Read Nugunu Motíosi 15 Bible Online

Motíosi 15 - Nugunu bible

Motíosi 15

¹Gɔ́ɔ nɛnamá ná Befelisiéŋe na nɛnamá ná muloodio má gicele bɛ́ ɛ́damɔ́ fadɛgɛna naá Yolósalɛmɛ go nco gíde Yésusu, go mo úhune bá amɔ́:

²«Go busío báakɛ́ behúúní báhɔ bá lɔ́mɔ́ bá dɛ bienénée caŋa sá biisée bɛ́cɔ́? Mammana, bá dɛ dóánánáa go básoga ɛmbɔ́gɔ otóotoɛ yá go ɛ́da go manyáanya[91].»

³Yésusu go bó baga a amɔ́: «Bɛɛnyɔ́ɔ moatɛ́, ɛkádɛ́ no dómbanɛnamɔ́ gɛlɔsɛnɔ gá Asaŋa go go ɔyɔ aŋa caŋa sá biisée bɛ́nyɔ́ sɛ́ oyamɔ́ o?

⁴Asaŋa a mbo oyɛ́dá a amɔ́: “Hálámána tɛ́ɔ na yigúédíi”, gɔnɔ́: “Mɔ́ɔnyɔ a yɔmɛnɔmɔ́ isée ɛ́na nnyeedíi, noséésényée nɛ́hɛ́ nó lɔ́mɔ́ nigúe[92]”.

⁵Kanɛ́ bɛɛnyɔ́ɔ no oya no amɔ́: “Mɔtɔ uŋkimée mɔ́ɔnyɔ o oyanamɔ́ isée ɛ́na nnyeedíi a amɔ́: gidúgune gɛ́ɛgɛ ŋgaá ná lɛ́ bá go go fáa gɛ́ lɛ́ gɛbáágá gɛ́ɛgɛ gɛ́ lɔ́mɔ́ fonáalú.

⁶Mɔtɔ mɔ́ɔnyɔ a dɛ báá gɔnɔ́ naá gɛgaŋa gá go hálamana isée[93]”. Nɔ́ɔnɔ, no á fúgúné gicele gá Asaŋa go go ɔyɔ aŋa caŋa sá biisée bɛ́nyɔ́ sɛ́ oyamɔ́.

⁷Bekuilí báaba! Mbúsí ya Asaŋa Iseyíi ɛ mba gálágáláa mammana gɔ́ɔgɔ ɛ mbaá lɛ yɛ oya go busío bɛ́nyɔ́ yɛ amɔ́:

⁸Asaŋa a amɔ́: “Boɛ́nɔ bɔ́ɔbɔ bó mbúlugenye goana na nyuudé, kanɛ́ odɛ́má yábɔ́ yó lɛ́ halaháláa namɛ.

⁹Mbúlugie yabɔ́ go busío bámɛ ɛ lɛ́ godugúnú, goakɛ́ bicele bɛ́ɛbɛ bá húunenyemú bɛ́ lɔ́mɔ́ bɛ́ɛbɛ bá batɔ moatɛ́ go báágɛnana[94].”»

¹⁰Gɔ́ɔ Yésusu a gɔnɔmɔ́ dɔ́ŋɛnɔ gitúu gá batɔ a amɔ́ gáábɔ́ a amɔ́: «Bódólígínyóomú nɔnɔ no gunde no ɔ́bɔ.

¹¹Caá akɛ́ bɔ́ɔbɔ bó íŋenenemú naá nyuudé ná mɔtɔ bɔ́ bó mo áganamɔ́ biílo naá oŋgíso yá Asaŋa; kanɛ́ bó lɔ́mɔ́ bɔ́ɔbɔ bó húmenemú naá nyuudé nɛ́hɛ́ bɔ́ bó mo áganamɔ́ biílo naá oŋgíso yá Asaŋa.»

¹²Kɔ́ɔ behúúní bá mo báyɛkɛnamɔ́ bá amɔ́ gɛ́hɛ́ aá: «Go íyimene go amɔ́ aŋa Befelisiéŋe bá báá nɔ́ ɔ́bɔ́ dogálɔ dɔ́ɔdɔ, bó báá bó séesenye makɔ́nɔ́ o?»

¹³Yésusu go bó gundie a amɔ́: «Bogónɛ́dá buimée bɔ́ɔbɔ Baaba mɔ́ɔnyɔ a lɔ́mɔ́ naá mmoɛná a lɔ́mɔ́ kanɛ go bó góna, bá ŋga bó bálá.

