Read Nugunu Motíosi 2 Bible Online

Motíosi 2 - Nugunu bible

Motíosi 2

¹Yésusu a mbaá bébíéné naá Bɛ́tɛlɛhɛ́mɛ, naá cí ya Yudée, naá gɛcamɛna gɛ́ɛgɛ Elóode a mbaá lɔmɔ́ ufuŋe ogɔ́nɔ́. Gɔ́ɔ biidí bá batɔ bɛ́ɛbɛ naá gɛdɔŋɔ gá mbálɛ́ná buisí bɛ́ ɛ́damɔ́ fadɛgɛna, go nco bola naá Yolósalɛmɛ;

²go úhune hɔ́ɔ bá amɔ́: «Ufuŋe yá Beyúdene yɔ́ɔyɔ yó gá lɔ́mɔ́ na go bébíene yó lɔ́mɔ́ áhanɛ́ɛ o? Dɛ lɛ́ ɛ́náalú hiotóti hɛ́hɛ́ naá gɛdɔŋɔ gɛ́cɔ́ naá mbálɛ́ná buisí, gɔ́ɔ dɛ úlemú go go nco mo búlugenye.»

³Aŋa ufuŋe Elóode a mbɔɔ́ ɔ́bɔ́ gɛpáa gɛ́ɛgɔ, gɛ́hɛ́ go békúke makɔ́nɔ́, na batɔ biimée báaba naá Yolósalɛmɛ.

⁴Gɛ́hɛ́ go bándɛgɛna bagɔ́nɔ́ɔ bá bedúmbí bɛbáágá naá Asaŋa, na muloodio má gicele má gɛdɔŋɔ gɛ́hɛ́ go go bó úhune anáa Mesíi a mbaá lɔmɔ́ ba go bébíene.

⁵Gáábɔ́ go mo gundie bá amɔ́ naá Bɛ́tɛlɛhɛ́mɛ, naá cí ya Yudée, goakɛ́ náana gɔ́ɔ mbúsí ya Asaŋa ɛ mbaá lɔmɔ́ ɔ́ŋɔ́ɔlú yɛ amɔ́:

⁶«Maamɔ́ɔ, Bɛ́tɛlɛhɛ́mɛ, cí ya Yóda, mammana, o do báá hɛómaŋkóma naá tɛ́sɔnɔ sá Yóda, goakɛ́ naá maamɔ́ɔ gɔ́ɔ ufuŋe yɔ́ɔyɔ yó ní indenyemú gɛdɔŋɔ gámɛ Ɛ́sɛlahɛ́ɛlɛ, yó ná hémemú.»

⁷Kɔ́ɔ Elóode a dɔ́ŋɛnɔmɔ́ biidí bá batɔ bɛ́ɛbɔ go cumbé goŋaá bɛ́ mo oyana naá mammana gɛcamɛna gɛ́ɛgɛ hiotóti hɛ́ mbaá lɔmɔ́ bédúfíelú.

⁸Naá nnyimé, a báá gó bɛ́ dóma naá Bɛ́tɛlɛhɛ́mɛ, a amɔ́ gá bɛ́ a amɔ́: «Ɛ́dá nɔnɔ, no fúmbe go íyime boóma buimée bɔ́ɔbɔ bó núunemú moádɔmbɔ́; aŋa no gaá ná ŋá no báa go mo ɛ́na, no nco ŋgoyana, yɔmɔ́ɔ tɔ́nɔ ŋgɛ́da mo búlugenye.»

⁹Biidí bá batɔ bɛ́ ó oyáa ŋkanɔ́ na ufuŋe nɔ́ɔnɔ, gá bɛ́ go dómba. Bɛ́ báá lɛ go ɛ́na goŋaá hiotóti hɛ́ɛhɛ bɛ́ mbaá lɔmɔ́ ɛ́náalú naá gɛdɔŋɔ gá bɛ́ hɛ́ ná lɛ́ go bó gɔ́gɔ naá busío. Hɛ́ ɛ́ ɛ́dá bola anáa moádɔmbɔ́ a mbaá lɔmɔ́, gá hɛ́ go dɛ́lɛmɛna hɔ́ɔ.

¹⁰Biidí bá batɔ bɛ́ ɛ́ ɛ́ná hiotóti hɛ́ɛhɔ nɔ́ɔnɔ, bɛ́ báá lɛ gó ɔ́bɔ bɛyaŋa makɔ́nɔ́ akɛ́báamɔ́.

¹¹Kɔ́ɔ bí íŋenemú naá ncíbo, gá bɛ́ go ɛ́na moádɔmbɔ́ na nnyeedíi bɛhɛ́ Malɛ́a, bɛ́ báá lɛ gó gule enúu, go ɛ́da go mo búlugenye. Bɛ́ á buuné bɛgada bá bɛ́ bá bonɔ́mɛ, go mo fáanana góolo, bolɔ, na míile.

¹²Naá nnyimé, Asaŋa go bɛ́ dóoginyo naá ndɛmá goŋaá bɛ́ dɛ gɔnɔ́ gunde naá Elóode. Gá bɛ́ go gɔ́lɔ pɛ́ incodío, bɛ́ báá gundé naá gɛdɔŋɔ gá bɛ́.

