Read Ntcham 1 Samuel 19 Bible Online

1 Samuel 19 - Ntcham bible

1 Samuel 19

¹Saayuul nìn tùkū u-jipɔɔn Joonatan nì u-kàliŋkpilib kɔkɔ yii u là bí kpɔ̀ Daafiidi. Ama Saayuul jipɔɔn Joonatan nì Daafiidi nìn kɔ́ tɔbin tiŋan.

²Ní Joonatan tùkū Daafiidi yii: «M-baa Saayuul nyàab̀ kí kpɔ̀-si. An puee fool kutaafaauee, á fu nín̄ nyíǹ a-ba. Á fu báĺ kí taa nyā.

³M làá fu céeǹ m-baa tí cù kusaau laakin a làá cùú báĺee. M làá fu sòoǹ nì m-baa a-pu. U yaa fu sòon̄ puee, m làá tùkù-si.»

⁴Joonatan sòon̄ Daafiidi ŋanti pu u-baa Saayuul cee. U bí-u yii: «Ti-baa ubɔti, á taa ŋá a-tɔntɔnliu Daafiidi ikpiti, kun puee waa pée ŋá-si ikpiti iba. Ama atummɔnti ŋin u túnnée cáań-si ipaati ní.

⁵U nìn dū u-maŋfal ki sú ní ki kūū ufiiliistiija. Ŋwiin gbantee, ti-Dindaan nìn tīī Isirayeel yab kɔkɔ dijajikpaandi. Sii a-ba nìn ká ki fāal̀. Kin ba pu ní a làá ŋá ikpiti kí kpɔ̀ Daafiidi un kaa ŋá tibee fám.»

⁶Niinee Saayuul gbìl̄ ki tīiǹ Joonatan ní ki pūtì yii: «M pūtì ti-Dindaan yii baa làá kpɔ̀ Daafiidi.»

⁷Niinee Joonatan yíiń Daafiidi ní ki tùkū-u tin jítèe kɔkɔ. U nìn cáań Daafiidi Saayuul cee, ní Daafiidi fātìi kíĺ ki bíi tūǹ u-tundi kii u nín nìn pée bí ki tūǹ pu dooooyee.

⁸Fiiliistii yab nì Isirayeel yab jaaku fātìi tí kíĺ. Daafiidi cūtì ki jáń ki pɔ́ɔkiǹ-bi sɔ́kɔ sɔkɔ, ní bi sáǹ-u.

⁹Dalbee, ti-Dindaan tí túnní ŋfaŋkpitim miba mi dɔ́miń ki kɔ́ Saayuul. U nìn kā u-dumpu ki ŋúb́ kikpaŋ. Daafiidi nìn kā u-cee ki bɔ̀ɔ́ kubeeu.

¹⁰Saayuul tɔ́ u-kpaŋki kí bàà yā Daafiidi kí nákań digundi. Ama Daafiidi nìn lóotì ní kikpaŋ cūtìi yá digundi ki báaǹ. Kunyeeuee ní Daafiidi sáǹ ki ŋmátì.

¹¹Saayuul dū binib ki tú Daafiidi dumpu bí cɔ̄ŋkì-u kutaa yaa wúntì kutaafaauee bí kpɔ̀-u. U-nimpuu gbìl̄ ní ki tùkū-u yii: «A yaa kaa sáǹ kunyeeu nee, fool bi làá fu kpɔ̀-si[22]!»

¹²Ní u-nimpuu yōoǹ-u ki dī tɔkɔla pu ki nāatì boon ní u sáǹ ki ŋmátì.

¹³Miikaal yōoǹ diwaal ki bíl̀ Daafiidi dooŋu pu, ní ki dū ŋŋɔgban ki bíl̀ diyil pú, ní ki dū dibɔkutikpaandi ki bīiǹ di-pu múlmul.

¹⁴Bininjab bin Saayuul túnní bí dāá cúú Daafiidee bāańee ní u-nimpuu bí-bi yii: «U būǹ.»

¹⁵Ní Saayuul fātìi gíiǹ-bi ki tú bí cùú ká Daafiidi. U bí-bi yii: «Yòon̄nímaan-u kí kpáaǹ u-dooŋu ḿ kpɔ̀-u!»

¹⁶Binibee fātìi bàn̄ Daafiidi dumpu ki kpēēyee diwaal di pá ndoo pu, ŋŋɔgban dɔ̄ diyil púee.

¹⁷Ní Saayuul bí Miikaal yii: «Ba pu ní a kíil̀-mi ki yāntì m-nannanliu sáǹ ki ŋmátì.» Ní Miikaal kíí-u yii: «Úǹ di bí-mi yii: <A yaa kaa yāntì m sáǹ ki ŋmátì, m làá kpɔ̀-si.>»

¹⁸Daafiidi sáǹ mimmee ní ki búntì Samiyeel cee Raama, ki máafì-u Saayuul nín ŋá-u tiŋyee kɔkɔ. Ní u nì Samiyeel cūtìi kóò Nayooti.

¹⁹Bi cūtìi tùkū Saayuul yii: «Kpèè Daafiidi cūtìi bí Nayooti tiŋkin, Raama caŋin.»

²⁰Ní Saayuul tú binib bí cùú cúuń-u. Bi bàn̄ee ki ká Unimbɔti bɔnaatiliibi dikitil, bi-kpiliu Samiyeel līī bi-nyɔkɔpu bi fītì ki bí ki nàatī Unimbɔti bɔti. Ní Unimbɔti Fam kɔ́ binib bin Saayuul túnnée ni ní bi mun fītì.

²¹Bi dɔ́miń ki tùkū Saayuul ní u dū biba mun ki tú, bi mun bàn̄ee ki fītì. Ní u dū bitataatiibi ki tú, bi mun tí bàn̄ee ní ki fītì.

²²Niinee ní Saayuul yíkìi nín cá u-ba Raama. U bàn̄ Seeku nyimbɔbikpaandee ní ki bālifì yii: «Samiyeel nì Daafiidi bí la pú ní?» Ní bi bí-u yii: «Bi bí Nayooti, Raama caŋin.»

²³U cá ki bàn̄ nsannee ní Unimbɔti Fam kɔ́ u mun ní u fītì ní u nìkī u-saŋŋu ki tin bàn̄ Nayooti, Raama caŋin.

²⁴Niin ní u mun pēetì u-bɔkutiŋ ní ki fītì Samiyeel nimbiin. U nìn lítì ki dɔ̄ dicancaŋgbeel ŋwiin gbanti nì kunyeeu kɔkɔ. An pu ní bi lì yii: «Saayuul mun kpántì Unimbɔti bɔnaatiliu níii?[23]»