Read Nugunu Motíosi 12 Bible Online

Motíosi 12 - Nugunu bible

Motíosi 12

¹Moɔnɔ́ ba gɛcamɛna a á dómbá, Yésusu go nco fɛ́lɛda naá ntɛ́mɛ́ sá belée buisí bá sábadɛ búmmue. Behúúní bɛ́hɛ́ go ɛ́da go sóga bɛondá bá sɛ́ go go nyáanana, goakɛ́ bá mba lɛ́ na ncaná[69].

²Befelisiéŋe bɛ́ ɛ́nana nɔ́ɔnɔ, go oyana Yésusu bá amɔ́: «Núúnée, behúúní báhɔ bá ŋanana boóma bɔ́ɔbɔ bó lɔ́mɔ́ gicele go buisí bá sábadɛ[70].»

³Yésusu go bó gundie a amɔ́: «No lɛ́ kanɛ go bana boóma bɔ́ɔbɔ Défidi a mbaá ŋaáa nɛhɛ́ na batɔ bɛ́hɛ́ buisí búmmue bɔ́ɔbɔ a mbaá bɛáa ncaná o?

⁴A mbi íŋéné naá Nnyaŋá ya Asaŋa, bá báá nyáá nɛhɛ́ na batɔ bɛ́hɛ́, bɛlɛ́dɛ bá bɛbáágá bɛ́ɛbɛ bedúmbí bɛbáágá naá Asaŋa bákáa bá mbaá lɔmɔ́ na bogaaga bá go bɛ́ nyáanana[71] o?

⁵Ɛ́na lí, no lɛ́ kanɛ go bana naá gicele gá Mɔ́sɛsɛ goŋaá, buisí bá sábadɛ, bedúmbí bɛbáágá naá Asaŋa bá dómbanɛna gicele gá sábadɛ naá Nnyaŋá ya Asaŋa kanɛ go bɛ́ɛmba naá gɛoba[72] o?

⁶Kanɛ́ yɔmɔ́ɔ ŋgaá nyó oyáná caá: anáa dɛ lɔ́mɔ́ háalá, bó dómbana Nnyaŋá ya Asaŋa.

⁷Aáŋa no íyimene nogálɔ ná Ŋgɔ́ŋɛ́ nɔ́ɔnɔ nó lɔ́mɔ́ nó amɔ́: “Ndɛ́galɛgamɔ́ ŋgɛ́na mahana, caá akɛ́ bidúgé bá go sómba go bɛbáágá[73]”, gásɛ́ no do á gá fáá batɔ béení gɛoba.

⁸Mammana, Moɔnɔ́ ba mɔtɔ a lɛ́ ogɔ́nɔ́ɔ ba sábadɛ.»

⁹Yésusu go fadɛgɛna hɔ́ɔlɔ́, go ɛ́da naá nnyaŋá yabɔ́ ya mbósógólí a bíí íŋéné.

¹⁰Mɔtɔ ummue a mba lɛ́ hɔ́ɔ na ombɔ́gɔ ugúe. Batɔ go úhune Yésusu bá amɔ́: «Gicele gɛ́cɔ́ gɛ́ fáanana bogaaga bá go éŋugie mɔtɔ buisí bá sábadɛ o?» Bá mba lɛ́ bá fúmbe go mo sɔ́mɛnɔ.

¹¹Kanɛ́ Yésusu go bó oyana amɔ́: «Aáŋa ummue naá bɛɛnyɔ́ɔ báaba a bɛanana gɛdómbáa gɛ́hɛ́ táŋɛ́ gímmue, gɛ́ bóó obɛ́ná naá ɛbɛ́lá buisí bá sábadɛ, a gií inyé go íŋene a gɛ́ húmie o?

¹²Kanɛ́ na mɔtɔ mɔ́ɔnyɔ a dómbanamɔ́ gɛdómbáa! Goŋanana besé buisí bá sábadɛ gó do báá na gicele.»

¹³Yésusu go oyana mɔtɔ mɔ́ɔnyɔ a amɔ́: «Gaanóna ombɔ́gɔ.» Mɔtɔ go yó gaanona, yó báá dómbá go éŋuge, yó báá gundé láhɔ láhɔ aŋa yɔ́ɔyɔ yúncoó.

¹⁴Befelisiéŋe go húme, go ɛ́da go cumbé, bá fúmbe pɛ́ sá go óna Yésusu.

¹⁵Aŋa Yésusu a mbaá lɛncá nɔ́ɔnɔ, gɛ́hɛ́ go úlukie hɔ́ɔlɔ́. Gitúu gá batɔ gɛ́ báá mo biené, a báá bó éŋúgíe biimée púmú.

