Read Ntcham 1 Samuel 9 Bible Online

1 Samuel 9 - Ntcham bible

1 Samuel 9

¹Ŋyunti gbantee, Beenjameen tiŋkinee, uninja ubɔ nìn bí ki sá ubaatandaan bi yíì-u yii Kiisi. Bi nìn yíì u-baa yii Abiyeel ní ki yíì u-naanja yii Seeroor. Bi nìn yíì Seeroor baa yii Beekoorati ní ki yíì u-naanja yii Afiya.

²U nìn cáá jipɔɔn ubɔ bi yíì-u yii Saayuul. U nìn ŋān̄ unaacimpɔɔn an kaa cáá bí lì. Isirayeel tiŋkinee, un nìn ŋān̄ ki bàn̄-uee kaa bí, ní u nìn fɔ̀kɔǹ bi-kɔkɔ.

³Dalbee, Saayuul baa Kiisi mansalii wáŋkì, ní u bí u-jipɔɔn yii: «Yòon̄ utɔntɔnli ubɔ kí páań a-boon ní cùú nyàab̀ imansal.»

⁴Saayuul nì utɔntɔnlee yìin̄ Eefiraayiim timmu mun bí ajoon puee, nì Salisaa timmun kaa ká-i. Boonee ki nín cá Saaliim timmun ki yìin̄ kaa ká-i, ní ki yìin̄ Beenjameen timmun kaa ká-i.

⁵Bi bāań Suufi tiŋkinee ní Saayuul bí utɔntɔnlee yii: «Tí gítí mmɔŋki, an yaa sá fám m-baa làá súntí imansal pu kí nīn bíi yáliŋkí ti-pu.»

⁶Ní utɔntɔnlee kíí-u yii: «Unimbɔti bɔnaatiliu ubɔ bí kitiŋ nee poon! U sá unil un pu bi nyée ní. Tin u yaa lēe, see á ká míǹ deedee. Tí cùú ká-u, an yaa yíì, u làá dàkà-ti dijandi din sá tí túĺ kí nīn nyàab̀ee.»

⁷Ní Saayuul kíí-u yii: «Too, tí cù. Kin ba ní ti làá tin pɔ̄ Unimbɔti bɔnaatiliu gbanti? Di sá yii ti-kpɔnɔb dóò kulooun, ní taa ti cáá tiwampɔkaal tiba mun kí tin pɔ̄-u, tiba nì tiba kaa ti kíǹ ti-cee.»

⁸Ní utɔntɔnlee bí yii: «Man cáá kijitɔŋwaai kiba m-cee doo. M làá dū-kì kí tīī Unimbɔti bɔnaatiliu ú dàkà-ti nsan ŋun sá tí túĺee.»

⁹Njaminee Isirayeel yab yaa nìn cá Unimbɔti cee kí bàlifèe, bi nìn lì yii: «Dāam̄maan tí cù un wāĺee cee ní.» Di sá yii bi nìn yíì bin ti yíì díǹ Unimbɔti bɔnaatiliibi nee yii bin wāĺee ní.

¹⁰Ní Saayuul bí u-tɔntɔnliuee yii: «A nín lī puee ŋān̄, tí nīn cá.» Ní bi páaǹ tɔb pu ki búntì kitiŋ kin poon Unimbɔti bɔnaatiliuee kóòyee.

¹¹Bi bíi dàb̀ kí kɔ́ kitiŋinee ní ki tú bisapɔmbi cá ŋkpin, ní bi bālifì-bi yii: «Doo ní uninja un wāĺee báaa?»

¹²Ní bisapɔmbee kíí-bi yii: «U bāań an kaa yúntì ní ni mun dūu bāań nee. Ama ní ŋá malaa, u dɔ́miń kitiŋin díǹ. Di sá yii u cáá saraa ubɔ ki làá ŋá kí tīī samaa díǹ nsaraaŋapaan pu.

¹³Ni yaa pée kɔ́ kitiŋin kpalaayee, ni làá ká-u kí wàatī ú nīn nín jɔ́ḿ nsaraaŋapaan laŋki kí jī tijin. Di sá yii u yaa kaa bāań, samaa kaa máaǹ kí jī, kun puee úǹ di mèé kí bìin̄ saraa jinti pu ní bin bi yíińee ń nín jī. Míǹ puee nín̄ cámaan kɔŋkɔnnee, ni làá tin yìkin̄-u.»

