Read Nugunu Motíosi 18 Bible Online

Motíosi 18 - Nugunu bible

Motíosi 18

¹Naá gigúlí gɛ́ɛgɔ, behúúní bá Yésusu go mo báyɛkɛna go mo oyana bá amɔ́: «Ánɛ́ɛ kanɛ́ a lɔ́mɔ́ gɛkɔ́nɔ́nɔ́ɔ a dómbana basɔ́gɔ́ɔ naá Bufuŋe bá mmoɛná o?»

²Kɔ́ɔ Yésusu a dɔ́ŋɛnɔmɔ́ moádɔmbɔ́ ummue go mo díliminye naá kadɛ́gadɛ́ɛ yabɔ́,

³a amɔ́: «Mammana, ŋgaá nyó oyáná daŋɛ́daŋɛ, amóŋa no do núgíe no gunde aŋa baábayɔ́, no do ní íŋene naá Bufuŋe bá mmoɛná.

⁴Mɔ́ɔnyɔ a ŋgaá bégundíe gihelege aŋa moádɔmbɔ́ mɔ́ɔnyɔ, mɔ́ɔnyɔ moánɛ mɔ́ɔ a ŋgaá bɛ́ɛ́mbá gɛkɔ́nɔ́nɔ́ɔ naá Bufuŋe bá mmoɛná.

⁵Mɔ́ɔnyɔ a gɛ́ndɛgɛnamɔ́ moádɔmbɔ́ aŋa mɔ́ɔnyɔ go busío bámɛ, a kɛ́ndɛgɛnamɔ́ yɔmɔ́ɔ moatɛ́.»

⁶«Kanɛ́ uŋkimée mɔ́ɔnyɔ a ŋamɔ́ goŋaá ummue táŋɛ́ naá baábayɔ́ báaba bá áganamɔ́ odɛ́má yábɔ́ naá yɔmɔ́ɔ o obɛna naá gɛlɔgɔ, bó lɛ́ bese nɛhɛ́ goŋaá bá mo gódɛna gɛantá gá ɛdánɛ́ ná go gola go ukelú, bá mo nɔɔ naá findímíi ya máŋɛ́.

⁷Mahana makɔ́nɔ́ na batɔ bá cí báaba bú ubenyemú basɔ́gɔ́ɔ naá gɛlɔgɔ! Mammana ɛ lɛ́ goŋaá moóma aŋa mɔ́ɔmɔ nɔ́ɔnɔ mó sɛmɛganana go bɛ́ɛmba hɔ́ɔ, kanɛ́ mahana makɔ́nɔ́ na mɔtɔ mɔ́ɔnyɔ ubenyemú basɔ́gɔ́ɔ naá gɛlɔgɔ.

⁸Aáŋa ombɔ́gɔ yáhɔ ɛ́na gɛgɔ́ndɔ́ gáhɔ mɔ́ mó go dómanamɔ́ goŋaá o lɔgɔ, mó sómbáamɔ́ o mó umbe halaháláa nahɔ; bó lɛ́ bese go busío báhɔ goŋaá o bɛa gɛɔyɔ gá kanɛ mesúge maamɔ́ɔ ombɔ́gɔ yúmmue ɛ́na gɛgɔ́ndɔ́ gímmue, bó dómba goŋaá bá go nɔɔ naá gɛbɔlɔ́gɔdɔ gá íyuke há kanɛ go fúenene na ɛmbɔ́gɔ yahɔ iŋkimée ɛ́na na bɛgɔ́ndɔ́ báhɔ biimée!

⁹Aáŋa niíso náhɔ nɛ́ go dómanamɔ́ goŋaá o lɔgɔ, nɛ́ báláamɔ́ o nɛ́ umbe halaháláa nahɔ; bó lɛ́ bese go busío báhɔ goŋaá o bɛa gɛɔyɔ gá kanɛ mesúge na gigélí, bó dómba goŋaá bá go nɔɔ naá gɛbɔlɔ́gɔdɔ gá íyuke há kanɛ go fúenene na oŋgíso yáhɔ eŋkimée!»

¹⁰«No do háánánáa go fánɛna ummue naá moáyayɔ́ŋgáyayɔ́ mɔ́ɔmɔ, ŋgaá nyó oyáná mammana caá, bɛɛ́ŋgɛlɛsɛ bábɔ́ bá lɛ́ kɛ́kɛ́kɛ́kɛ́ na Baaba naá mmoɛná.

¹¹[Mammana, Moɔnɔ́ ba mɔtɔ a mbuú úlé go go nco sódio báaba bá mbaá lɛ yíméelu[108].]

