Read Nugunu Motíosi 22 Bible Online

Motíosi 22 - Nugunu bible

Motíosi 22

¹Gɔ́ɔ Yésusu a gɔnɔmɔ́ bó ágɛna ncaba sɛ́ɛsɛ a amɔ́:

²«Bufuŋe bá mmoɛná bó lɔ́mɔ́ caŋa mmue aŋa ufuŋe yúmmue yɔ́ɔyɔ yó mbaá gedíe gɛdágá go gigiŋe gá ohaŋa bɛhɛ́.

³Gɔ́ɔ a dómamɔ́ boyogóní bɛ́hɛ́ goŋaá bɛ́ ɛ́da dɔ́ŋɔnɔ batɔ báaba bá mbaá lɛ dɔ́ŋɛ́nɔ́ɔlú naá gibíné. Kanɛ́ bɔ́ɔ, bá dɛ mbáa lɛ bá maamana go úle.

⁴Gɛ́hɛ́ go gɔnɔ dóma boyogóní bóncoó, a báá bó lɔsɛ́nɔ́ a amɔ́, bó oyana batɔ báaba bá lɔ́mɔ́ dɔ́ŋɛ́nɔ́ɔlú naá gibíné goŋaá: “Godɔ́ɔdɔ, mbáa go onda manyáanya. Mbáa go óna bɛnɔ́mɛ bámɛ bá gúlúge na bɛnɛmɛnaga bámɛ bá bidúgé, úlénée nɔnɔ naá gibíné.”

⁵Kanɛ́ batɔ bá dɔ́ŋɛ́nɔ́ɔlú naá gibíné bá lɛ́ kanɛ go ága boóma bɔ́ɔbɔ naá edúu; bá báa lɛ gó dómbana go masɔ́mɔ mábɔ́, mɔ́ɔnyɔ naá ntɛ́mɛ́ yɛhɛ́, mɔ́ɔnyɔ go nyonyí nɛ́hɛ́.

⁶Bóncodío go bɔ́yɔdɛgɛnɔ boyogóní, bá bó séesenye, bá bó óna.

⁷Ufuŋe go ɔ́bɔ́ mpímí, go dóma bitúu bɛ́hɛ́ bá bisimbi bá báá fúúgíe buúníní bɔ́ɔbɔ, bá báá ágɛ́ná tɛ́sɔnɔ yabɔ́ íyuke.»

⁸«Gɔ́ɔ ufuŋe o oyanamɔ́ boyogóní bɛ́hɛ́ a amɔ́: “Manyáanya má gigiŋe má ná lɛ́ mekúígíi, kanɛ́ batɔ báaba ŋgaá ná dɔ́ŋɔ́nɔ́ɔ bá dɛ á gá lɛ bá háanana na má.

⁹Ɛ́dánáa nɔnɔ kanɛ́ naá maádoga má pɛ́ miimée, no dɔ́ŋɔnɔ mɔtɔ uŋkimée mɔ́ɔnyɔ no gaá ná mo gídé hɔ́ɔ goŋaá u úle naá gibíné.”

¹⁰Boyogóní bɔ́ɔbɔ go biene pɛ́, go bándɛna batɔ biimée báaba bá mbaá gídénée, besi na bahándá. Batɔ go hóogo ncíbo ya gigiŋe dácɛ.

¹¹Ufuŋe go íŋene go go núune batɔ báaba bá mbaá lɔmɔ́ naá ncíbo, gɛ́hɛ́ go lieŋe mɔtɔ mɔ́ɔnyɔ a mbaá lɔmɔ́ kanɛ gɛla gá gibíné kɔ́ɔ.

¹²Gɛ́hɛ́ go mo oyana a amɔ́: “Paá, maamɔ́ɔ o báá ní íŋéné háalá nɛɛ́nɛ kanɛ gɛla gá bese go gibíné o?” Mɔtɔ go oba gɛmámɔ́.

¹³Gɔ́ɔ ufuŋe o oyanamɔ́ boyogóní bɛ́hɛ́ a amɔ́: “Mo gumbénéemú nɔnɔ, no mo góda iŋgolí, bɛgɔ́ndɔ́ na ɛmbɔ́gɔ kɛ́, no mo nɔɔ naá mbíno gadɛ́ɛ; a baŋa hɔ́ɔ, a banda bigélédé.”»

¹⁴Yésusu go gídene a amɔ́: «Bá dɔ́ŋɔnɔ degédegé, kanɛ́ bí iyide sɔŋɛ!»

¹⁵Gɔ́ɔ Befelisiéŋe bɛ́ ɛ́damɔ́ kɛsɛda naá nɛganda go go dámbɛna Yésusu na ŋgúhune, bá mo gumbene naá dogálɔ dɛ́hɛ́ dá moatɛ́.

