Read Nugunu Motíosi 19 Bible Online

Motíosi 19 - Nugunu bible

Motíosi 19

¹Kanɛ́ naá nnyimé ya dogálɔ dá témbugenye dɔ́ɔdɔ, gɔ́ɔ Yésusu u úlukiemú naá Gelilée, go ɛ́da naá gisísi gá cí gá Yudée, naá boayá búunú bá osaá yá Yɔlɔdɛ́ŋɛ[115].

²Bitúu bitúu bá batɔ go ɛ́da go mo bienene, a bó éŋugenye hɔ́ɔ hɔ́ɔlɔ́.

³Befelisiéŋe bóncodío go mo báyɛkɛna, go mo dámbɛna na ŋgúhune yɛ́ɛyɛ bá amɔ́: «Mɔtɔ a bɛanana bogaaga bá go inye ogɛ́ akɛ́ go gɛsɛnɛ gɛ́hanɛ́ɛ o?»

⁴Yésusu go gundie a amɔ́: «Ábɔ, nó lɛ́ kanɛ go bana goŋaá, naá gobayɛga gá cí, Ugedí a mba bó gedíe onɔ́mɔtɔ́ na okɔ́dɔ[116] o?

⁵Gɔ́ɔ a mbaá gálɛ́dá a amɔ́: “Go busío moánɛ gɔ́ɔ onɔ́mɔtɔ́ a ná húmemú naá nnyaŋá ya biisée, a bágódɛna okɔ́dɔ bɛhɛ́, biimée báandɛ́ bá bɛ́ɛmba nnyɔ́dɔ táŋɛ́ mmue.”

⁶Hɔ́ɔlɔ́ bá dɛ báá gɔnɔ́ báandɛ́, goana nnyɔ́dɔ táŋɛ́ mmue. Mɔtɔ a dɛ ádóná kanɛ́ bɔ́ɔbɔ Asaŋa a mbaá nebígínyée.»

⁷Gáábɔ́ go mo úhune bá amɔ́: «Go busío bá akɛ́ kanɛ́, Mɔ́sɛsɛ a mbaá fáá bogaaga bá go íŋene kálata yɛ́ɛyɛ ɛ́ dúfenyemú goŋaá nɛbáná nɛ́ á maná[117] gɔ́ɔgɔ mɔtɔ inyemú ogɛ́ o?»

⁸Yésusu go bó gundie a amɔ́: «Bó lɔ́mɔ́ go gɛlalaga gɛ́nyɔ́ gá odɛ́má, gɔ́ɔ Mɔ́sɛsɛ a mbaá nyó fáá bogaaga bá go inyene bakɔ́dɔ bɛ́nyɔ́; kanɛ́ naá mabayɛga bó do mbáa lɛ nɔ́ɔnɔ.

⁹Ŋgaá nyó oyáná caá, mɔtɔ a amɔ́ i inye ogɛ́ aáŋa caá goŋaá a á hémé hanyɔ́, a báá giŋé okɔ́dɔ untió, a á ŋaáa gɛdáŋa.»

¹⁰Gɔ́ɔ behúúní bá mo gundiemú bá amɔ́: «Aáŋa bó lɔ́mɔ́ nɔ́ɔnɔ go onɔ́mɔtɔ́ naá boayá bá ogɛ́, bó do háánánáa goŋaá mɔtɔ a giŋene.»

¹¹Gɛ́hɛ́ go bó gundie a amɔ́: «Mɔtɔ uŋkimée a dɛ ɔ́bɔ́nɔ́ɔ nogálɔ nɔ́ɔnɔ, kanɛ́ goana báaba Asaŋa a mbaá bó fáá bogaaga bá go ɔ́bɔ nogálɔ moánɛ.

¹²Mammana, batɔ bá lɛ́ hɔ́ɔ báaba bá mbaá bébíéné bɛancanca, bá dɛ báá ba go giŋe okɔ́dɔ; bóncodío, goŋaá basɔ́gɔ́ɔ batɔ bá mbaá bó gundíe bɛancanca, báaba bóncodío, bɔ́ɔ bá moatɛ́ moatɛ go Bufuŋe bá mmoɛná, bá bíí ínyé go giŋene. Mɔ́ɔnyɔ a lɔ́mɔ́ bá go ɔ́bɔ, ɔ ɔ́bɔ!»

¹³Gɔ́ɔ batɔ bú úlinemú Yésusu na baábayɔ́ goŋaá a bó dálana ɛmbɔ́gɔ, go go bó fona. Kanɛ́ behúúní bɛ́hɛ́ go lege batɔ bɔ́ɔbɔ.

¹⁴Aŋa Yésusu a mbɛɛ́ ɛ́ná boóma moánɛ, gɛ́hɛ́ go bó gálɛda a amɔ́: «Dɛ́ɛ́na nɔnɔ baábayɔ́ ŋgá bú úle mekúígíi namɛ, no do bó legé, goakɛ́ Bufuŋe bá mmoɛná bó lɔ́mɔ́ go batɔ báaba bá lɔ́mɔ́ aŋa bɔ́ɔ.»

¹⁵Naá nnyimé ya go bó dálana ɛmbɔ́gɔ, gɛ́hɛ́ go fíde pɛ́.

¹⁶Gɔ́ɔ mɔtɔ ummue a báyɛkɛnamɔ́ Yésusu go mo úhune a amɔ́: «Iloodio, ndɔ́mɔ́ bá go ŋa ɛkádɛ gá besé goŋaá mbɛa gɛɔyɔ gá kanɛ mesúge o?»