¹⁴Kanɛ́ bó dɛ́ɛ́náamɔ́ nɔnɔ: bá lɛ́ begélígeli báaba bá gɔ́gɔmɔ́ basɔ́gɔ́ɔ begélígeli. Hálá kanɛ́, ugélígeli a amɔ́ a gɔ́gɔ sɔ́gɔ́ɔ ugélígeli, bá goó obɛ́ná bɔ́ɔ biimée báandɛ́ naá gɛbɛ́lábɛ́lá!»

¹⁵Píele go gɔ́lɔ dogálɔ go oyana Yésusu a amɔ́: «Có falónɛ́náamɔ́ gɛlalaga gá ncaba gɛ́ɛgɛ.»

¹⁶Yésusu a amɔ́: «Bɛɛnyɔ́ɔ no gá lɛ́ tɔ́nɔ kanɛ nciŋí o?

¹⁷No do bósó go íyimene goŋaá buimée bɔ́ɔbɔ bó íŋenemú naá nyuudé ná mɔtɔ bó dómbana naá ɛsɔdɔ, naá nnyimé bó húme bó ɛ́da naá gɛbɛ́lábɛ́lá o?

¹⁸Kanɛ́ bɔ́ɔbɔ bó húmenemú naá nyuudé bó úlenemú naá odɛ́má, bɔ́ɔbɔ moánɛ bɔ́ bó áganamɔ́ mɔtɔ biílo naá oŋgíso yá Asaŋa.

¹⁹Kɔ́ɔ, naá odɛ́má yá mɔtɔ gɔ́ɔ bɛgáda bá mbééníŋínyí bɛ́ úlenemú hɔ́ɔ, bɛ́ bɛ́ mo dómanamɔ́ go go óna batɔ, go go ŋanana gɛdáŋa na go fídene gɛɔyɔ gá hanyɔ́, go go íbene, go go bude ufíno yá sɔ́gɔ́ɔ, go go gálagala gá basɔ́gɔ́ɔ nnyimé nnyimé.

²⁰Moóma mɔ́ɔmɔ mɔ́ mó áganamɔ́ mɔtɔ biílo naá oŋgíso yá Asaŋa; kanɛ́ gonyáanya kanɛ go básoga ɛmbɔ́gɔ gó do bósó go ágana mɔtɔ biílo naá oŋgíso yá Asaŋa.»

²¹Kɔ́ɔ Yésusu u úlukiemú hɔ́ɔlɔ́, gɛ́hɛ́ go ɛ́da naá gigísi gá cí gɛ́ɛgɛ mekúígíi na tɛ́sɔnɔ sá Tíile na Sídono.

²²Okɔ́dɔ ummue ba gɛdɔŋɔ gá Kanáana[95], mɔ́ɔnyɔ a mbaá lɛ ɔ ɔyɔ naá gigísi gá cí moánɛ go úle anáa Yésusu a mbaá lɛ, go ɛ́da go ánca a amɔ́: «Ŋgɛ́náamɔ́ mahana, Daadáa, Moɔnɔ́ bá Défidi! Gɛbɛ́ gá giliíli gɛ́ génegenye ombóla bamɛ makɔ́nɔ́.»

²³Yésusu a lɛ́ kanɛ go mo gundie boóma. Kɔ́ɔ behúúní bɛ́hɛ́ bá mo báyɛkɛnamɔ́, bá amɔ́ gɛ́hɛ́ aá: «Gundíe okɔ́dɔ mɔ́ɔnyɔ na nnyimé[96], goakɛ́ ɛ ɛ́dana naá busío a có bienene na go ánca.»

²⁴Gɛ́hɛ́ go gundie a amɔ́: «Baaba a lɔ́mɔ́ tómáalú goana go bɛdómbáa bá boɛ́nɔ bá Ɛ́sɛlahɛ́ɛlɛ bɛ́ɛbɛ bɛ́ mbaá yímé[97].»

²⁵Kanɛ́ gɔ́ɔ okɔ́dɔ mɔ́ɔnyɔ a ncomɔ́ gule enúu naá busío bɛ́hɛ́ a amɔ́: «Daadáa, ŋgoyóomú!»

²⁶Yésusu go mo gundie a amɔ́: «Gó do fɛanánáa go gɔ́lɔ gɛlɛ́dɛ gá baábayɔ́ o fáa baaná bá mbóa.»

²⁷Okɔ́dɔ a amɔ́: «Daadáa, bó lɛ́ mammana. Hálá kanɛ́, baaná bá mbóa bá bédúgemú na pumbú sá bɛlɛ́dɛ sɛ́ɛsɛ sɛ́ balagadanamɔ́ go cí ya tábɛ́la ya bagɔ́nɔ́ɔ bá sɛ́.»

