Read Nugunu Motíosi 27 Bible Online

Motíosi 27 - Nugunu bible

Motíosi 27

¹Na gɛyɛ́nɛ́ túlúbú, bagɔ́nɔ́ɔ bá bedúmbí bɛbáágá naá Asaŋa na bafɛanɔ́ɔ bá gɛdɔŋɔ go ŋa nɛganda, bá báá húmé ukelú go go óna Yésusu.

²Naá nnyimé ya go mo góda iŋgolí, gáábɔ́ go ɛ́da nɛhɛ́, bá báá mo íŋéné gá ŋgɔ́mɔnɔ Pɛlátɛ.

³Gɔ́ɔ Yódasɛ mɔ́ɔnyɔ a mbaá dúé Yésusu, ɛ ɛ́nana goŋaá bá á sómbá gɛsɛnɛ gɛ́hɛ́, go bɛa mecíkílí naá odɛ́má, go ɛ́da go go gundie bɛkɔ́ŋɔ bá muinyí nitíno na bɛ́ɔ́dɔ́ bɛ́ɛbɛ a mbaá bódá naá bagɔ́nɔ́ɔ bá bedúmbí bɛbáágá naá Asaŋa na bafɛanɔ́ɔ bá gɛdɔŋɔ.

⁴Ɛ ɛ́da a gálagala a amɔ́: «Ŋgaá lɔgɔ́ɔ aŋa túemú mɔ́ɔnyɔ a lɔ́mɔ́ kanɛ gɛoba.» Kanɛ́ bɔ́ɔ go mo gundie bá amɔ́: «Bó do có núúnée, bó lɔ́mɔ́ gɛsɛnɛ gáhɔ.»

⁵Yódasɛ go nɔɔ muinyí naá Nnyaŋá ya Asaŋa, go húme a bɛ́ɛ́ ɛ́dá bádóŋa.

⁶Bagɔ́nɔ́ɔ bá bedúmbí bɛbáágá naá Asaŋa go báda muinyí bá amɔ́: «Bó do háánánáa goŋaá dɛ mó ága naá bonɔ́mɛ bá Nnyaŋá ya Asaŋa, goakɛ́ bó lɛ́ muinyí má manɔ́ŋɔ́.»

⁷Naá nnyimé ya go yɔŋɔ, gáábɔ́ go húme ukelú goŋaá bɔ́ ɔ́ndɔ ntɛ́mɛ́ ya umií muséní, go go mienene biinyí hɔ́ɔ.

⁸Go busío moánɛ gɔ́ɔ bá mbaá dɔ́ŋɛ́nɔ́ ntɛ́mɛ́ ya ndiemi bá amɔ́, «ntɛ́mɛ́ ya manɔ́ŋɔ́» gó lama gó nco go éme ínoni.

⁹Nɔ́ɔ gɔ́ɔ nogálɔ ná mbúsí ya Asaŋa Selemíi nó mbɛɛ́ ɛ́nánɛ́náa. Nogálɔ moánɛ nó lɔ́mɔ́: «Bá mba gɔ́lɔ́ bɛkɔ́ŋɔ bá muinyí nitíno na bɛ́ɔ́dɔ́; bó lɔ́mɔ́ bɛɔŋóná bɛ́ɛbɛ baaná bá Ɛ́sɛlahɛ́ɛlɛ bá mbaá sómbá go busío bɛ́hɛ́.

¹⁰Bá báá mó íŋéné go go ɔ́ndɔ ntɛ́mɛ́ ya umií muséní, aŋa gɔ́ɔgɔ Daadáa a mbaá ŋgoyáná[169].»

¹¹Yésusu a á dɛ́lɛ́mɛ́ná naá busío ba Pɛlátɛ, Pɛlátɛ go mo úhune a amɔ́: «O lɛ́ ufuŋe yá Beyúdene lí?» Yésusu go mo gundie a amɔ́: «Go ó oyɛ́dá[170].»

¹²Kanɛ́ a dɛ mbá gundie boóma naá bɛsɔ́mɛnɔ bá bagɔ́nɔ́ɔ bá bedúmbí bɛbáágá naá Asaŋa na bafɛanɔ́ɔ bá gɛdɔŋɔ.

¹³Gɔ́ɔ Pɛlátɛ a mo úhunemú a amɔ́: «O do ɔ́bɔ́nɔ́ɔ bɛsɔ́mɛnɔ bɛ́ɛbɛ bá go sɔ́mɔnɔmɔ́ o?»

