Read Nugunu Motíosi 24 Bible Online

Motíosi 24 - Nugunu bible

Motíosi 24

¹Yésusu a húmene naá Nnyaŋá ya Asaŋa go go dómba, behúúní bɛ́hɛ́ go mo báyɛkɛna go go mo dúfie mbɔ́dɔ ya bɛfóaga.

²Gɛ́hɛ́ go gɔ́lɔ dogálɔ go bó oyana a amɔ́: «Ábɔ caá no núune buimée bɔ́ɔbɔ o? Mammana, ŋgaá nyó oyáná, akɛ́ ɛdánɛ́ nímmue nɛ́ dɛ ŋgá lɔbɔ dáláalú naá sɔ́gɔ́ɔ ɛdánɛ́ mmoɛná, bá ŋga buhée buimée bɔ́ɔbɔ.»

³Yésusu a lɛ́ ndukíi naá ogɔndɔ yá magónɛ́dá má Boolifíe, behúúní bɛ́hɛ́ go mo báyɛkɛna, go mo búuŋgulidene bá amɔ́: «Có oyánáamɔ́ gɛcamɛna gɛ́ɛgɛ boóma moánɛ bó ŋgaá báŋaáa, gɔnɔ́ tɔ́nɔ na gilincie gɛ́ɛgɛ gɛ́ ŋgaá dóógío mencogunde máhɔ, na mamáná má cí.»

⁴Gɛ́hɛ́ go bó gundie a amɔ́: «Bébeŋéemú nɔnɔ goŋaá mɔtɔ a dɛ nyó nenúgíe.

⁵Mammana, batɔ degédegé bá ŋgu úlénée, bá béfínenye go ufíno yámɛ, bó oya bá amɔ́: “Yɔmɔ́ɔ ndɔ́mɔ́ Mesíi”. Bá ŋga ŋaáa goŋaá gɛca gá batɔ gɛ́ nana mammana ya pɛ́.

⁶No ŋgɔ ɔ́bɔ́nɔ́ɔ bó oya cɔ́mɔ sá bidé, na biuŋgúlú bá bidé. No do bɛáa bofoá kanɛ́, moóma moánɛ mó háanana go bola, kanɛ́ bó gá lɛ́ bó do bɛ́ɛ́mbá gomana gá cí.

⁷Mammana, boɛ́nɔ búmmue bó ŋga nɔɔ́ɔ sɔ́gɔ́ɔ boɛ́nɔ bidé, bufuŋe na sɔ́gɔ́ɔ bufuŋe. Incíli na goyiŋkime gá cí mó ŋga bɛ́ɛ́mbá naá bigísi bá cí gɛca.

⁸Kanɛ́ muimée mɔ́ɔmɔ mó ŋga bɛ́ɛ́mbá aŋa mabayɛga má gɛɔ́bɛgɔ gá manómana má gobíene.

⁹Gɔ́ɔ batɔ bá ŋgaá nyó ágá naá mahana, bá nyó óna; mɛɛ́nɔ máama má lɔ́mɔ́ má dɛ bɛ́ɛ́mbá Beyúdene má ŋga nyó bɛlábɛ́láa go busío bámɛ.

¹⁰Go busío moánɛ gɔ́ɔ batɔ degédegé bá ŋgaá cecúgíe gioliminyo, bɛ́ ɛ́da go bábala bɔ́ɔ na bɔ́ɔ, gó gunde, bá bɛlanabɛlana.

¹¹Mbúsí sá mbele sɛ́ ŋga bológánáa go gitúu, sɛ́ gunde sɛ́ nenugenye degédegé ya batɔ.

¹²Bobɛ́ bó ŋgɛ ɛ́dánáa naá busío, bó goma, go busío moánɛ gɛcɛcá gá batɔ gɛ́ dɛ ŋgá gɔnɔ́ lɛ́ganalɛgana.

¹³Kanɛ́ mɔ́ɔnyɔ a ŋgaá simbímídé, gó ɛ́da húme naá mamáná, mɔ́ɔ Asaŋa a ŋgaá mo sódío.

