Read Nugunu Motíosi 26 Bible Online

Motíosi 26 - Nugunu bible

Motíosi 26

¹Aŋa Yésusu a mbaá dɔmbɔ́ go húunenye buimée bɔ́ɔbɔ, gɛ́hɛ́ go oyana behúúní bɛ́hɛ́ a amɔ́:

²«No íyimene no amɔ́ gibíné gá Pásɛ́ka ya Beyúdene[150] gɛ́ á síéné medúgú máandɛ́. Bá gaá dúé Moɔnɔ́ ba mɔtɔ goŋaá bá mo gilene naá kolósi.»

³Gɔ́ɔ bagɔ́nɔ́ɔ bá bedúmbí bɛbáágá naá Asaŋa na bafɛanɔ́ɔ bá gɛdɔŋɔ bá bábándɛgɛnamɔ́ naá ndáŋɛ ya Keyífe, Ufuŋe yá bagɔ́nɔ́ɔ ba bedúmbí bɛbáágá naá Asaŋa.

⁴Gáábɔ́ go húme ukelú goŋaá bá gumbene Yésusu naá nɛɔsɛgɔ, bá mo óna.

⁵Bá gálagala bá amɔ́: «Dɛ dɛ háánánáa go mo gumbene gɛcamɛna gá gibíné, go go ásɛgɛna goŋaá batɔ bá dɛ ubíe ologodo naá boɛ́nɔ.»

⁶Naá gɛcamɛna moánɛ, Yésusu a mba lɛ́ naá tɛ́sɔnɔ ya Beteníi, naá nnyaŋá ya mɔtɔ mɔ́ɔnyɔ a mbaá nómáa kúnú ufíno yɛ́hɛ́ Símono.

⁷Aŋa Yésusu a mbaá ŋá a ná lɛ́ go nyáanya, okɔ́dɔ ummue go úle a bíí íŋéné na idógódógó hɛ́ɛhɛ bá mbaá gedíe na ɛdánɛ́ ná ntɔ́nɔ nɛ́ɛnɛ bá dɔ́ŋɔnɔmɔ́ bá amɔ́ alabátɛlɛ. Hɛ́ mba lɛ́ dácɛ na alabɛ́nda ba ntɔ́nɔ, gɛ́hɛ́ go ɛ́da go udenine Yésusu alabɛ́nda moánɛ go odóɛ.

⁸Aŋa behúúní bɛ́hɛ́ bá mbɛɛ́ ɛ́ná boóma moánɛ, gáábɔ́ go duge odɛ́má bá amɔ́: «Kanɛ́ bá díeŋiemú alabɛ́nda mɔ́ɔnyɔ háalá goakɛ́ o?

⁹Bá á lɛ ba go mo dúe go muinyí gɛca, bá abana basógasoga.»

¹⁰Yésusu a á lɛncá nɔ́ɔnɔ go bó oyana kanɛ́ a amɔ́: «Go busío báakɛ́ no dugenyemú okɔ́dɔ mɔ́ɔnyɔ odɛ́má o? Bɔ́ɔbɔ a yɔgɛdɛnɔmɔ́ go busío bámɛ bó lɛ́ besé makɔ́nɔ́.

¹¹Mammana, no ŋga bɛ́ɛ́mbá na basógasoga bɛcamɛna biimée[151]. Kanɛ́ yɔmɔ́ɔ, cɛ ná bɛ́ɛmba gɔgɔ́ nɛnyɔ́ bɛcamɛna biimée.

¹²Guude gɔ́ɔgɔ a ŋgudenemú alabɛ́nda mɔ́ɔnyɔ, bó lɔ́mɔ́ go go gedie nnyɔ́dɔ yamɛ go gimie gá yɛ́[152].