¹⁶A báá bó bébégídíné a amɔ́ bá dɛ hóámá bá dɛ oyáná mɔtɔ ánɛ́ɛ a lɔ́mɔ́.

¹⁷Goŋaá nogálɔ ná mbúsí ya Asaŋa Iseyíi nó bóhóogio. Nogálɔ moánɛ nó lɔ́mɔ́:

¹⁸«Uyogóní bamɛ mɔ́ɔnyɔ ndɔ́mɔ́ iyídéelú mɔ́nyɔ́ɔ; bamɛ ba odɛ́má, mmba ágá bɛyaŋa bámɛ naá mɔ́ɔ. Ka ŋga ágá Giliíli bamɛ naá mɔ́ɔ, a ŋgo oyáa botɛ́nɛ́ɛ bámɛ go mɛɛ́nɔ.

¹⁹A dɛ ŋgá bɛa cuŋí na mɔtɔ a gunde a dɛ ŋgá áncɛda, mɔtɔ a dɛ ŋgɔ́ ɔ́bɔ ukelú yɛ́hɛ́ go bɛbala.

²⁰A dɛ ŋgá túse ombalɔ yɔ́ɔyɔ yó lɔ́mɔ́ békuncéelú, a dɛ ŋgá fúe lámba yɛ́ɛyɛ ɛ lɔ́mɔ́ pilópiló. A ŋga ŋanánáa nɔ́ɔnɔ gó ɛ́da héme aŋa botɛ́nɛ́ɛ bó ŋgaá mánɛ́gɛ́ná.

²¹Mɛɛ́nɔ miimée má ŋga bɛáa mbémineminie go ufíno yɛ́hɛ́[74].»

²²Gɔ́ɔ bú úlenemú Yésusu na mɔtɔ ba gɛgáda gá giliíli, ba ndiemi na bigélí, mɔ́ɔ gimmúke. Yésusu go mo éŋugie, a bɛ́ɛ́ ɛ́dá go gálagala, ɛ ɛ́nanɛna.

²³Bitúu bá batɔ bɛ́ mba békúkée, bɛ́ oya bɛ́ amɔ́: «Ábɔ, caá onana yá Défidi yɔ́yɔ́ɔ o?»

²⁴Kanɛ́ aŋa Befelisiéŋe bá mbɔɔ́ ɔ́bɔ́ boóma moánɛ, go oyɛda bá amɔ́: «Mɔtɔ mɔ́ɔnyɔ a gúne bɛgáda bá biliíli na bogaaga bá Belesebúlu, ogɔ́nɔ́ɔ ba bɛgáda bá biliíli.»

²⁵Aŋa Yésusu a mbaá lɔmɔ́ i íyimene mbééníŋínyí sábɔ́, go bó oyana a amɔ́: «Bufuŋe buimée bɔ́ɔbɔ bó básalasalamɔ́ go go noanana bɔ́ na bɔ́, bó ɛ́dana go go fúe, tɛ́sɔnɔ ɛ́na lí nnyaŋá ya batɔ yɛ́ɛyɛ ɛ básalasalamɔ́ ɛ dɛ bósó ba go ɔyɔ, yɛ ɛ́da naá busío.

²⁶Sátana a amɔ́ a gɔnɔmɔ́ gúne Sátana, bufuŋe bɛ́hɛ́ bó gaá nɛ́ ɛ́dánáa naá busío nɛɛ́nɛ o?

²⁷Kanɛ́, ɛ́na yɔmɔ́ɔ kúne bɛgáda bá biliíli na bogaaga bá Belesebúlu, batɔ bɛ́nyɔ́ bá bɛ́ gúnemú na bogaaga bá ánɛ́ɛ o? Bɔ́ɔ moatɛ́ moatɛ bá dúfenyemú goŋaá no lɛ́ naá gɛoba.

²⁸Mammana, bó lɔ́mɔ́ na Giliíli ba Asaŋa gɔ́ɔ kúnemú bɛgáda bá biliíli, nɔ́ɔnɔ bó dúfenye goŋaá Bufuŋe bá Asaŋa bó báa go nco bola naá bɛɛnyɔ́ɔ.

²⁹Mɔtɔ a dɛ báá ba go íŋene naá nnyaŋá ya sɔ́gɔ́ɔ mɔtɔ ba gɛgaaga, a gɔ́lɔnɔ bonɔ́mɛ bɛ́hɛ́ kanɛ go dóana go mo góda iŋgolí; aŋa a ŋamɔ́ a báá go mo góda iŋgolí, a ná lɛ́ ba goŋaá a gɔ́lɔ bonɔ́mɛ buimée bɔ́ɔbɔ naá nnyaŋá yɛ́ɛyɔ.