¹⁴Bá ŋga dúményée Gɛnɔ́gɔ́ gá Cɔ́mɔ gá Bufuŋe bá Asaŋa gɛ́ɛgɛ naá cí iŋkimée. Mɛɛ́nɔ miimée máama má lɔ́mɔ́ má dɛ íyíménée Asaŋa, má ŋgɔ ɔ́bɔ́ Cɔ́mɔ ya ndiemi. Hɔ́ɔlɔ́ gɔ́ɔ mamáná má cí má ŋgaá bolá.»

¹⁵«Aŋa no ŋgɛɛ́ ɛ́ná kanɛ́ mɔ́ɔnyɔ bá dɔ́ŋɔnɔmɔ́ bá amɔ́ “Mɔtɔ ba Gikume” dɛ́lɛ́mɛ́náalú naá gimmúmpúu gá hoóma, mbúsí ya Asaŋa Déniele ɛ mba gálágáláa go busío bɛ́hɛ́[141], — ŋgáa umbení kálata ɔ ɔ́bɔ! —

¹⁶gɔ́ɔ, batɔ báaba bá ŋgaá bɛ́ɛ́mbá naá gɛdɔŋɔ gá Yudée, bá salana naá ɛgɔndɔ.

¹⁷Mɔ́ɔnyɔ a ŋgaá bɛ́ɛ́mbá naá balánda ba nnyaŋá mmoɛná, a dɛ siisé, a dɛ gɔnɔ́ go íŋene naá ncíbo go go gɔ́lɔ boóma kɔ́ɔ.

¹⁸Mɔ́ɔnyɔ a ŋgaá bɛ́ɛ́mbá naá ntɛ́mɛ́, a dɛ gundé na nnyimé go go gɔ́lɔ gɛla gɛ́hɛ́ gá isió.

¹⁹Bakɔ́dɔ bá embume na báaba bá go yúuŋenye baaná bá ŋga bɛ́ɛ́mbá mahana makɔ́nɔ́ naá medúgú moánɛ.

²⁰Bósógólónyóomú nɔnɔ goŋaá no do ɛ́yá ba go sala gɛcamɛna gá gɛantá gá isió, ɛ́na lí buisí bá sábadɛ.

²¹Medúgú moánɛ kanɛ́ má ŋga bɛ́ɛ́mbá na gɛɔ́bɛgɔ aŋa bó gá báasamɔ́ bó do báŋaáa, gó sɛŋɛda aŋa Asaŋa a mbaá gedíe mmoɛná na cí na moóma muimée, gɔnɔ́ bó do ŋgá gɔnɔ báŋa akɛ́ go buisí[142].

²²Aáŋa gɔnɔ́ Daadáa a dɛ mbá sómba go une medúgú má ndiemi, gásɛ́ mɔtɔ a dɛ mbáa lɛ ba go sódio gɛɔyɔ gɛ́hɛ́. Kanɛ́ Asaŋa a ŋga uné medúgú mɔ́ɔmɔ go busío bá batɔ báaba a mbií iyídé.

²³Gɔ́ɔ gó lɔ́mɔ́, mɔtɔ a amɔ́ a nyó oyana a amɔ́: “Mesíi a lɛ́ háalá”, ɛ́ná lí, “A lɛ́ héení”, no do olímínyóo boóma bɔ́ɔbɔ a nyó oyanɛnamɔ́.

²⁴Kɔ́ɔ bemesíi bá mbele bá ŋga bológánáa, olɔŋɔ na mbúsí sá mbele. Batɔ bɔ́ɔbɔ bá ŋga ŋanánáa bieninye bá gobékúke na bɛsɛɔ, bá fúmbe go nenugie akɛ́ báaba Asaŋa a mbií iyídé.

²⁵Ɛɛ́ɛŋ, ŋgaá nyó dóógínyóo go ofalɔ.»

²⁶«Kanɛ́ bá amɔ́ bá nyó oyana bá amɔ́: “Mɔ́ɔ mɔ́nyɔ́ɔ naá giolóo gá bodɛ́agadɛ́”, no do hóámá no do ɛ́dá hɔ́ɔ. Ɛ́na bá amɔ́ bá nyó oyana bá amɔ́: “A lɛ́ háalá”, no do olímínyóo.