¹⁶Bá báa lɛ gó mo dómɛna beebieni bábɔ́ olɔŋɔ na batɔ bá giimbó gá Elóode, go go nco mo úhune bá amɔ́: «Iloodio dɛ íyimene goŋaá go oya tɛ́nɛ́ɛ, o gunde o húunenye pɛ́ sá Asaŋa na mammana iŋkimée. O do bɛanánáa bofoá na mbééníŋínyí sá batɔ, goakɛ́ o do díínée mɔtɔ go odɛ́nɛ́ yɛ́hɛ́.

¹⁷Có oyánáamɔ́ kanɛ́ gɛ́ɛgɛ: Dɛ háanana go soanana muinyí má tásɛ ya ufuŋe ogɔ́nɔ́ Sɛsáalɛ lí, ɛɛ́ɛŋ ɛ́na lí akɛ́ɛ?»

¹⁸Kanɛ́ Yésusu a lɛncana moliolio mábɔ́, go bó gundie a amɔ́: «Bekuilí báaba! No támbana goakɛ́ o?

¹⁹Túfíemú nɔnɔ gɛkɔ́ŋɔ gá muinyí gɛ́ɛgɛ no soananamɔ́ tásɛ kɔ́ɔ.» Bá báá lɛ gó mo úlene na gɛ́.

²⁰Gɛ́hɛ́ go bó úhune a amɔ́: «Busío bɔ́ɔbɔ bó lɔ́mɔ́ enínyéelú kɔ́ɔ na ufíno yɔ́ɔyɔ yó lɔ́mɔ́ dɛlɛ́dáalú kɔ́ɔ mó lɔ́mɔ́ má ánɛ́ɛ o?»

²¹Bɔ́ɔ go mo gundie bá amɔ́: «Mó lɔ́mɔ́ má ufuŋe ogɔ́nɔ́ Sɛsáalɛ.» Gɛ́hɛ́ go bó oyana a amɔ́: «Gundínyée nɔnɔ kanɛ́ Sɛsáalɛ bɔ́ɔbɔ bó lɔ́mɔ́ bá Sɛsáalɛ, no gundinye Asaŋa bɔ́ɔbɔ bó lɔ́mɔ́ bá Asaŋa.»

²²Naá dogálɔ dɔ́ɔdɔ, gáábɔ́ go békúke makɔ́nɔ́, bá báá mo dɛ́ɛ́ná, bá báá dómbánáa.

²³Buisí moánɛ bɔ́ɔbɔ, batɔ bá giimbó gá Beseduseyéŋe go úle naá boayá bá Yésusu. Beseduseyéŋe bá lɛ́ batɔ báaba bó oyamɔ́ bá amɔ́ bɛlɔ́ŋɔ́ bɛ́ dɛ fúfúgénée[129]. Kɔ́ɔ bá mo úhunemú bá amɔ́:

²⁴«Iloodio, Mɔ́sɛsɛ a mbo oyɛ́dá a amɔ́: “Mɔtɔ a amɔ́ a gúe kanɛ go bɛa baaná, ondimóní a gada gisí, a bíene naá ɛgoná há ondimóní mɔ́ɔnyɔ a mbaá gúé[130].”

²⁵Kanɛ́ naá bɛɛcɔ́ɔ, bolimóní banɔ́mɔtɔ́ bá mba lɛ́ batáanɔ na báandɛ́. Ba busío mɔ́ɔnyɔ a mbaá lɛ giŋénéelú, a báá gúé; aŋa a mbaá lɛ kanɛ go bíene, a báá dɛ́fɛ́ná ondimóní ogɛ́.

²⁶Gɔ́ɔ gó bɛ́ɛmbamɔ́ nɔ́ɔnɔ caŋa mmue na ba gáandɛ́ɛ, na ba gádadɔ́ɔ, gó bɛ́ ɛ́dá súgudinye naá ba gátáanɔ na gáandɛ́ɛ.

²⁷Naá nnyimé ya bɔ́ɔ biimée, okɔ́dɔ go gúe tɔ́nɔ.

²⁸Ɛɛ́ɛŋ kɔ́ɔ! Naá púfuge ya begúe, a ŋgaá bɛ́ɛ́mbá ogánɛ́ ánɛ́ɛ o? Mammana, a mba lɛ́ okɔ́dɔ ba biimée bátáanɔ na báandɛ́.»

²⁹Yésusu go bó gundie a amɔ́: «No bébelebele, goakɛ́ no do íyíménée Ŋgɔ́ŋɛ́, akɛ́ bogaaga bá Asaŋa.