³⁰Mɔ́ɔnyɔ a lɔ́mɔ́ a dɛ bɛ́ɛ́mbá namɛ, a nnuugenye; gɔnɔ́ mɔ́ɔnyɔ a lɔ́mɔ́ a dɛ bándáa namɛ, a kasa.

³¹«Gɔ́ɔ nnyó oyanamɔ́ caá: Asaŋa a ŋga hééhínyée batɔ go gɛlɔgɔ giimée na cigí iŋkimée, kanɛ́ mɔ́ɔnyɔ a ŋgaá sɛgɛ́dá Gimmúmpúu gá Giliíli, ba ndiemi, Asaŋa a dɛ ŋgá mo héehinye.

³²Mɔtɔ mɔ́ɔnyɔ a ŋgaá gálɛ́dá Moɔnɔ́ ba mɔtɔ go dobɛ́, Asaŋa a ŋga mo hééhínyée. Kanɛ́ mɔtɔ mɔ́ɔnyɔ a ŋgaá gálɛ́dá Gimmúmpúu gá Giliíli go dobɛ́, ba ndiemi, Asaŋa a dɛ ŋgá mo héehinye, akɛ́ naá ogɛlɛ yɔ́ɔyɔ, akɛ́ naá yɔ́ɔyɔ yó ɛ́damɔ́ go úlene.

³³«Aáŋa boɛ́tɛ bó lɛ́ gɛnɔ́gɔ́, bó úme bɛnɔ́gɔ́ bá bɛsamɔ́, aáŋa bó lɛ́ gɛbɛ́, bó úme bɛbɛ́ bá bɛsamɔ́; bá lɛncanamɔ́ boɛ́tɛ go bɛsamɔ́ bá bɔ́.

³⁴«Nnyɔ́gɔ sɛ́ɛsɛ! Nɛɛ́nɛ no lɔ́mɔ́ bá go oya moóma musi gɔ́ɔ bɛɛnyɔ́ɔ bahándá aŋa no lɔ́mɔ́ nɔ́ɔnɔ o? Kɔ́ɔ, nnyuudé nɛ́ gálagalamɔ́ bɔ́ɔbɔ bó ɛ́damɔ́ go úlene naá odɛ́má gadɛ́ɛ.

³⁵Usi ba mɔtɔ a húmenye moóma musi naá gɛnɔ́gɔ́ gɛ́hɛ́ gá bonɔ́mɛ; ombɛ́ ba mɔtɔ a húmenye moóma mobɛ́ naá gɛbɛ́ gɛ́hɛ́ gá bonɔ́mɛ.

³⁶Yɔmɔ́ɔ ŋgaá nyó oyáná caá: naá buisí bá nɛgála, mɔtɔ uŋkimée a ŋga báyálóláa go dogálɔ dobɛ́ dɔ́ɔdɔ a mbaá húményée.

³⁷Kɔ́ɔ, go dogálɔ dáhɔ gɔ́ɔ bá ŋgaá go gáláa; aáŋa o lɛ́ sɔgɔ́nɔ, bese. Kanɛ́ aáŋa o lɛ́ na gɛoba, go obɛnɛna naá gɛoba.»

³⁸Gɔ́ɔ muloodio má gicele na Befelisiéŋe bú úhunemú Yésusu bá amɔ́: «Dɛ lɛ́galɛga goŋaá o có ŋɛɛna gieninye gá gobékúke.»

³⁹Yésusu go bó gundie a amɔ́: «Batɔ bá ínoni báaba bá lɔ́mɔ́ bahándá, bá fíidenye Asaŋa nnyimé, bú úhene gieninye gá gobékúke; bá dɛ gaá bɛáa gieninye gá gobékúke gíncoó, gó do dómbáa gɛ́ɛgɛ gá mbúsí ya Asaŋa Yónasɛ.

⁴⁰Mammana, caŋa táŋɛ́ mmue aŋa Yónasɛ a mbaá ŋaáa miisí mádadɔ́ na medúgú mádadɔ́ naá gadɛ́ɛ gá gɛantá gá hɛɔbɔ́[75], nɔ́ɔ gɔ́ɔ Moɔnɔ́ ba mɔtɔ a ŋgaá ŋaáa miisí mádadɔ́ na medúgú mádadɔ́ naá cí gúunú.

