaasi, ní din kíǹee bí ŋgiil pú ki túĺ Giibeeya.

⁶Ní Joonatan bí u-tɔntɔnliu yii: «Dāan̄ tí cù Fiiliistii yab bin kaa gífì akpancanee janjakitil nee cee. An yaa yíì ti-Dindaan làá yūĺ ti-boon, di sá yii ti yaa wīikáaa, ti yaa kaa wīikáaa, tiba kaa lìkintí ti-Dindaan nsan ú tīī-ti dijajil.»

⁷Ní u-tɔntɔnliu kíí-u yii: «Tin yaa pée fáatiǹ-see, ŋá míǹ. Tí nīn cá, m pá a-boon.»

⁸Ní Joonatan bí yii: «Tí nīn cá binib gbanti cee kí cáá ti-ba kí dàkà-bi.

⁹Bi yaa bí-ti yii: <Yūĺmaan niin, timbi làá dāan̄ ni-ceeyee>, ti làá yūĺ dibɔɔbaantiil, taa làá jɔ̄m̀ bi-cee.

¹⁰Ama bi yaa bí-ti yii: <Jɔ̄mìḿmaan ti-ceeyee>, ti làá jɔ̄m̀, di sá yii án di làá dàkà yii ti-Dindaan dū-bi ki ŋá ti-ŋaan.»

¹¹Bi-liitil nín cá ki dū bi-ba ki dàkā Fiiliistii yab. Ní bíǹ bí yii: «Kpèèmaan, Eebru yab bin nìn sáǹ ki bál̀ ibòónee di nyēennée.»

¹²Binibee bí Joonatan nì u-tɔntɔnliu yii: «Jɔ̄mìḿmaan ti-cee, ti làá dàkà-ni tiba.» Ní Joonatan bí u-tɔntɔnliu yii: «Á páanní m-boon, ti-Dindaan dū-bi ki ŋá Isirayeel yab ŋaan.»

¹³Ní Joonatan nín dàb̀ ki nyìitī u-ŋalii pu ki bàlim̄ ki cá u-tɔntɔnliu pá u-boon. Joonatan nìn fátí Fiiliistii yab ki bīil̀ ní u-tɔntɔnliu pá u-boon ki púntí-bi.

¹⁴Ŋwiin gbantee, Joonatan nì u-tɔntɔnliu nìn kūū binib kii mmuŋku ní. Mpaan ŋun pu bi nìn bí bi kūū-bee kaa nìn wāā. Dijajil dipeepeekaal dee.

¹⁵Niinee dinyoondi kɔ́ Fiiliistii yab janjaliibi bin nìn gbíntì dijanjanaapaal puee nì bin nìn bí tisatinee nì samaa kɔkɔ. Bijanjaliibi bin yūlifí sintilee nì bin bi bífì bí nīn ŋàfēe mun nìn kɔ́ dinyoondin. Kí kūtèe kitiŋ nìn cīŋkì. Unimbɔti u-ba di nìn kɔ́ǹ-bi dinyoondi gbantin.

¹⁶Giibeeya, Beenjameen tiŋkinee, Saayuul janjaliibi bin nìn yú sintilee nìn bí ki kpèé. Bi nìn ká Fiiliistii yab nín sáń ki pùntī an kɔkɔ puee.

¹⁷Ní Saayuul bí bin bí u-ceeyee yii: «Yíiḿmaan ayin tí kpèè ŋma di nyáń ti-kansikin ki cūtì bi-cee?» Bi yíińee ní ki ká yii Joonatan nì u-tɔntɔnliu kpá.

¹⁸Saayuul bí usaraaŋal Ayiiya yii: «Cáań Unimbɔti dakaau doo.» Di sá yaadal wiiŋŋuee, Unimbɔti dakaau nìn bí Isirayeel yab janjanaapaalin bi-cee.

¹⁹Ŋyunti ŋun Saayuul bíi sòoǹ nì usaraaŋalee ní kuwoou mɔ̀tīi bíi pɔ́ɔkí Fiiliistii yab janjanaapaal pu. Ní Saayuul bí usaraaŋal yii: «Gbèen̄ dibalifil!»

²⁰Ní Saayuul kpáfì u-janjakitil ní bi nín cá dikɔmbool pu. Bi bàn̄ee ki ká Fiiliistii yab bí ki kù tɔb. An nìn sá fìkilfikilkpaan di kɔ́-bi.

²¹Eebru yab bin nìn bí Fiiliistii yab cee ki tūǹ-bi atuunee nìn céeǹ-bi kujaau. Bíǹ nìn fātìi gítì Isirayeel yab nì Saayuul nì Joonatan jandi pú.