¹⁴Ní bi nín jɔ́ḿ kitiŋin. Ŋyunti ŋun bi làá kɔ́ kitiŋinee, Samiyeel mun nyēē bi-nimbiin kí nīn cá nsaraaŋapaan pu dee.

¹⁵Too, kutaa ń wúntí Saayuul ń bà Samiyeel ceeyee, ti-Dindaan tùkū Samiyeel yii:

¹⁶«Fool ŋyunti nee deedeeyee, m làá fu yàntī Beenjameen naakookun niliu ubɔ ń dāan̄ a-cee. Á fu sìtī u-yil pu ŋkpam kí kàan̄-u m-nibul Isirayeel yab pu dibeel. U làá dāá fīī m-nibul Isirayeel yab Fiiliistii yab ŋaan. Di sá yii m ká m-nibul falaau ki gbìl̄ di-yaliŋkii.»

¹⁷Ŋyunti ŋun Samiyeel ká Saayuul páaǹnée ní ti-Dindaan bí-u yii: «Kpèè uninja un bɔti m fu sòon̄ nì si yii u làá jī m-nibul pu dibeelee sèé.»

¹⁸Saayuul sútì ki pìl̄ Samiyeel kitiŋ punyɔkɔki caŋin ki bālifì yii: «M gbāam̀-si, dàkà-mi laakin un wāĺee kóòyee.»

¹⁹Ní Samiyeel kíí-u yii: «An sá man. Lìntī m-nyɔkɔpu tí jɔ̄m̀ nsaraaŋapaan laŋki. Ni làá jī man cee ní tijin díǹ, ní fool kutaafaauee ḿ fu tùkù-si tin kɔkɔ páb́-see, ní kí fu pɔ̄-si nsan á fàtī.

²⁰An yaa kíǹ imansal in wáŋkì an ŋá díǹ iwiin itee bɔtee, taa ti yāliŋkì, di sá yii bi fātìi ká-i. Ŋma di yì tigaajawan tin kɔkɔ bí Isirayeel tiŋkinee ní? An kaa sá sii nì a-baa dicaŋkuaaa?»

²¹Ní Saayuul bí yii: «Man sá Beenjameen naakookun naa! Isirayeel naakɔti kɔkɔ poonee, kúǹ di sá kiwaai, ní Beenjameen naakookunee, man dicaŋku di kaa pée bí tiban! Kin ba pu ní a sòon̄ nì mi míǹ?»

²²Samiyeel cáá Saayuul nì utɔntɔnlee ki kɔ́ǹ kudii kun poon bi làá jī tijinee. U nìn kāaǹ-bi jilma paaŋyi binib bin u yíińee kansikin. Bi nìn sá binib mmuŋku nì saalaa nyɔkɔm ní.

²³Ní Samiyeel bí ujiŋŋal yii: «Cáań dinaŋkúndi din m bàà lēē ki tīī-si á yóońee.»

²⁴Ní u cūtìi cáań dinantaal nì dipugbindi ki yóoǹ Saayuul nimbiin, ní Samiyeel bí-u yii: «Dinaŋkúndi din m lēē ki yóoǹ-see dee. Sii di yì. Nín̄ ŋmóò. Dikpafil nee pu ní bi lēē-dì ki yóoǹ. Sii nì bin m yíińee ń kpāfì kí ŋmɔ́.» Ŋwiin gbantee Saayuul nì Samiyeel di nìn kpáfì ki jíń tijin.

²⁵Ní bi yíkìń nsaraaŋapaan laŋki ki sīntìń kitiŋin. Ní Samiyeel kāl̀ bi nín bɔ̀b̄ kudii yilpu puee u nì Saayuul gbáń mmaam.

²⁶Saayuul nì u-tɔntɔnliuee fīntì kutaafaau pɔ̀lpɔl. Kutaa wúntì ki dóòyee ní Samiyeel yíiń Saayuul kudii yilpu ki bí-u yii: «Yīkì ḿ nyāntí-si nsanni.» Ní bi yíkìi táá tɔb ki nín nyēē.

²⁷Bi nyáń kitiŋin ki dóòyee ní Samiyeel bí Saayuul yii: «Yàntī a-tɔntɔnliu ń lìntī nyɔkɔpu kí nīn cá.» Ní u-tɔntɔnliuee jítìi līntì ní Samiyeel bí Saayuul yii: «Sii yūĺ doo ḿ tùkù-si Unimbɔti nín lī puee.»