Read Nugunu Motíosi 23 Bible Online

Motíosi 23 - Nugunu bible

Motíosi 23

¹Gɔ́ɔ Yésusu a gɔ́lɔmɔ́ dogálɔ go oyana bitúu bá batɔ na behúúní bɛ́hɛ́ a amɔ́:

²«Muloodio má gicele na Befelisiéŋe bá lɛ́ ndukíi naá odɛ́nɛ́ yá Mɔ́sɛsɛ go go húunenye batɔ gicele gɛ́hɛ́.

³Kɔ́ɔ, ŋanánáa nɔnɔ no gunde no beŋe buimée bɔ́ɔbɔ bá nyó oyanɛnamɔ́, kanɛ́ naá gɛɔyɔ gɛ́nyɔ́, no do biené gɛgɔ́ndɔ́ gábɔ́; goakɛ́ bó oya, kanɛ́ bá dɛ ŋánánáa bɔ́ɔ moatɛ́ aŋa bó oyamɔ́.

⁴Bá góda bilúututu bá bɛnóɛ́ bɛ́ɛbɛ bá dóɛganamɔ́ batɔ go bibéndu; asáa gɔgɔ́ bɔ́ɔ moatɛ́ moatɛ bí inyene go bó óhiginyo akɛ́ na ɛnɔɔ́nnɔɔ́.

⁵Meŋiigíe mábɔ́ miimée má lɔ́mɔ́ go go bédúfenye naá oŋgíso yá batɔ. Mokakáda má go bɛ́dɛgana bigísi bá Ŋgɔ́ŋɛ́ kɔ́ɔ, mábɔ́ mó lɛ́ bɛantáa mó dómbana má basɔ́gɔ́ɔ. Ɛmbɔ́gɔ ya kaba sábɔ́, bɛdádálaga[135].

⁶Bá maamana go lukumenene naá indukí ya busío naá bɛdágá na naá nnyaŋá sá mbósógólí.

⁷Bá maamana goŋaá gásɛ́ bá á bó bédíígényée naá indukí yá agósa yá gɛdɔŋɔ, bɔ́ ɔ́bɔnɔ bese aŋa batɔ ba bó fínenyemú bá amɔ́ “Iloodio”.

⁸Kanɛ́ bɛɛnyɔ́ɔ, no do olímínyóo goŋaá bá nyó fínenye iloodio, goakɛ́ no bɛanana iloodio táŋɛ́ ummue, bɛɛnyɔ́ɔ biimée no lɛ́ bulimóní.

⁹No do fínídínyée mɔtɔ naá cí háalá no amɔ́ Isée bɛnyɔ́, goakɛ́ no bɛanana Isée táŋɛ́ ummue, a lɔ́mɔ́ naá mmoɛná.

¹⁰No do béfínídínyée no amɔ́ akɛ́ ufuŋe, goakɛ́ no bɛanana ufuŋe táŋɛ́ yúmmue, a lɔ́mɔ́ Kilítusu.

¹¹Ogɔ́nɔ́ɔ naá olɔŋɔ yɛ́nyɔ́ a lɔ́mɔ́ mɔ́ɔnyɔ a yɔgɔnɔmɔ́ go busío bá basɔ́gɔ́ɔ,

¹²goakɛ́ mɔ́ɔnyɔ a bébúlugiemú mɔ́ɔ moatɛ́ bá ŋga mo siisíe, kanɛ́ mɔ́ɔnyɔ a bésiisiemú mɔ́ɔ moatɛ́, bá ŋga mo búlúgíe.

¹³Mahana nɛnyɔ́ muloodio má gicele na Befelisiéŋe bekuilí báaba, goakɛ́ no buigenene batɔ gɛasɛ́ gá Bufuŋe bá mmoɛná. Bɛɛnyɔ́ɔ moatɛ́ no do lɛ́gálɛ́gáa go íŋene kɔ́ɔ, no legene báaba bá lɛ́galɛgamɔ́ go íŋene. [

¹⁴Mahana makɔ́nɔ́ nɛnyɔ́ muloodio má gicele, na Befelisiéŋe, bekuilí báaba! No nyɛ́ɛna bisí bá bakɔ́dɔ, no gɔnɔ ŋanana bɛntaálala bá mbósógólí go go bédúfenye. Go boóma moánɛ gɔ́ɔ no ŋgaá bɛáa gɛantáanta gá noséésényée.]

¹⁵Mahana nɛnyɔ́ muloodio má gicele na Befelisiéŋe bekuilí báaba, goakɛ́ no ɛnɛnda hoóma hiimée naá máŋɛ́ na naá cí go go kikilidie mɔtɔ goŋaá i íŋene naá giimbó gɛ́nyɔ́. Kanɛ́ aŋa no ŋamɔ́ no báá go mo kikilidie, no mo íyie mɔ́ɔnyɔ a háananamɔ́ na gɛbɔlɔ́gɔdɔ gá íyuke há kanɛ go fúenene ɛŋɛndɔ ɛhandɛ́ a nyó dómba bɛɛnyɔ́ɔ.