¹³Ŋgaá nyó oyáná mammana caá: naá cí iŋkimée, hoóma hiimée háaha bá ŋgaá dúményée Gɛnɔ́gɔ́ gá Cɔ́mɔ gɛ́ɛgɛ, bá ŋgo oyáa tɔ́nɔ boóma bɔ́ɔbɔ okɔ́dɔ mɔ́ɔnyɔ a báá ná ŋaáa, batɔ bá mo béeniŋenye go bɔ́.»

¹⁴Gɔ́ɔ ummue naá Bɛɔdɔ́ɔ na bɛ́andɛ́ bá behúúní, ufíno yɛ́hɛ́ Yódasɛ Ɛsɛkalɛ́ɔtɛ, ɛ ɛ́damɔ́ gíde bagɔ́nɔ́ɔ bá bedúmbí bɛbáágá naá Asaŋa.

¹⁵Go bó oyana a amɔ́: «No páamɔ́ ŋkádɛ, caá nyó dúene Yésusu o?» Gɔ́ɔ bá banamɔ́ bɛkɔ́ŋɔ bá muinyí nitíno na bɛ́ɔ́dɔ́ bá báá mo íŋéné[153].

¹⁶A dúme hɔ́ɔlɔ́, Yódasɛ go ɛ́da go fúmbe gɛnɔ́gɔ́ gá gɛcamɛna go go bó dúene Yésusu.

¹⁷Budúgú bá busío bá gibíné gá bɛlɛ́dɛ bá kanɛ ondɔ yá go fudugenye, behúúní bá Yésusu go nco mo úhune bá amɔ́: «O lɛ́galɛgamɔ́ goŋaá dɛ ɛ́da go gedinye manyáanya má gibíné gá Pásɛ́ka ya Beyúdene áhanɛ́ɛ o?»

¹⁸Gɛ́hɛ́ go bó gundie a amɔ́: «Ɛ́dá nɔnɔ naá tɛ́sɔnɔ, naá dénée, no mo oyana no amɔ́: “Iloodio a amɔ́: gɛcamɛna gámɛ gɛ á háá; naá maamɔ́ɔ gɔ́ɔ kaá ná leebényée gibíné gá Pásɛ́ka ya Beyúdene olɔŋɔ na behúúní bámɛ”.»

¹⁹Behúúní go ŋa aŋa a mbaá bó lɔsɛ́nɔ́, bá báá gedíe manyáanya má gibíné gá Pásɛ́ka ya Beyúdene.

²⁰Hɛɔbɔ́bɔ́ɔ hɛ́ obana, Yésusu go lukumene naá tábɛ́la na Bɛɔdɔ́ɔ na bɛ́andɛ́ bá behúúní;

²¹gɛcamɛna gɛ́ɛgɛ bá mbaá lɔmɔ́ bá ná lɛ́ go nyáanya, gɛ́hɛ́ go oyɛda a amɔ́: «Ŋgaá nyó oyáná mammana caá: ummue naá bɛɛnyɔ́ɔ a gaá túé.»

²²Behúúní bɛ́hɛ́ go ɛ́da go bécíkilenye odɛ́má, bá mo úhene go ummue go ummue bá amɔ́: «Daadáa, a dɛ báá yɔmɔ́ɔ, ábɔ?»

²³Gɛ́hɛ́ go bó gundie a amɔ́: «Mɔ́ɔnyɔ a dúmenemú gɛlɛ́dɛ gɛ́hɛ́ olɔŋɔ namɛ naá usóyóo[154], mɔ́ɔ a gaá ná túé.

²⁴Moɔnɔ́ ba mɔtɔ a gaá gúé aŋa Ŋgɔ́ŋɛ́ sɛ́ oyamɔ́ go busío bɛ́hɛ́[155]. Kanɛ́ mahana makɔ́nɔ́ go mɔ́ɔnyɔ a gaá ná mo dúé. Gó mba lɛ́ ba go bɛ́ɛmba bese go mɔtɔ ba ndiemi goŋaá a dɛ bébíéné.»