¹²Bɛɛnyɔ́ɔ no amɔ́ nɛɛ́nɛ o? Aáŋa mɔtɔ a bɛanana bɛdómbáa ntɛdɛ, gímmue naá olɔŋɔ yá bɛ́ gɛ́ lɛ go yíme, ábɔ a dɛ gaá síé a báá dɛ́ɛ́ná bɛdómbáa bɛ́ɛbɛ bíntió otíno énni na buinyo na bínni naá ogɔndɔ go go ɛ́da fúmbe gɛ́ɛgɛ gɛ́ báá ná yímé o?

¹³Kɔ́ɔ ŋgaá nyó oyáná mammana caá: a amɔ́ a gɔnɔ gɛ́ ɛ́na, a gɔɔ́ ɔ́bɔ́ bɛyaŋa a dúmbidinye go busío bá gɛdómbáa gɛ́ɛgɔ bó dómba go bɛ́ɛbɛ otíno énni na buinyo na bínni bɛ́ɛbɛ bɛ́ lɔ́mɔ́ kanɛ go yíme.

¹⁴Caŋa mmue, Isée bɛnyɔ́[109] naá mmoɛná a dɛ lɛ́gálɛ́gáa a amɔ́ ummue naá moáyayɔ́ŋgáyayɔ́ mɔ́ɔmɔ a yíme.»

¹⁵Aáŋa tɛ́ɔbɛnɔ a á ŋaáa gɛlɔgɔ[110], ɛ́dá mo gíde o mo dúfie gɛoba gɛ́hɛ́ naá bɛnyɔ́ báandɛ́. A amɔ́ a go ɔ́bɛnɔ, go á mo ágá naá pɛ́.

¹⁶Aáŋa a dɛ go ɔ́bɛ́nɔ́, gɔ́lɔ́ gɔnɔ́ mɔtɔ ummue ɛ́na báandɛ́ olɔŋɔ nahɔ, go goŋaá gɛsɛnɛ giimée gɛ́ bégedegedie naá gooya gá batɔ báandɛ́ ɛ́na akɛ́ bádadɔ́[111], aŋa Ŋgɔ́ŋɛ́ yɛ oyamɔ́.

¹⁷A amɔ́ i inye go bó ɔ́bɛnɔ, oyána giimbó gá boolímínyí; a amɔ́ i inye go ɔ́bɛnɔ giimbó gá boolímínyí, mo gɔ́lɔ́ɔmɔ́ aŋa mɔtɔ mɔ́ɔnyɔ a lɔ́mɔ́ a dɛ íyíménée Asaŋa, ɛ́na lí ugólí tásɛ.

¹⁸Mammana, ŋgaá nyó oyáná caá: buimée bɔ́ɔbɔ no ŋgaá gódá naá cí, bá ŋga bó gódá naá mmoɛná, kɔ́ɔ buimée bɔ́ɔbɔ no ŋgaá fulúné naá cí bá ŋga bó fulúné naá mmoɛná[112].

¹⁹«Ŋgaá nyó oyáná gɔnɔ́ caá, naá cí háalá, báandɛ́ naá olɔŋɔ yɛ́nyɔ́ bá amɔ́ bá húme ukelú yúmmue go go ɔŋɛnɔ akɛ́ ɛkádɛ, Baaba mɔ́ɔnyɔ a lɔ́mɔ́ naá mmoɛná a ná bó fáa boóma moánɛ.

²⁰Goŋaá anáa báandɛ́, ɛ́na bádadɔ́ bá bábándɛgɛnamɔ́ go ufíno yámɛ, ndɛ́ naá kadɛ́gadɛ́ɛ yabɔ́.»

²¹Gɔ́ɔ Píele a báyɛkɛnamɔ́ Yésusu go mo oyana a amɔ́: «Daadáa, ondimóní bamɛ a amɔ́ a ŋa gɛoba naá boayá bámɛ, ɛŋɛndɔ inikí káananamɔ́ go mo héehinye o? Ɛtáanɔ na ɛhandɛ́ dɔ́gɔ́?»

²²Yésusu go mo gundie a amɔ́: «Cɛ go oyánɛ́náa caá ɛtáanɔ na ɛhandɛ́, kanɛ́ otíno ádadɔ́ na yɔɔdɔ́ nɔ́ɔnɔ ɛŋɛndɔ ɛtáanɔ na ɛhandɛ́[113].»

²³«Náana gɔ́ɔ Bufuŋe bá mmoɛná bó lɔ́mɔ́ aŋa ufuŋe yúmmue yɔ́ɔyɔ yó mbaá lukúméné go go ŋa ombanɔ yá bonɔ́mɛ bɛ́hɛ́ na boyogóní bɛ́hɛ́.