²²Isirayeel yab bin nìn sáǹ ki bál̀ Eefiraayiim jooŋŋi puee gbìl̄ yii Fiiliistii yab sáǹ. Niinee ní bi mun kùl̄ ki bīiǹ bi-boon ki jáà nì bi.

²³Ti-Dindaan nìn tīī Isirayeel yab dijajil ŋwiin gbanti. Bi nìn jáń ki tin jítì áli Beeti-Afeen tiŋki pu.

²⁴Yaadal wiiŋŋuee, samaa nìn jíń falaa, kun puee Saayuul nìn pūtìi tɔ́ báà ŋma pu ki lī yii: «Un ní ŋwìiń yaa kaa láá jéetì man tɔ̀n̄ m-nannanliibi ipɔntoon ní udaan jíń tijinee, mbusu ń lítí udaan pu.» Samaa poonee, báà ubɔ kaa nìn jíń tijin.

²⁵Bi-kɔkɔ nìn kɔ́ kubambaŋŋun. Tisiil nìn còol̀ kitiŋ.

²⁶Bi nín kɔ́ kubambaŋŋunee, bi nìn ká tisiil dɔ̄ ki pùub̀ kitiŋ, ama bi-kansikin báà ubɔ kaa nìn sēē ki dáká, kun puee bi nìn fàŋkí mbusu.

²⁷Ama Joonatan kaa nìn gbìl̄ u-baa nín yāntì samaa pūtèe. U nìn tāntì ŋkpandɔ ŋun u ŋúb́ee ki sēē tisiil ki dáká ní u-nimbiliŋ ŋāatì.

²⁸Ní bijanjaliibi kansikin ubɔ bí-u yii: «A-baa bàà pūtì ki tɔ́ samaa pu yii: <Un yaa jíń tijin díǹee, mbusu ń lítí udaan pu.» An pu ní báà ŋma gīī.

²⁹Joonatan bí yii: «M-baa cáań nnaabu ki tɔ́ kitiŋ pu. Kpèè m nín sēē tisiil ki ŋmɔ́ ki ká mpɔn puee!

³⁰Samaa kɔkɔ yaa bàà lēē tin ti jáń ki fōō ti-nannanliibi ceeyee ki jíńee, ti nín bàà làá já kí pɔ̄ɔkiǹ Fiiliistii yab puee bàà làá nīn sá ŋkpaamin ní.»

³¹Ŋwiin gbantee, Isirayeel yab nìn kūū Fiiliistii yab kí yòon̄ Miikimaasi kí cáá sāā Ayalɔn. Bi nìn gīī púb.

³²Niinee samaa páatìi jéetì tiwan tin bi jáń ki fōōyee pu. Bi nìn cúú ipii nì inaa nì anabil ki lāntì ní ki kāl̀ laakin fatiku dɔ̄ee ki ŋmɔ́.

³³Ní bi tùkū Saayuul yii u-samaau yīntiǹ ti-Dindaan. Bi ŋmɔ́ tinan laakin bi lāntì tiwaŋkuti fatiku dɔ̄ee[16]. Ní Saayuul téeń yii: «Ni yīntiǹ mara! Bíntiḿmaan ditaŋkpakpaandi kí cáań doo.»

³⁴Ní Saayuul bí yii: «Ní yìiǹ samaa kansikin kí tùkù-bi yii: <Báà ŋma ń cáań u-naau àá u-piiiu man cee. Doo ní ni làá kpɔ̀ tiwaŋkuti gbanti kí ŋmɔ́-tì. Mimmee naa làá ti ŋmɔ́-tì fatiku caŋin kí yìntīǹ ti-Dindaan.>» Kujoou gbantee, báà ŋma nìn cáań u-waŋkuluku niin ní ki kūū-kù.

³⁵Míǹ ní Saayuul máń ti-Dindaan nsaraafan. Ŋúǹ di sá mpeekaa ŋun u máń ti-Dindaanee.

³⁶Ní Saayuul bí yii: «Tí sìntī kunyeeu nee kí jà Fiiliistii yab boon kí fūkul̀-bi kí kpɔ̀ bi-kɔkɔ áli kutaa nì ku-wuntil.» Ní u-yab kíí-u yii: «A yaa pée ká min ŋān̄ee, ŋá míǹ.» Ní usaraaŋal bí yii: «Tí bàlifì ti-Dindaan kí wàatī.»