¹⁶No lɛ́ mahana, bɛɛnyɔ́ɔ begélígeli báaba no indenyemú batɔ. No bó oyanɛna no amɔ́: “Mɔtɔ a amɔ́ a bálɛa go ufíno yá Nnyaŋá ya Asaŋa, bɔ́ɔbɔ bá dɛ banáa. Kanɛ́ mɔtɔ a amɔ́ a bálɛa go ufíno yá góolo yɛ́ɛyɛ ɛ lɔ́mɔ́ naá Nnyaŋá ya Asaŋa, bɔ́ɔbɔ bɔ́ɔ bó mo nonamɔ́.”

¹⁷Batɔ bá kanɛ nciŋí gɔnɔ́ na bigélí báaba! Na góolo na Nnyaŋá ya Asaŋa yɛ́ɛyɛ ɛ fonamɔ́ góolo, ɛkádɛ́ gɛ́ dómbanamɔ́ o?

¹⁸No gɔnɔ go oya no amɔ́: “Mɔtɔ a amɔ́ a bálɛa go ufíno ya gɛdálɛ́ná, bɔ́ɔbɔ bá dɛ́ banáa. Kanɛ́ a amɔ́ a bálɛa go ufíno ya gɛbáágá gɛ́ɛgɛ gɛ́ lɔ́mɔ́ naá gɛdálɛ́ná mmoɛná, bɔ́ɔbɔ bɔ́ bó mo nonamɔ́”.

¹⁹Batɔ bá kanɛ nciŋí gɔnɔ́ na bigélí báaba! Gɛbáágá na gɛdálɛ́ná gɛ́ɛgɛ gɛ fonamɔ́ gɛbáágá, ɛkádɛ gɛ́ dómbanamɔ́ sɔ́gɔ́ɔ o?

²⁰Mammana ɛ lɔ́mɔ́ goŋaá, mɔtɔ mɔ́ɔnyɔ a bálɛamɔ́ go ufíno yá gɛdálɛ́ná, a bálɛanana go gɛ́ gɔnɔ́ na buimée bɔ́ɔbɔ bó lɔ́mɔ́ kɔ́ɔ naá mmoɛná.

²¹Mɔtɔ mɔ́ɔnyɔ a bálɛamɔ́ go ufíno yá Nnyaŋá ya Asaŋa, a bálɛanana go yɛ́ gɔ́nɔ́ go Mɔ́ɔnyɔ a gɛ́gamɔ́ kɔ́ɔ.

²²Mɔtɔ mɔ́ɔnyɔ a bálɛamɔ́ go ufíno yá mmoɛná a á bálɛ́a go oŋgɛ́yɔ́ yá Asaŋa gɔ́nɔ́ na mɔ́ɔnyɔ a lɔ́mɔ́ ndukíi kɔ́ɔ[136].

²³No lɛ́ mahana bɛɛnyɔ́ɔ muloodio má gicele na Befelisiéŋe, bekuilí báaba! Bɛɛnyɔ́ɔ báaba no fáananamɔ́ Asaŋa gɛɔdɔ́ɔ gá masáŋa má kúínyígúínyi, bɛsɔbɔ, na bilímbí[137], kanɛ́ no sesesesie ɛsɔ́mɔ hɛ́ɛhɛ hɛ́ lɔ́mɔ́ na ndénégé naá gicele: botɛ́nɛ́ɛ, busi na pídefide. Moóma mɔ́ɔmɔ mɔtɔ a sɛmɛgananamɔ́ go ŋanana mɔ́mɔ́ɔ, kanɛ go sesidie mɔ́ɔmɔ múntió.

²⁴Bɛɛnyɔ́ɔ begélígeli báaba bá gɔ́gɔmɔ́ batɔ! No balona miimpo goŋaá no do mɛná ŋki, kanɛ́ no mɛna gɛantá gá nnyama gɛ́ɛgɛ bá dɔ́ŋɔnɔmɔ́ bá amɔ́ samóo.

²⁵No lɛ́ mahana bɛɛnyɔ́ɔ muloodio má gicele na Befelisiéŋe, bekuilí báaba! No kɔ́kɔ nnyimé ya kɔ́bɔ na isóyóo yɛnyɔ́ bese, kanɛ́ mó lɛ́ dácɛ na bɛsamɔ́ bá buíbi na bá bɛgáda bɛ́nyɔ́ bá mbééníŋínyí.

²⁶Befelisiéŋe, bigélígeli báaba! Bayɛ́ga go manɛ soga bese gadɛ́ɛ gá kɔ́bɔ yahɔ, gɔ́ɔ nnyimé ya yɛ́ ɛ gaá ná bɛ́ɛ́mbá tɔ́nɔ sogógáalú.