¹⁴Yésusu go mo obɛna gɛmámɔ́, gɛmámɔ́ gɛ́ɛgɛ gɛ́ mbaá ŋaáa goŋaá Pɛlátɛ a békúke.

¹⁵Nnyómá iŋkimée naá gɛcamɛna gá gibíné gá Pásɛ́ka ya Beyúdene, ŋgɔ́mɔnɔ a mba lɛ́ a húmenye mɔtɔ ummue naá ncíbo ya gɛaŋɔ́ mɔ́ɔnyɔ gɛdɔŋɔ gɛ́ úhenemú.

¹⁶Gɔ́ɔ upelípélí ummue ba tó, ufíno yɛ́hɛ́ Yésusu Balábasɛ[171], a mba lɛ́ naá ncíbo ya gɛaŋɔ́.

¹⁷Aŋa gitúu gá batɔ gɛ́ mbaá lɛ bábándɛ́gɛ́náalú, Pɛlátɛ go bú úhune a amɔ́: «No lɛ́galɛgamɔ́ goŋaá nnyó dɛ́ɛnɛna ánɛ́ɛ naá batɔ báandɛ́ báaba: Yésusu Balábasɛ, lí, Yésusu mɔ́ɔnyɔ bá dɔ́ŋɔnɔmɔ́ bá amɔ́ Mesíi o?»

¹⁸Mammana, a mba lɛ́ íyimene goŋaá bá mba dúé Yésusu go hɛagá.

¹⁹Gɛcamɛna gɛ́ɛgɛ a mbaá lɔmɔ́ naá nɛgála, okɔ́dɔ bɛhɛ́ go mo dómɛna cɔ́mɔ a amɔ́: «O do hóámá o do íŋéné naá gɛsɛnɛ gá mɔtɔ mɔ́ɔnyɔ. A lɛ́ usi ba mɔtɔ, goakɛ́ mbɔ́ ɔ́bɛgɔnɔ naá ndɛmá na budúgú bá ínoni yɛ́ɛyɛ go busío bɛ́hɛ́.»

²⁰Bagɔ́nɔ́ɔ bá bedúmbí bɛbáágá naá Asaŋa na bafɛanɔ́ɔ bá gɛdɔŋɔ go ɛ́da go gínigenye bitúu bá batɔ goŋaá bú úhune Pɛlátɛ a bó dɛ́ɛnɛna Balábasɛ, o óna Yésusu.

²¹Pɛlátɛ go gɔnɔ gɔ́lɔ dogálɔ, go bó úhune a amɔ́: «Ohanɛ́ naá batɔ bá báandɛ́ báaba no lɛ́galɛgamɔ́ goŋaá nnyó dɛ́ɛnɛna o?» Gáábɔ́ go gundie bá amɔ́: «Balábasɛ».

²²Pɛlátɛ a amɔ́ gáábɔ́ aá: «Kaá ná ŋaáa kanɛ́ nɛɛ́nɛ na Yésusu mɔ́ɔnyɔ bá dɔ́ŋɔnɔmɔ́ bá amɔ́ Mesíi o?» Biimée go gundie bá amɔ́: «Mo gilénéemú naá kolósi!»

²³Gɛ́hɛ́ go gɔnɔ bó úhune a amɔ́: «Gɛbɛ́ kanɛ́ gɛ́hanɛ́ a á ná ŋaáa o?» Kanɛ́ bɔ́ɔ bɛ́ ɛ́dana naá busío bá ánca na bogaaga bá amɔ́: «Mo gilénéemú naá kolósi!»

²⁴Aŋa Pɛlátɛ a mbɛɛ́ ɛ́ná goŋaá a dúmbenye gɛcamɛna gɛ́hɛ́ godugúnú, ologodo pɛnɛ́ɛ go go oba. Gɛ́hɛ́ go gɔ́lɔ miimpo, a báá básogá ɛmbɔ́gɔ naá busío bá gitúu gá batɔ[172], a gálagala a amɔ́: «Cɛ báá na boóma naá nigúe ná mɔtɔ mɔ́ɔnyɔ, bó lɔ́mɔ́ gɛsɛnɛ gɛ́nyɔ́.»

²⁵Gɛdɔŋɔ giimée go gundie gɛ́ amɔ́: «Ŋgáa manɔ́ŋɔ́ mɛ́hɛ́ má có obɛna bɛɛcɔ́ɔ na baaná bɛ́cɔ́ kɛ́.»