²⁵Yódasɛ mɔ́ɔnyɔ a mbaá lɔmɔ́ a mo dúenene go mo úhune a amɔ́: «Iloodio, a dɛ báá yɔmɔ́ɔ, ábɔ?» Yésusu go mo gundie a amɔ́: «Go ó oyɛ́dá.»

²⁶Gɛcamɛna gɛ́ɛgɛ bá mbaá lɛ́ bá nyáanya, Yésusu go gɔ́lɔ gɛlɛ́dɛ, a báá béhiigí Asaŋa, gɛ́hɛ́ go gɛ́ gɛ́sagɛsa, go íŋene behúúní bɛ́hɛ́ a amɔ́: «Gɔ́lɔ́ nɔnɔ no nyáa, bɔ́ɔbɔ bó lɔ́mɔ́ nnyɔ́dɔ yamɛ.»

²⁷Naá nnyimé, gɛ́hɛ́ go gɔ́lɔ ɛnnyóɛ́ná na mɔgɛ́bɔ kɔ́ɔ, a báá béhiigí Asaŋa, go bó íŋene a amɔ́: «Nyóɛ́na nɔnɔ bɛɛnyɔ́ biimée,

²⁸mammana, bɔ́ɔbɔ bó lɔ́mɔ́ manɔ́ŋɔ́ mámɛ, manɔ́ŋɔ́ má Gɛlada bugúle na Asaŋa[156], máama má lɔ́mɔ́ udúgéelú go gɛca gá batɔ, go ihéehinye há bɛlɔgɔ.

²⁹Ŋgaá nyó oyáná mammana caá: cɛ ŋgá gɔnɔ nyóɛna mɔgɛ́bɔ máama gó lama gó ɛ́da héme naá buisí bɔ́ɔbɔ ka ŋgaá nyóɛ́ná má mafáa olɔŋɔ nɛnyɔ́ naá Bufuŋe bá Baaba.»

³⁰Naá nnyimé ya go ágana ɛsagɔ ya bileebie[157]; gáábɔ́ go fíde pɛ́ go go ɛ́da naá ogɔndɔ yá Boolifíe.

³¹Yésusu go oyana behúúní bɛ́hɛ́ a amɔ́: «Bɛɛnyɔ́ɔ biimée no gaá tɛ́ɛ́ná mokáa na budúgú bá ínoni. Mammana, bó lɛ́ naá Ŋgɔ́ŋɛ́ goŋaá: “Nnó óna umbeŋíbéŋí, bɛdómbáa bá buufe bɛ́ lɛ go sálamanda hoóma hiimée[158].”

³²Kanɛ́ aŋa nná fúfugemú, nnɛ́ ɛ́da nyó gɛ́gana naá Gelilée.»

³³Píele go gɔ́lɔ dogálɔ go mo oyana a amɔ́: «Akɛ́ biimée púmú bá go dɛ́ɛna mokáa, yɔmɔ́ɔ cɛ ŋgá go dɛ́ɛna.»

³⁴Gɔ́ɔ Yésusu a mo gundiemú a amɔ́: «Ŋgaá go oyáná mammana caá, na budúgú bɔ́ɔbɔ, otóotoɛ yá goŋaá gɛnɔ́mɛ gá ŋgɔɔ́ gɛ́ dádɛda, o gaá ŋá o báa go mbásáŋona ɛŋɛndɔ ɛdadɔ́.»

³⁵Píele a amɔ́ gɛ́hɛ́ aá: «Akɛ́ bó húme goŋaá kúe olɔŋɔ nahɔ, akɛ́ɛ, cɛ gaá go básáŋóná.» Nɔ́ɔ gɔ́ɔ behúúní báaba bóncodío biimée bá mbaá lɔmɔ́ bá gálagala caŋa mmue.

