Read Nugunu Motíosi 25 Bible Online

Motíosi 25 - Nugunu bible

Motíosi 25

¹«Gɔ́ɔ Bufuŋe bá mmoɛná bó ŋgaá bɛ́ɛ́mbá aŋa ncaba ya babóla bɔ́ɔ́dɔ́ báaba bá mbaá fadɛ́gɛ́ná go go ɛ́da gigólio gá ugiŋénú.

²Bátáanɔ naá olɔŋɔ yábɔ́ bá mba lɛ́ biegu, báaba bátáanɔ bóntió na nciŋí.

³Biegu bá babóla go gɔ́lɔ lámba sábɔ́ kanɛ go bábɛ́dɛgɛna megúdé móncodío.

⁴Kanɛ́ báaba bá nciŋí, go gɔ́lɔ lámba sábɔ́ na megúdé móncodío naá mudógódógó.

⁵Aŋa ugiŋénú a mbaá gɛ́gáa go bola, dɔnɔ́ɔ go gumbene babóla bɔ́ɔbɔ, biimée bá bɛ́ɛ́ ɛ́dá go dɔnɔ́ɔ.

⁶Naá odɛ́má yá budúgú, nupópóo go dónogoga nó amɔ́: “Gobola gá ugiŋénú gɔ́gɔ́ɔ! Ɛ́dá no mo gólio.”

⁷Gɔ́ɔ babóla bɔ́ɔbɔ biimée bá foyogamɔ́, go nébigenye lámba sábɔ́.

⁸Biegu go oyana benciŋínciŋi bɛ́ amɔ́: “Có fáamɔ́ nɔnɔ megúdé mɛ́nyɔ́, goakɛ́ lámba sɛ́cɔ́ gá sɛ́ go fúe.”

⁹Benciŋínciŋi go bó gundie bá amɔ́: “Akɛ́ɛ, má dɛ gaá háá go busío bɛ́cɔ́ nɛ́nyɔ́ kɛ́. Bó lɛ́ bese, no ɛ́da go ɔ́ndɔ mɛ́nyɔ́ naá bedúí.”

¹⁰Gɛcamɛna gɛ́ɛgɛ bá mbaá fadɛ́gɛ́ná go go ɛ́da go ɔ́ndɔ megúdé, ugiŋénú go bola. Báaba bá mbaá bégedíe, go íŋene nɛhɛ́ naá ncíbo ya gigiŋe, gɔ́ɔ bá buigemú gɛasɛ́.

¹¹Naá nnyimé kanɛ́, babóla báaba bóncoó go úle bá báá bolá, bá amɔ́: “Ogɔ́nɔ́ɔ, ogɔ́nɔ́ɔ, có buunénéemú!”

¹²Kanɛ́ gɛ́hɛ́ go gundie a amɔ́: “Mammana, ŋgaá nyó oyáná caá, cɛ nyó í íyíménée.”

¹³“Gɛ́gáa nɔnɔ kanɛ́ pɔnyɛ́ɛ, goakɛ́ no do íyíménée akɛ́ buisí ɛ́na gigúlí.”

¹⁴«Mammana, bó ŋga bɛ́ɛ́mbá caŋa mmue aŋa mɔtɔ mɔ́ɔnyɔ a mbaá ŋá a ná lɛ́ go ɛ́dana go oŋɛndɔ, gɛ́hɛ́ go dɔ́ŋɛnɔ boyogóní bɛ́hɛ́, a báá bó dɛ́fɛ́ná bonɔ́mɛ bɛ́hɛ́.

¹⁵A báá fáá mɔ́ɔnyɔ tɔ́sɛnɔ mantɛdɛ mátáanɔ, mɔ́ɔnyɔ tɔ́sɛnɔ mantɛdɛ máandɛ́, mɔ́ɔnyɔ uncodío tɔ́sɛnɔ ntɛdɛ; onyɔ moánɛ go go báhóda gɛ́hɛ́, gɔ́ɔ a bienemú pɛ́.

