Read Ntcham 1 Samuel 2 Bible Online

1 Samuel 2 - Ntcham bible

1 Samuel 2

¹Niinee Aana mēē Unimbɔti yii: «Ti-Dindaan puee, m-pɔbil píil̀. Ti-Dindaan puee, m còom̄ m-yil gáań, m ŋūǹ kí lā m-nannanliibi. M bí ki fàal̀ dijajil din ti-Dindaan tīī-mee pu.

²Ubɔ kpá ki bí circir ki bàn̄ ti-Dindaan. Ti-Nimbɔtiu boonee, ubɔ kaa ti bí. Ti-Nimbɔtiu baba di sá kutaŋkpanaakoou.

³Ní taa nín̄ sòoǹ ki bùsī dibayoondi nyɔɔbuŋŋi. Timɔn nyɔɔbuŋŋi ń taa nín̄ nyēē ni-nyɔmmun. Di sá yii ti-Dindaan sá Unimbɔti un nyí tikɔkɔee ní, úǹ di ŋmàntī ki nyí báà ŋma tuuŋŋi nín sá puee.

⁴Bibaatandambi tɔfii kɔ́fì, ama ŋwɔsɔfimu ká mpɔn.

⁵Bin nìn jīǹ ki díkèe bíi nyàab̀ atuun kí tɔ̄ kí ká kí jī. Ama bin ŋkùm nìn cááyee kā ki ŋùŋfī. Uŋmaŋŋmanti màl̄ mbiyaamu mululi, ama un nìn màl̄ mbiyaamu tikpilee maaliŋu gúń.

⁶Ti-Dindaan di yàntī unil kúù, úǹ di tí tìì unil dimaŋfal. U yàntī unil ń sìntī ditaŋkpiilin, ki tí yàntī ú jɔ̄mìń.

⁷Ti-Dindaan di kɔ̄ntí unil disoolin, úǹ di tí tìì-u tigaajati. Úǹ di sìntī unil taapu, úǹ di tí yòontí-u yilpu.

⁸U yòontí unandaan ntampukumin, ki nyāntí ufalaadaan titampummoolin, kí cáá-bi kí kàan̄ bɔtiijab kansikin jilma paaŋŋu pu. Ti-Dindaan di yì kitiŋ kɔkɔ, úǹ di dū-kì ki tɔ́kɔǹ u-jaantalkub pu.

⁹U wúǹ bin yú nì u deedeeyee pu, ama binikpitib làá kpú dibɔmbɔndin. Kun puee an kaa sá unil pɔŋŋu pu ní u jáà ki jīǹ.

¹⁰Ti-Dindaan làá yàntī utaa ń nyānní yilpu kí tɔ̄ kí yàaǹ u-nannanliibi. Ti-Dindaan làá dāá sòoǹ kitiŋ kɔkɔ bɔti. U làá dāá tīī u-bɔtiu mpɔn, kí dāá yòon̄ ubɔti un u lēēyee yilpu[2].»

¹¹Míǹ boonee ní Eelkana nín gítí u-dumpu Raama. Ama Samiyeel úǹ nìn gbíntì Siiloo, usaraaŋakpil Eelii cee, kí nīn tūǹ ti-Dindaan tundi.

¹²Eelii jipɔmbi kaa nìn bí tiban, ní kaa nìn nyí ti-Dindaan.

¹³Bisaraaŋaliibi gbanti nín nìn ŋáań puee sèé. Ubɔ yaa nìn ŋá saraayee, usaraaŋal tɔntɔnliu nìn dòoń ŋyunti ŋun ní bi càkā tinan ki tɔ́kɔǹee, ki ŋúb́ kijiii kin cáá anyin atee.