²⁴Na go dúme ombanɔ, kɔ́ɔ bá mo úlenemú na ufínófino ummue mɔ́ɔnyɔ a mbaá lɛ a bɛananɛna gɛcɛcá gá muinyí.

²⁵Mɔ́ɔnyɔ aŋa a mbaá lɔmɔ́ kanɛ boóma bá go soa ufínó yɛ́hɛ́ kɔ́ɔ, ogɔ́nɔ́ɔ go íŋene bogaaga bá go mo dúe na okɔ́dɔ bɛhɛ́ na baaná bɛ́hɛ́ kɛ́. Bá gɔnɔ dúe buimée bɔ́ɔbɔ a mbaá lɛ na bɔ́ go go soa ufínó yɛ́hɛ́.

²⁶Kɔ́ɔ uyogóní mɔ́ɔnyɔ a bádɛ́amɔ́ ogɔ́nɔ́ɔ go bɛgɔ́ndɔ́, a báá ágá enúu go cí, a mo oyanɛna a amɔ́: “Ogɔ́nɔ́ɔ, manɛ́ mbédémbidinye, nná go soɛna mamɔ́ ufínó uŋkimée.”

²⁷Mahana go gɔ́lɔ ogɔ́nɔ́ɔ ba uyogóní mɔ́ɔnyɔ go mo dɛ́ɛna a báá dómbá, a báá mo dɛ́ɛ́nɛ́ná tɔ́nɔ ufínó yɛ́hɛ́.

²⁸Uyogóní mɔ́ɔnyɔ a húmene, gɛ́hɛ́ go lumene na sɔ́gɔ́ɔ bɛhɛ́ ba buelí, mɔ́ɔnyɔ a mba lɛ́ tɔ́nɔ a mo bɛanɛnana moɔnɔ́ ba ufínó. Gɛ́hɛ́ go mo gumbene go ukelú go ɛ́da go mo gáma, a amɔ́: “Coɛnáamɔ́ ufínó yamɛ.”

²⁹Sɔ́gɔ́ɔ bɛhɛ́ ba buelí mɔ́ɔnyɔ go mo bádɛ́a naá bɛgɔ́ndɔ́ a mo béyéeyenye a amɔ́: “Manɛ́ mbédémbidinye, nná go soɛna mamɔ́ ufínó.”

³⁰Mɔ́ɔnyɔ go inye go mo ɔ́bɔ. A dɛ gá súge goana hɔ́ɔlɔ́, a bɛ́ɛ́ ɛ́dá mo nɔɔ naá ncíbo ya gɛaŋɔ́ gó ɛ́da húme aŋa a ŋgaá mo soɛná ufínó yɛ́hɛ́.

³¹Aŋa basɔ́gɔ́ɔ boyogóní bá mbɛɛ́ ɛ́ná boóma bɔ́ɔbɔ bó mbaá bádómbánáa, mecíkílí go bó gumbene bese bese náana. Gáábɔ́ go ɛ́da, bá bóó oyánɛ́náa ogɔ́nɔ́ɔ babɔ́ ɛkádɛ giimée gɛ́ɛgɛ gɛ́ mbaá bádómbánáa.

³²Kɔ́ɔ ogɔ́nɔ́ɔ bɛhɛ́ a dómamɔ́ bá bɛ́ɛ́ ɛ́dá mo dɔ́ŋɛnɔ, go mo oyana a amɔ́: “Gɛbɛ́ gá uyogóní gɛ́ɛgɛ, yɔmɔ́ɔ ndɛ́ go dɛ́ɛ́nɛ́náalú ufínó uŋkimée yɔ́ɔyɔ, goakɛ́ o mba mbéyéyényée goŋaá ŋŋa nɔ́ɔ.

³³Ɛkádɛ́ kanɛ́, maamɔ́ɔ tɔ́nɔ go á ná lɔmɔ́ o do gɔ́lɔ́ tɛ́ɔbɛnɔ mahana aŋa yɔmɔ́ɔ moatɛ́ ndɔ́mɔ́ go gɔ́lɔ́ɔlú mahana o?”

³⁴Ogɔ́nɔ́ɔ bɛhɛ́ go liŋe makɔ́nɔ́, go mo dúe naá ɛmbɔ́gɔ ya bɛgaaga go medíge má gɛgaŋa, gó ɛ́da húme aŋa a ná mo soɛnamɔ́ ufínó yɛ́hɛ́ uŋkimée.

³⁵Náana gɔ́ɔ Baaba mɔ́ɔnyɔ naá mmoɛná a ná bɔ́gɔ́lɔmɔ́ nɛnyɔ́ amóŋa ummue naá bɛɛnyɔ́ɔ a dɛ hééhínyée ondimóní na odɛ́má yɛ́hɛ́ uŋkimée[114].»