¹⁶Hɔ́ɔ na hɔ́ɔ, mɔ́ɔnyɔ a mbaá bɛáa tɔ́sɛnɔ mantɛdɛ mátáanɔ go ɛ́da sɛ́ degie, a báá bódá tɔ́sɛnɔ mantɛdɛ mátáanɔ móncodío.

¹⁷Caŋa mmue, mɔ́ɔnyɔ a mbaá bɛáa tɔ́sɛnɔ mantɛdɛ máandɛ́, a báá bódá tɔ́sɛnɔ mantɛdɛ máandɛ́ móncodío.

¹⁸Kanɛ́ mɔ́ɔnyɔ a mbaá bɛáa goana tɔ́sɛnɔ ntɛdɛ, go ɛ́da díme gɛbɛ́lábɛ́lá, a bɔ́ɔ́ ɔsɛ́gɔ́ tɔ́sɛnɔ ntɛdɛ ya ogɔ́nɔ́ɔ bɛhɛ́ kɔ́ɔ.

¹⁹«Gɛcamɛna makɔ́nɔ́ gɛ́ á dómbá, ogɔ́nɔ́ɔ ba boyogóní bɔ́ɔbɔ go bola; go ɛ́da go bó ŋanana ombanɔ yá bonɔ́mɛ bɛ́hɛ́.

²⁰Mɔ́ɔnyɔ a mbaá bɛáa tɔ́sɛnɔ mantɛdɛ mátáanɔ go báyɛkɛna, a báá mo sɛncɛ́gɛ́ná tɔ́sɛnɔ mantɛdɛ mátáanɔ móncodío a amɔ́: “Ogɔ́nɔ́ɔ, o mba ncoóo tɔ́sɛnɔ mantɛdɛ mátáanɔ, ŋgaá bódá tɔ́sɛnɔ mantɛdɛ mátáanɔ móncodío, má mámáa.”

²¹Ogɔ́nɔ́ɔ a amɔ́ gɛ́hɛ́ aá: “Bese yɛ́yɔ́ɔ, gɛnɔ́gɔ́ gɔnɔ́ uyogóní ba pídefide; go á bɛ́ɛ́mbá na pídefide naá moóma má sɔŋɛ, nná go dɛ́fɛna má degédegé, úlé ncó yaŋa olɔŋɔ namɛ.”

²²Mɔ́ɔnyɔ a mbaá bɛáa tɔ́sɛnɔ mantɛdɛ máandɛ́, go báyɛkɛna tɔ́nɔ a amɔ́: “Ogɔ́nɔ́ɔ, o mba ncoóo tɔ́sɛnɔ mantɛdɛ máandɛ́, ŋgaá bódá tɔ́sɛnɔ mantɛdɛ máandɛ́ móncodío, má mámáa.”

²³Ogɔ́nɔ́ɔ a amɔ́ gɛ́hɛ́ aá: “Bese yɛ́yɔ́ɔ, gɛnɔ́gɔ́ gɔnɔ́ uyogóní ba pídefide; go á bɛ́ɛ́mbá na pídefide naá moóma má sɔŋɛ, nná go dɛ́fɛna má degédegé, úlé ncó yaŋa olɔŋɔ namɛ.”

²⁴«Mɔ́ɔnyɔ kanɛ́ a mbaá bɛáa tɔ́sɛnɔ ntɛdɛ go báyɛkɛna naá gɛ́hɛ́ gɛcamɛna a amɔ́: “Ogɔ́nɔ́ɔ, mba lɛ́ ŋgíyimene caá o lɛ́ mɔtɔ mɔ́ɔnyɔ a lalamɔ́ odɛ́má; o sáŋa anáa o mbaá lɔmɔ́ o do gónáa, o bándɛna anáa o mbaá lɔmɔ́ o do kasánáa.

²⁵Mmba bɛáa bofoá, gɔ́ɔ mbɛɛ́ ɛ́dá díndigene tɔ́sɛnɔ ntɛdɛ yahɔ go cí; yɛ́ yɛ́yɛ́ɛ.”

