Read Ntcham 1 Samuel 27 Bible Online

1 Samuel 27 - Ntcham bible

1 Samuel 27

¹Boonee ní Daafiidi lī u-neen yii: «Ŋwiin bí Saayuul làá dāá ŋmā kí lēē m-maŋfal. Kun m pée ŋūǹ kí ŋée di sá ḿ sāǹ kí cùú báĺ Fiiliistii yab tiŋkin. Mimmee, Saayuul làá gbèen̄ kí taa ti nín̄ nyàab̀-mi Isirayeel tiŋki kɔkɔn, ní ḿ ŋmátí u-ŋaan.»

²Niinee ní Daafiidi nì u-naacimbi binib alaataa aluuyee yíkìi búntì Mawooki jipɔɔn Akiisi, Gaati yab bɔtiu cee.

³Bi nìn cūtìi kāl̀ Akiisi cee Gaati tiŋkin bi nì bi-dicaŋŋi. Daafiidi nimpoobi liitil nìn bí u-cee: Akiinoowam un sá Jisirayeel tiŋkinee, nì Abiigayiil, Nabaal nimpuu un sá Kaarmeel tiŋkinee.

⁴Saayuul nín gbìl̄ yii Daafiidi sáǹ ki cūtìi bál̀ Gaatee ní u gbēeǹ kaa ti bíi jì-u.

⁵Dalbee ní Daafiidi bí Akiisi yii: «A yaa kíikí kí bàà pɔ̄-mi diyimɔɔl ḿ nīn kóò kitimbilii kiban. Kun puee an kaa máaǹ yii man a-tɔntɔnliu ń nīn kóò kitiŋ kin poon sii ubɔti kóòyee.»

⁶Yaadal gbanti ní Akiisi dū Siikilaagi tiŋki ki tīī-u. An pu ní áli nì díǹ, Juuda yab bɔtiibi gbíntìi yì Siikilaagi tiŋki.

⁷Daafiidi kāl̀ Fiiliistii yab tiŋkin dibindi diba nì iŋmal inaa ní.

⁸Daafiidi bí niinee ní u nì u-naacimbi jɔ́m̀ ki jáń nì Geesuur yab nì Giirsi yab nì Amaleeki yab. Di sá yii bíǹ di nìn pée kóò kitiŋ gbantin doooodooooyee kí pée yòon̄ Suur tiŋki kí tin cáá sāā Eejipiti tiŋki.

⁹Bi nìn kūū kitiŋ gbanti nib kɔkɔ, bininjab nì binimpoobi, ní ki cúuń inaa nì ipii nì iŋoobu nì mmamu nì igutaamu, ki kóoǹní tiwampeeŋkaal. U fātìi gítìńee ní ki cūtì Akiisi cee.

¹⁰Akiisi yaa nìn bālifì Daafiidi yii: «Bilab ní a cūtìi jáń kujaau díǹ ní?» Ní Daafiidi ń kíí-u yii: «M cūti jáń nì Juuda tiŋki ŋgiil pú yab», àá «Yeerameel yab tiŋki ŋgiil pú», àá «Keeni yab tiŋki ŋgiil pú ní.»

¹¹Daafiidi kaa nìn cútiń uninja àá unimpu nì u-nimbiliŋ kí cáań Gaati tiŋkin. U nìn lī u-neen yii: «Binib làá nīn sòoǹ ki kɔ́kɔĺ-mi yii: <Kpèè Daafiidi nín ŋáań puee sèé.>» Ŋyunti ŋun kɔkɔ Daafiidi dūu kāl̀ Fiiliistii yab tiŋkinee, u nín nìn ŋáań puee dee.

¹²An pu ní Akiisi nìn cáá Daafiidi pu dimákal tikpil. U nìn lī u-ban yii: «Daafiidi dàkā kináŋ Isirayeel yab bin sá u-nibulee pu tikpil. An puee u làá nīn pée bí m-cee ki tūǹ m-tundi kí nīn cáa cá jaanjaan.»