³⁶Yésusu na behúúní bɛ́hɛ́ go bola naá hoóma hémmue háaha bá dɔ́ŋɔnɔmɔ́ bá amɔ́ Gɛtɛsɛmanɛ́ɛ[159], gɛ́hɛ́ go bó oyana a amɔ́: «Síéne nɔnɔ háalá, yɔmɔ́ɔ mmanɛ go ɛ́da bósógolonyo héení.»

³⁷Gɔ́ɔ a gɔ́lɔmɔ́ Píele na bahaŋa bá Sebedée báandɛ́ olɔŋɔ nɛhɛ́, gɛ́hɛ́ go bayɛga go ɔ́bɔnɔ bofoá, a sómbasomba odɛ́má.

³⁸A báá lɛ gó bó oyana kanɛ́ a amɔ́: «Odɛ́má yámɛ yó lɛ́ dácɛ na mecíkílí má nigúe. Gɛ́gáa nɔnɔ háalá, dɛ no kúle.»

³⁹Gɛ́hɛ́ go báyɛkɛna naá busío, go bádába mɔŋgɔlɛ́, go ɛ́da go bósógolonyo a amɔ́: «Eé Baaba, boóma bá ndɔlɛ bó do báá naá maamɔ́ɔ, tóŋónɛ́náamɔ́ ɛnnyóɛ́ná há makánya hɛ́ɛhɛ. Akɛ́ nɔ́ɔnɔ moánɛ, bó do báŋaáa aŋa yɔmɔ́ɔ ndɛ́galɛgamɔ́, goana go ndɛ́ga yahɔ.»

⁴⁰Gɛ́hɛ́ go gɔnɔ nco gunde na nnyimé anáa behúúní bɛ́hɛ́ bá mbaá lɔmɔ́, go bó gíde go dɔnɔ́ɔ. A báá lɛ gó oyana Píele a amɔ́: «Bó dúfenye goŋaá no lɛ́ kanɛ go bɛa bogaaga bá go kúlide namɛ akɛ́ gigúlí gímmue!

⁴¹Kúlée nɔnɔ, no bósógolonyo goŋaá no do obɛ́ná naá magálá má ɛsɔgɛdɔ. Ɛdɛ́má yɛnyɔ́ ɛ lɛ́ dácɛ na bɛnɔ́gɔ́ bá mbééníŋínyí, kanɛ́ nnyɔ́dɔ ɛ lɛ́ na bonɔ́nɔ́.»

⁴²Yésusu go gɔnɔ yáŋɛmɛda, ɛ ɛ́da a bósógolonyo a amɔ́: «Eé Baaba, aáŋa o do báá ba go tóŋonɛna ɛnnyóɛ́ná hɛ́ɛhɛ kanɛ goŋaá nnyóɛna, ŋgáa ndɛ́ga yahɔ ɛ bóhóogio.»

⁴³Gɔ́ɔ a gɔnɔmɔ́ nco gundidene anáa behúúní bɛ́hɛ́ bá mbaá lɔmɔ́, gɛ́hɛ́ go gɔnɔ bó huenye go dɔnɔ́ɔ; goakɛ́ dɔnɔ́ɔ dó mba lɛ́ dácɛ naá bɔ́ oŋgíso.

⁴⁴Gɛ́hɛ́ go bó síe, a báá gɔnɔ́ yáŋɛmɛda, go ɛ́da go bósógolonyo go ɔŋɛndɔ yá gádadɔ́ɔ, a fitenye dogálɔ dúmmue eé dúmmue.

⁴⁵Aŋa a mbaá ncó gunde anáa behúúní bɛ́hɛ́, gɛ́hɛ́ go bó oyana a amɔ́: «Dúmbényée nɔnɔ go ɛ́dana go dɔnɔ́ɔ, no dúuge! Kanɛ́ gɛcamɛna gɛ́ á bolá gɛ́ɛgɛ bá gaá ná dúé Moɔnɔ́ ba mɔtɔ naá ɛmbɔ́gɔ ya bologílógí.

