Read Nugunu Motíosi 21 Bible Online

Motíosi 21 - Nugunu bible

Motíosi 21

¹Aŋa Yésusu na behúúní bɛ́hɛ́ bá mbaá ŋá bá ná lɛ́ go báyɛkana go go bola naá Yolósalɛmɛ, bá ná lɛ́ mekúígíi na Bɛ́tɛ́fasɛ, naá Ogɔndɔ yá magónɛ́dá má boolifíe, Yésusu go dóma behúúní bɛ́hɛ́ báandɛ́,

²a amɔ́ gáábɔ́ a amɔ́: «Ɛ́dá nɔnɔ naá gɛdɔŋɔ gɛ́ɛgɔ gɛ́ lɔ́mɔ́ naá busío bɛ́nyɔ́ gɛ́ɛgɔ. No gaá dómbá go gíde ginnyeedíi gá abaŋa bɛbɛa súnígéelú, gɛ́ lɛ́ na moɔnɔ́ ba gɛ́. Gɛ́ súdúnéemú nɔnɔ, no ŋgúlene nabɔ́.

³Mɔtɔ a amɔ́ a nyó úhune boóma, no gundie no amɔ́: Daadáa[122] a lɛ́ ncaná ya mɔ́. Hɔ́ɔ na hɔ́ɔ, a gaá dómbá go bó dɛ́ɛna no úle nabɔ́.»

⁴Bó mba bádómbánáa nɔ́ɔnɔ goŋaá dogálɔ dá mbúsí ya Asaŋa dɔ́ɔdɔ dó ɛ́nanɛna. Dogálɔ moánɛ dó lɔ́mɔ́:

⁵«Oyána nɔnɔ ombóla ba Síyono no amɔ́, “Ɛ́ná, ufuŋe yáhɔ yɔ́yɔ́ɔ yó ná lɔ́mɔ́ go go úlenine; yó do bébúlúgényée, yó lɛ́ bólɛ́gáalú naá ginnyeedíi gá abaŋa bɛbɛa, gɛ́ lɛ́ na moɔnɔ́ ba gɛ́[123], nnyama ya go bádóɛgana bɛnóɛ́.”»

⁶Behúúní bɔ́ɔbɔ go biene pɛ́, bá báá ŋaáa aŋa Yésusu a mbaá lɛ bó úhúnéelú.

⁷Gáábɔ́ go úle na ginnyeedíi gá abaŋa bɛbɛa na moɔnɔ́ ba gɛ́. Kɔ́ɔ bá anamɔ́ bɛla bábɔ́ naá nnyama sɛ́ɛsɔ, Yésusu go lukumene kɔ́ɔ naá mmoɛná.

⁸Kɔ́ɔ gitúu gá batɔ gɛ́ ɛ́damɔ́ go ana bɛla bábɔ́ go pɛ́, bóncodío bá fafa bitimbó, bá ágana naá pɛ́[124].

⁹Bitúu bá batɔ bɛ́ɛbɛ bɛ́ mbaá lɔmɔ́ bɛ́ mo gɔ́gɔ naá busío na bɛ́ɛbɛ bɛ́ mbaá lɔmɔ́ bɛ́ mo bienene bɛ́ ánca bɛ́ amɔ́: «Osána na Moɔnɔ́ ba Défidi! Gɛfona gɛ́ bɛ́ɛmba na mɔ́ɔnyɔ u úlenemú go ufíno yá Daadáa! Osána naá mmoɛná páábɔ́ gúunú!»

¹⁰Aŋa Yésusu a mbií íŋéné naá Yolósalɛmɛ, tɛ́sɔnɔ iŋkimée ɛ báá yuŋúmídé. Bú úhene bá amɔ́: «A lɔ́mɔ́ ánɛ́ɛ o?»

¹¹Bitúu bá batɔ bɛ́ gundenye bɛ́ amɔ́: «A lɔ́mɔ́ mbúsí ya Asaŋa, Yésusu ba go ɛ́da go úle naá Násalɛdɛ ba Gelilée.»

¹²Gɔ́ɔ Yésusu i íŋenemú naá Nnyaŋá ya Asaŋa, go ɛ́da go gúne batɔ báaba bá mbaá lɔmɔ́ bá ŋanana nyonyí hɔ́ɔ; a dɛ́anana tábɛ́la sá benúgí muinyí na indukí ya bedúí mmɛŋá go cí.

¹³Gɛ́hɛ́ go bó oyana a amɔ́: «Bó lɛ́ ɔ́ŋɔ́ɔlú goŋaá, bá ŋga dɔ́ŋɔ́nɔ́ɔ “Nnyaŋá yamɛ bá amɔ́ nnyaŋá ya mbósógólí”. Kanɛ́ bɛɛnyɔ́ɔ no báá go yɛ íyie nɛbɔ́ɔsɛgɔ ná biíbi[125]!»