³⁰Mammana, naá púfuge ya begúe, banɔ́mɔtɔ́ na bakɔ́dɔ bá dɛ ŋgá giŋenine, bá ŋgɔ ɔyɔ́ɔ aŋa bɛɛ́ŋgɛlɛsɛ naá mmoɛná.

³¹Aŋa ŋgúhune ɛ núunemú púfuge ya begúe, no gá báasa no do baná nogálɔ nɔ́ɔnɔ Asaŋa a mbaá nyó oyáná a amɔ́:

³²“Ndɛ́ Asaŋa ba Ábalaháma, Asaŋa ba Ɛ́saga, Asaŋa ba Yɔ́kɔbɔ[131] o?” A dɛ báá Asaŋa ba begúe, a lɔ́mɔ́ Asaŋa ba bɔgɔ́sɔ.»

³³Aŋa Bitúu ba batɔ bɛ́ mbɔɔ́ ɔ́bɔ́ gooya gá Yésusu gɔ́ɔgɔ, gáábɔ́ go békúke makɔ́nɔ́ mbɔ́dɔ yɛhɛ́ ya go húunenye.

³⁴Aŋa Befelisiéŋe bá mbɔɔ́ ɔ́bɔ goŋaá Yésusu a á buigé Beseduseyéŋe nyuudé, gáábɔ́ go bábándɛgɛna.

³⁵Iloodio há bɛlɔsɛnɔ hímmue naá olɔŋɔ yábɔ́ go mo dámbɛna na ŋgúhune yɛ́ɛyɛ a amɔ́:

³⁶«Iloodio, naá Gicele, gɛlɔsɛnɔ gá bogaaga gɛ́hanɛ́ gɛ́ lɔ́mɔ́ kɔ́ɔ, gɛ́ dómbana bɛ́ɛbɛ bíncodío?»

³⁷Gɛ́hɛ́ go mo gundie a amɔ́: «O háanana go maamana Daadáa Asaŋa bahɔ na odɛ́má yáhɔ uŋkimée, na gɛɔyɔ gáhɔ giimée, na mbééníŋínyí yahɔ iŋkimée[132].

³⁸Gɛlɔsɛnɔ gá bogaaga gɛ́ dómba gɛ́gɔ́ɔ, gɛ́ lɛ́ gá busío.

³⁹Gá gáandɛ́ɛ gɛ́ lɛ́ tɔ́nɔ na ndénégé makɔ́nɔ́, gɛ́ lɔ́mɔ́: O háanana go maamana sɔ́gɔ́ɔ aŋa maamɔ́ɔ moatɛ́[133].

⁴⁰Bɛlɔsɛnɔ bá bɛ́andɛ́ bɛ́ɛbɛ bɛ́ bɛ́ lɔ́mɔ́ mbɔ́gɔ́ ya Gicele giimée akɛ́ tɔ́nɔ na bakálata báaba mbúsí sá Asaŋa sɛ́ mbɔɔ́ ɔ́ŋɔ́ɔ.»

⁴¹Aŋa Befelisiéŋe bá mbaá lɔ́mɔ́ bábándɛ́gɛ́náalú, Yésusu go bó nɔɔ ŋgúhune yɛ́ɛyɛ a amɔ́:

⁴²«Bɛɛnyɔ́ɔ, no oyamɔ́ no amɔ́ nɛɛ́nɛ go busío bá Mesíi o? U úlenemú naá nogɔgɔ́ ná ánɛ́ɛ o?» Gáábɔ́ go mo gundie bá amɔ́: «Naá nogɔgɔ́ ná Défidi.»

⁴³Yésusu go bó oyana a amɔ́: «Nɛɛ́nɛ kanɛ́ Défidi a mo dɔ́ŋɔnɔmɔ́ aŋa Gimmúmpúu gá Giliíli a mbaá lɛ a mo oyanɛna, a amɔ́ Daadáa, o oya a amɔ́:

⁴⁴“Daadáa a mbo oyáná Daadáa bamɛ a amɔ́: Lukúméne naá boayá bá ombɔ́gɔ onɔ́mɛ yámɛ gó ɛ́da húme aŋa nná ŋamɔ́ goŋaá o níŋiside babɛlɔ́bɛlɔ báhɔ kɔndɔ́ go cí[134] o?”

⁴⁵Kanɛ́ aáŋa Défidi a mo dɔ́ŋɔnɔ Daadáa, nɛɛ́nɛ a lɔ́mɔ́ tɔ́nɔ ba go úle naá nogɔgɔ́ nɛ́hɛ́ o?»

⁴⁶Batɔ go gúdumide kanɛ ba go mo gundie nogálɔ. Gó bayɛga buisí moánɛ, mɔtɔ a lɛ́ kanɛ go gɔnɔ mo nɔɔ ŋgúhune.