²⁷Aŋa mpólómɛnáa yɛ́ɛyɛ ɛ begidemú gó bayɛga naá mbálɛ́ná buisí, gó ɛ́da húme naá hoóma háaha bó bɛ́dɛmanamɔ́, nɔ́ɔnɔ gɔ́ɔ gó ŋgaá bɛ́ɛ́mbá aŋa buisí bá goncogunde gá Moɔnɔ́ ba mɔtɔ.

²⁸Bɛgɔ́mbɛ́ɛ bɛ́ ŋga bábándáa naá hoóma háaha gigúe gɛ́ lɔ́mɔ́.

²⁹Hɔ́ɔ na hɔ́ɔ naá nnyimé ya makánya má medúgú mɔ́ɔmɔ go dómba, buisí bó ŋga fúé, ofɛ́ yó do gɔnɔ́ nomɛda, muotóti mó káfakafa go mmoɛná mó obana, magaaga má mmoɛná má dɛ gɔnɔ́ bɛa ndukúméníné[143].

³⁰Gɔ́ɔ bá ŋgɛɛ́ ɛ́ná gieninye gá Moɔnɔ́ ba mɔtɔ gɛ́ ɛ́da go úlene naá mpólómɛnáa. Egúli eŋkimée yáaya naá cí yá ŋga ágánáa kóokóo, yá gunde yá ɛ́na Moɔnɔ́ ba mɔtɔ ɛ ɛ́da go úlene naá bidu bá mmoɛná na bogaaga gɔnɔ́ na nigúmi dácɛ.

³¹Aŋa bá ŋgaá góbá cɛ́bá ya gɛantáa, a lɛ go dóma bɛɛ́ŋgɛlɛsɛ bɛ́hɛ́ naá maayá má cí miimée go go bándɛgɛna batɔ báaba Asaŋa a mbií iyídé, gó bayɛga naá ombálá yá cí yɔ́ɔyɔ gó ɛ́da súge naá yɔ́ɔyɔ yúntió[144].

³²Ɔ́bɔ́ nɔnɔ gieninye gɛ́ɛgɛ bá gɔ́lɔnɔmɔ́ go bogónɛ́dá bá bufiigíe: Gɛcamɛna gɛ́ɛgɛ bɛtáfɛ bá bɔ́ bɛ́ gundemú bɛdɔmbɔ́, gɔnɔ́ bɛáncɛ bá bɔ́ bɛ́ báá bayɛ́gá go tɔsɔ, no íyimene goŋaá gɛnɔ́gɔ́ gá gɛcamɛna gɛ́ ná lɛ́ mekúígíi.

³³Caŋa mmue, bɛɛnyɔ́ɔ tɔ́nɔ, aŋa no ŋgɛɛ́ ɛ́ná moóma mɔ́ɔmɔ, íyíme nɔnɔ goŋaá Moɔnɔ́ ba mɔtɔ, a nco gundene godɔ́ɔdɔ godɔ́ɔdɔ, a lɛ́ naá bɛasɛ́ bɛ́nyɔ́.

³⁴Ŋgaá nyó oyáná mammana caá, batɔ bá ogɛlɛ yɔ́ɔyɔ bá dɛ ŋgá fúe biimée, kanɛ goŋaá moóma muimée mɔ́ɔmɔ mó á bolá.

³⁵Mmoɛná na cí mó ŋga maná, kanɛ́ dogálɔ dámɛ dó do ŋgá mana.»

³⁶«Mɔtɔ a dɛ íyíménée akɛ́ buisí ɛ́na gigúlí gá moóma moánɛ go bola, akɛ́ bɛɛ́ŋgɛlɛsɛ báaba naá mmoɛná, akɛ́ Moɔnɔ́[145], Baaba i íyimenemú, goana mɔ́ɔ mokáa.

³⁷Moóma mɔ́ɔmɔ mó mbaá bádómbánáa naá gɛcamɛna gá Nóe, mó ŋga bádómbánáa caŋa táŋɛ́ mmue naá muúle má Moɔnɔ́ ba mɔtɔ.

³⁸Ɛɛ́ɛŋ, caŋa mmue, otóotoɛ yá goŋaá nobólá ná púugie nó naa, batɔ bá mba lɛ́ bá nyáanya, bá nyóanana, bá giŋenine, bá gunde bá fáanana babóla na bahaŋa go bigiŋe; gó ɛ́da go éme buisí bɔ́ɔbɔ Nóe a mbií íŋéné naá gilué gɛgɔ́nɔ́[146].