¹⁴U nìn dù kijiiyee kí sāā tinan tin kā disambitɔkɔŋkaalin àá dikumboolin àá sirban àá daanseeyee kí lēeń tinan tin an yaa pée sāāyee kí cáań usaraaŋal. Míǹ ní Eelii jipɔmbi nìn ŋáań Isirayeel yab bin kɔkɔ nìn cá Siiloo Circir Kɔŋkooŋŋunee.

¹⁵Tin bi nìn ŋáań an gíti lákatèe di sá baa láá dū tiwaŋkuti kpam ki wùn̄ ŋŋmi ki tīī ti-Dindaan ní usaraaŋal tɔntɔnliu ń bàń kí bí yii: «Tīī-mi tinan ḿ cáá ŋɔ̄fì kí tīī usaraaŋal. Waa làá kíí kí fōō a-cee tinantɔkɔŋkaal, see tikaal baba.»

¹⁶Bi yaa bí-u yii: «Yàntī tí dū ŋkpam kí wà ŋŋmi kí tīī ti-Dindaan kí wàatī á nín lēē tin a yaa lèe», ní utɔntɔnlee ń bí yii: «Kpataaa, an pée sá á tīī-mi kɔŋkɔnnee ní, an yaa kaa sá míǹ, m làá lēē-tì mpɔn ní.»

¹⁷Eelii jipɔmbee nìn ŋáań ikpitikpaan ti-Dindaan nimbiin, kun puee baa nìn tɔ́ saraabi bin bi nìn ŋáań ki tìì ti-Dindaanee.

¹⁸Samiyeel úǹ nìn pēē gulfa un bí fálfalee bɔkutipaaŋkaaki, ki bí ti-Dindaan nimbiin ki tūǹ u-tundi.

¹⁹Dibindi kamaayee, Samiyeel na nìn ŋál̀-u dibɔkutil ní. U nìn cáǹ-dì ki tìì-u ŋyunti ŋun ní u nì u-cal yaa nìn cá Siiloo kí ŋá dibindi kamaa saraauee.

²⁰Eelii nìn mèé ki bìintí Eelkana nì u-nimpuu pu. U nìn mèé yii: «Ti-Dindaan ń yàntī a-nimpuu nee ń gíti màal̀-si mbiyaamu kí téeǹ kin a dūu sú ti-Dindaanee.» Míǹ boonee ní bí fàtīí nín kùǹ bi-dumpu.

²¹Ti-Dindaan nìn bīiǹ Aana boon ní u gíti màl̄ mbininjabiyaamu muta nì nnimpubiyaamu muli. An yaa kíǹ Samiyeelee, u nìn bí ti-Dindaan tundin ní ki wīintí.

²²Usaraaŋakpil Eelii nìn púĺ tikpil. U nìn gbìl̄ u-jipɔmbi nín bí ki ŋáań Isirayeel yab puee. U nìn gíti gbìl̄ yii bi mɔ̀nnì binimpoobi bin dòoń ki tūǹ Circir Kɔŋkooŋŋu punyɔkɔpu atuunee.

²³U nìn bí-bi yii: «M gbìl̄ samaa kɔkɔ sòoǹ ni-pu min kaa ŋān̄ee, ba pu ní ni ŋáań míǹ?

²⁴M-biyaamu, fámaan mbimbim gbanti! Tin m gbìl̀ ti-Dindaan nikitil sòoǹ ni-puee kaa ŋān̄ báà fiii.

²⁵Unil ubɔ yaa yīntiǹ u-jutee, Unimbɔti di pɔ̀, ama unil yaa yīntiǹ ti-Dindaanee, ŋma di làá pɔ̀?» Ama baa pée dū tin bi-baa sòon̄ nì bee ki túń ditundi. Di sá yii ti-Dindaan nìn lēē kí kpɔ̀-bi ní.

²⁶Samiyeel nìn wīintí ní ki nìn mɔ̀tīi fáatiǹ ti-Dindaan nì binib.