⁴¹Naá buisí bá gosómba bɛsɛnɛ, batɔ bá Ninífe bá ŋga bólɛ́gɛ́ná batɔ bá ínoni, bá bó ubie na gɛsɛnɛ, goakɛ́ bɔ́ɔ bá mba núgíe gɛɔyɔ aŋa bá mbɔɔ́ ɔ́bɔ́ cɔ́mɔ yɛ́ɛyɛ Yónasɛ a mbaá lɛ a dúmenye[76]. Ɛɛ́ɛŋ, anáa dɛ lɔ́mɔ́ háalá, ummue a lɛ́ hɔ́ɔ mɔ́ɔnyɔ a dómbanamɔ́ Yónasɛ.

⁴²Naá buisí bá gosómba bɛsɛnɛ, Ufuŋe yá okɔ́dɔ yá Gɛmbádáa yó ŋga bólɛ́gɛ́ná batɔ bá ínoni, yó bó ubie na gɛsɛnɛ, goakɛ́ yó mbɛ ɛ́dá fadɛgɛna naá bigísi bá cí halaháláa go go nco bódólonyo dogálɔ dá nciŋí dá Salomɔ́ŋɔ[77]. Ɛɛ́ɛŋ, ummue a lɛ́ háalá mɔ́ɔnyɔ a dómbanamɔ́ Salomɔ́ŋɔ!

⁴³«Gɛcamɛna gɛ́ɛgɛ gɛgáda gá giliíli gɛ́ hémemú naá mɔtɔ, gɛ́ lɛ go ɛ́da gɛ́ léelene naá bɛkótánɔ́ɔ bá hoóma go go fúmbe túúgídéné, gɛ́ dɛ ɛ́ná.

⁴⁴Kanɛ́ gɛ́ lɛ go bágálɛdɛna gɛ́ amɔ́: “Kaá gundé naá yɔmɔ́ nnyaŋá yɛ́ɛyɛ ndɔ́mɔ́ húméelú hɔ́ɔ.” Aŋa gɛ́ ncomɔ́ gunde, gɛ́ lɛ go gíde nnyaŋá gɔdɔɔ́, fólá fólá, gedíelú.

⁴⁵Gɛbɛ́ gá giliíli gɛ́ɛgɔ gɛ́ lɛ go bégundidene na nnyimé, gɛ́ ɛ́da gólio biliíli bíncodío bɛ́táanɔ na bɛ́andɛ́ bɛ́ɛbɛ bɛ́ lɔ́mɔ́ bɛkándáa bɛ́ gɛ́ dómbana. Bɛ́ lɛ go nco go íŋene, bɛ́ lukumene hɔ́ɔ. Gɔ́ɔ odɛ́nɛ́ ya mɔtɔ mɔ́ɔnyɔ yó gaá ná tɛŋgɛ́lɛ́dá gó dómba aŋa gɔ́ɔgɔ a mbaá lɔmɔ́ gá busío. Bó ŋgaá bɛ́ɛ́mbá nɔ́ɔ caŋa mmue go bɛbɛ́ bá batɔ bá ínoni.»

⁴⁶Aŋa a mbaá lɔmɔ́ a gá gálagala nɔ́ɔnɔ na bitúu bá batɔ, nnyeedíi na bolimóní bá Yésusu go bola. Gáábɔ́ go lɔbɛnɔ go hanyɔ́, bá fúmbe goŋaá bó oyɛda ŋkanɔ́ na Yésusu.

⁴⁷[Mɔtɔ ummue go oyana Yésusu a amɔ́: «Yigúédíi na batɛ́ɔbɛnɔ bá lɛ́ go nnyaáŋgadɛ́ɛ, bá fúmbe go oyɛda ŋkanɔ́ nahɔ.»]

⁴⁸Yésusu go gundie mɔtɔ mɔ́ɔnyɔ a amɔ́: «Ánɛ́ɛ a lɔ́mɔ́ mmaáa o? Baánɛ́ɛ bá lɔ́mɔ́ gɔnɔ́ bolimóní bámɛ o?»

⁴⁹A á fedígínyée ombɔ́gɔ go dúfie behúúní bɛ́hɛ́ a amɔ́: «Núúnée nɔnɔ, mmaáa na bolimóní bámɛ bɔ́ɔ bábáa.

⁵⁰Mammana, mɔtɔ uŋkimée mɔ́ɔnyɔ ɔ ɔyɔmɔ́ aŋa Asaŋa a maamanamɔ́, mɔ́ɔ a lɔ́mɔ́ ondimóní bamɛ, na nnyeedíi bamɛ.»