²⁸Kɔ́ɔ Yésusu a mo gundiemú a amɔ́: «Okɔ́dɔ, gioliminyo gáhɔ gɛ́ lɛ́ gɛkɔ́nɔ́nɔ́ɔ! Ŋgáa bɔ́ɔbɔ o lɛ́galɛgamɔ́ bó báŋa nɔ́ɔ!» Ombóla bɛ́hɛ́ go dómba go éŋuge naá gigúlí gá ndiemi.

²⁹Yésusu u úlúkíe hɔ́ɔlɔ́, gɛ́hɛ́ go ɛ́da naá cɔ́lɔ ya máŋɛ́ má Gelilée. A á bólɛ́gá gɛɛnɛ, gɛ́hɛ́ go lukumene.

³⁰Kɔ́ɔ bitúu bitúu bá batɔ bɛ́ ɛ́damɔ́ go mo úlenine na banɛ́mɔnɛmɔ, begélígeli, batɔ bá go cɔndɔ, bimmúke na bɔgɔnɔ́gɔnɔ gɔnɔ́ bóntió gɛca. Bá báa lɛ gó nco bó dɛ́ɛnana naá bɛgɔ́ndɔ́ bá Yésusu, a bó éŋugenye.

³¹Batɔ go ɛ́da go békúke makɔ́nɔ́ aŋa gɔ́ɔgɔ bá mbaá lɛ bɛ́ ɛ́nana bimmúke bɛ́ gálagala, batɔ bá go cɔndɔ bá gundene bese, banɛ́mɔnɛmɔ bɛ́ ɛnda, begélígeli bɛ́ ɛ́nanɛna. Gɔ́ɔ bitúu bitúu bá batɔ bɛ́ɛbɔ bɛ́ ɛ́damɔ́ go búlugenye Asaŋa ba Ɛ́sɛlahɛ́ɛlɛ.

³²Gɔ́ɔ Yésusu a dɔ́ŋɛnɔmɔ́ behúúní bɛ́hɛ́, go bó oyana a amɔ́: «Ŋgɛ́nana gɛcɛcá gá batɔ gɛ́ɛgɛ mahana, goakɛ́ medúgú mádadɔ́ mámáa bá lɔ́mɔ́ namɛ, bá dɛ bɛanánáa boóma bá go nyáa. Cɛ lɛ́gálɛ́gáa go bó gúlugie na ncaná; bá lɛ́ ba go yɛ́mɛlɛda go pɛ́ na yɛ́.»

³³Behúúní go mo oyana bá amɔ́: «Bɛɛcɔ́ɔ bábáa halaháláa na gɛdɔŋɔ, dɛ gaá ná gɔ́lɔ́ manyáanya má ŋaá má háa go go dúge bitúu bitúu bá batɔ bɛ́ɛbɛ áhanɛ́ɛ o?»

³⁴Gɛ́hɛ́ go bó úhune a amɔ́: «No lɛ́ na bɛlɛ́dɛ bínikíi hɔ́ɔlɔ́ o?» Gáábɔ́ go mo gundie bá amɔ́: «Bɛ́ lɛ́ bɛ́táanɔ na bɛ́andɛ́ na baaná bá moɔbɔ́.»

³⁵Gɔ́ɔ o oyanamɔ́ batɔ goŋaá bá lukumenene go cí,

³⁶mɔ́ɔ go gɔ́lɔ bɛlɛ́dɛ bá bɛ́táanɔ na bɛ́andɛ́ na moɔbɔ́, a báá béhiigí Asaŋa, go bɛ́ gɛ́sa, i íŋenene behúúní bɛ́hɛ́, bá abana gitúu gá batɔ.

³⁷Batɔ biimée go nyáanya bá báá hóógío. Bigísi bá bɛlɛ́dɛ bɛ́ɛbɛ bɛ́ mbaá síénénée, bá báá gɔ́lɔ́ bá báá gundé na bɛ́. Bɛ́ mba lɛ́ bɛ́ hóogono ncada ɛ́táanɔ na ɛ́handɛ́ dácɛ dácɛ.

³⁸Batɔ báaba bá mbaá nyáányáa ombanɔ yábɔ́ yó mba lɛ́ banɔ́mɔtɔ́ tɔ́sɛnɔ ínni, kanɛ go bana bakɔ́dɔ na baábayɔ́.

³⁹Naá nnyimé ya Yésusu go gúlugie bitúu bitúu bá batɔ, gɛ́hɛ́ go bólɛga naá gilué go ɛ́da naá gigísi gá cí gá Magadána[98].