Read Ntcham 1 Samuel 23 Bible Online

1 Samuel 23 - Ntcham bible

1 Samuel 23

¹Bi dɔ́miń ki tùkū Daafiidi yii Fiiliistii yab dòoń ki tákà Keeyiila yab, ki cá bi-naapaaŋi pu ki kōontí tijin.

²Ní Daafiidi bālifì ti-Dindaan yii: «Ḿ cù kí já nì Fiiliistii yabaaa?» Ní ti-Dindaan kíí-u yii: «Cù kí já nì bi kí fōō Keeyiila yab bi-ŋaan ki líí.»

³Ní Daafiidi naacimbi bí-u yii: «Ti dá láá kā Juuda tiŋkin doo nì tifaandi. Ti yaa cūtì ki jáń nì Fiiliistii yab, an kaa làá púntáaa?»

⁴Daafiidi gíti bālifì ti-Dindaan nliliitiim, ní ti-Dindaan kíí-u yii: «Nín̄ cá Keeyiila. M làá dū Fiiliistii yab kí ŋá a-ŋaan.»

⁵Niinee ní Daafiidi nì u-naacimbi yíkìi nín cá Keeyiila ki jáń nì Fiiliistii yab ki cútì bi-waŋkuti, ki pɔ́ɔkiǹ-bi sɔ́kɔ sɔkɔ, ní ki fōō Keeyiila yab bi-ŋaan ki líí.

⁶Ŋyunti ŋun Ayiimeeleeki jipɔɔn Abiyataar nìn sáǹ ki cūtì Daafiidi cee Keeyiilayee, u nìn kpáaǹ eefoodi.

⁷Bi tùkū Saayuul yii Daafiidi kɔ́ Keeyiila tiŋkin. Niinee ní u bí yii: «Unimbɔti cúú-u ki ŋá m-ŋaan dee. Di sá yii u nín dɔ́miń ki kɔ́ kitiŋ kin cáá mpunyɔmu nì tikpàlkaal nee, u cáá u-ba ki tɔ́ kutaliŋŋun dee.»

⁸Ní Saayuul kóoǹ u-janjaliibi ki kpáfì bí cù Keeyiila kí màntīí tū Daafiidi nì u-naacimbi.

⁹Daafiidi gbìl̄ nlandɔkɔkpiti ŋun Saayuul bíi bɔ́ntí u-puee, ní u bí usaraaŋal Abiyataar yii ú cáań eefoodi.

¹⁰Ní Daafiidi bí yii: «Ti-Dindaan Isirayeel yab Nimbɔtiu, man a-tɔntɔnliu gbìl̄ yii Saayuul bɔ́ntì kí dāá kúntí Keeyiila tiŋki man pu.

¹¹Keeyiila tindaŋkpilib làá nyāntí-mi kí tīī-uaaa? Saayuul làá lafun dāan̄ kii man a-tɔntɔnliu nín gbìl̄ bi lī pueeee? M-Dindaan, Isirayeel yab Nimbɔtiu, an yaa sá puee, tùkù man a-tɔntɔnliu.» Ní ti-Dindaan kíí-u yii: «Saayuul làá dāan̄.»

¹²Ní Daafiidi gíti bí yii: «Keeyiila tindaŋkpilib làá nyāntí man nì m-naacimbi kí tīī-uaaa?» Ní ti-Dindaan kíí-u yii: «Iiin, bi làá nyāntí-ni kí tīī.»

¹³Niinee Daafiidi nì u-naacimbi nyáń Keeyiila tiŋki ki búntì laaba. Bi nìn sá kii binib alaataa aluu pu ní. Saayuul nín gbìl̄ yii Daafiidi nyáń Keeyiila tiŋkinee, ní u kpītì u-saŋŋu.

¹⁴Daafiidi bàn̄ Siifi teekun ki kóò ajoon pu titaŋkpanaakɔtin. Ní Saayuul bí ŋwiimpu nì kunyeeu ki nyàab̀-u, ama Unimbɔti kaa dū-u ki ŋá u-ŋaan.

¹⁵Daafiidi nín béè yii Saayuul bíi nyàab̀-u kí lēē u-maŋfalee ní u gbíntì Siifi teekun, Ooreesa tiŋkin.

¹⁶Saayuul jipɔɔn Joonatan cūtì Ooreesa Daafiidi cee ki tīī-u kunyannyaau ú nīn gbíntìi máká Unimbɔti pu.

¹⁷U bí-u yii: «Taa fàŋkì tiba! M-baa Saayuul kaa làá ŋmā kí dū u-ŋal kí máań a-pu. Sii di làá jī dibeel Isirayeel tiŋki pu, ní man ń nīn sá a-taapu yɔu. M-baa u-ba nyí míǹ tiŋan.»

¹⁸Ní bi-liitil pūtì ki pōoǹ tɔb kí nīn sá bibɔɔtiibi ti-Dindaan nimbiin. Ní Daafiidi gbíntì Ooreesa niin ki bí, ní Joonatan fātìi nín kùǹ u-dumpu.

¹⁹Siifi yab cūtì Giibeeya ki tùkū Saayuul yii: «Daafiidi dɔ́miń ki bál̀ timbi tiŋkin, Ooreesa taŋkpanaakɔtin, Akiila jool pu kitimpiliŋ kin sá kuteeuee ŋgiil pú.

²⁰Míǹ puee ti-baa, a yaa pée là ŋyunti ŋuŋyee, á dāan̄ timbi di làá cúú-u kí ŋúbíǹ-si.»

²¹Ní Saayuul kíí-bi yii: «Nimbi bin súń man saayee, ti-Dindaan ń bìin̄ ni-boon.

²²Ní cù kí mɔ̀tīí nyàab̀ kí béé laakin u baasii bée, kí béé un di ká-u dibɔbil gbantee, di sá bi tùkū-mi yii u sá uŋmatinli ní.

²³Ní kpèè kí béé ipaan in pu ní u cá ki bāal̀ee kɔkɔ. Ni yaa cúú ibaamɔnee ní gítiń kí tùkù-mi, ní man nì ni ń táá kí cù. U yaa bí Juuda tiŋkinee, m làá fíkití kitiŋee jaaŋŋi kɔkɔ poon nyíki nyiki kí tin ká-u.»

²⁴Niinee Siifi yab yíkì Saayuul cee ki līntì ki nín kùǹ. Daafiidi nì u-naacimbi nìn bí Maawɔn teeku kun bí kitimpiliŋ ŋgiil púee.

²⁵Saayuul yōoǹ u-nib bi nín cá kí nyàab̀-u. Ní bi tùkū Daafiidi, ní u yíkì ki nín cá Maawɔn teekun kigbantaŋ kiba pu. Saayuul gbìl̄ u-pu niinee ní ki nín jì u-boon.

²⁶Saayuul nì u-nib nìn bí dijool dijandi diba pú, ní Daafiidi nì u-naacimbi bí dijandi din kíǹee pu ki sáń. Daafiidi nìn bíi ŋáań malaa malaa kí sāǹ Saayuul. Di sá yii an nìn kíǹ fiii Saayuul nì u-janjaliibi ń bàà màntī kí tú-bi kí cúú-bi.

²⁷Niin kpalaayee ntuun ŋubɔ dɔ́miń ki tùkū Saayuul yii: «Dāan̄ malaa malaa, di sá Fiiliistii yab bíi jáà nì ti-tiŋki.»

²⁸Dicilpu niin ní Saayuul gbēeǹ Daafiidi bɔti pu ki nín cá kí cùú jáǹ Fiiliistii yab. An pu ní bi pú niin diyindi yii: «Diyakatil taŋkpal.»