²⁷Unimbɔti bɔnaatiliu ubɔ dɔ́miń ki ká Eelii ní ki bí-u yii: «Ti-Dindaan nín lī puee sèé: <Ŋyunti ŋun a-naanjab nìn bí kuyuŋun Faaroo ŋaan Eejipiti tiŋkinee, m nìn lēē m-ba ki dàkā-bi.

²⁸A-naanja Aarɔn ní m nìn lēē Isirayeel naakɔti kɔkɔ kansikin ú kpántí m-saraaŋakpiliu, kí nīn ŋáań saraabi m-saraafaŋŋu pu, kí nīn tùutī talaalutuukaa, kí nīn lēentí eefoodi m-nimbiin. M nìn lēē saraabi bin Isirayeel yab kɔkɔ cāabìń ki tìì-mee dijandi ki tīī u nì u-naantiibi[3].

²⁹Ba pu ní ni kpèé tiwaŋkuti saraabi nì saraabi bin kíǹ m tīī mara yii bí nīn ŋáań m-kɔŋkooŋŋunee fám míǹ? Ba pu ní a tīī a-jipɔmbi jilma ki jítiǹ man? Di sá yii m-nibul Isirayeel yab nín cāabìń-mi tin kɔkɔ ki ŋáań saraayee, ni lēē dijandi din ŋān̄ee ki jíń ki gbīfiǹ.

³⁰An pu ní man ni-Dindaan Isirayeel Nimbɔtiu lī yii: <M nìn pōoǹ yii a-dicaŋkun yab nì a-baa dicaŋkun yab làá nīn pée sá m-saraaŋaliibi ní kí nīn cá jaanjaan. Ama kɔŋkɔnnee, man ni-Dindaan sòon̄ yii an kaa ti sá míǹ. Di sá yii bin tìì-mi jilmee, m tìì-bi jilma ní, bin kpèé-mi fámee, ma mun kpèé-bi fám ní.

³¹Ŋwiin ŋubɔ dòoń m làá dāá kúntí kun sá sii nì a-baa dicaŋku pɔŋŋuee, ní taa ti ŋmā kí ká ujaŋkpil ni-cindin.

³²Ŋyunti kamaayee, a làá nīn bí kunimbaaun ní. Án làá bútí Isirayeel yab tikɔkɔ poon, ama a-dicaŋkun binicikitikaabi kaa làá nīn gíti bí.

³³Nì míǹ kɔkɔee, m làá yàntī a-dicaŋkun yɔu ubɔ ń nīn gbíntìi bí ki tūǹ ditundi m-saraafaŋŋu pu. An dāa sá kí yàntī án nīn wù-si pɔ̀lpɔl kí kɔ́ kí dóó-si ní. Ama a-dicaŋkun yab bin kɔkɔ kíǹee làá dāá kpú.

³⁴«Tin làá bàń a-jipɔmbi Oofinii nì Fineeyaasi puee di làá nīn sá-si kudaaŋŋu, bi-liitil làá kpú ŋwimbaanti ní.

³⁵Boonee, m làá dāá lēē usaraaŋal un bí deedeeyee. U làá dāá ŋá tin m-pɔbil fáatèe nì m nín là puee. Úǹ di làá dāá ŋá tin fáatì m-pɔbilee. M làá dāá yàntī u-naantiibi ń nīn sá bisaraaŋaliibi kí nīn cá jaanjaan, ní kí nīn bí ki kɔ́ĺ ubɔti un m làá dāá lēēyee.

³⁶Un làá dāá kíń a-dicaŋkun kí nīn bí dimaŋfalinee làá dāá cù kí gbàan̄ usaraaŋal nimbiin ki nyàab̀ animbil jitɔn àá kikpɔnɔkatii. U làá dāá tùkù-u yii: <M gbàam̄-si, pée fōō-mi kí ŋá disaraaŋal tundi diba poon ḿ ŋmā kí nīn kāntí tiba poon fiii ki jīǹ.>»