³⁹Bá dɛ mbáa lɛ bá gɔ́lɔnɔ bofoá go boóma, gó ɛ́da go éme gɛcamɛna gɛ́ɛgɛ nobólá ná púugie nó mbaá naáa, nó báá bó fúúgíe púmú[147]. Bó ŋgaá bɛ́ɛ́mbá tɔ́nɔ nɔ́ɔnɔ naá muúle má Moɔnɔ́ ba mɔtɔ.

⁴⁰Kɔ́ɔ naá batɔ báandɛ́ báaba bá ŋgaá bɛ́ɛ́mbá naá ntɛ́mɛ́: bá gɔ́lɔ ummue, bá dɛ́ɛna mɔ́ɔnyɔ untió.

⁴¹Bakɔ́dɔ báandɛ́ bá ŋga bɛ́ɛ́mbá naá ɛdánɛ́ bá gola camɔ́: bá gɔ́lɔ́ ummue, bá dɛ́ɛna mɔ́ɔnyɔ untió.

⁴²Gɛ́gáa nɔnɔ kanɛ́ pɔnyɛ́ɛ, goakɛ́ no do íyíménée buisí bɔ́ɔbɔ Daadáa bɛnyɔ́ a ŋgaá ncó gunde.

⁴³No íyimene: aáŋa mɔtɔ ba nnyaŋá a mba lɛ́ íyimene gɛcamɛna gá budúgú gɛ́ɛgɛ uŋgíbi a gaá nú úlé, a gaá gɛ́gáa pɔnyɛ́ɛ, a dɛ mo dɛ́ɛ́ná goŋaá a gúmbune bɛcába bá nnyaŋá yɛhɛ́.

⁴⁴Gɔ́ɔ, bɛɛnyɔ́ɔ tɔ́nɔ, bɛ́ɛ́mba nɔnɔ pɛnɛ́ɛ, goakɛ́ Moɔnɔ́ ba mɔtɔ a ŋgu úlé naá gigúlí gɛ́ɛgɛ no lɔ́mɔ́ no do íyíménée.»

⁴⁵«Ánɛ́ɛ a lɔ́mɔ́ kanɛ́ uyogóní ba pídefide gɔnɔ́ dóógínyóolú o? A lɔ́mɔ́ mɔ́ɔnyɔ ogɔ́nɔ́ɔ bɛhɛ́ a mo díliminyemú naá mɔ́ nnyaŋá go go indenye basɔ́gɔ́ɔ boyogóní, a bó fáanana manyáanya naá gɛcamɛna.

⁴⁶Besé makɔ́nɔ́ na uyogóní ba ndiemi, ogɔ́nɔ́ɔ bɛhɛ́ a amɔ́ a nco gunde, a báá mo gídé a yɔgɔnɔ buelí moánɛ.

⁴⁷Mammana, ŋgaá nyó oyáná caá, ogɔ́nɔ́ɔ a ŋga mo dílímínyée go go indenye bonɔ́mɛ bɛ́hɛ́ buimée.

⁴⁸Kanɛ́ aáŋa a lɛ́ gɛbɛ́ gá uyogóní, a gaá bágálɛ́dɛ́ná a amɔ́: “Ogɔ́nɔ́ɔ bamɛ a á gɛ́gáa go nco gunde,”

⁴⁹a lɛ go ɛ́da go gide basɔ́gɔ́ɔ boyogóní, a nyáanya, a nyóanana na basɔ́gɔ́ɔ bɛnyóa.

⁵⁰Gɔ́ɔ ogɔ́nɔ́ɔ a ŋgaá ncó gunde buisí bɔ́ɔbɔ uyogóní a lɔ́mɔ́ a dɛ bágɛ́gánáa, naá gigúlí gɛ́ɛgɛ a lɔ́mɔ́ a dɛ íyíménée.

⁵¹A ŋga mo gúnée[148], a mo déŋebie odɛ́nɛ́ yá bekuilí, naá hoóma háaha mbií na gobanda gá bigélédé mó lɔ́mɔ́.