¹⁴Begélígeli na banɛ́mɔnɛmɔ go mo báyɛkɛna naá Nnyaŋá ya Asaŋa, a báá bó éŋúgényée.

¹⁵Aŋa bagɔ́nɔ́ɔ bá bedúmbí bɛbáágá naá Asaŋa na muloodio má gicele bá mbɛɛ́ ɛ́ná bɛsɛɔ bɛ́ɛbɛ Yésusu a mbaá ŋá a gá lɛ́ na go ŋa, bá gɔnɔ go ɔ́bɔnɔ aŋa baábayɔ́ bá mbaá lɔmɔ́ bá ánca naá Nnyaŋá ya Asaŋa bá amɔ́: «Osána na Moɔnɔ́ ba Défidi!» boóma moánɛ go bó óbigio,

¹⁶gáábɔ́ go oyana Yésusu bá amɔ́: «Go ɔ́bɔnɔ boóma bɔ́ɔbɔ baábayɔ́ báaba bó oyamɔ́ o?» Gɛ́hɛ́ go bó gundie a amɔ́: «Ɛɛ́ɛŋ, mbó ɔ́bɔnɔ bese bese. No gá báasa no do banáa Ŋgɔ́ŋɛ́ sɛ́ɛsɛ sɛ́ oyamɔ́ sɛ́ amɔ́: “Naá eŋgúdé yá moáyayɔ́ŋgáyayɔ́ na yá muule gɔ́ɔ o mbaá bégedínyée mbúlugie[126] o”?»

¹⁷Kɔ́ɔ a bó síemú hɔ́ɔlɔ́, gɛ́hɛ́ go húme naá tɛ́sɔnɔ, a bɛ́ɛ́ ɛ́dá naá Beteníi, a báá dúmbíe budúgú hɔ́ɔ.

¹⁸A ná lɛ́ go nco gundene naá tɛ́sɔnɔ na gɛyɛ́nɛ́ túlúbú, gɛ́hɛ́ go ɔ́bɔ ncaná.

¹⁹Ɛ ɛ́ ɛ́ná mbɔ́gɔ́ ya bufiigíe naá boayá bá pɛ́, gɛ́hɛ́ go báyɛkɛna hɔ́ɔ, go gíde goana bɛányɛ aá bɛányɛ kanɛ bɛsamɔ́. Gɛ́hɛ́ go gálɛda bufiigíe a amɔ́: «O ŋga dɔ́ɔ, o do gɔnɔ́ go úme gɛsamɔ́!» Hɔ́ɔ na hɔ́ɔ bufiigíe go dómba go kóta.

²⁰Behúúní bɛ́ ɛ́nana nɔ́ɔnɔ, go békúke makɔ́nɔ́, go úhune Yésusu ba amɔ́: «Nɛ́ɛnɛ hɔ́ɔ na hɔ́ɔ, bufiigíe bó dómbamɔ́ go kóta o?»

²¹Gɛ́hɛ́ go bó gundie a amɔ́: «Mammana ŋgaá nyó oyáná daŋɛ́daŋɛ caá, no amɔ́ no bɛa gioliminyo buisí, gó gunde no do suŋénényée, caá goana bɔ́ɔbɔ ká lɔ́mɔ́ na go ŋa go bufiigíe bɔ́ no ná ŋamɔ́, kanɛ́ akɛ́ no amɔ́ no oyana ogɔndɔ yɔ́ɔyɔ no amɔ́, úlúkíe hɔ́ɔlɔ́ go ɛ́da bɔ́nɔ naá máŋɛ́, boóma moánɛ bó gaá báŋaáa.

²²Buimée bɔ́ɔbɔ no ŋgɔɔ́ ɔŋɛ́nɔ́ naá mbósógólí, aáŋa no bɛanana gioliminyo, no ŋga bó bɛáa.»

²³Aŋa Yésusu a mbií íŋéné naá Nnyaŋá ya Asaŋa, gɛcamɛna gɛ́ɛgɛ a mbaá lɛ a húunenye, bagɔ́nɔ́ɔ bá bedúmbí bɛbáágá naá Asaŋa na bafɛanɔ́ɔ bá gɛdɔŋɔ go mo báyɛkɛna bá amɔ́: «O ŋananamɔ́ moóma moánɛ na kasɛ́á nɛgaŋa? Ánɛ́ɛ a lɔ́mɔ́ go íŋénéelú nɛgaŋa moánɛ o?»