²⁶Ogɔ́nɔ́ɔ bɛhɛ́ go mo gundie a amɔ́: “Gɛbɛ́ gá uyogóní, onɔ́nɔ́nɔnɔ mɔ́ɔnyɔ! O mba lɛ́ go íyimene go amɔ́ cáŋa anáa mmbaá lɔmɔ́ cɛ gónáa, mbándɛna anáa mmbaá lɔ́mɔ́ cɛ kasánáa;

²⁷bó mba lɛ́ bó háanana goŋaá go ɛ́da go ága yɔmɔ́ muinyí naá nɛbɛ́dɛgɛna ná muinyí, go goŋaá naá goncogunde gámɛ, ŋgɛ́da mó gɔ́lɔ na bɛdálɛ́ná.

²⁸Gɔ́lɔ́ nɔnɔ tɔ́sɛnɔ ntɛdɛ yɛ́ɛyɛ a lɔ́mɔ́ na yɛ́, no íŋene mɔ́ɔnyɔ a lɔ́mɔ́ na tɔ́sɛnɔ mantɛdɛ mátáanɔ ɛŋɛndɔ ɛhandɛ́.

²⁹Mammana, mɔtɔ uŋkimée mɔ́ɔnyɔ a bɛananamɔ́, bá ŋga mo gídéné, a bɛ́ɛmba naá fundufundu; kanɛ́ mɔ́ɔnyɔ a lɔ́mɔ́ a dɛ bɛanánáa, bá ŋga úlíe akɛ́ bɔ́ɔbɔ a béeniŋenyemú a amɔ́ a lɛ́ na bɔ́.

³⁰Nɔɔ́ɔ nɔnɔ uyogóní ba kanɛ ŋgénéménée mɔ́ɔnyɔ go hanyɔ́, naá mbíno, anáa mbií na gobanda gá bigélédé mo ná bɛ́ɛmbamɔ́.”»

³¹«Gɔ́ɔgɔ Moɔnɔ́ ba mɔtɔ a ŋguú úlé naá nigúmi nɛ́hɛ́ na bɛɛ́ŋgɛlɛsɛ biimée, a ŋga lukúméné naá ɔŋgɛ́yɔ́ yɛ́hɛ́ yá bufuŋe.

³²Bɛdɔŋɔ biimée bɛ́ ŋga bábándáa naá busío bɛ́hɛ́. A ŋga dádónáa batɔ aŋa umbeŋíbéŋí bidúgé a dádonamɔ́ bɛdómbáa na mbúnyi.

³³A ŋga dílíményée bɛdómbáa naá boayá bá ombɔ́gɔ onɔ́mɛ yɛ́hɛ́, mbúnyi naá boayá bá ombɔ́gɔ odádɛ́ yɛ́hɛ́.

³⁴Gɔ́ɔ ufuŋe ogɔ́nɔ́ a ŋgoó oyáná báaba naá boayá bá ombɔ́gɔ onɔ́mɛ yɛ́hɛ́ a amɔ́: “Bɛɛnyɔ́ báaba Baaba a mbaá nyó fona, ncó no bɛa buebíe naá Bufuŋe bɔ́ɔbɔ a mbaá nyó gedínyée a dúme aŋa a mbaá gedíe cí.

³⁵Mammana, mmba lɛ́ na ncaná, no báá ŋganá, mmba lɛ́ na inyúidi, no báá mbényúígíe, mmba lɛ́ uŋunyí, no báá kɔ́lɔ́ bese.

³⁶Mba lɛ́ nnú gɔdɔɔ́, no báá ŋgágá gɛla; mmba lɛ́ nnóma, no báá ncó mɛ́nɛgɛna; mmba lɛ́ naá ncíbo ya gɛaŋɔ́, no báá ncó ŋgɛ́na.”

³⁷Kɔ́ɔ besi bá batɔ bá ŋgaá mo úhúné bá amɔ́: “Daadáa, dɛ mbaá go ɛ́ná áhanɛ́ɛ na ncaná, dɛ báá go aná o? Ɛ́na lí na inyúidi, dɛ báá go bényúígíe o?