⁴⁶Fadɛ́gɛ́na nɔnɔ dɛ no dómba. Ɛ́ná nɔnɔ, mɔtɔ mɔ́ɔnyɔ a túenenemú a ná lɛ́ hɔ́ɔ.»

⁴⁷Yésusu a gá lɛ́ na dogálɔ naá nyuudé, Yódasɛ, ummue mɔ́ɔnyɔ naá Bɛɔdɔ́ɔ na bɛ́andɛ́ bá behúúní, go úle a báá bolá olɔŋɔ na gitúu gá batɔ báaba bá mbaá lɛ na kalafɔ gɔnɔ́ na ŋkɛ́báa. Bagɔ́nɔ́ɔ bá bedúmbí bɛbáágá naá Asaŋa, na bafɛanɔ́ɔ bá gɛdɔŋɔ, bɔ́ɔ bá mbaá bó dómá.

⁴⁸Yódasɛ, mɔ́ɔnyɔ a mbaá lɛ ba go mo dúe, a mbi íŋéné gitúu gá batɔ gɛ́ɛgɔ gilincie a amɔ́: «Mɔtɔ mɔ́ɔnyɔ kaá ná mo gɔ́lɔ́ kude, a lɔ́mɔ́ mɔ́ɔ, mo gumbénéemú nɔnɔ.»

⁴⁹Yódasɛ a bolana, gɛ́hɛ́ go báyɛkɛna Yésusu a amɔ́: «Iloodio, ŋgaá go bédíigie.» Gɔ́ɔ a mo gɔ́lɔmɔ́ kude.

⁵⁰Yésusu go mo oyana a amɔ́: «Ugúle bamɛ, ŋaáa buelí buimée bɔ́ɔbɔ o báá nú úlé go bɔ́[160].» Basɔ́gɔ́ɔ báaba bóncodío go úle, gáábɔ́ go yɔkɛnɔ Yésusu, bá báá mo gumbéné.

⁵¹Kanɛ́ ummue mɔ́ɔnyɔ naá gɛbágá gá Yésusu, go somona kalafɔ yɛhɛ́, go canɛda uyogóní ba Ufuŋe yá bedúmbí bɛbáágá naá Asaŋa, a báá mo sólóná udúu[161].

⁵²Gɔ́ɔ Yésusu a mo oyanamɔ́ a amɔ́: «Gundíe kalafɔ yahɔ naá cágá, goakɛ́ uŋkimée mɔ́ɔnyɔ a somonamɔ́ kalafɔ go go óna mɔtɔ, bá ŋga mo óná na kalafɔ.

⁵³O béeniŋenye go amɔ́, cɛ bósó ba go baŋɛdɛna Baaba, a tómɛna bitúu bitúu bá bɛɛ́ŋgɛlɛsɛ godɔ́ɔdɔ lí?

⁵⁴Nɛɛ́nɛ kanɛ́, Ŋgɔ́ŋɛ́ sɛ́ɛsɛ sɛ́ oyamɔ́ sɛ́ amɔ́ boóma bɔ́ɔbɔ bó háanana go báŋa nɔ́ɔnɔ sɛ́ gaá nɛ́ ɛ́nánɛ́náa?»

⁵⁵Yésusu go gálɛda gitúu gá batɔ a amɔ́: «No ŋgúlenine na kalafɔ na ŋkɛ́báa go go nco kumbene, no ɔ́ ɔ́bɔ́ no amɔ́ ndɛ́ uŋgúníní batɔ lí? Mmba lɛ́ nɛnyɔ́ miisí miimée, ndukíi naá Nnyaŋá ya Asaŋa kúunenye hɔ́ɔ, no lɛ́ kanɛ go kumbene.