²⁴Gɛ́hɛ́ go bó gundie a amɔ́: «Yɔmɔ́ɔ tɔ́nɔ nnyó nɔɔ ŋgúhune táŋɛ́ mmue. No amɔ́ no kundinye, manɛ́ kanɛ́ yɔmɔ́ɔ tɔ́nɔ kaá ná nyó oyáná go nɛgaŋa nɛ́hanɛ́ ŋŋananamɔ́ moóma moánɛ.

²⁵Nnyó úhene caá, giyuminye gɛ́ɛgɛ Sáŋa a mbaá lɛ a yumeninye batɔ gɛ́ mbaá lɛ gɛ́ ɛ́da go úlene áhanɛ́ɛ, naá Asaŋa lí, naá batɔ o?» Gáábɔ́ go ɛ́da go bágálɛnagalɛna bá amɔ́: «Dɛ amɔ́ dɛ oyɛda dɛ amɔ́, gɛ́ mbaá lɛ gɛ́ ɛ́da go úlene naá Asaŋa, a gaá có úhúné a amɔ́, goakɛ́ kanɛ́ no mbií inyé go mo oliminyo o?

²⁶Kanɛ́ dɛ amɔ́ dɛ mo gundie dɛ amɔ́: “Naá batɔ”, dɛ háanana go bɛa bofoá na gitúu gá batɔ, goakɛ́ biimée bá mba lɛ́ bá gɔ́lɔnɔ Sáŋa aŋa mbúsí ya Asaŋa.»

²⁷Kɔ́ɔ bá gundiemú Yésusu bá amɔ́: «Dɛ dɛ íyíménée.» Mɔ́ɔ tɔ́nɔ go bó oyana a amɔ́: «Akɛ́ yɔmɔ́ɔ tɔ́nɔ cɛ gaá nyó oyáná nɛgaŋa nɛ́ɛnɛ ŋŋananamɔ́ moóma mɔ́ɔmɔ na nɛ́.»

²⁸«Dɛ́nyɔ́ no amɔ́ nɛɛ́nɛ? Mɔtɔ ummue a mba lɛ́ na baaná bɛ́hɛ́ báandɛ́. Gɔ́ɔ ɛ ɛ́damɔ́ naá ba busío go mo oyana a amɔ́: “Moɔnɔ́ bamɛ, ɛ́dá kanɛ́ yɔgɔnɔ naá ntɛ́mɛ́ ínoni yɛ́ɛyɛ.”

²⁹Moádɔmbɔ́ go mo gundie a amɔ́: “Cɛ lɛ́gálɛ́gáa.” Naá nnyimé hɔ́ɔlɔ́, gɛ́hɛ́ go núgie, a báá dígé.

³⁰Isée go ɛ́da tɔ́nɔ naá ba gáandɛ́ɛ go mo oyana boóma búmmue eé búmmue; mɔ́ɔnyɔ go mo gundie a amɔ́: “Ŋgɛ́dana, baaba.” Kanɛ́ a báá lɔbɛ́nɔ́ a dɛ ɛ́dá.

³¹Gɔ́ɔ naá baábayɔ́ bá báandɛ́ báaba, ohanɛ́ a mbaá ŋaáa ndɛ́ga ya isée o?» Batɔ go gundie bá amɔ́: «A lɔ́mɔ́ ba busío.» Yésusu a amɔ́ gáábɔ́ a amɔ́: «Mammana, ŋgaá nyó oyáná daŋɛ́daŋɛ caá, bogólí tásɛ na bɛ́daŋadaŋa bá bakɔ́dɔ bɛ́ ŋga nyó dóánɛ́ná naá Bufuŋe bá Asaŋa.

³²Mammana, Sáŋa a mbu úlé, a nyó dúfenye pɛ́ ya tɛ́nɛ́ɛ, no bíí inyé go mo oliminyo. Kanɛ́ bogólí tásɛ na bɛ́daŋadaŋa bá bakɔ́dɔ bɔ́ɔ, bá báá mo olímínyóo. Kanɛ́ bɛɛnyɔ́ɔ, akɛ́ aŋa no mbɛɛ́ ɛ́ná nɔ́ɔnɔ, no lɛ́ kanɛ go núgie gɛɔyɔ gɛ́nyɔ́ goŋaá no mo oliminyo.»

³³«Bódólígínyóomú nɔnɔ ncaba incodío. Mɔtɔ ummue a mba bɔ́ŋɔ́ ntɛ́mɛ́ ya magónɛ́dá má bɛsamɔ́ bá mɔgɛ́bɔ; a báá yɛ dúméné omɛndɛ́, a báá gedíe osá, a báá fóágá tɔ́nɔ nnyaŋá ya mmoɛná go ogɛ́ga[127]. Kɔ́ɔ a yɛ íŋenemú go gɛdɛ́nɔ go boyogóní bá go dɛŋa mɔgɛ́bɔ, mɔ́ɔ a bɛ́ɛ́ ɛ́dá go oŋɛndɔ.

