Read Ntcham 1 Samuel 6 Bible Online

1 Samuel 6 - Ntcham bible

1 Samuel 6

¹Ti-Dindaan dakaau nìn ŋá Fiiliistii yab tiŋkin iŋmal iluli ní.

²Fiiliistii yab nìn yíiń bitandambi nì bibɔɔbi, ní ki bālifì-bi yii: «Ti làá ŋá ti-Dindaan dakaau mana ní? Tùkùmaan-ti min ní an sá tí ŋá ní kí yòon̄-u kí gíiǹ u-tiŋkin laakin u nìn bée.»

³Ní bi kíí-bi yii: «Ni yaa làá gíiǹ Unimbɔti dakaau Isirayeel tiŋkinee, ní taa gíiǹ-u fám. Ama ní tīī tiwan tin bi làá tin dūú ŋá saraa kí ŋāŋkì ni-bɔkpilee. Niinee, ni làá ká dicáaǹdi ní kí béé kun pu u dátí ni-tafal kaa gbèentée.»

⁴Ní bi bālifì-bi yii: «Ba ní an sá tí tīī bí dūú ŋāŋkì?» Ní bitandambee nì bibɔɔbee bí-bi yii: «Ní dū sindaariya kí mɔ́ɔ́ tiwan tiŋmoo kí nántíǹ ncaapa, nì inapul iŋmoo, di sá yii Fiiliistii yab bɔtiibi bí biŋmoo ní. Ibaamɔnee, ŋweembaanti di cúú ni nì ni-bɔtiibi.

⁵An puee ní mɔ́ɔ́ tiwan kí nántíǹ ncaapa ŋun cúú-nee nì inapul in di kɔ́ ki bíil̀ ni-tiŋkee, ní kí tīī Isirayeel Nimbɔtiu tinyool. An yaa yíì, u làá gbèen̄ kaa ti làá dáaĺ ni nì ni-waaŋi nì ni-tiŋki tafal.

⁶Ní taa pɔ̄ɔkì ni-pɔbil kii Eejipiti yab nì Faaroo nín nìn ŋá puee. Ní téetí Unimbɔti nín nìn sāaǹ-bi pu ní bi dāa nín yāntì Isirayeel yab nyáń ki búntèe.

⁷An puee mɔ́ɔ́maan tɔrɔkupɔɔn ubɔ, kí nyàab̀ inasal ili in biyaamu ŋáaḿ baa kpàl̄-i i túń ditundi ki kée. Bí dū tɔrɔku kí nɔ̀b̄-i ní kí gíiǹ i-biyaamu laakin bi ŋáań inaa timool i ŋmóòyee.

⁸Ní yòon̄ ti-Dindaan dakaau kí tàkan̄ tɔrɔkuee poon. Ní dū sindaariya wanti tin ni tīī bí dūú ŋāŋkì ni-bɔkpilee kí ŋá kidakaabiki kiba poon kí dūú yóoń kí kɔ́ĺ Unimbɔti dakaau, ní kí yàntī inaayee ń nīn cá.

⁹Ní nīn yú ki kpèé, inasalee yaa túĺ Isirayeel yab tiŋki saŋŋu ki cá Beeti-Seemeesi watil púee, mimmee ti béè yii bi-Nimbɔtiu di yāntì mbusu nee jéetì ti-pu. Ama i yaa dūu túĺ laaba púee, mimmee ti béè yii an kaa nyánní u-cee, an sá yìkíl̄ yikil ní.»

¹⁰Fiiliistii yab ŋá min bi dàkā-bee. Bi nyàab̄ inasal ili in mbiyaamu ŋáaḿee ki kpàl̄-i ní ki dū tɔrɔku ki nɔ̀b̄-i, ní ki gíiǹ i-biyaamu laakin bi ŋáań inaa timool i ŋmóòyee.

¹¹Bi nìn dū ti-Dindaan dakaau nì kidakaabiki kin poon inapul naŋku nì tiwan tin bi dū sindaariya ki mɔ́ɔ́ ki nántiǹ ncaapee ki tākaǹ tɔrɔkuee poon.