³⁸Gɛcamɛna gɛ́hanɛ́ dɛ mbaá go ɛ́ná uŋunyí, dɛ báá go gɔ́lɔ́ bese o? Ɛ́na lí nnú gɔdɔɔ́, dɛ báá go ágá gɛla o?

³⁹Gɛcamɛna gɛ́hanɛ́ dɛ mbaá go ɛ́ná o nóma, ɛ́na lí naá ncíbo ya gɛaŋɔ́, dɛ báá ncó go mɛ́nɛgɛna o?”

⁴⁰Kɔ́ɔ ufuŋe ogɔ́nɔ́ a ŋgaá bó gundíe a amɔ́: “Mammana, ŋgaá nyó oyáná caá, ɛŋɛndɔ iŋkimée yɛ́ɛyɛ no mbaá ŋaáa moóma mɔ́ɔmɔ go busío bá ummue naá moáyayɔ́ŋgáyayɔ́ naá bifío bámɛ bɛ́ɛbɛ, no mbaá ŋŋaáa yɔmɔ́ɔ.”

⁴¹«Manɛ́ a ŋgaá békikílídíe báaba naá boayá bá ombɔ́gɔ odádɛ́ yɛ́hɛ́ a amɔ́ gáábɔ́ a amɔ́: “Ŋgɛ́dɛ́náamɔ́ nɔnɔ halaháláa, bɛɛnyɔ́ɔ báaba bá mbaá nyó yɔmɛ́nɔ́ báaba; ɛ́dá nɔnɔ naá gɛbɔlɔ́gɔdɔ gá íyuke gá kanɛ go fúenene gɛ́ɛgɛ Asaŋa a mbaá gedíe go busío bá Ohándá na bɛɛ́ŋgɛlɛsɛ bɛ́hɛ́.

⁴²Mammana, mmba lɛ́ na ncaná, no bíí inyé go ŋgana; mmba lɛ́ na inyúidi, no bíí inyé go mbényúígie.

⁴³Mmba lɛ́ uŋunyí, no bíí inyé go kɔ́lɔ bese; mmba lɛ́ nnú gɔdɔɔ́, no bíí inyé go ŋgága gɛla; mmba lɛ́ nnóma, gó gunde, yɔmɔ́ɔ naá ncíbo ya gɛaŋɔ́, no bíí inyé go nco mmɛ́nɛgɛna.”

⁴⁴Gɔ́ɔ bɔ́ɔ tɔ́nɔ ba ŋgaá mo uhúné bá amɔ́: “Daadáa, gɛcamɛna gɛ́hanɛ́ dɛ mbaá go ɛ́ná na ncaná ɛ́na lí na inyúidi; uŋunyí ɛ́na lí nnú gɔdɔɔ́; o nóma ɛ́na lí naá ncíbo ya gɛaŋɔ́, dɛ báá lɔbɛ́nɔ́ kanɛ go nco go óhiginyo o?”

⁴⁵Gɔ́ɔ a ŋgaá bó gundíe a amɔ́: “Mammana, ŋgaá nyó oyáná caá, ɛŋɛndɔ iŋkimée yɛ́ɛyɛ no mbaá lɔbɛ́nɔ́ kanɛ go ŋa moóma mɔ́ɔmɔ go busío bá ummue naá moáyayɔ́ŋgáyayɔ́ mɔ́ɔmɔ mó lɔ́mɔ́ bifío bámɛ, bó lɔ́mɔ́ go busío bámɛ gɔ́ɔ no mbaá lɔbɛ́nɔ́ kanɛ go mó ŋa.”

⁴⁶Nɔ́ɔ gɔ́ɔ, báaba moánɛ ba ŋgɛɛ́ ɛ́dánáa naá noséésényée ná kanɛ mmanɛ́náa, besi bá batɔ bɔ́ɔ bɛ́ ɛ́da naá gɛɔyɔ gá kanɛ mesúge[149].»