Read Nugunu Motíosi 3 Bible Online

Motíosi 3 - Nugunu bible

Motíosi 3

¹Naá gɛcamɛna moánɛ gíiní, gɔ́ɔ Sáŋa Begiyuminye a buyugugemú naá giolóo gá bodɛ́agadɛ́ gá Yudée, go ɛ́da go dóogonyo a amɔ́:

²«Núgíe nɔnɔ gɛɔyɔ gɛ́nyɔ́[7], Bufuŋe bá mmoɛná bó ná lɛ́ mekúígíi!»

³Gá Sáŋa mɔ́ɔnyɔ gɔ́ɔ mbúsí ya Asaŋa Iseyíi ɛ mboó oyɛ́dá yɛ amɔ́: «Ukelú yá mɔtɔ yó dónogogana naá giolóo gá bodɛ́agadɛ́ yó amɔ́: “Gedégédíe nɔnɔ pɛ́ ya Daadáa, bónónáa nɔnɔ ŋŋɛndɛ́ná sɛ́hɛ́[8]”.»

⁴Gɛla gɛ́ɛgɛ Sáŋa a mbaá lɛ a bɛga gɛ́ mba lɛ́ gedíelú na binúmpe bá nnyama yɛ́ɛyɛ bá dɔ́ŋɔnɔmɔ́ bá amɔ́ samóo, kandáa ya gɛɔbɔ básómbɛ́náalú go nosɛ́ŋɛ́. A mba lɛ́ a bédúge na bɛatatalá na megúdé má póɔ́ŋɛ́.

⁵Kɔ́ɔ batɔ bá Yolósalɛmɛ, na biimée báaba naá Yudée, gigísi gá cí giimée gá Yɔlɔdɛ́ŋɛ, bɛ́ ɛ́damɔ́ go úlene naá Sáŋa;

⁶bó oya bɛoba bábɔ́ daŋɛ́daŋɛ, a bó yumeninye naá osaá yá Yɔlɔdɛ́ŋɛ.

⁷Aŋa Sáŋa a mbɛɛ́ ɛ́ná gitúu gá Befelisiéŋe na Beseduseyéŋe bá mo úlenine goŋaá a bó yuminye, gɛ́hɛ́ gó bó oyana a amɔ́: «Bɛɛnyɔ́ɔ pɛ́nɛ sɛ́ɛsɛ, ánɛ́ɛ a ná nyó fáá nciŋí ya go pamba mpímí ya Asaŋa yɛ́ɛyɛ yɛ úlenemú o?

⁸Dúfényée kanɛ́ nɔnɔ na meŋiigíe má bese no bóloodio goŋaá no á núgíe gɛɔyɔ gɛ́nyɔ́.

⁹Kanɛ́, no do ɛ́dá go bágálɛnagalɛna naá odɛ́má no amɔ́: “Ábalaháma a lɛ́ isée kɔ́nɔ́ɔ bɛcɔ́[9].” Ɛɛ́ɛŋ, ŋgaá nyó oyáná caá, Asaŋa a lɛ́ ba go gɔ́lɔ adánɛ́ yáaya, yá ɛ́ya baaná bá Ábalaháma.

¹⁰Moánɛ, iléŋú hɛ́ ná lɛ́ mekúígíi go go sómba ɛŋaŋá ya mɛɛ́tɛ: boɛ́tɛ buimée bɔ́ɔbɔ bó lɔ́mɔ́ bó do úmée bɛnɔ́gɔ́ bá bɛsamɔ́, bá bó sómba bá bó nɔɔ naá íyuke.

¹¹«Yɔmɔ́ɔ nnyó yumeninye naá miimpo go go loodio goŋaá no á núgíe gɛɔyɔ gɛ́nyɔ́; kanɛ́ mɔ́ɔnyɔ u úlenemú naá nnyimé yamɛ a lɛ́ gɛgaaga a tómbana, cɛ háánánáa naá odɛ́nɛ́ yá go mo úlie nnaadɛna sɛ́hɛ́. Mɔ́ɔ, a ná nyó yumeninyemú na Gimmúmpúu gá Giliíli na íyuke.

¹²A lɛ́ na gifúne[10] ŋkeŋé go ombɔ́gɔ go go úlenye bifúnú. A bɛ́dɛgana camɔ́ naá gɛɔ́lɔ, a lókononyo bifúnú naá íyuke há kanɛ go fúenene.»

¹³Gɔ́ɔ Yésusu a buyugugemú ɛ ɛ́da go úlene naá Gelilée, go úle naá osaá yá Yɔlɔdɛ́ŋɛ, goŋaá Sáŋa a mo yuminye.

¹⁴Sáŋa a mba lɛ́ a maamana go inye go mo yuminye, go gálɛda amɔ́: «Yɔmɔ́ɔ caá yɔmɔ́ɔ mɔ́ɔ ndɔ́mɔ́ ba go úle naá maamɔ́ɔ goŋaá o nyuminye, maamɔ́ɔ o lɔ go úle naá yɔmɔ́ɔ!»

¹⁵Kanɛ́ Yésusu go mo gundie a amɔ́: «Olímínyóo goŋaá bó manɛ báŋa nɔ́ɔ godɔ́ɔdɔ. Náana gɔ́ɔ gó háananamɔ́ goŋaá dɛ loodio botɛ́nɛ́ɛ buimée.» Kɔ́ɔ Sáŋa o oliminyomú, gɛ́hɛ́ go yumiye Yésusu.

¹⁶Gɔgɔ́ aŋa Yésusu a mbaá béyumínyée, gɛ́hɛ́ go húme naá miimpo. Mmoɛná go dómba go bébuune, gɛ́hɛ́ go ɛ́na Giliíli ba Asaŋa a mo siisenine aŋa mmɛŋá.

¹⁷Ukelú go ɛ́da go úle naá mmoɛná yó oya yó amɔ́: «Moɔnɔ́ bamɛ ba odɛ́má mɔ́nyɔ́ɔ, bɛyaŋa bámɛ biimée bɛ́ lɔ́mɔ́ naá mɔ́ɔ[11].»