³⁷Ní Saayuul bālifì ti-Dindaan yii: «Ḿ sìntī kí jà Fiiliistii yab boonaaa? A làá dū-bi kí ŋá Isirayeel yab ŋaanaaa?» Ama ŋwiin gbantee Unimbɔti kaa pée kíí tiba.

³⁸Niinee ní Saayuul yíiń samaa kpilib kɔkɔ u-cee ki bí-bi yii: «Ní nyàab̀maan kí kpèè ikpiti in ní ti ŋá díǹee!

³⁹M pūtì ti-Dindaan un sá Isirayeel yab fiiliu ki bí dimaŋfalinee yii báà an yaa sá gba m-jipɔɔn Joonatan di ŋá ikpiti gbanti, see bí kpɔ̀-u.» Samaa kɔkɔ poon báà ubɔ kaa gātì-u.

⁴⁰Saayuul bí samaa yii: «Nimbi Isirayeel yab kɔkɔ, ní gítímaan dijandi diba, ma mun nì m-jipɔɔn ń yūĺ dijandi diba.» Ní samaa kíí-u yii: «A yaa pée ká min ŋān̄ee, ŋá míǹ.»

⁴¹Saayuul mēē ti-Dindaan yii: «Isirayeel Nimbɔtiu, ba pu ní aa kíí-mi díǹ ní? Ti-Dindaan Isirayeel Nimbɔtiu, an yaa sá man àá m-jipɔɔn Joonatan di yīntèe, án tāā Uriim, an yaa tí sá Isirayeel nibul di yīntèe, án tāā Tumiim[17].» Ní an tāā Joonatan nì Saayuul, ní samaa nyáń tibɔtin.

⁴²Ní Saayuul bí yii: «Tɔ̄maan kasi kí kpèè man nì m-jipɔɔn Joonatan un ní an sée, ní an tāā Joonatan.»

⁴³Niinee ní Saayuul bí-u yii: «Tùkù-mi tin a ŋée.» Ní Joonatan bí-u yii: «M ká tisiil ní ki dū m-kpandɔŋu ki sēē ki dáká. M bɔ́ntì kí kpú.»

⁴⁴Ní Saayuul téeń yii: «Joonatan, a yaa kaa kpíì díǹ, Unimbɔti ń dáaĺ m-tafal ŋkpitim pu!»

⁴⁵Ama ní samaa bí Saayuul yii: «Joonatan yāntì Isirayeel yab ká dijajikpaandi. Waa máaǹ kí kpú. Án làá nīn sá ntimbiil bɔti ní. Ti pūtì ti-Dindaan yii u-yikpilku báà kubɔ kaa làá lítí kitiŋ. Di sá yii Unimbɔti di tútúǹ-u ní u ŋúń ki ŋá míǹ díǹ.» Samaa nín ŋá pu ki fīī Joonatan baa kūū-uee dee.

⁴⁶Niin ní Saayuul gbēeǹ kaa ti jìn̄ Fiiliistii yab boon, ní Fiiliistii yab nín kùǹ bi-tiŋkin.

⁴⁷Saayuul nín kāl̀ dibeel Isirayeel tiŋki puee, u nìn jáń nì u-nannanliibi bin kóò ki māntìi tú-uee. Bíǹ di sá Moowaab yab nì Amɔn yab nì Eedoom yab nì Sooba bɔtiibi nì Fiiliistii yab. Laakin pú ní u yaa nìn pée fātèe, u nìn jáà ki jīǹ ní.

⁴⁸Ŋwiin ŋubɔee, u dàkā tininjati ki jáń ki pɔ́ɔkiǹ Amaleeki yab[18]. U nìn jáń ki fōō Isirayeel yab ki nyántì bin nìn dòoń ki fúkuĺ bi-tiŋkee ŋaan.

⁴⁹Saayuul jipɔmbi di nìn sá Joonatan nì Yisfii nì Malkisuwa. U nìn cáá bisalib mun bili. Meerab di sá ukpil ní Miikaal sá uwaal.

⁵⁰Bi nìn yíì u-nimpuu Akiinoowam, Ayiimaasi bisal. U-janjakpiliu di nìn sá Abineer, Saayuul baawaai Neer jipɔɔn.

⁵¹Di sá yii Saayuul baa Kiisi, nì Abineer baa Neer sá Abiyeel jipɔmbi ní.

⁵²Saayuul maŋfal wiiŋyi kɔkɔ poonee, u nìn jáń nì Fiiliistii yab nì dinimbinaamandi. An puee u yaa nìn ká ubɔ cáá dikpabil nì dibaatandee, u nìn cútí-u ú kpántí ujanjal ní.