Read Ntcham 1 Samuel 22 Bible Online

1 Samuel 22 - Ntcham bible

1 Samuel 22

¹Niinee ní Daafiidi yíkì Gaati tiŋkin ki cūtìi bál̀ Adulaam taŋkpanaakookun. U-nabiyaamu nì u-dicaŋkun yab gbìl̄ mimmee ní bi yíkìi dɔ́miń ki kíǹ ki bí u-cee[33].

²Binib bin nìn bí agìń poonee, nì bin nìn jíń apɔɔnee, nì bin nyɔmmu túŋkèe kɔkɔ nìn dɔ́miń ki bí u-cee. Binib nìn kpáfì kii binib alaataa anaa ki bí u-cee, ní u kpántì bi-kpiliu.

³Míǹ boonee ní Daafiidi yíkì niin ki nín cá Miisipa, Moowaab yab tiŋkin, ní ki bí Moowaab bɔtiu yii: «M gbāam̀-si, á yàntī m-baa nì m-na ń dāá nīn kóò a-cee doo, kí nīn cí ŋyunti ŋun m làá béé Unimbɔti nín làá ŋá-mi puee.»

⁴Ní u yōoǹní u-baa nì u-na ki cáań ki kāaǹ Moowaab bɔtiu cee. Niin ní bi kāl̀ kí yòon̄ iyunti in kɔkɔ Daafiidi nìn bí dibalinee.

⁵Dalbee ní Unimbɔti bɔnaatiliu Gaadi bí Daafiidi yii: «Taa nín̄ kā kibalilaŋ nee poon. Yīkì kí nīn cá Juuda tiŋkin.» Ní Daafiidi yíkì ki nín cá Eereeti bambaŋku poon.

⁶Saayuul gbìl̄ yii bi ká Daafiidi nì u-naacimbi. U nìn kā Giibeeya gbantaŋki pu, busubu bun bi yíì tamariisee taapu ki ŋúb́ u-kpaŋki u-ŋaan. U-tɔntɔnliibi kɔkɔ nìn yú ki māntìi tú-u.

⁷Saayuul bí u-tɔntɔnliibee yii: «Nimbi Beenjameen naakookun yab, ní pīlifìmaan-mi. Ni dàkafī yii Jeesee jipɔɔn làá tīī ni-kɔkɔ tisati nì fiinyi kpaaŋŋaaa? U làá kàan̄ ni-kɔkɔ ní nīn sá binib kutukub kpilib nì binib alaataa kpilibaaa?

⁸Ba pu ní ni-kɔkɔ nyáń m-boon míǹ. Ni-kansikin báà ubɔ kaa nyá-mi kuŋaŋŋaau yii m-jipɔɔn nì Jeesee jipɔɔn pūtì ki pōoǹ tɔb kí nīn sá bibɔɔtiibi. M-bɔti kaa pée ká ni-kansikin báà ubɔ. Ubɔ kaa ŋúń ki tùkū-mi yii m-jipɔɔn sāal̀ m-tɔntɔnliu ú píĺ-mi titalindi, kii an nín bí pu díǹ nee!»

⁹Dooweegi, ueedoomja nìn bí Saayuul tɔntɔnliibi kansikin. U nìn bí-u yii: «Man ká Jeesee jipɔɔn. U nìn dɔ́miń Noob, Akituub jipɔɔn Ayiimeeleeki cee.

¹⁰Ayiimeeleeki nìn bālifì ti-Dindaan u-yil pu, ki tīī-u tijin. U nìn dū ufiiliistiija Gooliyaati tàataajiki ki tīī-u[34].»

¹¹Niinee ní ubɔti tú bi yíiń Akituub jipɔɔn Ayiimeeleeki nì u-dicaŋkun yab bin sá bisaraaŋaliibi ki bí Noobee kɔkɔ. Ní bi-kɔkɔ dɔ́miń ki yúl̀ ubɔti nimbiin.

¹²Ní Saayuul bí Ayiimeeleeki yii: «Akituub jipɔɔn, á pīlifì tiŋan». Ní u kíí-u yii: «M-dindaan m pílifí.»

¹³Ní Saayuul bí-u yii: «Ba pu ní sii nì Jeesee jipɔɔn ŋá kinyɔkɔ kí já nì mi ní? A tīī-u tijin nì kitàataajiki, ní ki kɔ́ ki bālifì Unimbɔti u-yil pu ú já nì mi kí píĺ-mi titalindi, kii an nín bí pu díǹ nee.»

¹⁴Ní Ayiimeeleeki kíí ubɔti yii: «A-tɔntɔnliibi kansikin ubɔ bí ki sá deedee ki bàn̄ Daafiidaaa? Sii ti-baa ubɔti coo dee, ní ki sá bijanjaliibi bin cí-see kpiliu. Úǹ ní dibɔticindin nib kɔkɔ tìì jilma.

¹⁵M yaa bālifì Unimbɔti u-yil puee, an kaa sá mpeepeekaam. Maa pée ká nlandɔkɔ yii m làá nyā a-boon kí já nì si. An puee, ti-baa ubɔti, taa dū tibɔti nee kí túń man nì m-dicaŋkun niliu ubɔ pu. Di sá man a-tɔntɔnliu kaa pée nyí tiba tibɔti nee poon.»

¹⁶Ní ubɔti bí Ayiimeeleeki yii: «Sii nì a-dicaŋkun nib kɔkɔ làá kpú ní, man di lī míǹ.»

¹⁷Ní u bí bijanjaliibi bin yú ki kɔ́ĺ-uee yii: «Kpɔ̀maan ti-Dindaan saraaŋaliibi nee, kun puee bi yú Daafiidi boon. Bi nyí u nín bíi sáńee ní baa tùkū-mi.» Ama bijanjaliibi yíì kaa kūū ti-Dindaan saraaŋaliibi.

¹⁸Ní ubɔti bí Dooweegi yii: «Sii, cùú kpɔ̀ bisaraaŋaliibi nee!» Ní ueedoomja Dooweegi u-ba kūū-bi. Yaadalee, u nìn kūū bisaraaŋaliibi bin pèentí asaraaŋabɔkutee imuŋku inaa nì binib biŋmoo ní.

¹⁹Saayuul nìn yāntì bi dū ntàataajimu ki kūū Noob, bisaraaŋaliibi tiŋkin nib kɔkɔ. U nìn yāntì bi kūū bininjab nì binimpoobi nì mbiyaamu nì mbipɔmu nì inaa nì mmamu nì ipii.

²⁰Ayiimeeleeki jipɔɔn, Akituub naantiiu ubɔbɔ di nìn ŋúń ki sáǹ ki ŋmátì. Bi nìn yíì-u Abiyataar. U nìn sáǹ ki cūtìi bí Daafiidi cee.

²¹Abiyataar di tùkū Daafiidi yii Saayuul kūū ti-Dindaan saraaŋaliibi.

²²Ní Daafiidi bí Abiyataar yii: «M nín nìn ká ueedoomja Dooweegi Noob tiŋkin ŋwiin gbantee, m nìn béè yii u làá tùkù Saayuul tin kɔkɔ jítèe. Míǹ puee man di yì a-baa dicaŋkun nib kɔkɔ kúm.

²³An puee nín̄ kā m-cee, á taa fàŋkì tiba. Man nì sii nannanliu sá ubaanti ní. Ama a yaa bí man ceeyee, tiba nì tiba kaa làá ŋá-si.»