²⁷No lɛ́ mahana bɛɛnyɔ́ɔ muloodio má gicele na Befelisiéŋe, bekuilí báaba! No fóanana bɛbɛ́lá bɛ́ɛbɛ bá báá ná fúénénée cafá mmúmpúu, bonɔ́gɔ́ go oŋgíso, kanɛ́ naá gadɛ́ɛ na bigúégúé bá bigúe bá batɔ na biílo mbɔ́dɔ iŋkimée kɔ́ɔ dácɛ.

²⁸Nɔ́ɔnɔ gɔ́ɔ bɛɛnyɔ́ɔ no lɔ́mɔ́: go oŋgíso yá batɔ no lɛ́ besi, kanɛ́ gadɛ́ɛ gɛ́nyɔ́ gá lɛ́ dácɛ na bukuilí, na bobɛ́.

²⁹No lɛ́ mahana bɛɛnyɔ́ɔ muloodio má gicele na Befelisiéŋe, bekuilí báaba! No maanana bɛbɛ́lá bá mbúsí sá Asaŋa no gɔnɔ lɛŋa bɛ́ɛbɛ bá besi bá batɔ.

³⁰No gunde nó oya no amɔ́: “Aáŋa dɛ mba lɛ́ hɔ́ɔ naá gɛcamɛna gá biisée bá biisée kɔ́nɔ́ɔ bɛ́cɔ́, gásɛ́ dɛ lɛ́ kanɛ go gunde nnyimé yabɔ́ go go óna mbúsí sá Asaŋa.”

³¹No dúfenye nɔ́ɔnɔ goŋaá no lɛ́ bɛɛnyɔ́ɔ moatɛ́ mbíényée sá báaba bá mboó ónáa mbúsí sá Asaŋa.

³²Ɛɛ́ɛŋ! Yibénínée nɔnɔ kanɛ́ buelí bá biisée bá biisée kɔ́nɔ́ɔ bɛ́nyɔ́.

³³No lɛ́ nnyɔ́gɔ, baaná bá moɔnɛnɔ. No béeniŋenye no amɔ́ no lɛ́ ba go pamba go gɛbɔlɔ́gɔdɔ gá íyuke há kanɛ go fúenene o?

³⁴Go busío moánɛ, ɔ́bɔ́ nɔnɔ: nná nyó dómɛna mbúsí sá Asaŋa, benciŋínciŋi na muloodio má gicele. No ŋga bó ónáa, no gunde no bó gilene naá kolósi. No ŋga bó sóáláa bɛságɔ naá nnyaŋá sɛ́nyɔ́ sá mbósógólí, no gunde no bó gúnene go tɛ́sɔnɔ iŋkimée.

³⁵Bó ŋgaá bɛ́ɛ́mbá nɔ́ɔnɔ goŋaá manɔ́ŋɔ́ má besi biimée bá cí má nyó obɛna gó bayɛga go usi ba mɔtɔ mɔ́ɔnyɔ Ábɛlɛ gó nco bola naá manɔ́ŋɔ́ má Sakalɛ́a, ohaŋa ba Belecíi. No mba mo óná naá kadɛ́gadɛ́ɛ yɛ́ɛyɛ na Nnyaŋá ya Asaŋa na gɛdálɛ́ná[138].

³⁶Mammana, ŋgaá nyó oyáná caá, buimée bɔ́ɔbɔ bó nó obɛna ogɛlɛ yɔ́ɔyɔ!

³⁷«Yolósalɛmɛ, Yolósalɛmɛ o! Maamɔ́ɔ go ónamɔ́ mbúsí sá Asaŋa, o dóɛdana báaba Asaŋa a go dómanɛnamɔ́ adánɛ́. Ɛŋɛndɔ gɛca, yɛ́ɛyɛ ndɔ́mɔ́ lɛ́gáalú go bandɛgɛna baaná báhɔ aŋa ŋgɔɔ́ ɛ bándɛganamɔ́ baaná naá bɛbaga bá yɛ́ cí, kɔ́ɔ no lɔ́mɔ́ kanɛ go lɛ́ga!

³⁸Ɛɛ́ɛŋ! nnyaŋá yɛnyɔ́ ɛ gaá síéné gɔdɔɔ́ go púmúpúmúu[139].

³⁹Gɔ́ɔ ŋgaá nyó oyáná daŋɛ́daŋɛ caá: a dúme godɔ́ɔdɔ, no do ná gɔnɔ ŋgɛ́na gó ɛ́da héme aŋa no ŋgoó oyɛ́dá no amɔ́: “Gɛfona gɛ́ bɛ́ɛmba na mɔ́ɔnyɔ u úlenemú go ufíno yá Daadáa[140]!”»