²⁶Gɔ́ɔ Pɛlátɛ a bó dɛ́ɛnɛnamɔ́ Balábasɛ. Naá boayá bá Yésusu, a báá manɛ́ fáa bogaaga bá go mo sóala bɛságɔ. Naá nnyimé, gɛ́hɛ́ go mo íŋene goŋaá bá mo gilene naá kolósi.

²⁷Bisimbi bá ŋgɔ́mɔnɔ go gɔ́lɔ Yésusu, go íŋene nɛhɛ́ naá ndáŋɛ. Gáábɔ́ go bándɛgɛna bisimbi bíntió, bɛ́ báá mo géŋgélídíe.

²⁸Bá báá lɛ gó mo úlie bɛla bɛ́hɛ́, bá báá mo ágá gɛmbɛ́lɛŋɛnyɛ gá kaba[173].

²⁹Bá báá nogá ɛdada há bufuŋe na cɛ́ndɛ́, bá báá mo sɔnɛ́gɔ́ go odóɛ. Bá báá mo ágá ombalɔ go ombɔ́gɔ onɔ́mɛ yɛ́hɛ́; bá mo gulenine enúu, bá mo hɔnɔ bɛ́ ɛ́da bá gálagala bá amɔ́: «Mbédíígí, ufuŋe yá Beyúdene.»

³⁰Bá mo cábana bɛdɛ́, bá gɔ́lɔnɔ ombalɔ, bá mo óndana go odóɛ na yɔ́.

³¹Aŋa bá mbaá dɔmbɔ́ go mo hɔnɔ, gáábɔ́ go mo úlie gɛmbɛ́lɛŋɛnyɛ gá kaba, bá báá gundíe go mo ága bɛla bɛ́hɛ́. Gáábɔ́ go ɛ́da nɛhɛ́ go go ɛ́da mo gilene naá kolósi.

³²Bá húmene naá tɛ́sɔnɔ, gáábɔ́ go lumene na mɔtɔ ummue ba tɛ́sɔnɔ ya Siléene, ufíno yɛ́hɛ́ Símono, bisimbi go mo gaŋa goŋaá a bádóɛgɛna kolósi ya Yésusu.

³³Bɛ́ ɛ́ ɛ́dá bola naá hoóma háaha bá dɔ́ŋɔnɔmɔ́ bá amɔ́ Gologóta, nɔ́ɔnɔ gó lɛ́ aá «hoóma háaha há fóananamɔ́ giŋóŋkólóŋó gá odóɛ».

³⁴Gáábɔ́ go mo fáa mɔgɛ́bɔ nebígínyéelú na ondɔ yá go noanana[174]; kanɛ́ aŋa a mbaá mɔ́ ɔ́bɛ́dɛ́nɔ́, a báá lɛ gó inye go bónyo.

³⁵Naá nnyimé ya go mo gilene naá kolósi, gáábɔ́ go abɛdana bɛla bɛ́hɛ́ go adɔ[175].

³⁶Bá báá lukúméné hɔ́ɔlɔ́ go go mo beŋebeŋe.

³⁷Bá mbɔ ɔ́ŋɔ́ naá gɛgɔ́gɔ́ mbɔ́gɔ́ ya gɛsɛnɛ gá Yésusu go gúe go gɛ́, bá báá ágá naá kolósi mmoɛná. Bá mbɔɔ́ ɔ́ŋɔ́ bá amɔ́: «Mɔ́ɔnyɔ a lɔ́mɔ́ Yésusu, ufuŋe yá Beyúdene.»

³⁸Bá báá gilénée tɔ́nɔ bahándá báandɛ́ gɛcamɛna gímmue eé gímmue na Yésusu, onyɔ moánɛ naá yɛhɛ́ kolósi, mɔ́ɔnyɔ naá boayá bá ombɔ́gɔ onɔ́mɛ, mɔ́ɔnyɔ naá boayá bá ombɔ́gɔ odádɛ́[176].

³⁹Batɔ báaba bá mbaá lɛ bá dómbana hɔ́ɔ, bá mba lɛ́ bá gide ɛdóɛ bɛ́ ɛ́da bá mo sɛga[177];

⁴⁰bá amɔ́ gɛ́hɛ́ aá: «Maamɔ́ɔ mɔ́ɔnyɔ o mbaá lɛ o lɛ́galɛga go gada Nnyaŋá ya Asaŋa go go fóaga intió go medúgú táŋɛ́ mádadɔ́[178], bósódíomú maamɔ́ɔ moatɛ́; aáŋa o lɛ́ Moɔnɔ́ ba Asaŋa, siisé naá kolósi aá!»