⁵⁶Kanɛ́ bó á báŋaáa go go hóogio bɔ́ɔbɔ bó mbaá lɛ ɔ́ŋɔ́ɔlú naá kálata sá mbúsí sá Asaŋa.» Gɔ́ɔ behúúní bɛ́hɛ́ biimée bá mo dɛ́ɛnamɔ́ mokáa, bá báá díínée[162].

⁵⁷Gɔ́ɔ báaba bá mbaá gumbéné Yésusu, bɛ́ ɛ́damɔ́ nɛhɛ́ naá Keyífe, Ufuŋe yá bedúmbí bɛbáágá naá Asaŋa, anáa muloodio má gicele na bafɛanɔ́ɔ bá gɛdɔŋɔ bá mbaá lɔ́mɔ́ bábándɛ́gɛ́náalú.

⁵⁸Píele naá bɛ́hɛ́ boayá, a mba lɛ́ a síene a fídene Yésusu gɛyábá gó bɛ́ɛ́ ɛ́dá húme naá nnyaáŋgadɛ́ɛ ya ndáŋɛ ya Ufuŋe yá bedúmbí bɛbáágá naá Asaŋa. I í íŋéné naá nnyaáŋgadɛ́ɛ, gɛ́hɛ́ go lukumene émmuée na bebeŋíbéŋí go go ɛ́na aŋa bó gaá nɛ́ ɛ́dá súgidinye.

⁵⁹Kanɛ́, bagɔ́nɔ́ɔ bá bedúmbí bɛbáágá naá Asaŋa na batɔ biimée báaba naá Nɛgála Nɛgɔ́nɔ́ go ɛ́da go fúmbe gɛmbɛ́ná gá go ubie Yésusu naá gɛsɛnɛ goŋaá bá sómba bá amɔ́ a háanana na nigúe.

⁶⁰Kanɛ́ bá dɛ mbá bɛa, akɛ́ aŋa degédegé ya batɔ ɛ mbaá lɛ ɛ nco dɛ́lɛmana na bɛsɛnɛ bá kanɛ kɔ́ɔ[163]. Naá go ɛ́da súgidinye, batɔ báandɛ́ go nco sɛncɛmɛda,

⁶¹bá gálagala bá amɔ́: «Mɔtɔ mɔ́ɔnyɔ a mbo oyɛ́dá a amɔ́: “Ndɛ́ ba go gada Nnyaŋá ya Asaŋa yɛ́ɛyɛ, kunde nyɛ fóaga naá nnyimé ya medúgú mádadɔ́[164]”.»

⁶²Ufuŋe yá bedúmbí bɛbáágá naá Asaŋa go fadɛgɛna yó amɔ́ gɛ́hɛ́ aá: «O do gundényée boóma o? Batɔ báaba bó oyamɔ́ ŋkádɛ náana go busío báhɔ o?»

⁶³Yésusu go máma pɔ́ɔ́. Ufuŋe yá bedúmbí bɛbáágá naá Asaŋa yó amɔ́ gɛ́hɛ́ yó amɔ́: «Ŋgaá bálɛáa go ufíno yá Asaŋa ogɔ́sɔ, goŋaá o có oyana ɛ́na maamɔ́ɔ, o lɔ́mɔ́ Mesíi, Moɔnɔ́ ba Asaŋa.»

⁶⁴Yésusu go mo gundie a amɔ́: «Go ó oyɛ́dá. Kanɛ́ ŋgaá nyó oyáná daŋɛ́daŋɛ caá: gó bayɛga godɔ́ɔdɔ no ŋgɛ ɛ́ná Moɔnɔ́ ba mɔtɔ ndukíi naá boayá bá ombɔ́gɔ onɔ́mɛ bá Asaŋa Bogaaga Buimée, a gɔnɔ go ɛ́da go úlene naá bidu bá mmoɛná[165].»