¹²Ní inasalee kíĺ Beeti-Seemeesi saŋŋu cáaa ki búntì. I pée tàkā nsan gbanti míǹ ní, kaa pāatì ŋganaaa, ŋgiil. I nìn pée sūǹ ní kaa gbèentí. Fiiliistii yab bɔtiibi nìn pá i-boon áli i tin kɔ́ Beeti-Seemeesi tiŋkin.

¹³Beeti-Seemeesi yab nìn bí ditantakalin ki cēē bilee. Bi yáatìi kpēēyee ki ká ti-Dindaan dakaau. Bi nín ká dakaayee ní an mɔ́ɔkiǹ-bi.

¹⁴Inaayee dūu bàn̄ Joosuwa un sá Beeti-Seemeesee saakunee ní ki yúl̀ ditaŋkpakpaandi diba caŋin. Bi nìn látì tɔrɔkuee dɔi ní ki dū inasalee ki ŋá saraawɔkaa ki tīī ti-Dindaan.

¹⁵Ní Leefii yab dɔ́miń ki tākatì ti-Dindaan dakaau nì kidakaabiki kin poon sindaariya wanti kēe ki dūu tɔ́kɔǹ ditaŋkpakpaandee pu. Ŋwiin gbanti mbaanti ní Beeti-Seemeesi yab ŋá bisaraawɔkaabi nì mpèé saraau ki tīī ti-Dindaan.

¹⁶Fiiliistii bɔtiibi bi-ŋmootil nín ká mimmee ní bi nín gítí Eekrɔn tiŋkin yaadal wiiŋŋu.

¹⁷Fiiliistii yab nín nìn tīī sindaariya wanti tin bi mɔ́ɔ́ ki nántiǹ ncaapa bí dūú ŋá ti-Dindaan saraa kí ŋāŋkì bi-bɔkpilee nyɔkɔm sɔ̀: Asidoodi tiŋki yil pu kubɔ, Gaasaa tiŋki yil pu kubɔ, Asikeelɔn tiŋki yil pu kubɔ, Gaati tiŋki yil pu kubɔ ní Eekrɔn tiŋki yil pu kubɔ.

¹⁸Sindaariya napulii in bi mɔ́ɔ́yee nìn sá ntimu mun Fiiliistii bɔtiibi biŋmooyee nìn kpòotēe nyɔkɔm ní, kí yòon̄ ntimu mun bi máń agun ki túee kí cáá sāā ntimbilimu mun baa máń agun ki túee. Fiiliistii yab timmu nìn dɔ̄ kí tin cáá sāā Ditaŋkpakpaandi din pu bi nìn dū ti-Dindaan dakaau ki tɔ́kɔǹee. Díǹ pu nee, ditaŋkpakpaandi gbanti dáá gbíntìi bí niin, Joosuwa un sá Beeti-Seemeesee saakun.

¹⁹Ti-Dindaan nìn dáaĺ Beeti-Seemeesi yab tafal, kun puee bi nìn kpēē ti-Dindaan dakaau poon. Binib kutukub imuŋku ili nì saalaa poonee, u nìn kūū binib imuŋku ita nì saalaa. Niinee Beeti-Seemeesi yab kāl̀ dikpool, kun puee ti-Dindaan nìn dáaĺ bi-tafal tikpil.

²⁰Ní Beeti-Seemeesi yab bí yii: «Ŋma di ŋūǹ kí yūĺ ti-Dindaan un sá circir Nimbɔtiu nee nimbiin? Ŋma cee ní ti làá yòon̄ dakaa nee kí cùnnì kí yóoń kí wàatī ti-ba?»

²¹Ní bi tú binib bí cù Kiiriyati-Yeeyariim yab cee kí tùkù-bi yii: «Fiiliistii yab gíiǹní ti-Dindaan dakaau. Dāam̄maan kí yòon̄ kí cùnnì ni-cee.»