⁴¹Caŋa mmue na bagɔ́nɔ́ɔ bá bedúmbí bɛbáágá naá Asaŋa, muloodio má gicele na bafɛanɔ́ɔ bá gɛdɔŋɔ, bá mo hɔnɔ bá amɔ́:

⁴²«A á sódónyóo batɔ bóntió, a dɛ bósó ba go bósódio mɔ́ɔ moatɛ́! A lɛ́ ufuŋe yá batɔ bá Ɛ́sɛlahɛ́ɛlɛ! Ŋgáa a siise godɔ́ɔdɔ naá kolósi, manɛ́ dɛ gaá ná ágá odɛ́má yɛ́cɔ́ naá mɔ́ɔ.

⁴³A mba ágá odɛ́má yɛ́hɛ́ naá Asaŋa, ŋgáa Asaŋa a mo sódio godɔ́ɔdɔ aáŋa a mo maamana, a mbo oyɛ́dá a amɔ́: “Ndɛ́ Moɔnɔ́ ba Asaŋa[179].”»

⁴⁴Akɛ́ tɔ́nɔ bahándá báandɛ́ báaba bá mbaá bó giléné naá kolósi gɛcamɛna gímmue eé gímmue bá mo sɛga caŋa táŋɛ́ mmue.

⁴⁵Go tólóbóo, mbíno go dómba go oba naá gɛdɔŋɔ giimée, gó bɛ́ɛ́ ɛ́dá húme bigúlí bɛ́dadɔ́.

⁴⁶Go bigúlí bɛ́dadɔ́ bɛ́ɛbɔ, Yésusu go áncɛda ukelú naá mmoɛná a amɔ́: «Elíi, Elíi, lámá sabakatanɛ́ɛ?» Nɔ́ɔnɔ gó lɛ́ aá: «Asaŋa bamɛ, Asaŋa bamɛ, o túfiemú nnyimé náana goakɛ́[180] o?»

⁴⁷Batɔ bóntió naá báaba bá mbaá lɔmɔ́ hɔ́ɔ, bá mo ɔ́bɔnɔ a gálagala nɔ́ɔnɔ, go oyɛda bá amɔ́: «Mɔ́ɔ múnyúu a dɔ́ŋɔnɔmɔ́ Elíi.»

⁴⁸Mɔtɔ ummue mɔ́ɔnyɔ naá olɔŋɔ yábɔ́ go dómba go ɛ́da a díine, a báá dúmé giyugú naá gɛtóánɔ́ɔ gá mɔgɛ́bɔ, a báá gɛ́ cékígínyée naá ombalɔ, gɛ́hɛ́ go mo dóŋio goŋaá a libige ukelú[181].

⁴⁹Báaba bóntió bá amɔ́: «Gɛ́gɛ́dɛ́na, dɛ ɛ́na aáŋa Elíi a gaá ncó mo sódio.»

⁵⁰Gɔ́ɔ kanɛ́ Yésusu a gɔnɔmɔ́ go áncɛda ukelú naá mmoɛná, gɛ́hɛ́ go obɛnɛna.

⁵¹Naá gɛcamɛna moánɛ, sanda ya goodo yɛ́ɛyɛ ɛ mbaá lɔmɔ́ ɛ sómba Nnyaŋá ya Asaŋa go cómba ɛ́handɛ́[182], go salɛga go biseli bɛ́andɛ́, gó bayɛga gɛmmoɛnáa gó nco héme gɛmbádáa. Cí ɛ báá yiŋkímídé, bɛdánɛ́dánɛ́ bɛ́ báá bumébúmée,

⁵²bɛbɛ́lá bɛ́ báá bébuunée, gɛca gá bɛlɔ́ŋɔ́ bɛ́ɛbɛ bɛ́ mbaá lɔmɔ́ bɛ́ olimonyo Asaŋa bɛ́ báá fúfúgénée.

⁵³Aŋa bɛ́ mbaá húménée naá bɛbɛ́lá, tɔ́nɔ naá nnyimé ya kúme gɛbɛ́lá ya Yésusu, gáábɔ́ go íŋene naá gimmúmpúu gá tɛ́sɔnɔ ya Yolósalɛmɛ anáa batɔ degédegé bá mbaá bó lɛ́máa.

