Read Ntcham 1 Samuel 24 Bible Online

1 Samuel 24 - Ntcham bible

1 Samuel 24

¹Daafiidi yíkì niin ní ki cūtì ki kíǹ ki bí Eeni-Geedii gbantaŋki pu.

²Saayuul nín jáń nì Fiiliistii yab ki fātìi gítìńee, ní bi tùkū-u yii: «Kɔŋkɔnnee, Daafiidi kíǹ ki bí Eeni-Geedii teekun.»

³Saayuul lēē Isirayeel janjamɔmmɔntiibi binib kutukub bita bí cù njooŋɔjamu taŋkpeeŋi laŋki kí nyàab̀ Daafiidi nì u-naacimbi.

⁴Tinaabakal tiba nìn bí nsan caŋin ipii bí poon. Kutaŋkpanaakoou kubɔ nìn bí niin. Bi bàn̄ niinee, Saayuul kɔ́ ataa pu. Asee Daafiidi nì u-naacimbi nìn kɔ́ ki bál̀ poon poon niin[35].

⁵Niinee Daafiidi naacimbi lɔ́kɔfì-u yii: «Ŋwiin ŋun pu ti-Dindaan nìn sòon̄ nì si yii: <Ŋwiin ŋubɔ bí ki dòoń, m làá dū a-nannanliu kí ŋá a-ŋaan á ŋá-u a nín là puee sèé.>» Ní Daafiidi ŋá soooo ki cūtìi gíí Saayuul bɔkutijuti.

⁶U ŋá míǹ ki dóòyee ní u-pɔbil bíi máfí, kun puee u gíí Saayuul bɔkutijuti.

⁷Daafiidi bí u-naacimbi yii: «Ti-Dindaan ń cúú-mi ḿ taa dū m-ŋal kí gbēē m-kpiliu un Unimbɔti lēēyee. Di sá ti-Dindaan u-ba di lēē-u ú nīn sá ubɔti.»

⁸An nyɔɔbuŋŋi ní Daafiidi nìn dūu tātì u-naacimbi lammi. Waa nìn pú-bi nsan bí ŋá Saayuul tiba. Ní ubɔti nyáń kutaŋkpanaakooun ki nìkī u-saŋŋu.

⁹Míǹ boonee Daafiidi mun nyánní kutaŋkpanaakoouee poon ki kúuǹ ki yíiń-u yii: «Ti-baa ubɔteeee!» Saayuul fātìi kpēēyee ní Daafiidi gbāaǹ u-nimbiin u-yigbeel tūū kitiŋ.

¹⁰Ní u bí Saayuul yii: «Ba pu ní a pílifí bin dòoń ki tùkù-si yii man Daafiidi nyàab̀-si tikpitilee ní?

¹¹Sii a-ba ká nì a-nimbil díǹ yii ti-Dindaan bàà dū-si ki ŋá m-ŋaan kutaŋkpanaakoou nee poon. Bi bí-mi yii ḿ kpɔ̀-si, ama ní m súń a-saai ki bí yii: <Maa làá dū m-ŋal kí gbēē m-kpiliu un Unimbɔti lēēyee, di sá úǹ ní ti-Dindaan lēē ubɔti.>

¹²Kpèè m-baa, kpèè kun kā m-ŋaanee, a-bɔkutil juti dee. M nín gíí a-bɔkutil juti kaa kūū-si nee, á béé yii maa pée cáá a-pu nlandɔkɔkpiti ŋubɔ, kaa bíi jáà nì si, kaa yīntiǹ-si tiba mun poon. Ama sii di bíi jì-mi ki là kí lēē m-maŋfal.

¹³Ti-Dindaan di làá sòoǹ man nì si kansikin bɔti. Úǹ di làá tɔ̀ m-pɔntooŋyi ikpiti in a ŋá-mee pu. Ama man kaa làá dū m-ŋal kí gbēē-si.

¹⁴Kii dooooyee laŋkpandi nín lī puee yii: <Utɔŋfiti cee ní ntoom nyēeń.> Ama maa làá dúkutí m-ŋal ní kaa nín gbēē-si.

¹⁵Ŋma ní Isirayeel yab bɔtiu cá kí jáǹ ní? Ŋma ní a sáń ki jì ní? Man sá kii kibɔkɔ kin kpíìyee, ní ki sá kii dikambabilee!

¹⁶Ti-Dindaan di sá ubɔsoonli kí sòoǹ man nì si bɔti. U làá kpèè-tì, kí mɔ̄tì m-pu, kí pɔ̀-mi ní kí fīī-mi a-ŋaan.»

¹⁷Daafiidi sòon̄ nì Saayuul míǹ ki dóòyee, ní Saayuul bí-u yii: «Sii m-jipɔɔn Daafiidi neen ní m gbìl̀ naaa?» U lī mimmee ní ki bíi sūǹ tikpil.

¹⁸Ní Saayuul nìkī ki lī yii: «A sá deedeedaan ki jítiǹ man, di sá yii sii ŋá man tiŋan ní man ŋá-si tikpitil.

¹⁹A dàkā-mi díǹ nee tiŋan tin a dàkafī m-puee, di sá yii ti-Dindaan bàà dū-mi ki ŋá a-ŋaan ní aa kūū-mi.

²⁰Unil yaa yīkiǹ u-pulincɔnti nsanni, u yàntī ú nìkī u-saŋŋu nì ŋgbansɔŋfaaa? Unimbɔti ń pà-si tin a ŋá ki tīī-mi díǹ nee pu.

²¹Kɔŋkɔnnee m béè yii sii di làá dāá nīn sá ubɔti, ní Isirayeel beel pɔŋŋu dāa kā a-ŋaan.

²²Kɔŋkɔnnee, pùtī ti-Dindaan kí pòon̄-mi yii m-kúm boonee, aa làá dāá kpɔ̀ kí céetí m-dicaŋkun nib. Mimmee bi làá dāá téetí man nì m-dicaŋkun nib pu.»

²³Niinee Daafiidi pūtì ki pōoǹ Saayuul. Míǹ boonee ní u nín gítí u-dumpu, ní Daafiidi nì u-naacimbi mun nín gítí ajoon pu laakin bi nìn bál̀ee.