Read Ntcham 1 Samuel 16 Bible Online

1 Samuel 16 - Ntcham bible

1 Samuel 16

¹Ti-Dindaan bí Samiyeel yii: «A làá nīn gbíntìi sūǹ Saayuul pu kí tin cáá sāā ŋyunti ŋulɔŋu ní? Man di dū-u ki fá ní waa ti làá nīn sá Isirayeel yab bɔtiu. Kpíĺ ŋkpam a-yiŋŋu poon, kí yīkì ḿ tɔ̄-si Beetileem Jeesee cee. U-jipɔmbi kansikin ní m lēē ubɔti un m lèe.»

²Samiyeel bí yii: «M làá ŋá mana ní kí ŋá míǹ? Saayuul yaa gbìl̄, u làá kpɔ̀-mi ní.» Ní ti-Dindaan bí-u yii: «Cúú dinajapɔmbil kí nīn cá. A bèe ní kí bí yii: <M dɔ́miń kí ŋá ti-Dindaan saraa ní.>

³A yaa làá dāá ŋá saraa gbantee, á dāá yíiń Jeesee ú nīn bí. M làá dāá dàkà-si tin sá á ŋée. Á dāá bàtī ŋkpam kí sìtī un man làá dāá dàkà-see yil pu.»

⁴Samiyeel ŋá kii ti-Dindaan nín lī puee. U bàn̄ Beetileem tiŋkinee ní bitindaŋkpilib pɔbiliŋ máĺ. Ní bi yíkìi túŋkì-u ki bālifì-u yii: «A-dāantam nee mɔ̄ deeee?»

⁵Ní u kíí-bi yii: «An mɔ̄! M dɔ́miń kí ŋá m-Dindaan saraa ní. Ní ŋámaan ni-ba circir kí dāam̄maan tí ŋá saraa.» Ní u bí Jeesee nì u-jipɔmbi mun yii: «Ní ŋámaan ni-ba circir kí dāan̄ tí ŋámaan saraa gbanti.»

⁶Jeesee nì u-jipɔmbi bāańee ní Samiyeel ká Eeliyaab ní ki lī u-neen yii: «Báà an ŋá pu, un bí nee ní ti-Dindaan lēē.»

⁷Ama ní ti-Dindaan bí-u yii: «Taa kpèè u-gbannyaaŋŋu nì u-fɔkɔŋŋu pu, maa lēē-u. Maa kpèé kii binib nín kpèé puee. Di sá yii tin unil nimbil wāĺee ní u kpèé. Ama ti-Dindaan úǹ kpèé dipɔbil poon ní.»

⁸Ní Jeesee yíiń Abinadaab, ki yāntì u dɔ́miń ki jítì Samiyeel nimbiin, ama ní u bí yii: «Ti-Dindaan kaa lēē un bí nee mun.»

⁹Jeesee yāntì Sama dɔ́miń ki jítì, ní Samiyeel bí yii: «Ti-Dindaan kaa lēē-u.»

¹⁰Jeesee yāntì u-jipɔmbi biluli dɔ́miń ki jítì Samiyeel nimbiin, ní u bí yii: «Ti-Dindaan kaa pée lēē báà ubɔ bi-kansikin.»

¹¹Ní Samiyeel bí Jeesee yii: «A-jipɔmbi kɔkɔ dɔ́mińaaa?» Ní u bí yii: «Aayee, bi-kɔkɔ kaa yá, an kíǹ ujoolkaa, úǹ bíi kpàá ipii.» Ní Samiyeel bí Jeesee yii: «Tɔ̄ bí yíiń-u, see ú bàń ní tí nín jī saraa jinti.»

¹²Jeesee tú bi yíiń Daafiidi. Kinaacimpɔmbikee nìn máǹ ní púlpul ní u-nimbiin ŋān̄ an kaa cáá bí lì. Niinee ní ti-Dindaan bí Samiyeel yii: «Úǹ dee! Yīkì kí bàtī ŋkpam kí sìtī u-yil pu ú kpántí ubɔti.»

¹³Samiyeel yōoǹ ŋyin ŋun poon ŋkpam kēe ki bātì ki sītì Daafiidi yil pu u-nabiyaamu kansikin. Ki yōoǹ ŋwiin gbantee, ti-Dindaan Fam kpákatìń Daafiidi pu, ki bí u-cee. Míǹ boonee ní Samiyeel fātìi nín gítí Raama tiŋkin.

¹⁴Ti-Dindaan Fam nìn yíkì Saayuul cee, ní ti-Dindaan tūǹní ŋfaŋkpitim miba, mi dòoń ki sàantí-u.

¹⁵Saayuul tɔntɔnliibi bí-u yii: «Ti ká yii ti-Dindaan tūǹní ŋfaŋkpitim miba mi dòoń ki sàantí-si.

¹⁶Ti-baa, timbi bí ki tīī-si ní. An sá á pɔ̄ kinyɔkɔ ní timbi ń cùú nyàab̀-si un ŋūǹ ki bɔ̀ɔ́ kubeeuee. Mimmee Unimbɔti yaa ti túnní ŋfaŋkpitimee a-puee, ú nīn bíi bɔ̀ɔ́ kubeeu ní an ŋá a-pu fòooo.»

¹⁷Ní Saayuul bí u-tɔntɔnliibi yii: «An ŋān̄, nyàab̀maan ubeebɔɔmɔnti kí cáań-mi.»

¹⁸Ní u-tɔntɔnliibi kansikin ubɔ bí yii: «M nyí ubɔ, Jeesee un sá Beetileemee jipɔɔn. U ŋūǹ ki bɔ̀ɔ́ kubeeu tiŋan, ki cáá dibaatandi, ki sòoǹ tibɔti nì iciin ki ŋān̄ uninja, ní ti-Dindaan bí u-cee.»

¹⁹Saayuul dū binib ki tú Jeesee cee bí tùkù-u yii: «Yàntī a-jipɔɔn Daafiidi upikpaalee ń dāan̄ kí nīn bí m-cee.»

²⁰Jeesee dū kpɔnɔb nì ndaam ntúun, nì diŋɔbil ki túǹ kimaŋ ní ki bí Daafiidi yii ú cáá tīī Saayuul.

²¹Daafiidi bàn̄ Saayuul cee ní ki kpántì u-tɔntɔnliu. Saayuul nìn néeń-u tikpil. Úǹ di nìn tūntí u-janjawanti ki pá u-boon.

²²Saayuul tú bí tùkù Jeesee yii: «M néeń Daafiidi bɔti, an puee m là yii ú kpántí m-tɔntɔnliu.»

²³Kí yòon̄ ŋyunti gbantee, Unimbɔti yaa ti túnní ŋfaŋkpitim Saayuul puee, ní Daafiidi ń yòon̄ u-beeku ki bíi bɔ̀ɔ́. Niinee ní án ŋá Saayuul pu fòooo ní ú ŋùŋfì ní ŋfaŋkpitimee ń nyā kí wàatī-u.