Read Ntcham 1 Samuel 5 Bible Online

1 Samuel 5 - Ntcham bible

1 Samuel 5

¹Fiiliistii yab nìn fōō Unimbɔti dakaau. Bi nìn yōoǹ-u Eebeen-Eeseer ki cáa cūnnì Asidoodi tiŋkin.

²Bi yōoǹ-u ki cáa kɔ́ǹ bi-waal Daagɔn diikun ki nákáǹ-dì.

³Kutaa wúntì kutaafaau pɔ̀lpɔl Asidoodi yab kpēēyee, diwaal Daagɔn lítì dicincibil ki dɔ̄ kitiŋ Unimbɔti dakaau nimbiin, ní bi yōoǹ-dì ki gíiǹ ki yóoǹ di-paaŋŋu.

⁴Kù tí wúntì kutaafaau pɔ̀lpɔl bi kpēēyee, Daagɔn tí lítì dicincibil ki dɔ̄ kitiŋ Unimbɔti dakaau nimbiin. Diyil nìn cúu tūkutì ní iŋal liitil kɔ́fì ki dɔ̄ nsan pú. An nìn pée kíǹ dimuundi ní ki dɔ̄.

⁵An pu ní áli ki dāa sāā díǹ nee, diwaal Daagɔn tandambi nì bin kɔkɔ cá ki kóò kuwaadiin Asidoodi tiŋkinee taal kaa tà kuwaadii punyɔkɔpu kí kɔ́.

⁶Ti-Dindaan nìn kɔ́ǹ Asidoodi yab agìŋ́kpaan poon. U nìn kɔ́ǹ-bi dinyoondin, ki yāntì ncaapa cúú-bi, ki kpáaǹ bin nìn kóò ntimu mun māntìi tú-bee.

⁷Asidoodi yab nín ká tin bíi jītí bi-puee, ní bi bí yii: «Isirayeel yab Nimbɔtiu dakaau kaa máaǹ kí yūĺ ti-cee doo. Isirayeel Nimbɔtiu dàkā ti nì ti-waal Daagɔn u-pɔŋŋu.»

⁸Ní bi tú bi yíiń Fiiliistii yab bɔtiibi bi dɔ́miń ki kpáfì bi-cee, ní bi bālifì-bi yii: «Ti làá ŋá Isirayeel Nimbɔtiu dakaau nee mana?» Ní bíǹ kíí-bi yii: «Yòom̄maan-u kí cáá cùnnì Gaati tiŋkin.» Niinee ní bi yōoǹ Isirayeel yab Nimbɔtiu dakaau ki cáa yóoǹ Gaati tiŋkin.

⁹Bi nín cáá Unimbɔti dakaau ki yóoǹ kitiŋ gbantinee, Unimbɔti nìn dáaĺ kitiŋ gbanti nib tafal, ki yāntì dinyoondi kɔ́-bi. U nìn dáaĺ bikpaambi nì ŋwaamu kɔkɔ tafal, ki yāntì ncaapa cútì-bi.

¹⁰Niinee ní bi yōoǹ Unimbɔti dakaau ki cūnnì Eekrɔn tiŋkin. Ama bi nín cáá Unimbɔti dakaau ki bàn̄ niinee ní Eekrɔn yab kíĺ ki bíi gbáà ibiil yii: «Bi cáań Isirayeel yab Nimbɔtiu dakaau ti-cee doo kí kpɔ̀ ti nì ti-nibul!»

¹¹Ní bi mun yíiń Fiiliistii yab bɔtiibi kɔkɔ ki kpáfì ki bí-bi yii: «Ní fàtīí gíiǹ Isirayeel yab Nimbɔtiu dakaau u-tiŋkin, laakin u nìn bée, ú taa kpɔ̀ ti nì ti-nibul.» Di sá ŋkúm faanti nìn cúú Eekrɔn yab kɔkɔ, kun puee Unimbɔti nìn dàkā-bi u-pɔnŋu.

¹²Bin ŋkúm kaa nìn kūūyee, ncaapa nìn cúú-bi, ní bi gbáń kunimbaau biilii áli an tin bàn̄ kutagbɔŋu.