⁵⁴Aŋa bá mbɛɛ́ ɛ́ná cí ɛ báá yiŋkímídé na moóma mɔ́ɔmɔ mó mbaá bádómbánáa, ogɔ́nɔ́ɔ ba bisimbi ntɛdɛ na bisimbi bɛ́ɛbɛ bɛ́ mbaá lɔmɔ́ nɛhɛ́, bɛ́ beŋebeŋe Yésusu go bɛa bofoá makɔ́nɔ́, bó oya bá amɔ́: «Mammana, mɔtɔ mɔ́ɔnyɔ a mba lɛ́ Moɔnɔ́ ba Asaŋa.»

⁵⁵Bakɔ́dɔ degédegé bá mba lɛ́ hɔ́ɔ bá núune naá gɛyábá; bá mbaá lɔmɔ́ bakɔ́dɔ báaba bá mbaá lɛ bá bienene Yésusu gó ɛ́da bayɛga naá Gelilée[183], bá mo óhigonyo go masɔ́mɔ.

⁵⁶Naá olɔŋɔ yábɔ́, Malɛ́a ba tɛ́sɔnɔ ya Magadaláa, Malɛ́a mɔ́ɔnyɔ nnyeedíi ba Sáakɛ na Yósɛbɛ, gɔnɔ́ na nnyeedíi ba bahaŋa bá Sebedée.

⁵⁷Aŋa hɛɔbɔ́bɔ́ɔ hɛ́ mboó obá, gɛnɔ́mɛ gímmue gá tɛ́sɔnɔ ya Alɛmatɛ́ɛ, ufíno yɛ́hɛ́ Yósɛbɛ, go úle a báá bolá. A mba lɛ́ tɔ́nɔ ɛ́yáalú uhúúní ba Yésusu.

⁵⁸Yósɛbɛ go ɛ́da naá Pɛlátɛ go go mo úhune gigúe gá Yésusu. Pɛlátɛ go fáa bogaaga bá báá mo íŋéné.

⁵⁹Yósɛbɛ go gɔ́lɔ gigúe a báá gɛ́ máŋánáa naá nnɔ́mbɔ́ ya gɛla,

⁶⁰gɛ́hɛ́ go ɛ́da gɛ́ bídiginye naá gɛbɛ́lá gɛfáa gɛ́ɛgɛ bá mbaá ŋá bá báá go dímene Yósɛbɛ naá gɛdánɛ́dánɛ́; gɔ́ɔ a tíŋgilidiemú gɛantá gá ɛdánɛ́ go go buige miíŋene má gɛbɛ́lá, gɛ́hɛ́ go gunde.

⁶¹Malɛ́a ba Magadaláa na Malɛ́a mɔ́ɔnyɔ uncodío, bá mba lɛ́ hɔ́ɔ ndukíi cɛŋɛ na gɛbɛ́lá.

⁶²Naá gobélie, buisí bá gogedegedie sábadɛ, bagɔ́nɔ́ɔ bá bedúmbí bɛbáágá naá Asaŋa na Befelisiéŋe, go ɛ́da bɔ́ɔ biimée naá Pɛlátɛ,

⁶³bá amɔ́ gɛ́hɛ́ aá: «Ogɔ́nɔ́ɔ, dɛ dɛ bófoolónyóo goŋaá umbelíbélí mɔ́ɔnyɔ a gá lɛ́ ogɔ́sɔ, a mbo oyɛ́dá a amɔ́: “Naá nnyimé ya medúgú mádadɔ́, nná fúfuge[184]”.

⁶⁴Kanɛ́ íŋéne bogaaga goŋaá bá beŋebeŋe gɛbɛ́lá, gó ɛ́da go éme naá medúgú mádadɔ́; go goŋaá behúúní bɛ́hɛ́ bá dɛ ncó go íbe gigúe gɛ́hɛ́, bá lɛ go ɛ́da go oyanɛna gɛdɔŋɔ bá amɔ́, a á fúfúgénée. Aáŋa caá nɔ́ɔnɔ, yɛ́ɛyɔ ŋkanɔ́ yɛ́ɛyɔ ɛ gaá dómbá ya busío.»

⁶⁵Pɛlátɛ a amɔ́ gáábɔ́ aá: «Bisimbi bɛ́bɔ́ɔ, ɛ́dá no beŋebeŋe gɛbɛ́lá aŋa no lɛ́galɛgamɔ́.»

⁶⁶Bá báá lɛ gó ɛ́da kanɛ́ na bisimbi bá gibeŋe; bá báá fɛdɛ́ ɛdánɛ́ ná go buige miíŋene má gɛbɛ́lá, bá báá dílímínyée bisimbi bá gibeŋe.