¹³Aŋa biidí bá batɔ bɛ́ mbaá dómbá, ɛ́ŋgɛlɛsɛ ba Daadáa go nco go oyana Yósɛbɛ naá ndɛmá a amɔ́: «Fadɛ́gɛ́na, o gɔ́lɔ moádɔmbɔ́ na nnyeedíi, o ságɛna go ɛ́da bɔ́ɔsɛgɔ naá gɛdɔŋɔ gá Egíbítene; o gɛ́ga hɔ́ɔ gó ɛ́da go éme aŋa nná go oyanamɔ́ goŋaá o nco gunde. Elóode a gaá fúmbée moádɔmbɔ́ goŋaá a mo óna.»

¹⁴Gɔ́ɔ Yósɛbɛ a dómbamɔ́ go fadɛgɛna na budúgú bɔ́ɔbɔ, go gɔ́lɔ moádɔmbɔ́ na nnyeedíi, a bɛ́ɛ́ ɛ́dá go oba naá Egíbítene.

¹⁵Gɔ́ɔ a mbaá gɛ́gáa hɔ́ɔ gó bɛ́ɛ́ ɛ́dá go éme aŋa Elóode a mbaá gúé, goŋaá naá nnyimé hɔ́ɔlɔ́ boóma bɔ́ɔbɔ Daadáa a mboó oyɛ́dá gá mbúsí ya Asaŋa bó ɛ́nanɛna: «Ndɛ́ dɔ́ŋɛ́nɔ́ɔlú moɔnɔ́ bamɛ naá Egíbítene[3].»

¹⁶Aŋa Elóode a mbɛɛ́ ɛ́ná a amɔ́ biidí bá batɔ bɛ́ɛbɔ bɛ́ á mo belé, gɛ́hɛ́ go liŋe a báá dúmbídínyée. Go dóma batɔ goŋaá bɛ́ ɛ́da go óna baábayɔ́ biimée gó ɛ́da súge naá bá nnyómá ɛ́handɛ́ naá Bɛ́tɛlɛhɛ́mɛ, cí yɛhɛ́. Gɔ́ɔ bá mbaá fúúgíe baábayɔ́ bá ogɛlɛ yɔ́ɔyɔ gɔgɔ́ aŋa gɛcamɛna gɛ́ɛgɛ biidí bá batɔ bɛ́ mbaá lɔmɔ́ mo oyánáalú gɛ́ mbaá lɔmɔ́.

¹⁷Gɔ́ɔ boóma bɔ́ɔbɔ Daadáa a mbaá dóógío naá nyuudé ná mbúsí ya Asaŋa Selemíi bó mbaá bédúfíe:

¹⁸«Ukelú yó ɛ́da go úlene naá Aláma, mbií na oŋónyi: a lɔ́mɔ́ Alásɛlɛ mɔ́ɔ a baŋamɔ́ baaná bɛ́hɛ́, a dɛ lɛ́gálɛ́gáa go goŋaá bá mo fuugie odɛ́má, goakɛ́ baaná bɛ́hɛ́ bá dɛ báá gɔnɔ́[4].»

¹⁹Naá nnyimé ya nigúe ná Elóode, ɛ́ŋgɛlɛsɛ ba Daadáa go nco go oyana Yósɛbɛ naá ndɛmá naá Egíbítene

²⁰a amɔ́: «Fadɛ́gɛ́na, gɔ́lɔ moádɔmbɔ́ na nnyeedíi, o gunde nabɔ́ naá gɛdɔŋɔ gá Ɛ́sɛlahɛ́ɛlɛ, goakɛ́ batɔ báaba bá á ná lɔmɔ́ bá lɛ́galɛga go óna moádɔmbɔ́ bá á gúé púmú.»

²¹Kɔ́ɔ Yósɛbɛ a gɔ́lɔmɔ́ moádɔmbɔ́ na nnyeedíi, bá báa lɛ gó gunde naá gɛdɔŋɔ gá Ɛ́sɛlahɛ́ɛlɛ.

²²Kanɛ́ ɔ ɔ́ ɔ́bɔ́ goŋaá Akɛ́lasɛ[5] mɔ́ɔ a lɔ́mɔ́ ufuŋe naá undukí yá isée Elóode naá Yudée, gɛ́hɛ́ go díine go gunde hɔ́ɔ; go ɛ́da naá Gelilée, aŋa Daadáa a mbaá lɔ́mɔ́ mo oyánáalú naá ndɛmá.

²³Gɛ́hɛ́ go lukumene naá tɛ́sɔnɔ yɛ́ɛyɛ bá dɔ́ŋɔnɔmɔ́ bá amɔ́ Násalɛdɛ, goŋaá boóma bɔ́ɔbɔ Asaŋa a mbaá lɔmɔ́ oyɛ́dáalú naá nyuudé ná mbúsí sá Asaŋa bo ɛ́nanɛna go busío bɛ́hɛ́: «Bá ŋga mo dɔ́ŋɔ́nɔ́ɔ bá amɔ́ moɔnɔ́ ba Banásalɛdɛ[6].»