⁶⁵Gɔ́ɔ Ufuŋe yá bedúmbí bɛbáágá naá Asaŋa yó lafamɔ́ bɛla bɛ́hɛ́ a amɔ́: «A á sɛgáa Asaŋa. No á mo ɔ́bɔ́ aŋa a sɛgamɔ́ Asaŋa. Dɛ gaá gɔnɔ́ fúmbe batɔ bóntió bá go mo sɔ́mɔnɔ lí!

⁶⁶Dɛ́nyɔ́ no amɔ́ nɛɛ́nɛ o?» Batɔ biimée go gundie bá amɔ́: A lɛ́ na gɛoba, a háanana na nigúe[166].

⁶⁷Gɔ́ɔ bɛ́ ɛ́damɔ́ go mo cábana bɛdɛ́ go busío, bá mo dóɛdana bibúme, bóncodío bá mo lába ɛmbɔ́lɛ́[167] bá amɔ́:

⁶⁸«Lɛncá, maamɔ́ɔ Mesíi, có oyánáamɔ́ mɔ́ɔnyɔ a báá ná go góbá.»

⁶⁹Píele a mba lɛ́ ndukíi go hanyɔ́ naá nnyaáŋgadɛ́ɛ; okɔ́dɔ ba masɔ́mɔ ba Ufuŋe yá bedúmbí bɛbáágá naá Asaŋa go mo báyɛkɛna a amɔ́ gɛ́hɛ́ a amɔ́: «Maamɔ́ɔ tɔ́nɔ o mba lɛ́ olɔŋɔ na Yésusu, mɔtɔ ba Bégelilée mɔ́ɔnyɔ!»

⁷⁰Píele go básáŋona naá oŋgíso yá mɔtɔ uŋkimée a amɔ́: «Cɛ íyi bɔ́ɔbɔ o lɛ́galɛgamɔ́ go oyɛda.»

⁷¹Gɔ́ɔ ɛ ɛ́damɔ́ ɛ ɛ́dana anáa gɛasɛ́, okɔ́dɔ ba masɔ́mɔ untió a á mo ɛ́ná, go oyana batɔ báaba bá mbaá lɛ́ hɔ́ɔ a amɔ́: «Mɔtɔ mɔ́ɔnyɔ a mba lɛ́ olɔŋɔ na Yésusu ba Násalɛdɛ.»

⁷²Kɔ́ɔ Píele a gɔnɔmɔ́ básáŋona a báá bálɛáa a amɔ́: «Cɛ íyíménée mɔtɔ mɔ́ɔnyɔ!»

⁷³Aŋa moɔnɔ́ ba gɛcamɛna a mbaá dómbá, batɔ báaba bá mbaá lɛ hɔ́ɔ go báyɛkɛna Píele bá amɔ́ gɛ́hɛ́ aá: «Mammana, o lɛ́ ummue mɔ́ɔnyɔ naá bɔ́ɔ: goakɛ́ gogálagala gáhɔ gó dúfenye nɔ́ɔnɔ.»

⁷⁴Gɔ́ɔ ɛ ɛ́damɔ́ go oya a amɔ́: «Aáŋa mbelebele, ŋgáa Asaŋa a céesenye; cɛ íyíménée mɔtɔ mɔ́ɔnyɔ.» Hɔ́ɔ na hɔ́ɔ, gɛnɔ́mɛ gá ŋgɔɔ́ go dómba go dádɛda.

⁷⁵Gɔ́ɔ Píele a dómbamɔ́ go béeniŋinye nogálɔ ná Yésusu nɔ́ɔnɔ a mbaá mo gálɛ́dá a amɔ́: «Otóotoɛ yá goŋaá gɛnɔ́mɛ gá ŋgɔɔ́ gɛ́ dádɛda, o gaá ŋá o báa go mbásáŋona ɛŋɛndɔ ɛ́dadɔ́[168].» Gɛ́hɛ́ go húme, a báá dúmbúgé na mbií gɛbɛ́ gɛbɛ́.