³⁴Aŋa gɛcamɛna gá masáŋa gɛ́ mbaá háá, mɔtɔ go dóma boyogóní bɛ́hɛ́ naá boyogóní bá go dɛŋa mɔgɛ́bɔ goŋaá bá mo dómɛna bɛ́hɛ́ bodáŋɔ.

³⁵Gɔ́ɔ bɔ́ɔbɔ bá gumbenemú batɔ bá bosɔ́mɔ; ummue bá báá mo gidée, uncodío, bá báá mo óná, uncodío gɔnɔ́, bá báá mo dóɛ́dánáa adánɛ́.

³⁶Gɔ́ɔ mɔtɔ ba ntɛ́mɛ́ a gɔnɔmɔ́ dóma boyogóní bóncoó gɛca bá báá dómbá báaba bá busío; boyogóní bá go dɛŋa mɔgɛ́bɔ go ŋa caŋa mmue nabɔ́ aŋa bá mbaá ŋaáa na báaba bá busío.

³⁷Naá gosúgudinye, gɛ́hɛ́ go dóma moɔnɔ́ bɛ́hɛ́ ba moatɛ́, a amɔ́ gófɛnaá bá gaá mo hálámáná.

³⁸Kanɛ́ boyogóní bá go dɛŋa mɔgɛ́bɔ, bɛ́ ɛ́nana moɔnɔ́, go bágálɛdɛna bá amɔ́: “A lɔ́mɔ́ moɔnɔ́ ba bigíndé. Úlé nɔnɔ! Ŋgáa dɛ mo óna, dɛ bɔ́gɔ́gɛdɛnɔ bigíndé.”

³⁹Kɔ́ɔ bá mo yɔkɛnɔmɔ́, bá báá húmé nɛhɛ́ naá ntɛ́mɛ́, go mo óna.

⁴⁰Ɛɛ́ɛŋ, aŋa mɔtɔ ba ntɛ́mɛ́ a nú úlemú, a ná ŋamɔ́ nɛɛ́nɛ na boyogóní bá go dɛŋa mɔgɛ́bɔ bɔ́ɔbɔ o?»

⁴¹Batɔ go mo gundie bá amɔ́: «Kanɛ mahana, a ŋga fúúgíe buúníní bɔ́ɔbɔ púmú, i íŋene ntɛ́mɛ́ yɛhɛ́ go gɛdɛ́nɔ go boyogóní bá go dɛŋa mɔgɛ́bɔ bóncoó, báaba bá ná ŋamɔ́ bá mo fáanana bɛ́hɛ́ bodáŋɔ aŋa gɛcamɛna gɛ́ báá ná háá.»

⁴²Yésusu go bó oyana a amɔ́: «No gá báasa no do banáa naá Ŋgɔ́ŋɛ́ goŋaá: “Ɛdánɛ́ nɛ́ɛnɛ befúégí bá mbuú umbé, nɛ́ nɛ́ lɔ́mɔ́ ɛ́yáalú Ɛdánɛ́ ná bugído. Buelí bá Daadáa kanɛ́ bɔ́bɔ́ɔ: Kasɛ́á boóma bá go békúke naá oŋgíso yɛ́cɔ́[128]!”

⁴³«Tɔ́nɔ ŋgaá nyó oyáná daŋɛ́daŋɛ caá bá ŋgu úlíe Bufuŋe bá Asaŋa naá bɛɛnyɔ́ɔ, bá fáa batɔ bá gɛdɔŋɔ gíntió báaba bá ŋgaá ŋanánáa bɛnɔ́gɔ́ bá moóma na bɔ́. [

⁴⁴Mɔ́ɔnyɔ a ŋgoó obá naá ɛdánɛ́ moánɛ, a ŋga mɛ́ncámɛ́ncáa; gɔnɔ́ mɔ́ɔnyɔ nɛ́ ŋgaá mo obɛ́ná, nɛ́ ŋga mo goláa.»]

⁴⁵Bagɔ́nɔ́ɔ bá bedúmbí bɛbáágá naá Asaŋa na Befelisiéŋe bɔ́ ɔ́bɔnɔ ncaba sɛ́ɛsɔ, go lɛnca goŋaá Yésusu a mbaá gálágáláa nɔ́ɔnɔ go busío bábɔ́.

⁴⁶Go ɛ́da go fúmbe pɛ́ ya go mo gumbene, kanɛ́ bá mba dííné gitúu. Mammana, go busío bá gitúu, Yésusu a mba lɛ́ mbúsí ya Asaŋa.