Read Nugunu Motíosi 28 Bible Online

Motíosi 28 - Nugunu bible

Motíosi 28

¹Aŋa buisí bá sábadɛ bó mbaá maná, na gɛyɛ́nɛ́ gá buisí bá busío bá gɛanyɛ, Malɛ́a ba Magadaláa na Malɛ́a mɔ́ɔnyɔ uncodío, bú úlemú go go nco go ɛ́na gɛbɛ́lá.

²Hɔ́ɔ na hɔ́ɔ, cí go dómba go yiŋkimide na bogaaga; ɛ́ŋgɛlɛsɛ ba Daadáa go ɛ́da go úle naá mmoɛná, a báá tíŋgílídíe gɛantá gá ɛdánɛ́, a báá lukúméné kɔ́ɔ.

³A mba lɛ́ begibegi, gɛla gɛ́hɛ́ gimmúmpúu makɔ́nɔ́ aŋa ndɛbɛ.

⁴Bebeŋíbéŋí gɛbɛ́lá go bɛa bofoá, bá bɛ́ɛ́ ɛ́dá go dagadana, bá báá gundé aŋa begúe.

⁵Kanɛ́ ɛ́ŋgɛlɛsɛ go gɔ́lɔ dogálɔ, go oyana bakɔ́dɔ a amɔ́: «Bɛɛnyɔ́ɔ, no do bɛáa bofoá, ŋgíyimene caá no fúmbemú Yésusu mɔ́ɔnyɔ bá mbaá giléné naá kolósi.

⁶A dɛ báá háalá. Mammana, a á fúfúgé aŋa a mboó oyɛ́dá. Úlé nɔnɔ, no nco go ɛ́na hoóma háaha bá mbaá mo bídígínyée.

⁷Ɛ́dá nɔnɔ fɛaŋɔ no oyana behúúní bɛ́hɛ́ no amɔ́: “A á fúfúgé naá kadɛ́gadɛ́ɛ ya begúe. Moatɛ́ a á dóánánáa go go ɛ́da nyó gɛ́gana naá Gelilée; hɔ́ɔ háa no ná mo ɛ́namɔ́.” Boóma bɔ́ɔbɔ mbáá ná lɔmɔ́ goŋaá nnyó oyana bɔ́bɔ́ɔ.»

⁸Bakɔ́dɔ go dómba go úlukie naá gɛbɛ́lá bɔ́ɔ na bofoá, bɔ́ɔ na bɛyaŋa dácɛ. Gáábɔ́ go ɛ́da go oyana behúúní bɛ́hɛ́ cɔ́mɔ yɛ́ɛyɔ.

⁹Hɔ́ɔ na hɔ́ɔ, Yésusu go úle giluméní nabɔ́, go bó oyana a amɔ́: «Ŋgaá nyó bédíígíe.» Bakɔ́dɔ go mo báyɛkɛna, bá báá gulé enúu go go gumbene bɛgɔ́ndɔ́ bɛ́hɛ́, gáábɔ́ go ɛ́da go mo búlugenye.

¹⁰Gɔ́ɔ Yésusu a bó oyanamɔ́ a amɔ́: «No do bɛáa bofoá; ɛ́dá nɔnɔ no oyana bolimóní bámɛ goŋaá, ŋgáa bɛ́ ɛ́da naá Gelilée, hɔ́ɔ háa bá gaá ná ŋgɛ́ná.»

¹¹Bá gá lɛ́ go pɛ́, nɛnamá ná bebeŋíbéŋí gɛbɛ́lá go ɛ́da naá tɛ́sɔnɔ go go oyana bagɔ́nɔ́ɔ bá bedúmbí bɛbáágá naá Asaŋa, buimée bɔ́ɔbɔ bó mbaá bádómbánáa.

¹²Bɔ́ɔbɔ moánɛ, go lumene na bafɛanɔ́ɔ bá gɛdɔŋɔ go nɛganda, gáábɔ́ go íŋene bebeŋíbéŋí gɛbɛ́lá gɛca gá muinyí.

¹³Bá amɔ́ gáábɔ́ aá: «Oyɛ́da nɔnɔ no amɔ́: “Behúúní bɛ́hɛ́ bá báá nco mo íbe na budúgú, gɛcamɛna gɛ́ɛgɛ dɛ báá lɔmɔ́ go dɔnɔ́ɔ[185].”

¹⁴Gó gunde, gɛsɛnɛ moánɛ gɛ́ amɔ́ gɛ́ oba naá edúu yá ŋgɔ́mɔnɔ, bɛɛcɔ́ɔ báa dɛ gaá ná ŋaáa goŋaá a dɛ́ɛna gɛsɛnɛ, no do luméné na gɛdɔmbɔ.»

¹⁵Gáábɔ́ go gɔ́lɔ muinyí, bá báá ŋaáa aŋa bá mbaá bó lɔsɛ́nɔ́. Kɔ́ɔ ŋgoyáamɔ́ yɛ́ɛyɛ ɛ mbaá saáa naá Beyúdene, gó nco go éme ínoni.

¹⁶Behúúní bɔ́ɔ́dɔ́ na ummue go ɛ́da naá Gelilée naá ogɔndɔ yɔ́ɔyɔ Yésusu a mbaá bó oyáná.

¹⁷Aŋa bá mbaá mo ɛ́ná, bá báá lɛ gó ɛ́da go mo búlugenye; kanɛ́ bóncodío bá mba lɛ́ na cuŋí.

¹⁸Yésusu go bó báyɛkɛna, go bó oyana a amɔ́: «Asaŋa a lɛ́ páalú nɛgaŋa niimée naá mmoɛná na naá cí.

¹⁹Ɛ́dá nɔnɔ kanɛ́, no íyenye batɔ behúúní bámɛ naá bɛdɔŋɔ biimée bɛ́ɛbɛ naá cí[186], no bó yumeninye go ufíno yá Isée, na yá Moɔnɔ́, na yá Gimmúmpúu gá Giliíli.

²⁰No bó húunenye goŋaá bá beŋe buimée bɔ́ɔbɔ mmbaá nyó lɔsɛ́nɔ́. Gɔnɔ́ íyíme nɔnɔ goŋaá, ndɛ́ nɛnyɔ́ miisí miimée gó ɛ́da húme aŋa cí ɛ ŋgaá maná.»