¹⁷Yésusu go mo oyana a amɔ́: «Ɛkádɛ́ o ŋgúhenemú bɔ́ɔbɔ bó lɔ́mɔ́ bá besé o? Ummue táŋɛ́ mɔ́ɔ a lɔ́mɔ́ mammana. Aáŋa o lɛ́galɛga go íŋene naá gɛɔyɔ, bɛ́dɛ́gɛ́na bɛlɔsɛnɔ.»

¹⁸Mɔtɔ mɔ́ɔnyɔ go mo úhune a amɔ́: «Bɛlɔsɛnɔ bɛ́hanɛ́ɛ?» Yésusu go gundie a amɔ́: «O do óná mɔtɔ. O do ŋaáa gɛdáŋa. O do íbé boóma. O do básómbɛ́ná mɔtɔ.

¹⁹O hálamana tɛ́ɔ na yigúédíi. Naá go súgidinye, o maamana sɔ́gɔ́ɔ aŋa maamɔ́ɔ moatɛ́[118].»

²⁰Ohaŋa bá mɔtɔ mɔ́ɔnyɔ go mo oyana a amɔ́: «Ndɛ́ bɛ́dɛ́gɛ́náalú bɛlɔsɛnɔ bɛ́ɛbɛ biimée. Ŋkádɛ́ gɛ́ gá gɔnɔmɔ́ taŋanɛna o?»

²¹Yésusu go mo oyana a amɔ́: «Aáŋa o lɛ́galɛga go bɛ́ɛmba mammana, ɛ́dá, dúé buimée bɔ́ɔbɔ o lɔ́mɔ́ na bɔ́, go abana basógasoga, gɔ́ɔ o ná bɛamɔ́ bonɔ́mɛ naá mmoɛná. Naá nnyimé, úlé, mbienéemú.»

²²Aŋa ohaŋa ba mɔtɔ a mbɔɔ́ ɔ́bɔ́ dogálɔ dɔ́ɔdɔ, gɛ́hɛ́ go biene pɛ́ ɛ ɛ́da a súŋe busío, mammana a mba lɛ́ na bonɔ́mɛ degédegé.

²³Kɔ́ɔ Yésusu o oyanamɔ́ behúúní bɛ́hɛ́ a amɔ́: «Mammana mammana, ŋgaá nyó oyáná caá, bó lɛ́ ndɔlɛ makɔ́nɔ́ goŋaá onɔ́mɛnɔmɛ ba mɔtɔ i íŋene naá Bufuŋe bá mmoɛná.

²⁴Ŋgaá nyó fitínyé caá, bó lɛ́ fɛaŋɔ goŋaá gɛantá gá nnyama aŋa samóo gɛ́ dómba naá gɛasɛ́ gá nnɔndɔ, kanɛ́ bó lɛ́ ndɔlɛ goŋaá onɔ́mɛnɔmɛ ba mɔtɔ i íŋene naá Bufuŋe bá Asaŋa.»

²⁵Aŋa behúúní bá mbɔɔ́ ɔ́bɔ́ dogálɔ dɔ́ɔdɔ, gáábɔ́ go ɛ́da go békúke, bó oya bá amɔ́: «Ánɛ́ɛ kanɛ́ bá lɔ́mɔ́ ba go mo sódio o?»

²⁶Yésusu go bó ágɛna oŋgíso go bó oyana a amɔ́: «Naá busío bá batɔ, bó lɛ́ ndɔlɛ, kanɛ́ naá Asaŋa, boóma bá ndɔlɛ bó do báá.»

²⁷Gɔ́ɔ Píele a gɔ́lɔmɔ́ dogálɔ a amɔ́ gɛ́hɛ́ a amɔ́: «Bese! Bó ná bɛ́ɛmbamɔ́ kanɛ́ nɛɛ́nɛ go bɛɛcɔ́ɔ báaba dɛ mbaá síé dɛ báá dɛ́ɛ́ná buimée dɛ báá go fídé o?»

²⁸Yésusu go bó gundie a amɔ́: «Mammana mammana ŋgaá nyó oyáná caá: naá gobénúgie gá moóma muimée, aŋa Moɔnɔ́ ba mɔtɔ a ŋgaá lukúméné naá oŋgɛ́yɔ́ yɛ́hɛ́ yá bugúmigumi[119], bɛɛnyɔ́ɔ báaba no mbaá mbiené, no ŋga lukúménénée tɔ́nɔ naá ɛŋgɛ́yɔ́ yɔ́ɔ́dɔ́ na ɛhandɛ́ go go sómba bɛsɛnɛ bá egúli yɔ́ɔ́dɔ́ na áhandɛ́ yá Ɛ́sɛlahɛ́ɛlɛ.

²⁹Kɔ́ɔ, uŋkimée mɔ́ɔnyɔ a mbaá síé a báá dɛ́ɛ́ná nnyaŋá, na bolimóní bá banɔ́mɔtɔ́ na bá bakɔ́dɔ, isée, nnyeedíi, baábayɔ́ ɛ́na lí ntɛ́mɛ́, go busío bá ufíno yámɛ, a ŋga gɔnɔ́ bɛa moóma mɔ́ɔmɔ makɔ́nɔ́ mó dómba, tɔ́nɔ a gunde a bóda gɛɔyɔ gá kanɛ mesúge.

³⁰Kanɛ́ gɛca gá báaba bá lɔ́mɔ́ bá busío godɔ́ɔdɔ bá ŋga bɛ́ɛ́mbá bá nnyimé; tɔ́nɔ gɛca gá báaba bá lɔ́mɔ́ bá nnyimé godɔ́ɔdɔ, bá ŋga bɛ́ɛ́mbá bá busío.»