Read Ntcham 1 Samuel 3 Bible Online

1 Samuel 3 - Ntcham bible

1 Samuel 3

¹Kinaacimpɔmbiki Samiyeel nìn bí Eelii cee ki tūǹ ti-Dindaan tundi. Ŋyunti gbantee, Unimbɔti kaa nìn sòoǹ nì binib múlmul, ní dileedakal kaa nìn gbōō.

²Kunyeeu kubɔee, Eelii nìn dɔ̄ laakin u pée dɔ̀ee. U-nimbiliŋ nìn pēefì ní waa ti wāĺ tiŋan.

³Samiyeel mun nìn dɔ̄ ti-Dindaan Diikun, laakin Unimbɔti dakaau yúee. Unimbɔti fitilau kaa nìn dáá kpíì.

⁴Ti-Dindaan nìn yíiń Samiyeel, ní u kíí yii: «M sèé».

⁵Ní u sáǹ ki nín cá Eelii cee ki bí-u yii: «A nín yíiń-mee, m sèé.» Ní Eelii bí-u yii: «Maa yíiń-si, nín̄ gítí kí cùú dòon̄.» Ní Samiyeel nín gítí ki cūtìi dōoǹ.

⁶Ní ti-Dindaan fātìi yíiń Samiyeel nliliitiim. Ní Samiyeel yíkì ki nín gítí Eelii cee, ki bí-u yii: «A nín yíiń-mee, m sèé.» Ní Eelii bí-u yii: «Maa yíiń-si m-biki, nín̄ gítí kí cùú dòon̄.»

⁷Samiyeel kaa nìn dáá nyí ti-Dindaan, di sá waa nìn dáá pée sòon̄ nì u ki ká.

⁸Ní ti-Dindaan gíti yíiń Samiyeel ntataatiim ní Samiyeel yíkì ki nín cá Eelii cee ki bí-u yii: «A nín yíiń-mee, m sèé!» Niinee Eelii nín béè yii an sá ti-Dindaan di bíi yíì kibiki.

⁹Ní Eelii bí Samiyeel yii: «Nín̄ gítí kí cùú dòon̄, u yaa ti yíiń-see, á lì yii: <Nín̄ sòoǹ, ti-Dindaan, man a-tɔntɔnliu pílifí!>» Ní Samiyeel nín gítí ki cūtìi dōoǹ laakin u pée dɔ̀ee.

¹⁰Ti-Dindaan nìn dɔ́miń ki lēē u-bítam ki dàkā. Kii u nín bàà pée bíi yíì-u puee, u nìn tí yíiń-u yii: «Samiyeel! Samiyeel!» Ní Samiyeel kíí-u yii: «Nín̄ sòoǹ, man a-tɔntɔnliu pílifí.»

¹¹Niinee ní ti-Dindaan bí Samiyeel yii: «M làá ŋá tiba Isirayeel tiŋkin, ní án làá kɔ́ǹ un kamaa yaa gbìl̄-tèe dinyoondi.

¹²Ŋwiin gbantee, m làá dū mbusub bin kɔkɔ m sòon̄ kí tɔ̄ Eelii nì u-dicaŋku puee kí tɔ̄ bi-pu, báà ubɔbɔ kaa làá gbíntí.

¹³M tùkū Eelii ki síiǹ, m sòon̄ ki kūū u-dicaŋkun yab bɔti kí nīn pée cá, kun puee u nyí u-jipɔmbi nín bí ki kpèé man Unimbɔti fámee ní u ŋmí kaa dáaĺ bi-tafal.

¹⁴An pu ní m pūtì yii báà Eelii dicaŋkun yab yaa yāntì ki ŋá tiwaŋkuti saraabi àá saraabi bin kíǹee min min, án kpá kí pítí bi-kpitii.»

¹⁵Samiyeel gbíntìi dɔ̄ míǹ ní kutaa wúntì, ní u yíkìi pīitì ti-Dindaan diiku punyɔmmu. Samiyeel nìn fàŋkí kí tùkù Eelii tin u kée.

¹⁶Ní Eelii yíiń Samiyeel ní ki bí-u yii: «Samiyeel, m-jipɔɔn!» Ní u kíí-u yii: «M sèé!»

¹⁷Ní u bālifì-u yii: «Ti-Dindaan tùkū-si yii ba ní? Á taa báĺ-mi báà tiba! A yaa bál̀-mi kubɔbambaantiiu, Unimbɔti ń dáaĺ a-tafal ŋkpitim pu.»

¹⁸Niinee ní Samiyeel kàan̄ tibɔti kɔkɔ ki tùkū-u kaa bál̀-u báà tiba. Ní Eelii bí yii: «Úǹ di sá ti-Dindaan, ú ŋá min u ká yii an ŋān̄ee.»

¹⁹Samiyeel nìn wíiǹ. Ti-Dindaan nìn bí u-cee, ní kaa nìn yāntì tin u sòon̄ee tiba gbíntì fám kaa túń ditundi.

²⁰An yāntì Isirayeel yab kɔkɔ, kí yòon̄ Daani tiŋki kí cáá sāā Beerseeba tiŋkee, báà ŋma béè yii ibaamɔn Samiyeel baasii sá ti-Dindaan bɔnaatiliu[4].

²¹Ti-Dindaan nìn gbíntìi nìkì ki nyāntí u-ba Siiloo ki dàkà. Di sá yii Siiloo niin ní u nìn nyāntí u-ba ki dàkà Samiyeel ní ki tìì-u u-nyɔɔbundi,